जिल्हाध्यक्ष केतकी कुलकर्णी यांच्या पुढाकारातून मेळावा, सभासद संमेलनाचे आयोजन

पुणे : ब्राह्मण महासंघाचे कार्य महाराष्ट्रासह देशातील 22 राज्यात सुरू आहे. नव्या काळाची आव्हाने पेलण्यासाठी संघटन मजबूत करणे, सदस्यसंख्या वाढवणे आणि सातत्याने एकत्र येणे आवश्यक आहे. महिला मेळावे, सभासद संमेलनासारखे उपक्रम त्यामुळे स्वागतार्ह आहेत, असे प्रतिपादन अखिल भारतीय ब्राह्मण महासंघाचे राष्ट्रीय अध्यक्ष डॉ. गोविंद कुलकर्णी यांनी रविवारी येथे केले.
अखिल भारतीय ब्राह्मण महासंघाच्या पुणे जिल्हा महिला आघाडीच्या जिल्हाध्यक्ष केतकी कुलकर्णी यांनी आयोजित केलेल्या महिला मेळावा व सभासद संमेलनात ते बोलत होते. यावेळी अखिल भारतीय ब्राह्मण महासंघाचे महाराष्ट्र प्रदेशाध्यक्ष निखिल लातूरकर, माजी प्रदेशाध्यक्षा मोहिनी पत्की, जिल्हाध्यक्ष मंदार रेडे आणि महिला आघाडीच्या जिल्हाध्यक्ष केतकी कुलकर्णी हे मान्यवर व्यासपीठावर उपस्थित होते. लॉ कॉलेज रोडवरील आगाशे शाळेच्या सभागृहात मेळावा आयोजित केला होता. अखिल भारतीय ब्राह्मण महासंघाच्या प्रदेश कार्याध्यक्षपदी केतकी कुलकर्णी यांच्या निवडीची घोषणा या प्रसंगी करण्यात आली.
प्रास्ताविक करताना केतकी कुलकर्णी म्हणाल्या, आपल्या ज्ञातीचा अभिमान बाळगत, एकत्र येणे आणि संघटन वाढवणे, यावर भर देत महिला आघाडीचे काम सुरू आहे. उद्योजकीय वृत्ती वाढीस लागावी, यासाठी विशेष उपक्रम हाती घेण्यात आले आहेत.
डॉ. गोविंद कुलकर्णी पुढे म्हणाले, “केतकी कुलकर्णी यांच्या समर्थ आणि धडाडीच्या नेतृत्वाखाली पुणे जिल्हा महिला आघाडी उत्तम कार्य करत आहे. लवकरच महासंघाच्या 10 हजार पदाधिकाऱ्यांचा माहिती असणारे बुकलेट प्रकाशित केले जाईल. प्रदेशाध्यक्ष निखिल लातूरकर यांनी महासंघाच्या विविध शाखांची व कार्याची माहिती दिली. जिल्हाध्यक्ष मंदार रेडे यांनी मनोगत व्यक्त केले.
मोहिनी पत्की म्हणाल्या, ज्ञातीमधील पौरोहित्य करणाऱ्यांना नियमित मानधन मिळावे, तसेच ॲट्रोसिटीचा अधिकार मिळावा, या मागण्यांसाठी मोठ्या प्रमाणावर माहिती गोळा करण्याची आवश्यकता आहे.
आर्थिक साक्षरता आणि गुंतवणूक या विषयावर मार्गदर्शन करताना यामिनी मठकरी यांनी महिलांचे आर्थिक विषयांतील निर्णयस्वातंत्र्य आणि सूक्ष्म नियोजन, यांची सांगड आवश्यक असल्याचे सांगितले. रेणुका जोशी यांनी महिलांचे आरोग्य हा विषय मांडला.
महासंघासाठी उल्लेखनीय कार्य करणाऱ्या महिलांचा सत्कार करण्यात आला. जिल्हा स्तरावरील महिला शाखांच्या अध्यक्षांनी प्रातिनिधिक स्वरुपात मनोगते व्यक्त केली. नेहा नाटेकर यांनी शंखवादन केले. सीमा रानडे यांनी सरस्वती वंदना सादर केली. माधवी पानसरे यांनी सूत्रसंचालन केले तर महिला आघाडीच्या सरचिटणीस आकांक्षा देशपांडे यांनी आभार मानले.

