पुणे, दि. २३: धर्मादाय संस्थाच्या कायद्यांअंतर्गत नोंदणीकृत रुग्णालयांनी आयुष्मान भारत- प्रधानमंत्री जन आरोग्य योजना आणि महात्मा ज्योतिराव फुले जन आरोग्य योजनांचा गरजू रुग्णांना तत्परतेने लाभ देण्याकरिता पुढाकार घ्यावा, या कायद्यांअंतर्गत नोंदणीकृत न झालेल्या रुग्णालयानी नोंदणी करुन घ्यावी, याकामी राज्य शासनाच्यावतीने सहकार्य करण्यात येईल, असे प्रतिपादन सार्वजनिक आरोग्य व कुटुंब कल्याण मंत्री प्रकाश आबिटकर यांनी दिले.

यशदा येथे आयुष्मान भारत- प्रधानमंत्री जन आरोग्य योजना आणि महात्मा ज्योतिराव फुले जन आरोग्य योजनांबाबत आढावा बैठकीत ते बोलत होते. यावेळी आमदार कैलास पाटील, आयुष्मान भारत मिशन महाराष्ट्र समितीचे अध्यक्ष डॉ. ओमप्रकाश शेटे, राज्य आरोग्य हमी संस्थेचे मुख्य कार्यकारी अधिकारी अण्णासाहेब चव्हाण, आरोग्य उपसंचालक डॉ. कैलास बाविस्कर, जिल्हा शैल्यचिकित्सक डॉ. नागनाथ यमपल्ले, जिल्हा आरोग्य अधिकारी डॉ. सचिन देसाई यांच्यासह रुग्णालयाचे प्रतिनिधी उपस्थित होते.

श्री. आबिटकर म्हणाले, आयुष्मान भारत- प्रधानमंत्री जन आरोग्य योजना आणि महात्मा ज्योतिराव फुले जन आरोग्य योजना नागरिकांच्या आरोग्याच्यादृष्टीने अतिशय महत्वाच्या योजना आहे. धर्मादाय संस्थाच्या कायद्यांअंतर्गत जिल्ह्यात विविध रुग्णालये नोंदणीकृत असून रुग्णालयात येणाऱ्या रुग्णांना आजारपणाच्या काळात सकारात्मक पद्धतीने मदत करण्याची भावना ठेवावी. त्यांची सेवा करण्याकरिता पुढाकार घेतला पाहिजे.

धर्मादाय रुग्णालयांनी निर्धन व दुर्बल घटकातील रुग्णांसाठी प्रत्येकी १० टक्के याप्रमाणे एकूण २० टक्के खाटा आरक्षित करणे बंधनकारक असून त्याअनुषंगाने धर्मादाय संस्थाच्या कायद्यांअंतर्गत नोंदणीकृत रुग्णालयांनी तत्परतेने काम करावे, शासनाच्या निर्देशाप्रमाणे रुग्णांना खाटा उपलब्ध करुन द्याव्यात.

पुणे जिल्ह्यात रुग्णांची संख्या तसेच वैद्यकीय उपचाराकरिता येणाऱ्या खर्चाचा विचार करता धर्मादाय रुग्णालयाची मोठी जबाबदारी आहे. त्यामुळे गरजू रुग्णांना गुणवत्तापूर्ण वैद्यकीय सेवा उपलब्ध करुन द्याव्यात, सेवा दिल्यानंतर रुग्णाच्या मनात रुग्णालयाप्रती समाधानाची भावना निर्माण झाली पाहिजे, यादृष्टीने काम करावे, असेही श्री. आबिटकर म्हणाले.

डॉ. शेटे म्हणाले, शासनाच्या आरोग्य विषयक योजनांचा प्रत्येक गरजू रुग्णांना लाभ देण्याकरिता राज्य शासन प्रयत्नशील आहे. त्यामुळे रुग्णालयांनी पात्र रुग्णांना दर्जेदार आरोग्यसेवा देवून सहकार्य करावे, याकामात हलगर्जीपणा होणार नाही, याबाबत रुग्णालय व्यस्थापनाने दक्षता घ्यावी, असेही डॉ. शेटे म्हणाले.

