पुणे : पुणे शहर युवक काँग्रेस तर्फे अखिल भारतीय काँग्रेसच्या अध्यक्षा सोनिया गांधी यांच्या वाढदिवसानिमित्ताने जाहिरातीचा खर्च टाळून गरजू लोकांना ब्लँकेट वाटप करण्यात आले.डेक्कन येथील भिडे पुल, पुणे स्टेशन आणि ससून भागातील रस्त्यावर राहणार्‍या गरजू लोकांना सदर ब्लँकेट वाटप करण्यात आले. कार्यक्रमाचे आयोजन पुणे शहर युवक काँग्रेसचे उपाध्यक्ष सौरभ बाळासाहेब अमराळे यांनी केले होते. कार्यक्रमास युवक काँग्रेसचे अध्यक्ष विशाल मलके, विवेक कडू, प्रताप शिळीमकर, कुणाल काळे, विवीयन केदारी, धनराज माने, अक्षय नवगिरे आदी उपस्थित होते.

पुणे प्रादेशिक संचालक श्री. अंकुश नाळे यांचे निर्देश

पुणे : वितरण व वाणिज्यिक हानी कमी करण्यासोबतच सर्व वीजग्राहकांना योग्य दाबाच्या वीजपुरवठ्यासाठी ग्रामीण व शहरी भागातील वीजचोरीविरुद्धची मोहीम आणखी तीव्र करण्यात यावी तसेच रब्बी हंगामामध्ये कृषिपंपांना योग्य दाबाने सुरळीत वीजपुरवठ्यासाठी तातडीने आवश्यक उपाययोजना करावी असे निर्देश महावितरणचे पुणे प्रादेशिक संचालक (प्र.) श्री. अंकुश नाळे यांनी दिले.

पुणे, कोल्हापूर, सांगली, सातारा व सोलापूर जिल्ह्यातील विविध कामांचा आढावा प्रादेशिक संचालक (प्र.) श्री. नाळे यांनी मंगळवारी (दि. 8) व्हीडीओ कॉन्फरसिंगद्वारे घेतला. यावेळी ते बोलत होते. मुख्य अभियंता सर्वश्री सचिन तालेवार (पुणे), सुनील पावडे (बारामती) व प्रभाकर निर्मळे (कोल्हापूर) यांची प्रमुख उपस्थिती होती.  

वीजबिलांचा भरणा होत नसल्याने महावितरण सध्या आर्थिक संकटात आहे. त्यामुळे थेट वीजग्राहकांशी संवाद साधून त्यांना वीजबिल भरण्याची विनंती करण्यात यावी. कोरोनाच्या लॉकडाऊन कालावधीतील वीजबिलांबाबत शंका किंवा तक्रारी असल्यास त्याचे देखील तात्काळ निवारण करण्यात यावे असे प्रादेशिक संचालक (प्र.) श्री. नाळे यांनी सांगितले. यासोबतच प्रत्येक विभागनिहाय वितरण व वाणिज्यिक हानी आणखी कमी करण्यासाठी वीजचोरीविरुद्ध मोहीम तीव्र करण्याचे निर्देश त्यांनी दिले. ज्या वीजवाहिन्यांवर हानीचे प्रमाणे अधिक दिसून येत आहे त्या वाहिन्यांवरील सर्व वीजजोडण्यांची तात्काळ तपासणी सुरु करण्यात यावी. अनधिकृत वीजजोडण्या काढून टाकण्यासोबतच संबंधीतांवर कायदेशीर कारवाई करण्यात यावी. आवश्यक तेथे महावितरणच्या भरारी पथकांसह पोलिस विभागाचे देखील सहकार्य घ्यावे, असेही त्यांनी सांगितले.