पीएमआरडीएच्या पथकाचे बचाव कार्य; एका कामगाराचा दुर्दैवी मृत्यू

पुणे (दि.४ ) : नांदेड सिटी शेजारी पुणे महापालिकेअंतर्गत सुरू असलेल्या पाईप लाईनच्या मातीच्या ढगाराखाली दबलेल्या ४ पैकी ३ कामगारांचे प्राण वाचवण्यात पुणे महानगर प्रदेश विकास प्राधिकरणाच्या (पीएमआरडीए) अग्निशमन विभाग आणि पीडीआरएफच्या पथकाला यश आले. संबंधित कामगारांना उपचारासाठी रुग्णालयात हलवण्यात आले. परंतु या घटनेत एका कामगाराचा दुर्दैवी मृत्यू झाल्याची घटना सोमवारी (दि.४) सायंकाळी सव्वा सहाच्या सुमारास घडली.

गेल्या काही दिवसापासून नांदेड सिटी शेजारी जायका प्रोजेक्ट अंतर्गत नदी सुधार योजनेचे सुरू आहे. यासाठी संबंधित भागात पाईपलाईन टाकण्यासाठी मोठी चारी खोदण्याचे काम सुरू होते. पण दुर्दैवाने या चारित ४ कामगार मातीच्या ढिगार्‍याखाली दबल्याची घटना घडली. यासंबंधी सायंकाळी सहा वाजता पीएमआरडीएच्या पथकाला माहिती मिळताच त्यांनी तातडीने अवघ्या पाच ते सात मिनिटात घटनास्थळ गाठत मदत कार्यास सुरुवात केली. त्यामुळे चार जणांपैकी तिघांना वाचवण्यात पीएमआरडीएच्या अग्निशमन विभाग व पीडीआरएफच्या पथकाला यश आले. यातील एका कामगाराचा दुर्दैवी घटनेत मृत्यू झाला.

मदत कार्य तातडीने मिळाल्यामुळे चार कामगारांपैकी तिघांचा जीव वाचवण्यात पीएमआरडीएच्या पथकाला यश आले. संबंधित कामगारांना उपचारासाठी रुग्णालयात हलवण्यात आले आहे. या पथकात अग्निशमन व पीडीआरएफच्या ३० जवानांनी शर्तीचे प्रयत्न केले. पुणे महापालिकेच्या अग्निशमन विभागासह पीएमआरडीएचे मुख्य अग्निशमन अधिकारी देवेंद्र पोटफोडे, विभागीय अग्निशमन अधिकारी सुजित पाटील यांच्या मार्गदर्शनाखाली अग्निशमन जवान आणि पीडीआरएफ जवान यांनी रेस्क्यू ऑपरेशन केले.

पुणे : महाराष्ट्रीय कलोपासक आयोजित हीरक महोत्सवी पुरुषोत्तम करंडक एकांकिका स्पर्धेला रविवार, दि. 10 ऑगस्ट रोजी प्रारंभ होणार आहे. अखिल भारतीय मराठा शिक्षण परिषदेचे अनंतराव पवार कॉलेज ऑफ इंजिनिअरिंग अँड रिसर्च ‌‘सत्यं शोधं सुंदरम्‌‍‌’ या एकांकिकेने हीरक महोत्सवी वर्षातील स्पर्धेला सुरुवात होणार आहे.

स्पर्धा दि. 10 ऑगस्ट ते 24 ऑगस्ट 2025 या कालावधीत भरत नाट्य मंदिरात होणार आहे. स्पर्धेसाठी 51 संघांनी प्रवेश निश्चित केला असून स्पर्धेचे लॉटस्‌‍ आज (दि. 4 ऑगस्ट) शनिवार पेठेतील सुदर्शन रंगमंच येथे विद्यार्थी प्रतिनिधींच्या उपस्थितीत काढण्यात आले. स्पर्धेसंदर्भातील नियमावली स्पर्धक संघांना सुरुवातीस समजावून सांगण्यात आली. त्यानंतर विद्यार्थी स्पर्धकांच्या हस्ते चिठ्ठ््या काढून लॉटस्‌‍ निश्चित करण्यात आले.

स्पर्धा दि. 10, दि. 17 आणि दि. 24 ऑगस्ट रोजी सकाळी 9 ते 12 आणि सायंकाळी 5 ते 9 अशा दोन सत्रात होणार असून दि. 11 ते 16 ऑगस्ट आणि दि. 18 ते 23 ऑगस्ट या कालावधीत सायंकाळी 5 ते 9 या वेळात होणार आहे.

नाट्यसंस्कार कला अकादमी आयोजित नाट्यछटा स्पर्धेचे पारितोषिक वितरण

पुणे : नाट्यकलेद्वारे माणूस केवळ शिकत नाही तर चांगला, आदर्शवत माणूस म्हणूनही घडतो. नाट्यकलेचे संस्कार बालवयापासूनच होत आहेत ही आनंदाची, अभिमानाची गोष्ट आहे, असे मत सावित्रीबाई फुले पुणे विद्यापीठातील विद्यावाणीचे कार्यक्रम अधिकारी श्रीयोगी मुंगी यांनी व्यक्त केले.