राज्य कामगार विमा रुग्णालयाची पाहणी

पिंपरी-चिंचवड मोहननगर येथील राज्य कामगार विमा योजनेच्या रुग्णालयाला आरोग्य मंत्री यांनी भेट देऊन बाहय रुग्ण विभाग, आंतररुग्ण विभाग, औषधी भंडार,आहार कक्षाला भेट देऊन प्रत्यक्ष पाहणी केली. येथील रुग्णांशीही संवाद साधून अडीअडचणी जाणून घेतल्या.

रुग्णांना चांगल्या सेवा सुविधा देण्याकरिता डॉक्टर व प्रशासनानी काळजीपूर्वक लक्ष द्यावे व दर्जेदार सेवा द्याव्यात, अशा सूचना श्री. आबीटकर केली.

पुणे दि.23 :- विभागीय उप आयुक्त, राज्य उत्पादन शुल्क, पुणे विभाग, पुणे सागर धोमकर यांच्या आदेशानुसार व निरीक्षक, राज्य उत्पादन शुल्क, विभागीय भरारी पथक, पुणे विभाग, पुणे नरेंद्र थोरात यांचे मार्गदर्शनाखाली निरीक्षक, राज्य उत्पादन शुल्क, विभागीय भरारी पथक, पुणे विभाग, पुणे यांचे पथकाने 22 जुलै 2025 रोजी पुरंदर तालुक्यातील भोसलेवाडी गाव हद्दीत टेमजाई माता मंदिराच्या मागील बाजूस, मोकळया जागेत तसेच जेजुरी गावच्या हद्दीत बारामती जेजुरी रोड लगत, ओढ्याच्या काठी दोन विकाणी सुरु असलेल्या अवैध गावठी दारुच्या भट्टीवर छापे मारले.

या छाप्यामध्ये 5550 लिटर रसायन, 1855 लिटर अवैध गावठी हातभटटी दारु व निर्मीती साहीत्य असा एकुण अंदाजे रु. 3,94,500/- किंमतीचा मुद्देमाल नष्ट करण्यात आला. या ठिकाणी गावठी दारूभट्टी तयार करणा-या इसमाविरुध्द महाराष्ट्र दारुबंदी कायदा 1949 चे कलम 65 ब. क. ई. फ नुसार गुन्हे नोंदविण्यात आले आहेत. यापुढे देखील अवैध गावठी हातभटटी दारु निर्मीती, वाहतुक व विक्रीवर आळा घालण्याच्या दृष्टीने सातत्याने छापे मारण्याची कारवाई सुरु राहणार असल्याचे निरिक्षक, राज्य उत्पादन शुल्क, विभागीय भरारी पथक, पुणे कार्यालयाकडून कळविण्यात आले आहे.

सदरची कारवाई विभागीय उप आयुक्त सागर धोमकर यांच्या आदेशान्वये निरीक्षक नरेंद्र थोरात यांच्या मार्गदर्शनाखाली विभागीय भरारी पथकाचे दुय्यम निरीक्षक धिरज सस्ते, जवान शशीकांत भाट, संदिप सुर्वे व ऋतिक कोळपे यांनी केली असून, या गुन्हयांचा पुढील तपास निरीक्षक नरेंद्र थोरात यांच्या मार्गदर्शनाखाली दुय्यम निरीक्षक धिरज सस्ते करीत आहेत.

पुणे शहरातील नागरीकांना अवैध दारु निर्मीती, वाहतुक व विक्री व्यवसायाशी संबंधीत माहिती असल्यास त्यांनी निरीक्षक, राज्य उत्पादन शुल्क, विभागीय भरारी पथक, पुणे विभाग, पुणे यांचे कार्यालयाशी संपर्क साधवा असे, आवाहन निरीक्षक नरेंद्र थोरात यांनी प्रसिध्दी पत्रकान्वये केले आहे.

पुणे: दक्षिण कोरियात नुकत्याच पार पडलेल्या १८ व्या वर्ल्ड तायक्वांदो कल्चरल एक्स्पो २०२५ या आंतरराष्ट्रीय स्पर्धेत पुण्याच्या आठ खेळाडूंनी चमकदार कामगिरी करत ४ सुवर्ण, १० रौप्य आणि २ कांस्य पदकांची कमाई केली. हे खेळाडू आर. बी. होरांगी तायक्वांदो अकादमी आणि सेंट फेलिक्स हायस्कूलचे विद्यार्थी असून त्यांना प्रशिक्षक मास्तर रवींद्र भांडारी यांचे मार्गदर्शन लाभले.