पश्चिम महाराष्ट्रात शेतीसाठी रब्बी हंगाम महत्वाचा असल्याने कृषिपंपांना योग्य दाबाने सुरळीत वीजपुरवठा करावा. त्यासाठी येत्या 31 डिसेंबरपर्यंत कृषिपंपांसह संबंधीत रोहित्रांचे सर्वेक्षण करून अनधिकृत वीजजोडण्या काढून टाकण्याची मोहीम पूर्ण करावी. या दरम्यान रोहित्रांची क्षमता वाढविणे आवश्यक असल्यास त्याचे प्रस्ताव देखील तातडीने सादर करावे. सुरळीत वीजपुरवठा व रोहित्रावरील वीजभार कमी करण्यासाठी उपयुक्त असलेले कॅपॅसिटर योग्य क्षमतेनुसार कृषिपंपांना बसविण्याचे आवाहन यावेळी प्रादेशिक संचालक (प्र.) श्री. नाळे यांनी केले. अभियंता व कर्मचाऱ्यांनी कृषिपंपांना कॅपॅसिटर बसविण्याबाबत शेतकऱ्यांना माहीती द्यावी, असे निर्देश त्यांनी दिले. कृषिपंपांचे रोहित्र नादुरुस्त झाल्यास दुरुस्तीची किंवा बदलण्याची कार्यवाही तात्काळ करण्यात यावी. पुरेशा प्रमाणात रोहित्र व ऑईल उपलब्ध असून मागणीप्रमाणे पुरविण्यात येत आहे. त्यामुळे नादुरुस्त रोहित्र किंवा इतर तांत्रिक कारणांनी वीजपुरवठा सातत्याने खंडित होत असल्यास संबंधीत जबाबदार अधिकाऱ्यांविरुद्ध कारवाई करण्यात येणार असल्याचे श्री. नाळे यांनी सांगितले.

या आढावा बैठकीमध्ये महाव्यवस्थापक (वित्त व लेखा) श्री. अलोक गांगुर्डे, प्रादेशिक विभागातील सर्व अधीक्षक अभियंते व कार्यकारी अभियंते तसेच वरिष्ठ अधिकारी यांची उपस्थिती होती.

पुणे दि. 9: पुणे व परिसरातील सार्वजनिक वाहतूक व्यवस्थेला चालना देण्यासोबतच वाहतुक विषयक विविध समस्या सोडविण्यासाठी पुणे एकीकृत महानगर परिवहन प्राधिकरण (PUMTA) ची स्थापना करण्यात आली आहे. वाहतूक समस्येच्या आव्हानांचा सामना करण्यासाठी प्राधिकरणातील सर्व विभागांनी समन्वयाने काम करण्याच्या सूचना विभागीय आयुक्त सौरभ राव यांनी आज केल्या.
विधानभवन कार्यालयाच्या सभागृहात पुणे एकीकृत महानगर परिवहन प्राधिकरण (PUMTA)ची चतुर्थ बैठक प्राधिकरणाचे अध्यक्ष तथा विभागीय आयुक्त सौरभ राव यांच्या अध्यक्षतेखाली आज पार पडली. त्यावेळी ते बोलत होते. यावेळी पुणे महानगरपालिकेचे आयुक्त विक्रम कुमार, पिंपरी-चिंचवड महानगरपालिकेचे आयुक्त श्रावण हार्डीकर, पुणे महानगर परिवहन महामंडळाचे व्यवस्थापकीय संचालक डॉ राजेंद्र जगताप, पुणे स्मार्ट सिटी डेव्हलपमेंट कार्पोरेशनचे मुख्य कार्यकारी अधिकारी डॉ. संजय कोलते, महाराष्ट्र मेट्रो रेलचे कार्यकारी संचालक रामनाथ सुब्रमण्यम, सार्वजनिक बांधकाम विभागाचे मुख्य अभियंता एस. एस. साळुंखे, पुणे महानगर प्रदेश विकास प्राधिकरणाचे मुख्य कार्यकारी अधिकारी सुहास दिवसे यांच्यासह सर्व संबंधित विभागाचे वरिष्ठ अधिकारी व कर्मचारी उपस्थित होते.
विभागीय आयुक्त सौरभ राव म्हणाले, पुणे महानगर क्षेत्रातील वाहतूक विषयक आव्हानांचा सामना करण्यासाठी तसेच सार्वजनिक वाहतूक व्यवस्थेला चालना देण्यासाठी पुणे एकीकृत महानगर परिवहन प्राधिकरणाची स्थापना करण्यात आली आहे. या प्राधिकरणात पुणे महानगरपालिका आणि पिंपरी-चिंचवड महानगरपालिका यांची भूमीका अत्यंत महत्वाची आहे. पुणे शहर आणि परिसरासाठी समस्या दिवसेंदिवस गंभीर बनत आहे. ही समस्या सोडविण्यासाठी सार्वजनिक वाहतूक व्यवस्था सक्षम करून दीर्घकालीन उपाययोजना आखून त्यावर कृती करण्याची गरज आहे. या प्राधिकरणाच्या माध्यमातून सर्व विभागांनी समन्वयाने काम करून निर्णय घेण्याची आवश्यकता आहे. प्राधिकरणाचे काम करताना यामध्ये सर्वसमावेशकता येण्यासाठी सामाजिक काम करणाऱ्या संस्थांबरोबरच वाहतूक क्षेत्रातील तज्ज्ञ व्यक्तींच्या ज्ञानाचा आणि अनुभवाचा फायदा करून घेण्यासाठी प्रयत्नशील राहणार असल्याचेही विभागीय आयुक्त राव यांनी सांगितले.
या बैठकीत नवीन मेट्रो मार्ग महामेट्रो कॅरिडोर 1 मधील निगडी-कात्रज, चांदणी चौक-वाघोली, हिंजेवाडी-शिवाजीनगर, शिवाजीनगर-हडपसर, हिंजेवाडी-चाकण तसेच महामेट्रो कॅरिडोर 2 मधील वारजे-स्वारगेट, वाघोली-हिंजेवाडी, चांदणी चौक-हिंजेवाडी प्रस्तावित मार्गाबाबत आढावा घेण्यात आला. याबाबत पुणे महानगर प्रदेश विकास प्राधिकरणाने सविस्तर अहवाल सादर करणे. तसेच सावित्रीबाई फुले पुणे विद्यापिठ चौकातील नवीन एकात्मिक दुमजली उड्डाणपुल बांधणी आराखडे अंतिम करणे. याअनुषंगाने उड्डाणपुल संरचना अतिंम करुन लवकरात लवकर पुणे महानगरपालिका आणि शासनास सादर करणे, सर्व कामे एकाचवेळी पुर्ण करणे, पुणे महानगरपालिकेने यासंबंधी स्वतंत्र जबाबदारी घेण्याबाबत निर्णय घेणे. पुणे महानगर परिवहन महामंडळ लि. कंपनीस पुणे महानगर प्रदेश विकास प्राधिकरण हद्दीपर्यंत वाहतूक सेवा विस्तारित करण्यास व त्याअनुषंगिक पायाभूत सुविधा विकसित करण्यासाठी संबंधित यंत्रणेस समन्वय साधण्याबाबत चर्चा झाली.
या बैठकीला पुणे एकीकृत महानगर परिवहन प्राधिकरणाच्या संबंधित सर्व विभागांचे अधिकारी उपस्थित होते.