नाट्यसंस्कार कला अकादमी आयोजित 34व्या दिवाकर स्मृती नाट्यछटा स्पर्धेचा पारितोषिक वितरण समारंभ सदाशिव पेठेतील उद्यान प्रसाद सभागृहात आयोजित करण्यात आला होता. त्या वेळी श्रीयोगी मुंगी बोलत होते. स्पर्धेचे पारितोषिक वितरण ज्येष्ठ कवयित्री संजीवनी बोकील यांच्या हस्ते झाले.

संजीवनी बोकील यांनी स्पर्धकांना गोष्टीरुपी मार्गदर्शन केले. शूरसेनची गोष्ट सांगून निसर्गातील पाने फुले वेली, फळे आणि बागा कशाप्रकारे मानवी जीवन सुंदर करण्यासाठी मानवाला मदत करतात हे सांगितले. आपल्या आजूबाजूचे वातावरण कितीही प्रदूषित झाले असले तरी आपले मन स्वच्छ आणि निर्मळ असावे, असेही त्या म्हणाल्या.

प्रास्ताविकात नाट्यसंस्कार कला अकादमीचे प्रमुख विश्वस्त प्रकाश पारखी म्हणाले, सहाशेपेक्षा जास्त स्पर्धकांनी या स्पर्धेत सहभाग नोंदविला होता.

कार्यक्रमाची सुरुवात पूजा पारखी आणि दिप्ती असवडेकर यांच्या नाट्यसंस्कार गीताने झाली. दिपाली निरगुडकर यांनी पाहुण्यांचा परिचय करून दिला. प्रतीक पारखी, पूजा पारखी, अनुराधा कुलकर्णी, आशिष तिखे, दिप्ती असवडेकर, राधिका देशपांडे यांनी कार्यक्रमाचे संयोजन केले. विश्वस्त संध्या कुलकर्णी यांनी सूत्रसंचालन केले तर अपूर्वा तिखे यांनी आभार मानले.

लेखन स्पर्धेतील विजेत्या नाट्यछटांचा संग्रह असलेल्या ‌‘सुमन नाट्यछटा‌’ आणि संध्या कुलकर्णी लिखित ‌‘सप्तरंगी नाट्यछटा‌’ या दोन पुस्तकांचे प्रकाशन या प्रसंगी झाले.

स्पर्धेचा सविस्तर निकाल :
गट क्र. 1 (शिशुगट) : प्रथम -प्रज्वल जोशी, द्वितीय – नित्या चोपडे, तृतीय – मिहित मठपती, उत्तेजनार्थ – विराट गोटे.
गट क्र. 2 (पहिली-दुसरी) : प्रथम – आदित्य कुलकर्णी, द्वितीय – शौनक मेस्त्री, तृतीय – मीरा अडकर, उत्तेजनार्थ – अमायरा जाधव, अनिश रिसबूड.
गट क्र. 3 (तिसरी-चौथी) : प्रथम – गार्गी वैद्य, द्वितीय – शिवंश मोरे, तृतीय – आनिका लहुरीकर, उत्तेजनार्थ – राघव घाटणेकर, पार्थ ठोंबरे.
गट क्र. 4 (पाचवी-सातवी) : प्रथम – स्पर्श कलवनकर, द्वितीय – नील देशपांडे, तृतीय – आरोही उंडे, उत्तेजनार्थ – राही पोहनेरकर, सन्विता कुलकर्णी.
गट क्र. 5 (आठवी-दहावी) : प्रथम – अर्चीस थत्ते, द्वितीय – इरा जोशी, तृतीय – सई भोसले, उत्तेजनार्थ – सनत देशपांडे, कैवल्य चांदवले.
गट क्र. 6 (खुला) : प्रथम – निकिता वाणी, द्वितीय – हर्षदा कुलकर्णी, तृतीय – सोमनाथ भवर, उत्तेजनार्थ – अश्विनी आठवले, सचिन काळे.

पुरातत्त्व आणि संग्रहालये महाराष्ट्र राज्याचे संचालक डाॅ. तेजस गर्गे 

पुणे – आज समाजमाध्यमांवर विषय भडकपणे मांडले जातात आणि त्यामुळे आपण सत्यापासून दूर जात आहोत. नागरिकांपर्यंत खरा इतिहास पोहोचवण्यासाठी संशोधकांनी सुवर्णमध्य शोधणे आवश्यक आहे. मात्र आज समाज अस्मिता प्रकर्षाने पुढे येत असल्यामुळे त्याचाही संशोधकांवरही परिणाम होत आहे. त्यामुळे अनेक संशोधक खरा इतिहास मांडण्यास घाबरतात. अशा परिस्थितीत त्यांनी इतिहास मांडण्यासाठी वेगळा मार्ग अवलंबण्याची गरज आहे, असे मत महाराष्ट्र राज्याच्या पुरातत्त्व आणि संग्रहालयाचे संचालक डॉ. तेजस गर्गे यांनी व्यक्त केले.