या स्पर्धेत पुमसे आणि क्युरोगी प्रकारांत आयुषी भांडारी, झोया खान, हर्ष निकम आणि वाल्मीकी चौरसिया यांनी प्रत्येकी एक सुवर्ण आणि एक रौप्य पदक मिळवले. समीक्षा साबळे आणि पवन ननावरे यांनी प्रत्येकी दोन रौप्य पदके पटकावली. स्वलिहा खान आणि अनुष्का चिनाय्या यांनी प्रत्येकी एक रौप्य आणि एक कांस्य पदक मिळवले.

दक्षिण कोरियातील कुकिवॉन – वर्ल्ड तायक्वांदो मुख्यालय येथे खेळाडूंना अधिकृत सहभाग प्रमाणपत्र देण्यात आले. त्यानंतर खेळाडूंनी वर्ल्ड हपकीदो आणि कुमदो मार्शल आर्ट्स फेडरेशनचे अध्यक्ष ग्रँडमास्टर डॉन ओ चोई यांच्या डोजांगमध्ये प्रशिक्षण घेतले आणि त्यांच्याकडून ब्लॅक बेल्ट प्रमाणपत्रे व सुवर्ण पदके मिळवली.

तसेच खेळाडूंनी कोरिया शिन (९ वा डॅन, चंग-डो क्वान), ग्रँडमास्टर ह्युंगनाम क्वोन (९ वा डॅन, पूमसे प्रशिक्षक) आणि ऑलिंपिक सुवर्ण पदक विजेते ग्रँडमास्टर मून डे-सुंग यांच्याकडून प्रशिक्षण घेतले आणि वैयक्तिक सन्मान व प्रमाणपत्रे प्राप्त केली. या दौऱ्यादरम्यान अर्चना चिनाय्या यांनी पालक म्हणून संघास साथ दिली.

पुण्यात परतल्यानंतर सेंट फेलिक्स शाळेच्या वतीने प्रांतीय प्रमुख सिस्टर उर्सुला पिंटो, सिस्टर जेनिफर परेरा, शाळेच्या व्यवस्थापिका सिस्टर रोझमेरी आल्मेडा, प्राचार्या लीना पॉल, सिस्टर एल्सा व श्रीमती बेला डिसिल्वा यांच्या हस्ते खेळाडूंना गौरविण्यात आले.

ही कामगिरी केवळ पदकांची कमाई नसून, आंतरराष्ट्रीय पातळीवर पुण्याच्या युवा खेळाडूंनी मिळवलेले मानांकन आणि तायक्वांदो क्षेत्रातील पुण्याचे उंचावलेले स्थान दर्शवणारी ठरली. या यशामागे मास्टर रवींद्र भांडारी यांचे नियोजनबद्ध प्रशिक्षण आणि मार्गदर्शन महत्त्वाचे ठरले.

पिंपरी (दि.२३) : चाकण औद्योगिक क्षेत्रातील वाहतुकीसह रस्त्याच्या समस्यांमुळे नागरिकांसह व्यवसायिकांना अडचणी येत आहे. त्यामुळे यासंदर्भात पडताळणी करून तातडीने आवश्यक त्या उपाययोजना करण्याचे निर्देश पुणे महानगर प्रदेश विकास प्राधिकरणाचे महानगर आयुक्त डॉ. योगेश म्हसे यांनी दिले. रस्ते दुरुस्तीच्या अनुषंगाने शासकीय यंत्रणांनी शासनाकडे प्रस्ताव पाठवून पाठपुरावा करणे अपेक्ष‍ित आहे. चाकण औद्योगिक क्षेत्रातील समस्यांवर मात करण्यासाठी आमदार बाबाजी काळे यांच्या उपस्थितीत महानगर आयुक्त यांनी पीएमआरडीए कार्यालयात बुधवारी (दि.२३) विविध यंत्रणांची आढावा बैठक घेतली.

