पुणे, दि. 10: तंबाखू आणि तंबाखूजन्य पदार्थांचे कोणत्याही स्वरुपातील सेवन ही कर्करोगासह अनेक घातक आजारांना आमंत्रण देणारी बाब असून त्याला आळा घालणे ही सर्वांची संयुक्त जबाबदारी आहे असा सूर जिल्हा रुग्णालय आणि मराठवाडा ग्रामीण विकास संस्था यांच्या संयक्त विद्यमाने राष्ट्रीय तंबाखू नियंत्रण कार्यक्रमांतर्गत आयोजित जिल्हास्तरीय कार्यशाळेतील चर्चेप्रसंगी निघाला.

जिल्हाधिकारी कार्यालयात या कार्यशाळेचे आयोजन करण्यात आले होते. यावेळी जिल्हास्तरीय तंबाखू समन्वय नियंत्रण कक्षाच्या जिल्हा नोडल अधिकारी डॉ. सुहासिनी घाणेकर, जिल्हा सल्लागार आणि मनोवैज्ञानिक हनुमान हाडे, महाराष्ट्र ग्रामीण विकास संस्थेच्या राज्य प्रकल्प अधिकारी झिया शेख, विभागीय व्यवस्थापक अभिजित संघई आदी उपस्थित होते. या कार्यशाळेत सिगारेट आणि अन्य तंबाखूजन्य उत्पादने अधिनियम 2003 (कोट्पा ॲक्ट) मधील तरतुदींबाबत सविस्तर माहिती देण्यात आली.

यावेळी डॉ. घाणेकर म्हणाल्या, तंबाखू सेवन करणाऱ्यांपैकी किमान 50 टक्के व्यक्तींचे मृत्यू तंबाखू सेवनामुळे होणाऱ्या विविध आजारांमुळे होतात. हृदय बंद पडणे (आयएसडी किंवा हर्ट स्ट्रोक), विविध प्रकारचे कर्करोग, गंभीर श्वसनविकार अशा तीन मुख्य परिणामांसह अन्य आजारांनाही तंबाखू, सिगारेट कारणीभूत ठरते.

तंबाखू सेवनामुळे होणारे परिणाम अत्यंत दूरगामी असल्यामुळे कोट्पा ॲक्टची प्रभावी अंमलबजावणी करणे सर्व विभागांची जबाबदारी आहे. शालेय शिक्षण, आरोग्य विभाग, पोलीस, अन्न व औषध प्रशासन, उत्पादन शुल्क, वस्तू व सेवा कर विभाग, परिवहन विभाग आदी विभाग तसेच स्वयंसेवी संस्था यांनी समन्वयाने काम करणे आवश्यक आहे, असे सांगून डॉ. घाणेकर यांनी जिल्हास्तरीय तंबाखू समन्वय नियंत्रण कक्षाकडून करण्यात येणाऱ्या कामाची माहिती दिली.

यावेळी श्रीमती झिया शेख यांनी कोट्पा अधिनियमातील कलम 4 व कलम 6अ आणि 6ब मधील तरतुदींची माहिती दिली. सार्वजनिक ठिकाणी धुम्रपानास बंदी, 18 वर्षाखालील मुलांना तसेच शैक्षणिक संस्थेच्या 100 यार्ड परिसरात तंबाखूजन्य पदार्थ विकण्यास बंदी याबाबतच्या कायद्यातील तरतुदींची माहिती दिली.

तंबाखूजन्य पदार्थांची जाहिरात, प्रदर्शित करणे, स्पॉन्सरशिप करणे या बाबींना असलेली बंदी, तंबाखूजन्य पदार्थांचे वेष्टन करणे व त्यावरील लेबलींग याबाबतची नियमने, त्यावर छापायची धोक्याची चित्रे आणि सूचना, कार्यालयांबाहेर लावायचे सूचना फलक आदींबाबत माहिती श्री. संघई यांनी दिली.

सार्वजनिक आरोग्य दंतरोगतज्ञ डॉ. साहना हेगडे- शेटिया यांनी तंबाखू मुक्त शाळा करण्यासाठी करावयाच्या प्रयत्नांची माहिती दिली.