इंद्रायणी साहित्य द्वारा प्रकाशित, संदीप परांजपे संपादित ऐतिहासिक नोंदी दुर्गांच्या, जिल्हा सातारा आणि कोल्हापूर या पुस्तकाचा प्रकाशन समारंभ भारत इतिहास संशोधन मंडळ येथे पार पडला. यावेळी ज्येष्ठ गिर्यारोहक वसंत लिमये, पुरातत्त्व संशोधक डॉ. सचिन जोशी, संदीप परांजपे, अरुणकुमार बाभूळगावकर उपस्थित होते. 

डॉ. तेजस गर्गे म्हणाले,  संशोधक म्हणून आपण अनेकदा एकटे असतो. परंतु, संशोधकांनी एकत्र येऊन काम केल्यास तयार होणारा संदर्भग्रंथ हा बहुविषयक स्वरूपाचा असेल. आपला इतिहास इंग्रजी भाषेत फारच अल्प प्रमाणात उपलब्ध आहे. म्हणूनच मराठीबरोबरच इंग्रजीतही इतिहासाची नोंद व्हायला हवी, तेव्हाच तो जागतिक पातळीवर पोहोचू शकेल, असेही त्यांनी सांगितले.

डॉ. सचिन जोशी म्हणाले, अनेक सर्वसामान्य लोक किल्ल्यांवर जातात, पण तिथे नेमके काय पाहायचे आणि किल्ला कसा पाहावा याची माहिती त्यांना नसते. आपल्याला किल्ल्यांचा इतिहास संपूर्ण माहिती नसल्यामुळे त्याचा योग्य संदर्भ लक्षात येत नाही. मात्र, किल्ल्यावर जाण्यापूर्वी त्याचा इतिहास वाचून गेल्यास, तेथे अनेक ऐतिहासिक गोष्टींचे संदर्भ समजू शकतात. त्याचबरोबर गडकिल्ल्यांवर पीएच.डी. करणाऱ्या विद्यार्थ्यांना संशोधनासाठी मदत होईल, असेही त्यांनी सांगितले. वसंत लिमये यांनी उपस्थितांना मार्गदर्शन केले. 

संदिप परांजपे यांनी पुस्तकाची माहिती दिली आणि त्याचा उपयोग सर्वसामान्य, अभ्यासकांना कसा होईल हे सांगितले. चिंतामणी केळकर यांनी सूत्रसंचालन केले. मुग्धा कोपर्डेकर यांनी आभार मानले. 

पुणे- ओंकार चॅरिटेबल ट्रस्टच्या वतीने इयत्ता दहावी आणि बारावीच्या परीक्षेत यश संपादन केलेल्या विद्यार्थ्यांचा सत्कार समारंभ, करिअर मार्गदर्शन शिबिर आणि शिष्यवृत्ती प्रदान सोहळा काल मोठ्या उत्साहात संपन्न झाला.

याप्रसंगी ज्येष्ठ समाजसेवक पद्मश्री गिरीश प्रभुणे आणि एअरमार्शल भूषण गोखले यांना प्रमुख अतिथी म्हणून निमंत्रित करण्यात आले होते, परंतु काही कारणास्तव त्यांचे आगमन रद्द झाले. यावेळी महाराष्ट्र राज्य मराठी भाषा मंडळाचे संचालक आणि ज्येष्ठ साहित्यिक डॉ. केशव देशमुख सर यांनी कार्यक्रमाच्या अध्यक्षपदी उपस्थिती दर्शवली तर सुप्रसिद्ध साहित्यिक वि. दा. पिंगळे सर, क्रिकेट खेळाचे प्रशिक्षक श्याम ओक, माजी नगरसेविका सौ लक्ष्मी दुधाने यांच्या प्रमुख उपस्थितीत कार्यक्रम पार पडला.