पुणे विभागातील  5 लाख 15 हजार 784 कोरोना बाधित रुग्ण बरे होऊन घरी
 विभागात कोरोना बाधित 5 लाख 44  हजार 260 रुग्ण  -विभागीय आयुक्त सौरभ राव
 पुणे,दि.09 :- पुणे विभागातील  5  लाख 15  हजार 784 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5  लाख 44  हजार 260 झाली आहे. तर ॲक्टीव रुग्ण संख्या 13  हजार  265 इतकी आहे. कोरोनाबाधीत एकुण 15 हजार 211  रुग्णांचा मृत्यू झाला असून मृत्यूचे प्रमाण 2.79  टक्के आहे. पुणे विभागामध्ये बऱ्या होणा-या रुग्णांचे प्रमाण  94.77 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील  कोरोना बाधीत एकूण  3 लाख 48  हजार 862 रुग्णांपैकी  3  लाख  30  हजार 72  रुग्ण बरे होवून घरी गेले आहेत. ॲक्टीव रुग्ण  10  हजार 357  आहे. कोरोनाबाधित एकूण 8  हजार 433  रुग्णांचा मृत्यू झाला आहे. मृत्यूचे प्रमाण  2.42  टक्के इतके आहे तर बरे  होणा-या रुग्णांचे प्रमाण  94.61 टक्के आहे.
सातारा जिल्हा
  सातारा जिल्हयातील कोरोना बाधीत एकूण  52  हजार 127 रुग्णांपैकी  49 हजार 921  रुग्ण बरे होवून घरी गेले आहेत. ॲक्टीव रुग्ण संख्या  462 आहे. कोरोनाबाधित एकूण 1  हजार  744 रुग्णांचा मृत्यू झाला आहे.

सोलापूर जिल्हा
 सोलापूर जिल्हयातील कोरोना बाधीत एकूण 46 हजार 972 रुग्णांपैकी  43 हजार 502  रुग्ण बरे होवून घरी गेले आहेत. ॲक्टीव रुग्ण संख्या 1   हजार 835 आहे. कोरोनाबाधित एकूण 1  हजार 635  रुग्णांचा मृत्यू झाला आहे.