यावेळी उपस्थितांनी तंबाखू विरोधी शपथ घेतली. कार्यक्रमास आरोग्य, पोलीस, परिवहन, महानगरपालिका, शिक्षण, कृषी, अन्न व औषध प्रशासन आदी विभागांचे अधिकारी उपस्थित होते.

माजी सभागृह नेते गणेश बिडकर यांनी केले आयोजन

पुणे -भारतीय जनता पक्षाचे प्रदेशाध्यक्ष आणि कोथरूड विधानसभा मतदार संघाचे आमदार चंद्रकांतदादा पाटील यांच्या वाढदिवसानिमित्त शुक्रवारी महामृत्युंजय मंत्राचे सामुहिक पठन करण्यात आले. महानगरपालिकेचे माजी सभागृह नेते गणेश बिडकर यांनी या कार्यक्रमाचे आयोजन केले होते.
भाजपचे प्रदेशाध्यक्ष चंद्रकांत पाटील यांचा १० जूनला वाढदिवस असल्याने शहरातील विविध भागात भाजप पदाधिकाऱ्यांच्या वतीने कार्यक्रमांचे आयोजन करण्यात आले होते. पाटील यांच्या उत्तम आरोग्यासाठी, दीर्घायुसाठी आणि राजकीय कारकीर्दीसाठी माजी सभागृह नेते बिडकर यांनी या उपक्रमाचे आयोजन केले होते. सोमवार पेठेतील श्री नागेश्वर मंदीर येथे महामृत्युंजय मंत्राचे सामूहिक पठनाचा कार्यक्रम झाला. यामध्ये बिडकर हे सपत्नीक, सहभागी झाले होते.

मंत्रोच्चाराच्या स्वरांनी मंदिरातील वातावरण चैतन्यमय झाले होते. सोमवार पेठेतील नागरिकांनी हजेरी लावली होती. तेजस सप्तर्षी गुरुजी आणि त्यांचे २७ सहकाऱ्यांनी हे पठन केले. यावेळी सागर अफूवाले, उद्धव मराठे, मंदार पवार, सुजित पुजारी, राहुल शर्मा, माऊली शिवले, सोमनाथ शेळके, सुमीत रांबाडे, प्रताप सावंत, दिलीप मामा बहीरट, निलेश अल्हाट, बाला शेख, सुनील बारणे, सुरेखा शिंदे, कल्पना बहीरट, किरण गोसावी, शिल्पा शेळके, बाळासाहेब घोडके, लक्ष्मी घोडके, वैशाली सोनवणे, अनुराधा तळेगावकर यांच्यासह पक्षाचे स्थानिक पदाधिकारी इतर कार्यकर्ते यामध्ये मोठ्या संख्येने उपस्थित होते.

पुणे- हवामान खात्यासह पुणेकरांना गेली काही दिवसांपासून हुलकावणी देणारा पाऊस आज अखेर सायंकाळी ५ वाजण्याच्या सुमारास बरसला ….

आज दुपारपासूनच आकाशात ढग जमण्यास सुरुवात झाली होती. दुपारी साडेचारच्या सुमारास आंधारून आले. काही वेळातच विजांच्या कडकडाटासह टपोऱ्या थेंबांनी पावसाला सुरुवात झाली. सुमारे अर्धा तास शहरात दमदार पावसाने हजेरी लावली. त्यामुळे काही वेळातच वातावरणात गारवा निर्माण झाला होता.वाढत्या तापमानात उन्हाच्या चटक्याने हैराण झालेल्या पुणेकरांना मोसमी पावसाची चाहूल देणाऱ्या पूर्वमोसमीच्या दमदार सरींची अनुभूती मिळाली. त्यामुळे वातावरणात काही प्रमाणात गारवा निर्माण झाला होता. पावसामुळे काही वेळातच शहरातील रस्ते जलमय झाले. अनेक दिवसांच्या खंडानंतर झालेल्या पहिल्याच दमदार पावसाने अनेकांची तारांबळ उडविली असली, तरी काहींनी त्यात भिजण्याचाही आनंद घेतला.पुणे वेधशाळेने दिलेल्या अंदाजानुसार, शनिवारीही विजांच्या कडकडाटात शहरात मध्यम स्वरूपाच्या पावसाची शक्यता आहे. पुढील पाच ते सहा दिवस शहर आणि परिसरात आकाश ढगाळ राहून हलक्या ते मध्यम स्वरूपाच्या सरी कोसळण्याचा अंदाज पुणे वेधशाळेकडून व्यक्त करण्यात आला आहे.