यावेळी ओंकार चॅरिटेबल ट्रस्टच्या वतीने इयत्ता बारावीच्या ओजस देशपांडे, तेजल गव्हाणे, सार्थक भास्कर, हर्षदा शेलार आणि ऋतुजा भांडवलकर या पाच विद्यार्थ्यांना तर इयत्ता दहावीच्या गुरुराज धोंगडे, सई धडपळे, मिहीर आपटे, आदर्श सातपुते आणि भार्गव मराठे या पाच विद्यार्थ्यांना सन्मानचिन्ह आणि आर्थिक शिष्यवृत्ती प्रदान करण्यात आली. याप्रसंगी तब्बल पाचशे ते साडेपाचशे विद्यार्थ्यांनी आपल्या पालकांसह उपस्थिती दर्शवली असून आपल्या प्रभागातील पलक निलेश वरपे या महाराष्ट्र राज्याकडून क्रिकेट खेळणाऱ्या विद्यार्थिनीने इयत्ता दहावीच्या परीक्षेत ८३% गुण प्राप्त केल्याबद्दल विशेष सत्कार करण्यात आला. अभ्यासासह आपला छंद जोपासत खेळाला प्राधान्य दिले आणि पलकने उत्तम गुण प्राप्त केले असून तिच्या या मेहनतीत तिच्या पालकांनीही साथ दिल्याबद्दल त्यांचेही अभिनंदन करत सत्कार केला.

यावेळी मार्गदर्शन करताना पुस्तकांचे महत्व, अभ्यासाबद्दल दृष्टिकोन आणि गेल्या १४ वर्षांत ओंकार चॅरिटेबल ट्रस्टच्या वतीने करण्यात आलेले कार्य आदी गोष्टींवर प्रकाश टाकण्यात आला. समाजात वावरत असताना आपण समाजासाठी काही देणे लागतो, असे प्रतिपादन करताना सहकाऱ्यांचे आभार मानले. यावेळी माझे सहकारी श्री. प्रमोदजी शिंदे, दीपकजी चांदकुडे, श्री. किशोरजी शेडगे, श्री. विष्णूजी सरगर, श्री. विनायकजी देशमुख तर सूत्रसंचालक रत्नाताई दहीवळकर तसेच ओंकार चॅरिटेबल ट्रस्टचे पदाधिकारी उपस्थित होते. यावेळी उपस्थित प्रत्येक विद्यार्थ्याला ॲडव्हान्स डॉक्युमेंट फोल्डर प्रदान करण्यात आल्याने त्यांच्या चेहऱ्यावरील आनंद अवर्णनीय होता.

आपल्या समाजातील विद्यार्थी वर्गाला यथायोग्य मार्गदर्शन लाभणे आवश्यक असून याबाबत शिबिराचे आयोजन केल्याने पालक आणि विद्यार्थी वर्गातून समाधान व्यक्त केले जात आहे. त्यांचे हे शब्द हीच आमच्या परिश्रमांची पोहोच पावती असून भविष्यातही असेच अधिकाधिक उपक्रम राबवण्याचा आमचा मानस असेल.

पोलिस अधिकाऱ्याने दोन दिवस थांबा, अशी विनंती करताच संतप्त झालेल्या प्रकार आंबेडकरांनी ‘दोन दिवस नाही ताबडतोब एफआयआर झाली पाहिजे. नाहीतर मी….

पुणे-कोथरूड पोलिस ठाण्यात तिन्ही दलित तरुणींवर पोलिसांकडून कथित छळ केल्याची धक्कादायक घटना रविवारी उघड झाली आहे. या प्रकरणात तब्बल 24 तास उलटल्यानंतरही पुणे पोलिसांकडून कोणताही गुन्हा दाखल करण्यात आलेला नाही. परिणामी, राजकीय आणि सामाजिक वर्तुळात तीव्र प्रतिक्रिया उमटत आहेत. वंचित बहुजन आघाडीचे अध्यक्ष प्रकाश आंबेडकर यांनी एका पोलिस अधिकाऱ्याला फोन करून निर्वाणीचा इशारा दिला.

पुण्यातील या प्रकरणात गुन्हा दाखल करण्यासाठी रविवारी रात्रीपासून आमदार रोहित पवार, वंचित बहुजन आघाडीच्या नेत्या अंजली आणि सुजात आंबेडकर यांच्यासह अनेक सामाजिक कार्यकर्ते पुणे पोलिस आयुक्तालयात ठाण मांडून बसले होते. पहाटे साडेतीन वाजेपर्यंत वरिष्ठ अधिकाऱ्यांशी चर्चा झाली, मात्र एफआयआर नोंदवण्यात आला नाही. यानंतर संतप्त झालेल्या प्रकाश आंबेडकर यांनी कदम नावाच्या पोलिस अधिकाऱ्याला फोन लावून याबद्दल जाब विचारला.