चाकण औद्योगिक क्षेत्रातील रस्ते खराब झाल्यामुळे अपघातांचे प्रमाण वाढले असून रहदारीला अडचणी येत आहे. यासह वाढत्या अतिक्रमणामुळे वाहतूक कोंडी होत आहे, यावर पर्यायी मार्ग म्हणून संबंधित शासकीय यंत्रणांनी समन्वयातून रस्ते दुरुस्त करत या भागातील अतिक्रमणे तात्काळ काढून आवश्यक त्या उपाययोजना करणे आवश्यक आहे. औद्योगिक क्षेत्रासह इतर ठ‍िकाणची अतिक्रमणे काढून घेत रस्त्यावर उभे राहणाऱ्या वाहनांवर कारवाईसाठी एमआयडीसी, पोलीस यंत्रणेला निर्देश देण्यात आले. नागरी सुव‍िधांसाठी एमएसआरडीसी, राष्ट्रीय महामार्ग, सार्वजनिक बांधकाम विभाग, एमआयडीसी आदी विभागांनी चाकण हद्दीतील रस्त्यासंदर्भात पाठपुरावा करून यासाठी आवश्यक तो निधी उपलब्ध करून घेण्यासाठी शासनाकडे पाठपुरावा करणे अपेक्ष‍ित आहे. यासह संबंध‍ित यंत्रणांनी तातडीच्या उपाययोजना हाती घेण्याचे न‍िर्देश यावेळी महानगर आयुक्त यांनी द‍िले.

औद्योगिक क्षेत्राला चालना देण्यासाठी या भागातील रस्त्यांचे रुंदीकरण करत त्यांची दुरुस्ती करणे अपेक्षित आहे. यासह वाहतूक कोंडी निराकरणासाठी नवीन पर्यायी मार्गाचा विचार करून तातडीने त्यासंबंधीचा अहवाल तयार करण्याचे निर्देश शासकीय यंत्रणांना देण्यात आले. यावेळी पुणे – नाश‍िक रस्ता, तळेगाव – चाकण – शिक्रापूर, माई ते चिखली, निघोजे ते कुरळी, चाकण ते आळंदी अशा विविध रस्त्यांसंदर्भात चर्चा करण्यात आली. यावेळी महानगर आयुक्त डॉ. योगेश म्हसे, आमदार बाबाजी काळे, मुख्य अभियंता रिनाज पठाण, एमआयडीसीचे मुख्य अभियंता नितीन वानखेडे, महागनर न‍ियोजन सम‍िती सदस्य वसंत भ‍िसे यांच्यासह औद्योगिक संघटना, लोकप्रतिनिधी आदी उपस्थित होते.

पुणे, दि. 22 : शहरातील मार्केट यार्ड भागात शारदा महिला मंडळाच्या नावाने रास्त भाव दुकानाचा परवाना सुरू होता. सदर परवाना श्रीकृष्ण पांडुरंग ननावरे नावाची व्यक्ती कोणत्याही परवानगीशिवाय चालवत असल्याचे परिमंडळ अधिकारी अमोल हाडे यांनी तपासणी केल्यावर आढळून आले. तसेच तपासणी दरम्यान श्री. हाडे यांना सदर रास्त भाव दुकानात अनेक गंभीर दोष आढळून आले जसे की रास्त भाव दुकान शासन निर्धारित वेळेत बंद ठेवणे, महिला मंडळाचे दुकान इतर व्यक्तीने चालवणे, रास्त भाव दुकानात शासनाने नेमून दिलेले दप्तर न ठेवणे, रास्त भाव दुकानातील तराजू व वजने प्रमाणित नसणे, शिधापत्रिकाधारकांशी अरेराविपणे बोलणे व धमकावणे तसेच तपासणी वेळी प्रत्यक्ष व पुस्तकी शिल्लक धान्यसाठा यात तफावत आढळून येणे असे दोष आढळल्याने प्रशांत खताळ अन्नधान्य वितरण अधिकारी यांनी शारदा महिला मंडळ रास्त भाव दुकान परवाना क्रमांक ह 31 कायमस्वरूपी रद्द केला.

तसेच शारदा महिला मंडळ सद्यस्थितीत अस्तित्वात आहे का याची खातर जमा करण्यात येत आहे. दुकानातील आढळून आलेल्या दोषांच्या तपासणी दरम्यान तफावत आढळून आलेल्या धान्याच्या दंडाची रक्कम रु 33 हजार 666 वसूल करण्याचे आदेश बजावण्यात आले आहेत. तसेच सर्व परिमंडळ कार्यालयातील सहकारी संस्था व महिला बचत गटामार्फत चालवण्यात येणाऱ्या दुकानांची तपासणी करण्याची मोहीम हाती घेण्याच्या सूचनाही श्री. खताळ यांनी दिल्या आहेत.