अरबी समुद्रातून येणाऱ्या बाष्पाचे प्रमाण आणि वाऱ्यांचा वेग कमी असल्याने तब्बल दहा दिवस मोसमी पाऊस कर्नाटकच्या कारवारपर्यंत रखडला होता. मात्र, गुरुवारपासून पोषक वातावरण तयार झाल्याने शुक्रवारी पहाटेपासूनच मोसमी पावसाने वेगवान प्रवास करून दक्षिण कोकणात धडक मारली. त्याचबरोबरीने राज्याच्या इतर भागात पूर्वमोसमी पावसाने जोर धरला. पुणे, पिंपरी-चिंचवड शहर आणि जिल्ह्यातील काही भागामध्येही पूर्वमोसमी पावसाने हजेरी लावली. शहरात यंदा पूर्वमोसमीच्या हंगामात पुरेसा पाऊस झाला नाही. जून महिना सुरू होऊनही पावसाच्या दमदार सरी बरसल्या नव्हत्या. त्यातच शहरातील तापमानाचा पारा वाढला असल्याने उन्हाचा चटका आणि उकाड्याने नागरिक हैराण झाले होते. गेल्या दोन दिवसांपासून दुपारनंतर आकाश ढगाळ होत असले, तरी पावसाचा केवळ हलका शिडकावा झाला होता. १२ ते १६ जून या कालावधीत शहरात हलक्या स्वरूपाच्या पावसाची शक्यता व्यक्त करण्यात आली आहे

पहिल्याच पावसात शहराच्या वेगवेगळ्या भागांमध्ये झाडपडीच्या 30 घटना घडल्या.

कर्वे रस्त्यावरील एका रुग्णालयाच्या पाठीमागील बाजुला असलेली भिंत पडल्याने 11 वाहने तर पोलिस आयुक्तालयाच्या परिसरातील झाड कोसळल्यामुळे 25 हून अधिक वाहनांचे नुकसान झाले. काही ठिकाणी रस्त्यांवर पाणी साठल्याच्याही घटना घडली.

जोराचा वारा व पावसाच्या मोठ्या सरींमुळे शहराच्या वेगवेगळ्या भागात मोठमोठी झाडे उन्मळुन, तर काही ठिकाणी तुटून पडली. पोलिस आयुक्तालयाच्या परिसरात मोठे झाड कोसळून रस्त्यावर पडले. त्यामुळे संपुर्ण रस्ता काही वेळ बंद राहीला. तर रस्त्याच्याकडेला पार्कींग केलेल्या 20 ते 25 दुचाकींवर झाड पडल्याने त्यांचे नुकसान झाले. याबरोबरच कर्वे रस्त्यावरील सह्याद्री रुग्णालयाच्या पाठीमागील बाजुला असलेली भिंत पडल्याने तेथेही दहा दुचाकी व एक चारचाकी वाहन अडकल्याने त्याचे नुकसान झाले.

दरम्यान, पावसामुळे शहरातील पर्वती शाहू कॉलनी, जीपीओ, पर्वती येथील स्टेट बॅंक कॉलनी, स्वारगेट एसटी कॉलनी, पोलिस आयुक्तालय, भवानी पेठ येथील बीएसएनएलचे कार्यालय, प्रभात रस्ता, औंध येथील आंबेडकर चौक, राजभवन परिसर, गुरुवार पेठेतील पंचहौद, कोंढवा येथील शिवनेरी नगर, एनआयबीएम रस्ता, कात्रज-कोंढवा रस्ता, नवी पेठेतील पत्रकार भवन, राजेंद्र नगर, कोंढवा येथील आनंदपुरा रुग्णालय, कर्वे सह्याद्री हॉस्पिटलच्या मागे सीमा भिंत पडली असून दहा दुचाकी व एक चारचाकी गाडी अडकल्याची माहिती अग्निशामक दलाच्यावतीने देण्यात आली. दरम्यान, झाडपडीच्या घटना घडलेल्या ठिकाणी अग्निशामक दलाच्या पथकाने तत्काळ पोहचून रस्ता मोकळा करण्यास प्राधान्य दिले. जोरदार पावसामुळे शहराच्या काही भागातील रस्त्यांवर मोठ्या प्रमाणात पाणी साठले होते. त्यातुन दुचाकी काढताना नागरीकांची तारांबळ उडाली. तर काही ठिकाणी रस्ता निसरडा झाल्याने दुचाकी वाहने घसरून पडण्याच्या घटनाही काही प्रमाणात घडल्या.