प्रकाश आंबेडकर यांनी कदम नावाच्या पोलिस अधिकाऱ्याला फोन लावला. मात्र, एक-दोन दिवसांत एफआयआर दाखल करुन घेऊ, असे तो अधिकारी सांगत होता. त्यावर प्रकाश आंबेडकर यांनी म्हटले की, एक लक्षात घ्या कदम…. ती मुलगी 25 वर्षांची आहे. कुठलातरी पोलिस औरंगाबादमधून येतो आणि हे सगळ्या कोणाच्यातरी घरात घुसतात. हे पोलिस कोणत्या कायद्याखाली मुलींच्या घरात घुसतात? असा सवाल प्रकाश आंबेडकर यांनी विचारला. पोलिसांना कोणाच्या घरात घुसण्याचा परवाना दिलेला नाही ना? त्यामुळे तुम्ही याप्रकरणात मुलींच्या तक्रारीनुसार, एफआयआर नोंदवून घ्या आणि मग त्याचा तपास करा, अशा शब्दांत त्यांनी पोलिस अधिकाऱ्याला खडसावले.

त्यावर पोलिस अधिकाऱ्याने दोन दिवस थांबा, अशी विनंती करताच संतप्त झालेल्या प्रकार आंबेडकरांनी ‘दोन दिवस नाही ताबडतोब एफआयआर झाली पाहिजे. नाहीतर मी त्यांना सांगतो, धरणे देऊन बसा. कायदा हा कायदा आहे. सर्वोच्च न्यायालयाने निर्देश दिले आहेत. चौकशी होत राहील, त्यामधून सत्य समोर येईल. पण एफआयआर नोंदवायला पोलिसांचा इतका विरोध का? तुम्ही एफआयआर नोंदवत नसाल तर सुप्रीम कोर्टाला पत्र पाठवू का, अशी विचारणा प्रकाश आंबेडकर यांनी केली.
पुणे पोलिसांनी रात्री साडेतीन वाजता या मुलींना अवघ्या चार ओळींचे पत्र देत गुन्हा दाखल करण्यास असमर्थता दर्शवली. मुलींनी ज्याबाबत तक्रार केली आहे, ती घटना एका खोलीत घडली आहे. सार्वजनिक ठिकाणी घडलेली नाही. त्यामुळे संबंधित पोलीस कर्मचाऱ्यांविरोधात कोणतेही पुरावे नाहीत. मुलींनी जी अॅट्रोसिटीची तक्रार दाखल केली आहे. त्यामध्ये कोणतेही तथ्य आढललेले नाही. त्यामुळे याप्रकरणात गुन्हा दाखल करता येणार नाही, असे पोलिसांनी दिलेल्या पत्रात म्हटले आहे.
छत्रपती संभाजीनगर जिल्ह्यातील 23 वर्षीय विवाहित महिला आपल्या पतीकडून होणाऱ्या सततच्या मानसिक आणि शारीरिक त्रासाला कंटाळून पुण्यात आली होती. तिच्या मदतीला तत्काळ धाव घेत, पुण्यातील तीन महिला सामाजिक कार्यकर्त्यांनी तिला वन स्टॉप सखी सेंटरमध्ये दाखल केलं आणि स्वावलंबनासाठी आवश्यक अशा कौशल्यविकास प्रशिक्षणाचीही सोय केली. मात्र, या पीडित महिलेच्या नातेवाईकांमध्ये एकजण निवृत्त पोलिस अधिकारी असून, त्यांच्या दबावाखाली पुणे पोलिसांनी कोणतीही कायदेशीर नोटीस, समन्स किंवा वॉरंट न दाखवता कोथरूडमधील या तीन सामाजिक कार्यकर्त्यांच्या घरावर छापा टाकला आणि त्यांना जबरदस्तीने पोलिस ठाण्यात नेले.

या तिन्ही कार्यकर्त्या महिलांनी आरोप केला आहे की, कोथरूड पोलिस स्टेशनमध्ये त्यांना एका वेगळ्या खोलीत नेऊन लाथा-बुक्क्यांनी मारहाण करण्यात आली. तसेच अत्यंत खालच्या पातळीवरचे आणि अपमानास्पद प्रश्न विचारले. सहायक पोलिस निरीक्षक (API) प्रेमा पाटील, संभाजीनगर पोलिस स्टेशनचे PSI अमोल कामटे आणि छत्रपती संभाजीनगर येथील महिला कॉन्स्टेबल संजीवनी शिंदे यांच्यावर थेट मारहाणीचे आरोप करण्यात आले आहेत. या प्रकरणी पीडित महिला पोलिस ठाण्यात तक्रार दाखल करण्यात गेली असता, पोलिसांनी त्यांची नोंदवून घेण्यास टाळाटाळ केल्याचा आरोपही या महिलांनी केला आहे.