  सांगली जिल्हा
 सांगली  जिल्हयातील  कोरोना बाधीत एकूण 47  हजार  99 रुग्णांपैकी 45 हजार 13 रुग्ण बरे होवून घरी गेले आहेत. ॲक्टीव रुग्ण संख्या 377 आहे.  कोरोनाबाधित एकूण 1  हजार 709 रुग्णांचा मृत्यू झाला आहे

कोल्हापूर जिल्हा
कोल्हापूर जिल्हयातील  कोरोना बाधीत एकूण 49 हजार 200 रुग्णांपैकी 47  हजार  276 रुग्ण  बरे होवून घरी गेले आहेत. ॲक्टीव रुग्ण संख्या 234 आहे. कोरोनाबाधित एकूण  1 हजार 690  रुग्णांचा मृत्यू झाला आहे.

कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 776 ने वाढ झाली आहे. यामध्ये पुणे जिल्ह्यात 567 , सातारा जिल्ह्यात 64, सोलापूर जिल्ह्यात 93, सांगली जिल्ह्यात 38 तर कोल्हापूर जिल्ह्यात 14 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण  1 हजार 265 रुग्णांमध्ये पुणे जिल्हयामध्ये 924, सातारा जिल्हयामध्ये 112, सोलापूर जिल्हयामध्ये  177, सांगली जिल्हयामध्ये  24 व कोल्हापूर जिल्हयामध्ये 28 रुग्णांचा समावेश आहे.

पुणे विभागातील सर्व्हेक्षण
आजपर्यत विभागामध्ये एकुण 29 लाख 88 हजार  830 नमून्यांचा तपासणी अहवाल प्राप्त झाला. प्राप्त अहवालांपैकी   5 लाख  44 हजार 260  नमून्यांचा अहवाल सकारात्मक (पॉझिटिव्ह) आहे.
( टिप :- दि.  8 डिसेबर 2020 रोजी रात्री 9.00 वा. पर्यंतच्या आकडेवारीनुसार )

जिल्हाधिकारी डॉ. राजेश देशमुख यांचे आवाहन

पुणे दि.9:- हवेली तालुक्यातील पेरणे फाटा (कोरेगाव भिमा) येथे 1 जानेवारी रोजी विजयस्तंभ अभिवादन कार्यक्रम साजरा केला जातो. यावर्षी कोविड-19 चा प्रादुर्भाव विचारात घेऊन हा कार्यक्रम शांततेने आणि संयमाने साजरा करुया, असे आवाहन जिल्हाधिकारी डॉ. राजेश देशमुख यांनी केले.

कोरोना विषाणू प्रादुर्भावाच्या पार्श्वभूमीवर मौजे पेरणे (कोरेगाव भिमा) येथील विजयस्तंभ अभिवादन कार्यक्रमाची आढावा बैठक आज जिल्हाधिकारी डॉ. देशमुख यांच्या अध्यक्षतेखाली घेण्यात आली. यावेळी जिल्हा पोलीस अधीक्षक अभिनव देशमुख, जिल्हा परिषदेचे मुख्य कार्यकारी अधिकारी आयुष प्रसाद, निवासी उपजिल्हाधिकारी डॉ.जयश्री कटारे, उप विभागीय अधिकारी संतोषकुमार देशमुख व सचिन बारावकर तसेच पोलीस व संबंधित विविध विभागांचे अधिकारी उपस्थित होते.

डॉ.देशमुख म्हणाले, आपल्या राज्यासह देश आणि जग कोरोना विरुद्ध लढत आहे. अशा परिस्थितीत योग्य पध्दतीने अभिवादन कार्यक्रम साजरा करणे, ही आपल्या सर्वांची जबाबदारी आहे. हा कार्यक्रम शांततेने आणि सुरळीत पार पाडण्यासाठी सर्वांनी प्रशासनाला सहकार्य करावे, असे आवाहन जिल्हाधिकारी डॉ. देशमुख यांनी केले.

जिल्हा पोलीस अधीक्षक अभिनव देशमुख म्हणाले, विजयस्तंभ अभिवादन कार्यक्रम साजरा करण्याबाबत येथील नागरिकांच्या भावना जाणून घेण्याच्या दृष्टीने ही बैठक घेण्यात येत आहे. कोरोनाचे संकट लक्षात घेऊन यावर्षी सर्व सण-समारंभ साधेपणाने साजरे करण्यात आले आहेत. पेरणे विजयस्तंभ अभिवादन कार्यक्रमात गर्दी होऊन कोरोनाचा प्रादुर्भाव वाढणार नाही, याची दक्षता घेऊन कार्यक्रम साजरा करुया, असे आवाहन जिल्हा पोलीस अधीक्षक अभिनव देशमुख यांनी केले.