औंध :

माजी नगरसेवक सनी विनायक निम्हण यांच्या वतीने 5 जून जागतिक पर्यावरण दिनाच्या निमित्ताने ५ जून ते १५ जून २०२२ दरम्यान आम्ही औंध, सोमेश्वरवाडी, बाणेर, बालेवाडी ‘सोसायटी गार्डन संगोपन अभियान’ हा एक विशेष हरित उपक्रम राबविला जात आहे.

या उपक्रमाबद्दल बोलताना माजी नगरसेवक सनी निम्हण म्हणाले की, आपली सोसायटी स्वच्छ, सुंदर असेल तर परिसराची सर्वांगीण प्रगती साधता येते. याच विचारातून ५ जून रोजी असलेल्या जागतिक पर्यावरण दिनानिमित्त ५ जून ते १५ जून २०२२ दरम्यान आम्ही ‘सोसायटी गार्डन संगोपन अभियान’ हा एक विशेष हरित उपक्रम राबवित आहोत.

या अभियानाला सर्व सोसायटीतर्फे मोठ्या प्रमाणात प्रतिसाद मिळताना दिसतोय आणि त्याचे अतिशय छान परिणाम देखील सोसायटीमध्ये व पर्यायाने परिसरात दिसत आहेत. यामध्ये झाडांचे चॉपिंग, ट्रिमिंग व कटिंग, जैविक फवारणीतून कीड नियंत्रण, झाडांना सेंद्रिय खतांचा डोस इत्यादी सेवा मोफत प्रदान केल्या जात आहेत. या अभियानाला यशस्वी करण्यासाठी संबंधित सोसायटी मेंबर्स व परिसरातील नागरिकांचे सातत्याने विशेष सहाय्य लाभत आहे. तसेच हे अभियान यशस्वीपणे राबविण्यासाठी कष्ट घेत असलेल्या कामगारांचेही सनी निम्हण यांनी मनापासून आभार मानले

आपण देखील आपल्या सोसायटीमध्ये हा उपक्रम राबविण्यासाठी व आपल्या सोसायटी गार्डनची निगा राखण्यासाठी आम्हाला 8308123555 वर संपर्क साधावा असे आव्हान सनी निम्हण यांनी केले आहे.

विधवा प्रथा हद्दपार करूया, स्री सन्मानाचे साक्षीदार होऊया-राज्य महिला आयोगाच्या अध्यक्षा रुपाली चाकणकर

पुणे, दि. ९: आजही समाजात विधवा प्रथेसारख्या अनिष्ट प्रथा प्रचलित असल्याचे आढळून असून राज्यातील प्रत्येक गावाने विधवा प्रथा मुक्तीचा ठराव करण्यासाठी पुढाकार घ्यावा, असे आवाहन राज्य महिला आयोगाच्या अध्यक्षा रुपाली चाकणकर यांनी केले.

महाराष्ट्र राज्य महिला आयोगाच्या अध्यक्षा रुपाली चाकणकर यांच्या पुढाकाराने खडकवासला परिसरातील धायरीसह एकूण २९ ग्रामपंचायतींनी आज विधवा प्रथा बंदी करणारा ठराव मंजूर केला. यावेळी धायरी येथे आयोजित कार्यक्रमात त्या बोलत होत्या. कार्यक्रमाला महानगरपालिका आयुक्त विक्रम कुमार, पोलीस आयुक्त अमिताभ गुप्ता, पोलीस अधीक्षक अभिनव देशमुख, अतिरिक्त आयुक्त विलास कानडे, उपमुख्य कार्यकारी अधिकारी सचिन घाडगे, उप मुख्य कार्यकारी अधिकारी जामशिंग गिरासे, तहसीलदार तृप्ती कोलते, हवेलीचे गटविकास अधिकारी प्रशांत शिर्के उपस्थित होते.