पुणे -शेतकऱ्यांच्या प्रश्नाप्रति इतके निष्काळजी असलेले कृषिमंत्री आपल्या महाराष्ट्राला नकोच… माणिकराव कोकाटे यांनी त्यांच्याच भाषेत “ओसाड गावची पाटीलकी” सोडून शेतकऱ्यांवर उपकार करावेत, मंत्री पदाचा राजीनामा द्यावा अशी मागणी करत राष्ट्रवादी काँग्रेस पार्टी शरदचंद्र पवार पक्षाच्या वतीने शहराध्यक्ष प्रशांत जगताप यांच्या नेतृत्वात तीव्र आंदोलन करण्यात आले.यावेळीजगन्नाथ शेवाळे, शेखर धावडे, फहीम शेख, रोहन पायगुडे, असिफ शेख, दीपक कामठे, रानु साने, योगेश पवार, पूजा काटकर, गौरव जाधव, फिरोज तांबोळी, प्राजक्ता जाधव, विमल झुंबरे, रुपाली शेलार यांच्यासह राष्ट्रवादी काँग्रेस पार्टी शरदचंद्र पवार पक्षाचे सर्व पदाधिकारी, कार्यकर्ते मोठ्या संख्येने उपस्थित होते.

पुणे जिल्हाधिकारी कार्यालयासमोर करण्यात आलेल्या या आंदोलनात प्रशांत जगताप यांनी तीव्र शब्दांत माणिकराव कोकाटे यांचा निषेध व्यक्त केला. यावेळी जगताप म्हणाले,’ स्वतःच्या चुकांवर पांघरूण घालण्यासाठी माणिकराव कोकाटे महाराष्ट्राला भिकारी म्हणत आहेत. अशा व्यक्तीला महाराष्ट्र राज्याच्या मंत्रिमंडळात राहण्याचा काहीही अधिकार नाही. एकतर माणिकराव कोकाटे यांना पदावरून काढून टाका, किंवा महाराष्ट्राला जुगारी राज्य बनवण्यासाठी त्यांना थेट मुख्यमंत्री करा अशी खोचक मागणी प्रशांत जगताप यांनी केली आहे.महाराष्ट्रात सत्तेत असलेल्या तिन्ही पक्षांनी सत्तेत येण्यापूर्वी शेतकऱ्यांना कर्जमाफीचे, सातबारा कोरा करण्याचे आश्वासन दिले होते हे आपल्या सर्वांना ज्ञात आहे. या आश्वासनाची पूर्तता करण्यास सरकार स्पष्टपणे नकार देत आहे. या असंवेदनशीलपणावर कळस म्हणून महाराष्ट्राचे कृषिमंत्री माणिकराव कोकाटे लोकशाहीच्या पवित्र सभागृहात, म्हणजेच विधिमंडळात ऑनलाईन जुगार खेळताना चे चित्र सबंध महाराष्ट्राने बघितले आहे.

पुणे-पुणे शहरातील धनकवडी परिसरात मंगळवारी मध्यरात्री १२ ते १ दरम्यान तीन अज्ञात व्यक्तीने तुफान राडा घालत गोंधळ आणि दहशत निर्माण करण्याचा प्रयत्न केला. धनकवडीतील केशव कॉम्प्लेक्स, सरस्वती चौक, आणि नवनाथ नगर या भागात त्यांनी तब्बल वाहनांची मोठ्या प्रमाणावर तोडफोड केली. यामध्ये १५ रिक्षा, दोन कार आणि एक स्कूल व्हॅन टेम्पोचे नुकसान झाले. सीसीटीव्हीमध्ये तोडफोड करणारे तीघे एका दुचाकीवरुन आलेले दिसत आहेत.याप्रकरणी सहकारनगर पोलिस ठाण्यात गुन्हा दाखल करण्यात आला आहे. सहकारनगर पोलिस आणि गुन्हे शाखेची पथके आरोपींच्या मागावर आहेत.

पोलिसांनी दिलेल्या माहितीनुसार, हल्लेखोरांनी दुचाकीवरुन येत हॉकीस्टीक आणि दगडाच्या सहाय्याने एकूण १५ ऑटो रिक्षा, २ कार, १ स्कूल व्हॅन यांच्या काचा फोडून मोठ्या प्रमाणात नुकसान केले आहे. हे हल्लेखोर रस्त्यावर पार्किं केलेल्या वाहनांवर तोडफोड करत असताना त्यांना दोन नागरिकांनी अडवण्याचा प्रयत्न केला. मात्र त्या दोघांना हल्लेखोरांनी मारहाण केली. यातील एका रहिवाशाचीदुचाकीही फोडण्याचा प्रयत्न केला. त्यानेच पोलिस नियंत्रण कक्षाला याची माहिती दिली.