यावेळी पेरणे व वढू येथील सरपंच, विविध संस्था- संघटनांचे पदाधिकारी, ग्रामस्थ यांनी कोरोनाच्या अनुषंगाने खबरदारी म्हणून गर्दी होवू नये, यासाठी प्रशासनाला सर्वतोपरी सहकार्य करण्याचे आश्वासन दिले.

पुणे-समाजाला दिलेल्या सकारात्मक योगदानांची दखल घेण्याचा एक प्रयत्न म्हणून, लेक्झिकॉन एमआयएलई ही लेक्झिकॉन ग्रुप ऑफ इन्स्टिट्यूट्सची, फ्लॅगशिप पदव्युत्तर शिक्षणसंस्था सरकार, कायदा, सामाजिक कार्य, कॉर्पोरेट, शिक्षण आणि मनोरंजन या क्षेत्रातील दिग्गजांचा त्यांनी कला, धोरण यांसाठी दिलेल्या योगदानाबद्दल तसेच त्यांनी आपापल्या क्षेत्रात निर्माण केलेल्या प्रभावाबद्दल सन्मान करणार आहे. हा समारंभ महाराष्ट्राचे राज्यपाल श्री. भगतसिंह कोश्यारी यांच्या उपस्थितीत पुणे येथे १२ डिसेंबर, २०२० रोजी होणार आहे.

लेक्झिकॉन ग्रुप ऑफ इन्स्टिट्यूट्सचे अध्यक्ष पंकज शर्मा म्हणाले,  “आपल्या उद्योगक्षेत्रांवर प्रभाव निर्माण करण्यासाठी लक्ष केंद्रित करणाऱ्या, सकारात्मक बदलाला चालना देणाऱ्या आणि नवोन्मेषाचे स्फुल्लिंग चेतवणाऱ्या उद्योगक्षेत्रातील नेत्यांसोबत संवाद साधण्याच्या, समन्वय करण्याच्या आणि त्यांची दखल घेण्याच्या आमच्या प्रयत्नांचा भाग म्हणून आम्ही भारत लीडरशिप अवॉर्डस् सुरू करण्याचा निर्णय केला. आमच्या विद्यार्थ्यांना दिग्गजांशी संवाद साधता यावा आणि त्यांच्या स्वत:च्या कारकिर्दीच्या मार्गात मापदंड तयार करता यावेत यासाठी आम्ही कायमच प्रयत्नशील असतो. विद्यार्थ्यांना स्वत:चा सर्वांगीण विकास साधण्यात मदत करता यावी म्हणून विविध दृष्टिकोनांचे दर्शन घडवणारे वातावरण तयार करण्यावर आमच्या अध्यापनशास्त्राने कायमच भर दिला आहे. या दिशेनेच एक पाऊल म्हणून हे पुरस्कार प्रदान करताना आम्हाला रोमांचित झाल्यासारखे वाटत आहे.“

लेक्झिकॉन ग्रुप्स ऑफ इन्स्टिट्यूटचे उपाध्यक्ष नीरज शर्मा म्हणाले,“लेक्झिकॉन एमआयएलई ही परिवर्तन करणारी व उद्योगक्षेत्राच्या चाकोऱ्या मोडणारी नवीन पिढी घडवण्याचे उद्दिष्ट समोर असलेली उदयोन्मुख पदव्युत्तर व्यवस्थापन शिक्षणसंस्था आहे. कोविडच्या साथीने आपल्या उद्योगांना तर उद्ध्वस्त केलेच, शिवाय व्यक्तीच्या वैयक्तिक उद्दिष्टांबद्दलच्या तसेच करिअरच्या निवडीबद्दलच्या मानसिकतेवरही आघात केला आहे. एक संस्था म्हणून आम्हाला एक नवीन विचारप्रक्रिया आत्मसात करणे तसेच शिक्षण व अनुभव देण्यासाठी स्वतंत्र असा दृष्टिकोन तयार करणे गरजेचे आहे. आमच्या डेटावर आधारित दृष्टिकोनासह, समस्या-निवारण आणि शून्यातून उद्योजक निर्माण करणारी विशेष कौशल्ये व क्षमता विद्यार्थ्यांना देण्यावर लक्ष केंद्रित करण्याचे लक्ष्य आमच्यापुढे आहे.”