श्रीमती चाकणकर म्हणाल्या, महिला आयोगाच्यावतीने राज्यात बालविवाह, गर्भलिंग निदानचाचणी, स्त्रीभ्रूणहत्या, हुंडाबळी, विधवा, एकल महिला यांच्या समस्यांबाबत जनजागृती करण्यात येत आहे. तसेच महिलांना समान दर्जा देण्यासाठी व समाजातील कुप्रथा बंद करण्याचे काम सुरू आहे. खडकवासला मतदार संघातून शंभर टक्के विधवा प्रथा बंद करण्याचे ठराव होणे कौतुकास्पद आणि मार्गदर्शक आहे. राज्यातील गावागावात असे ठराव होतील, अशी अपेक्षा त्यांनी व्यक्त केली. समाजात महिलांना समान दर्जा देण्यासाठी प्रत्येकाने पुढाकार घ्यावा, असे आवाहन त्यांनी केले.

श्री. गुप्ता म्हणाले, समाजातील कुप्रथा बंद करण्यासाठी आपला सर्वांचा पुढाकार आवश्यक आहे. समाजातील कुप्रथा बंद करून महिलांना सन्मान देणारा हा अत्यंत महत्त्वाचा उपक्रम आहे. समाजातील कुप्रथा बंद करण्यासाठी सर्व मिळून एकत्रित करावे, असेही ते म्हणाले.

महानगरपालिकेचे आयुक्त विक्रमकुमार म्हणाले, खडकवासला विभागातील अनेक ग्रामपंचायतीनी विधवा प्रथे विरुद्ध ठराव केला. २९ ग्रामपंचायतींचा कुप्रथा बंद करून महिलांना सन्मान देणारा हा उपक्रम महत्वपूर्ण ठरणार आहे. एकाच वेळी ठराव करणारा राज्यातील हा पहिलाच उपक्रम ठरणार आहे. विधवा महिलांना समान अधिकार आहेत. गावातील सरपंच, महिला यांनी यासाठी पुढाकार घेतला ही अभिनंदनीय बाब आहे. राज्यातील गावागावात असे उपक्रम आवश्यक असल्याचे त्यांनी सांगितले.

जिल्हा पोलिस अधीक्षक डॉ.देशमुख म्हणाले, स्री पुरुष समानतेचा इतिहास लिहला जाईल, त्यावेळी या ऐतिहासिक कार्यक्रमाची त्यात निश्चितपणे नोंद असणार आहे. कायद्यासोबतच अनुरूप असे सामाजिक वातावरण निर्माण करणे आवश्यक आहे. आजच्या या ठरावाच्या कार्यक्रमातून लोकचळवळ उभी राहील, महिलांना सन्मान देणारी चांगली सुरुवात असल्याचा उल्लेख त्यांनी केला.

महिला आयोगाच्या प्रशासन अधिकारी श्रीमती ठाकूर यांनी प्रास्ताविक केले.महिला आयोगाच्या वतीने राबविण्यात येत असलेल्या विविध उपक्रमाबाबत त्यांनी माहिती दिली.

यावेळी अतिरिक्त आयुक्त श्री. कानडे, तहसीलदार श्रीमती कोलते,सरपंच मोनिका पडेर, राहुल पोकळे यांनी मनोगत व्यक्त केले.

यावेळी सरपंच, पोलीस पाटील, ग्रामसेवक,महिला आदी उपस्थित होते.

एकाच दिवशी तब्बल २९ ग्रामपंचायतीनी केला विधवा प्रथेविरुद्ध ठराव

राज्य महिला आयोगाने विधवा प्रथासारख्या अनिष्ट प्रथेचे निर्मूलन होण्यासाठी राज्यातील सर्व ग्रामपंचायतींना आवाहन केले होते त्याला राज्यभरातून सकारात्मक असा प्रतिसाद मिळत आहे. राज्य महिला आयोगाच्या अध्यक्षा रुपाली चाकणकर यांच्या पुढाकाराने खडकवासला मतदारसंघातील धायरीसह तब्बल २९ ग्रामपंचायतींनी व काही प्रभागातील नागरिकांनी आज हा ठराव मंजूर केला आहे. खडकवासला हा महाराष्ट्रातील१०० टक्के विधवा प्रथा बंदी करणारा पहिला मतदारसंघ असणार आहे.