पुणे-पुण्यातील कोथरूड पोलिसांवर तीन मुलींनी मारहाण, शिवीगाळ आणि जातीवाचक शब्द वापरण्याचा आरोप केला होता. मात्र, या आरोपांमध्ये कोणताही तथ्य नसल्याचे पुणे पोलिसांनी स्पष्ट केले आहे. पोलिस उपायुक्त संभाजी कदम यांनी या सर्व आरोपांना फेटाळून लावत, असा कोणताही प्रकार घडला नसल्याचे सांगितले. तसेच, या प्रकरणात पोलिस कर्मचारी प्रेमा पाटील यांचा कुठलाही सहभाग नसल्याचेही त्यांनी स्पष्ट केले.पोलिसांच्या म्हणण्यानुसार, या प्रकरणात कोणताही विश्वासार्ह पुरावा समोर आलेला नसल्याने गुन्हा दाखल होऊ शकत नाही. ॲट्रॉसिटी कायद्याअंतर्गत कारवाईची मागणी संबंधित मुली करत असल्या तरी, ती कायदेशीर निकषांनुसार ग्राह्य धरली जाऊ शकत नाही, असे पोलिसांचे म्हणणे आहे. त्यामुळे संपूर्ण प्रकरणात तथ्य नसल्याचे पोलिसांनी पुन्हा अधोरेखित केले आहे.

पोलिस उपायुक्त संभाजी कदम म्हणाले, छत्रपती संभाजीनगरची एका मिसिंग महिलेची तक्रार दाखल करण्यात आली होती. त्याचा तपास करण्यासाठी पोलिस पुण्यात आले होते आणि त्यांना आम्ही दोन दामिनी मार्शल दिले. कोथरूड पोलिस स्टेशनला त्यांनी पत्र देऊन महिला कर्मचारी गरज असल्याचे सांगितले होते, तसा लेखी अर्ज दिला होता. महिला सहाय्यता कक्ष आणि हिरकणी कक्ष या ठिकाणी या महिलेची चौकशी केली. यात मिसिंग मुलगी होती ती ट्रेस झाली आणि तिचे वन स्टॉप सेंटर कोंढव्यात होते हे दिसून आले. त्यानंतर छत्रपती संभाजीनगरचे जे पथक होते ते पथक मुलीला घेऊन निघून गेले.

पुढे बोलताना संभाजी कदम म्हणाले, त्यानंतर पहाटे पोलिसांनी आम्हाला मारहाण केल्याची तक्रार संबंधित मुलींनी केली होती. यात प्रथमदर्शनी कोणतेही तथ्य आढळून आले नाही. अनेक कार्यकर्ते पोलिस आयुक्तालयात आले तिथेही त्यांना यात तथ्य नसल्याचे सांगितले. या संदर्भात सगळ्यांना लेखी पत्र देऊन देखील कळवण्यात आले आहे.

या प्रकरणाच्या तपासादरम्यान पोलिस कर्मचारी प्रेमा पाटील यांचा काहीही संबंध नाही, त्या ना संबंधित पथकात होत्या ना दामिनी मार्शल पथकाचा भाग होत्या, असे स्पष्ट करत पोलिस उपायुक्तांनी मुलींनी केलेल्या आरोपांमध्ये कोणताही प्रकार घडलेला नसल्याचे सांगितले. तसेच, या संपूर्ण प्रकरणात काही प्रशासकीय त्रुटी असून त्याचा सध्या तपास सुरू असल्याचेही त्यांनी स्पष्ट केले.

पुणे – कोथरूड पोलिस ठाण्यात 3 दलित तरुणींचा छळ झाल्याच्या आरोपामुळे वातावरण तापले आहे. या तरुणींनी पोलिसांवर जातीवाचक शेरेबाजी, विनयभंग व शाब्दिक लैंगिक शोषण केल्याचा गंभीर आरोप केला आहे. यासंबंधी पीडित मुलीने दिलेली तक्रार समोर आली आहे. त्यात या आरोपांचा उल्लेख आहे.

यासंबंधीच्या माहितीनुसार, पीडित तरुणींनी आपल्या तक्रारीत पीएसआय कामठे, कॉन्स्टेबल शिंदे, सायबर पोलिस सानप यांच्यासह पिवळ्या रंगाचे चेक्सचे शर्ट घातलेल्या एका पोलिस कर्मचाऱ्याचा उल्लेख केला आहे. हे सर्व पोलिस कर्मचारी व निवृत्त पोलिस अधिकारी असलेले माझ्या मैत्रिणीचे सासरे आमच्या कोथरूड येथील फ्लॅटवर आले होते. त्यावेळी फ्लॅटमध्ये आम्ही दोघी मैत्रिणी होतो. त्यांनी घरात शिरताच झाडाझडती सुरू केली. आम्हाला दुपारी 3.30 वा. कोथरूड पोलिस ठाण्यात नेले. 7.30 वाजेपर्यंत आम्हाला पोलिस स्टेशनच्या वरच्या मजल्यावर बसवून ठेवण्यात आले. आम्हाला आमच्या विवाहित मैत्रिणीचा पत्ता विचारून मारहाण करण्यात आली. सुरुवातीला आम्ही काहीच सांगितले नाही. पण मारहाण सहन न झाल्याने अखेर आम्ही तिचा पत्ता सांगितला. त्यानंतर पोलिसांनी आम्हाला जातीवाचक शिवीगाळ केली. तसेच लैंगिक शेरेबाजीही केली.