विख्यात दिग्गजांसह या समारंभात, पिंकसारख्या चित्रपटांतून प्रभावी अभिनय करणारी बॉलिवूड अभिनेत्री तापसी पन्नू, दिग्दर्शक व प्रख्यात नृत्यदिग्दर्शक रेमो डिसोझा, यांचाही भारत लीडरशिप अवॉर्डने गौरव केला जाणार आहे.

या समारंभामध्ये “दि इंडिया ग्रोथ स्टोरी पोस्ट पॅण्डेमिक” या विषयावर चर्चासत्रही घेतले जाणार आहे. सरकारी तसेच कॉर्पोरेट क्षेत्रातील प्रख्यात व्यक्ती या चर्चेत भाग घेतील. संस्थेने हा समारंभ मर्यादित लोकांपुरता ठेवण्याचा निर्णय घेतला आहे. मात्र, सर्व संबंधितांना चर्चासत्रात सहभागी होता यावे या उद्देशाने कार्यक्रमाची लिंक उपलब्ध करून दिली जाईल. लेक्झिकॉन एमआयएलईला दृष्टिकोनांच्या आदानप्रदानासाठी व्यासपीठे उभी करायची आहेत तसेच भारताच्या वाढीच्या पुढील टप्प्याला चालना देणारे उपाय शोधून काढायचे आहेत.

पुरस्कारप्राप्त व्यक्तींची नावे

पुरस्कारप्राप्त व्यक्ती

लाइफटाइम अचीव्हमेंट भारत लीडरशिप अवॉर्ड्स

१.     श्री. एस. डी. शर्मा

अध्यक्ष- लेक्झिकॉन ग्रुप ऑफ इन्स्टिट्यूट्स

२.     डॉ. परवेझ ग्राण्ट

प्रमुख कार्डिओलॉजिस्ट आणि अध्यक्ष, कार्डिओव्हस्क्युलर सर्व्हिसेस तसेच पुणे येथील रुबी हॉल क्लिनिकचे व्यवस्थापकीय विश्वस्त

भारत लीडरशिप अवॉर्डस्

३.     श्री. सौरभ राव (आयएएस)

विभागीय आयुक्त, पुणे

४.    डॉ. दीपक म्हैसेकर (आयएएस)

माजी विभागीय आयुक्त

मुख्यमंत्र्यांचे सल्लागार

५.    श्री. श्रावण हर्डीकर (आयएएस)

पालिका आयुक्त, पीसीएमसी

६.    श्री. विशाल सोळंकी (आयएएस)

शिक्षण आयुक्त (महाराष्ट्र राज्य)

७.    श्री. कृष्ण प्रकाश (आयपीएस)

पोलिस आयुक्त पीसीएमसी

८.    श्री. रंजनकुमार शर्मा (आयपीएस)

डीआयजी, सीआयडी क्राइम पुणे

९.    श्री. रामनाथन सुब्रमणियम

संचालक, महाराष्ट्र मेट्रो रेल प्रायव्हेट लिमिटेड

१०.  श्री. वेदप्रकाश शर्मा

समुदाय विकास आणि समाजसेवा, पुणे

११.  श्रीमती कविता द्विवेदी (आयएएस)

पीएमआरडीए

१२.  श्रीमती तापसी पन्नू

भारतीय अभिनेत्री

१३.  श्री. चंद्रकांत वामनराव काळे

अध्यक्ष, वाई अर्बन कोऑपरेटिव बँक लिमिटेड, वाई

१४.  श्री. नेविल श्रॉफ

मॅनेजिंग पार्टनर, माझदा केमिकल्स

१५. श्री. शशांक भूषण

इंडिया साइट हेड आणि व्हीपी- एचआर, बीएमसी सॉफ्टवेअर इंडिया प्रायव्हेट लिमिटेड

कॉर्पोरेट सोशल रिस्पॉन्सिबिलिटीसाठी भारत लीडरशिप अवॉर्डस्

१६. श्री. कार्तिक आनंद

संस्थापक आणि अध्यक्ष, एक्सडीबीएस कॉर्पोरेशन

१७. श्री. कुंदन देशमुख

व्यवस्थापकीय संचालक, परभणी अ‍ॅग्रोटेक प्रायव्हेट लिमिटेड

१८.  श्री. संदीप खंडेलवाल

व्यवस्थापकीय संचालक, संदीप स्टील्स

१९.  श्री. विवेक बिडगर

सोशल आँत्रप्रेन्युर

२०. श्री. रोहन सिंग

संस्थापक- ट्रस्टफोर्ट इव्हेंट अँड ट्रस्टमाइस

२१.  श्री. विजय अडवाणी

संस्थापक- अडवाणी अॅडव्हर्टायजिंग

२२. स्वस्तिक सिर्सीकर

विश्वस्त- पुणे इन्स्टिट्यूट ऑफ कम्प्युटर टेक्नोलॉजी, पीआयसीटी मॉडेल स्कूल, उपाध्यक्ष- लक्ष्य स्पोर्टस्, कॅप्टन- पूना क्लब गोल्फ कोर्स