पुणे – शहराचे विद्यमान आमदार,माजी महापौर, माजी स्थायी समिती अध्यक्ष, सभागृहनेते आणि सोबतीला डझनभर नगरसेवक भारतीय जनता पक्षाचे असतानाही कसबा विधानसभा मतदार संघात महापालिकेकडून विकासकामे होत नसल्याचे सांगत चक्क भारतीय जनता पक्षाने महापालिका प्रशासन विरोधात आंदोलन करण्यात आले.विश्रामबाग क्षेत्रीय कार्यालय येथे व भवानी पेठ क्षेत्रीय कार्यालय येथे प्रशासना विरोधात हे आंदोलन करण्यात आले.

विशेष म्हणजे या मतदारसंघात गेल्या पाच वर्षात सर्वाधिक सिमेंट रस्ते, ड्रेनेज लाईन बदलणे, पथदिवे, तसेच पदपथ करण्यासाठी कोट्यवधीची कामे झाली आहेत. असे असतानाही, आता या कामासाठी केलेल्या खोदाई मुळे रस्त्यावर खड्डे पडले असून आता त्यासाठी भाजपकडून आंदोलन केले जात असल्याने भाजपचे आंदोलनावर आश्‍चर्य व्यक्त केले जात आहे.

तर हीच कामे सुरू असताना त्याचे श्रेय घेण्याचे फलक भाजप नगरसेवकांनी लावलेले असताना आता मात्र या आंदोलनात भाजपकडून रस्त्यावरील खड्ड्यांचे खापर महापालिका प्रशासनावर या आंदोलनात फोडण्यात आले. मात्र, या आंदोलनामुळे महापालिकेच्या पदाधिकाऱ्यांच्या माध्यमातून कसबा मतदारसंघातील आपल्या प्रभागात खर्च केलेला निधी कुठे गेला असा प्रश्‍न विचारण्याची वेळ पुणेकरांवर आली आहे.

एका बाजूला विकास कामे होत नसल्याची ओरड माजी सत्ताधारी भाजपच करत असताना, दुसऱ्या बाजूला भाजपचे माजी नगरसेवक मात्र प्रभागात सुस्त आहेत. प्रशासकाच्या कालावधीत विकासकामे होण्यासाठी नगरसेवकांनी डबा घेऊन पालिकेत यावे नागरिकाच्या समस्या सोडवाव्यात, अशा सूचना प्रदेशाध्यक्ष चंद्रकांत पाटील यांनी माजी पदाधिकारी तसेच नगरसेवकांना दिल्या होत्या.

पुणे- महानगरपालिकेच्या मुख्य इमारत येथे आज इलेक्ट्रिक व्हेईकलच्या चार्जिंग व्यवस्थेचे महापालिका आयुक्त विक्रम कुमार यांच्या हस्ते उद्घाटन करण्यात आले. पुणे महानगरपालिकेचे सेवक व पुणे महानगरपालिकेत येणारे नागरिक यांच्कारिता पुणे महानगरपालिकेतर्फे चार्जिंग point ची व्यवस्था करण्यात आलेली आहे. तसेच शहरात इलेक्ट्रिक वाहनाच्या वापरास प्रोत्साहन मिळावे आणि इलेक्ट्रिक वाहनांचे प्रमाण वाढावे यासाठी EV सेल कायम प्रयत्नशील राहील असे महापालिका आयुक्त विक्रम कुमार यांनी सांगितले.
या प्रसंगी अतिरिक्त महापालिका आयुक्त (ई) डॉ. कुणाल खेमनार, कार्यकारी अभियंता ( विद्युत) श्रीनिवास कंदूल, पर्यावरण अधिकारी मंगेश दिघे इत्यादी अधिकारी व कर्मचारी मोठ्या संख्येने उपस्थित होते.