पीडित तरुणीच्या तक्रारीनुसार, पोलिसांनी आम्हा तिघींनाही कोथरूड पोलिस स्टेशनच्या वरच्या मजल्यावरील एका रुममध्ये ठेवले. तिथे माझा 4 तास छळ झाला. यावेळी पोलिसांनी मला माझे आडनाव विचारले. तुझे आडनाव काय? मग तू अशीच वागणार असे पोलिस म्हणाले. यावेळी एक महिला पोलिस अधिकारी म्हणाली, की तुझा स्वभाव असाच राहिला, तर कुणीतरी तुला असेच मारून टाकेल. तुझा खून होईल. तू अशी जिवंत राहूच शकत नाहीस. त्यामुळे मी कुटुंबीयांपासून इथे लांब (पुण्यात) एकटी राहते. या धमकीमुळे मला आता सतत भीती वाटत आहे.

पीडित तरुणी आपल्या तक्रारीत पुढे म्हणते, एकट्या राहत अशाच मोकाट सुटल्यात. किती पोरांसोबत झोपते? तुझ्या रुमवर पोरं झोपायला येतात का? तुझी व तुझ्या मैत्रिणींची ओढणी एकाच रंगाची आहे. तुम्ही लेस्बियन दिसत आहात. तुम्हाला पाहूनच वाटत आहे की, तुम्ही एलजीबीटीक्यू समुदायाच्या आहात असे विविध आरोप करून माझे आळीपाळीने शाब्दिक लैंगिक शोषण करण्यात आले.

तुला बाप नाही. फक्त माय आहे. तू पगाराचे पैसे घरी देतेस का? की त्यांनीही तुला वाऱ्यावर सोडले आहे? पोलिसांनी चौकशीशी काहीच संबंध नसल्याची वाक्य बोलून मला टॉर्चर केले. यावेळी काही पुरुष पोलिस सतत माझे शरीर न्याहाळत होते. जणू काही ते डोळ्यांनी माझे शरीरच स्कॅन करत होते. महिला पोलिसही सतत निरीक्षण करत होत्या. एक पोलिस अधिकारी तर चक्क माझ्या अंगावर धावून आला. त्याचा हाता, खांद्याचा व हनुवटीचा घाणेरडा स्पर्श मला झाला. एका प्रकरणात केवळ चौकशीसाठी मला ठाण्यात आणले असता त्या पोलिस अधिकाऱ्याने मला गाल व पाठीवर गुद्दे व चापटा मारल्या. कंबर व पायावरही लाथा मारल्या, असा आरोपही सदर तरुणीने आपल्या तक्रारीत केल्याचा दावा ‘एबीपी माझा’ने आपल्या वृत्तात केला आहे.

कॉन्स्टेबल शिंदे यांनी माझ्या मोबाईलमधील फोटो पाहून, ‘मस्त मजा करते, ऐष करते’, अशी टिप्पणी केली. पोलिस वारंवार माझी जात विचारत होते. नाव सांगितले की हसायचे. एकाने शिवी दिली की इतरजण हसायचे. पोलिसांनी माझ्या मोबाईलमधील पर्सनल चॅटही वाचले. माझ्या व्हॉईसनोट ऐकल्या. दोन मित्रांसोबतचे चॅट वाचून, ‘या दोघांमधला तुझा बॉयफ्रेंड कोण?’ असेही पोलिसांनी विचारले. कोथरुड पोलिस ठाण्यात जवळपास चार तास माझा मानसिक आणि शारीरिक छळ करण्यात आला असा आरोप पीडित तरुणीने केला.

छत्रपती संभाजीनगर येथील एक 23 वर्षीय विवाहित महिला पतीच्या छळाला कंटाळून पुण्यात आली होती. ती तिथे आपल्या मैत्रिणींसोबत राहत होती. पुणे पोलिसांनी या मुलीला मदत करणाऱ्या 3 मुलींना कोणतीही पूर्वसूचना न देता ताब्यात घेतले. यावेळी त्यांना कोथरूड पोलिस ठाण्यात जातीवाचक शिवीगाळ, मारहाण व लैंगिक छळ करण्यात आल्याचा आरोप आहे. वंचित बहुजन आघाडीने या प्रकरणी रविवारी रात्री मध्यरात्री उशिरापर्यंत आंदोलन केले.