२३. प्रमोद माणिकचंद दुग्गड

सामाजिक प्रभाव

२४. गौरव दुग्गड

उदयोन्मुख आंत्रप्रेन्युर

२५. प्रवीण सिंग

२६. रेमो डिसोझा

दिग्दर्शक/नृत्यदिग्दर्शक

पुणे-नळस्टॉप चौकात दुहेरी उड्डाण पुलाचे काम सुरु झाले असून मेट्रोचे काम ही पूर्णत्वास जात आहे.हे काम जून अखेरीस पूर्ण होईल असा विश्वास मेट्रो ने दिल्याची माहिती येथे भाजपचे प्रवक्ते संदीप खर्डेकर आणि नगरसेविका मंजुश्री खर्डेकर यांनी दिली .

भाजप चे प्रदेशाध्यक्ष आणि कोथरूडचे आमदार चंद्रकांतदादा पाटील यांच्या निर्देशानुसार कोथरूड मधील विविध नागरी समस्यांवर समाधान शोधण्यासाठी समन्वयक म्हणून संदीप खर्डेकर यांच्याकडे जबाबदारी देण्यात आली आहे.त्यानुसार नळस्टॉप चौकातील समस्यांवर समाधान शोधण्यासाठी आणि येथील पुढील कामांचे नियोजन करण्यासाठी संदीप खर्डेकर आणि नगरसेविका मंजुश्री खर्डेकर यांच्या पुढाकाराने आज मेट्रोचे कार्यकारी संचालक गौतम बिऱ्हाडे,प्रकल्प अधिकारी मुलमुले,मनपा पथ विभागाचे अधीक्षक अभियंता संतोष तांदळे,मलनिस्सारण चे मुख्य अभियंता जगदीश खानोरे,पथ चे कार्यकारी अभियंता अभिजीत डोंबे,उपअभियंता संदीप रणवरे, कनिष्ठ अभियंता राजेश धुमाळ,कविता पाटील यांच्यासह विविध खात्यातील अधिकाऱ्यांसह पाहणी करण्यात आली.
खर्डेकर म्हणाले ,’यावेळी खालील विषयांवर एकमत झाले असून मेट्रोचे काम जून अखेरपर्यंत वेगाने पूर्ण करण्याचे नियोजन करण्यात आले.तसेच खालील विषयात निर्णय घेण्यात आले ….
१) मेट्रोच्या वतीने एस एन डी टी ते नळस्टॉप या पट्ट्यात ४ मीटर चा रस्ता,किमान २ मीटर कमाल ३ मीटरचा पदपथ करण्यात येणार आहे.
२) नळस्टॉप चौकात पावसाळ्यात पाणी तुंबण्याचे प्रमाण वाढत असून अनेक सोसायटीच्या आवारात यावर्षी पाणी घुसले.यावर मात करण्यासाठी कर्वे रस्त्यावर दोन्ही बाजूस ९०० मि.मी व्यासाची पावसाळी लाईन टाकण्यास मेट्रोच्या अधिकाऱ्यांनी मान्यता दिली.
३) तर याच भागात ६०० मि.मी व्यासाची ड्रेनेज लाईन मनपा तर्फे टाकण्यासाठी मान्यता देण्यात आली.
वरील कामे फेब्रुवारी अखेरपर्यंत पूर्ण करण्यात येतील