रात्र गस्तीवरील पोलिसांचे पथक आणि सहायक पोलिस आयुक्तांनी घटनास्थळी धाव घेतली होती. मात्र रात्रभर शोधाशोध करुनही हल्लेखोर हाती लागले नाहीत. दरम्यान पोलिस उपायुक्त मिलींद मोहिते हे सहकारनगर पोलिस ठाण्यात ठाण मांडून होते. वरिष्ठ पोलिस निरीक्षक यांच्या मार्गदर्शनाखाली तपास सुरु आहे.

गरजवंत ५०० विद्यार्थ्यांना १ लाख २५ हजार रुपयांचे शैक्षणिक साहित्य

पुणे : पोलीस दल संपूर्ण कार्यक्षमतेने शहराला शिस्तीत आणण्यासाठी प्रयत्नशील आहे. यासाठी सर्वांचे प्रेम आणि विश्वास आम्हाला लाभत आहे. यामुळे आम्ही पुढील काळात गुन्हेगारीला पूर्णपणे गाडून टाकू, असे पुण्याचे पोलीस आयुक्त अमितेश कुमार यांनी सांगितले. 

शुक्रवार पेठेतील अखिल म्हसोबा उत्सव मंडई ट्रस्ट चा म्हसोबा उत्सव महात्मा फुले मंडई, बुरुड आळी येथे आयोजित करण्यात आला आहे. त्यामध्ये सदाशिव पेठेतील महाराष्ट्र विद्यालयातील गरजवंत ५०० विद्यार्थ्यांना १ लाख २५ हजार रुपयांचे शैक्षणिक साहित्य प्रदान करण्यात आले. यामध्ये ३ हजार फुलस्केप वह्या आणि ५०० पॅड चा समावेश आहे. 

कार्यक्रमाला सद्गुरू मनोहर भोसले, राज्याच्या अंमलीपदार्थ विरोधी फोर्सचे पोलीस उपमहानिरीक्षक प्रवीण कुमार पाटील, परिमंडळ १ चे पोलीस उपायुक्त कृषिकेश रावले, सहाय्यक पोलीस आयुक्त साईनाथ ठोंबरे, पोलीस निरीक्षक संतोष पांढरे, उद्योजक रवींद्र लुंकड, युवा उद्योजक संग्राम मुरकुटे, ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव यांसह लुंकड परिवार उपस्थित होता. आर.के.लुंकड हौसिंग फर्म चे संचालक रमणशेठ लुंकड यांचे विशेष सहकार्य या उपक्रमाला लाभले. 

अमितेश कुमार म्हणाले, धार्मिकतेसोबत सामाजिक व सांस्कृतिक उपक्रमांचे आयोजन ट्रस्टतर्फे केले जाते, ही कौतुकास्पद बाब आहे. समाजातील गरजवंतांसाठी अशा प्रकारचे कार्य व्हायला हवे, असेही त्यांनी सांगितले. उत्सवात ५ दिवस अन्नदान सेवा, सकाळी रुद्राभिषेक व रुद्रयाग आणि दुपारी शहर व जिल्ह्यातील भजनी मंडळाची सेवा तसेच ढोल ताशा वादन देखील सुरु आहे. अखिल म्हसोबा उत्सव मंडई ट्रस्ट पुणे या ट्रस्टच्या फेसबुक पेजवरुन हा उत्सव भाविकांना पाहता येणार असल्याचे ट्रस्टतर्फे सांगण्यात आले.  

दीप अमावस्येनिमित्त ११०० दिव्यांचा दीपोत्सव
गुरुवार, दिनांक २४ जुलै रोजी सायंकाळी ७ वाजता मंडई बुरुड आळीतील मंदिरात दीप अमावस्येनिमित्त ११०० दिव्यांचा दीपोत्सव साजरा करण्यात येणार आहे. फिरत्या रंगीबेरंगी दिव्यांची व फुलांची आकर्षक आरास यानिमित्ताने होणार असून पुणेकरांनी मोठ्या संख्येने सहभागी व्हावे, असे आवाहन ट्रस्टतर्फे करण्यात आले आहे.