४) मेट्रोचे काम पूर्णत्वास गेल्यावर संपूर्ण कर्वे रस्त्याचे डांबरीकरण पुणे मनपा तर्फे करण्यात येइल.
५) तसेच काम वेगाने करत जून अखेर पर्यंत पूर्ण करण्याचे ही नियोजन करण्यात आले.
सदरचे काम करत असताना एल ॲंड टी,विविध केबल कंपन्या,महावितरण,एम एन जी एल यांच्याशी संपर्क साधून सर्व कामे एकाच वेळी पूर्ण करावे असे संदीप खर्डेकर यांनी सुचवले.तर नगरसेविका मंजुश्री खर्डेकर यांनी दर १५ दिवसांनी संयुक्त बैठक घेऊन कामाच्या प्रगतीचा आढावा घ्यावा असे सुचवले.
मात्र ज्येष्ठ नागरिकांना रस्ता ओलांडणे सोपे व्हावे यासाठी ठराविक अंतरावर डिव्हायडर च्या मधे क्रॉसिंग ठेवावे या नगरसेविका मंजुश्री खर्डेकर यांच्या सूचनेवर हे शक्य नसल्याचे मेट्रोच्या अधिकाऱ्यांनी स्पष्ट केले व पौड फाटा ते खंडूजीबाबा चौक ह्या २:२ किमी च्या रस्त्यावर ५ सिग्नल चौकातून रस्ता ओलांडावा लागेल असेही त्यांनी स्पष्ट केले.

शरद पवार यांच्या भव्य पेंटिंगचे लोकार्पण – माजी उपमहापौर दीपक मानकर यांची संकल्पना

पुणे (प्रतिनिधी) :’शरद पवार यांच्या सातारा येथील ऐतिहासिक सभेत भर पावसात सभेला मार्गदर्शन करताना भिंतीवर उभारलेली भव्य दिव्य पेंटिंग ही शहरातील नव्या पिढीला आणि सर्वांनाच प्रेरणादायी ठरेल, असा विश्वास असल्याचे राष्ट्रवादी काँग्रेस प्रदेशाध्यक्ष आणि जलसंपदा मंत्री जयंत पाटील यांनी येथे व्यक्त केला . रमणबाग चौक येथे शरद पवार यांच्या ८० व्या वाढदिवसाच्या निमित्ताने माजी उपमहापौर दीपक मानकर यांच्या संकल्पनेतून आणि नीलेश खराडे यांच्या कुंचल्यातून साकारण्यात आलेल्या ६० बाय ३० फूट भव्य दिव्य पेंटिंगचे लोकार्पण पाटील यांच्या हस्ते संपन्न झाले. त्यांनतर ते माध्यमांशी बोलत होते.

याप्रसंगी आमदार संजय शिंदे, राष्ट्रवादीचे शहराध्यक्ष आ.चेतन तुपे, पुणे शहर कॉंग्रेस अध्यक्ष रमेश बागवे, शहर शिवसेना प्रमुख संजय मोरे, राष्ट्रवादीचे प्रवक्ते अंकुश काकडे, दत्ता सागरे, हर्षवर्धन मानकर, करण मानकर, संजय पालवे, निलेश शिंदे, अप्पा जाधव तसेच महाविकास आघाडीचे शहरातील पदाधिकारी व कार्यकर्ते उपस्थित होते. याप्रसंगी भिंतीवर पेंटिंग काढणारे आर्टिस्ट निलेश खराडे, योगेश भुवड, पंकज विसापूरे, विनायक आडगळे, शंतनु जोशी, नितीन परदेशी यांचा पाटील यांच्या हस्ते सत्कार करण्यात आला. जलसंपदा मंत्री जयंत पाटील म्हणाले की, ‘ पवार साहेबांचा येत्या १२ डिसेंबर रोजी ८० वा वाढदिवस होणार आहे, त्यानिमित्ताने दीपक मानकर यांच्या संकल्पनेतून आणि निलेश खराडे या आर्टिस्टनी भिंतीवर पवार साहेबांची हुबेहुब आणि उत्तम दर्जाची अशी पेंटिंग साकारली आहे. त्यांचे अभिनंदन आणि दीपक मानकर व त्याच्या मित्र परिवाराचे आभार मानतो. पवारसाहेब हे महाराष्ट्रातील नाही, तर देशातील नव्या पिढीचे प्रेरणादायी आहेत.’ दीपक मानकर म्हणाले की,’ आदरणीय शरदचंद्रजी पवारसाहेब हे माझे प्रेरणास्थान आहेत. त्यांच्या ८० व्या वाढदिवसाच्या निमित्ताने काही तरी वेगळे करावे, असे मनात होते. तेव्हा विधानसभा निवडणुकीत ऐतिहासिक आणि प्रेरणादायी ठरलेल्या सभेचे पेंटिंग काढण्याचे ठरवले आणि तसे ते काढून पुणेकरांच्या वतीन साहेबांना भेट दिली.