मुंबई, दि. ६ : राज्यातील आर्थिकदृष्ट्या दुर्बल व गरीब रुग्णांसाठी मुख्यमंत्री सहाय्यता निधी कक्ष हा मोठा आधार बनला आहे. विशेषतः पुणे विभागात मागील सात महिन्यामध्ये रूग्णांना तब्बल ५४ कोटी ९१ लाख ३७ हजार रूपयांची मदत दिली गेली आहे.
मुख्यमंत्री देवेंद्र फडणवीस यांच्या सुचनेनुसार पेपरलेस आणि डिजिटल प्रणाली तसेच जिल्हा कक्ष स्थापन करण्यात आले आहेत. ज्यामुळे रुग्णांना मंत्रालयात येण्याची गरज भासत नाही. रुग्णांनी प्रथम महात्मा जोतिराव फुले जन आरोग्य योजना, आयुष्मान भारत, राष्ट्रीय बाल स्वास्थ्य कार्यक्रम, किंवा धर्मादाय रुग्णालयांच्या योजनांचा लाभ घ्यावा. जर या योजनांद्वारे उपचार शक्य नसतील, तर, मुख्यमंत्री वैद्यकीय सहाय्यता निधी कक्षाकडे संलग्न असणाऱ्या रुग्णालयातून अर्ज करता येतो. यामुळे शासकीय योजनांचा सुयोग्य वापर होतो आणि निधीचा उपयोग खऱ्या गरजू रुग्णांपर्यंत पोहोचतो अशी माहिती मुख्यमंत्री सहाय्यता निधी व धर्मादाय रूग्णालय मदत कक्षाचे प्रमुख रामेश्वर नाईक यांनी दिली.

२० गंभीर आजारासाठी मदत
कॉक्लियर इम्प्लांट (वय वर्षे २ ते ६), हृदय, यकृत, किडनी, फुफ्फुस, बोन मॅरो प्रत्यारोपण, हाताचे प्रत्यारोपण, हिप रिप्लेसमेंट, कर्करोग शस्त्रक्रिया, रस्ते अपघात, लहान बालकांची शस्त्रक्रिया, मेंदूचे आजार, हृदयरोग, डायालिसिस, कर्करोग (केमोथेरपी / रेडिएशन), अस्थिबंधन, नवजात शिशुंचे आजार, गुडघ्याचे प्रत्यारोपण, बर्न (भाजलेले) रुग्ण, विद्युत अपघात रुग्ण या अशा एकूण २० गंभीर आजारांसाठी अर्थसहाय्य दिले जाते.
आवश्यक कागदपत्रे

• रूग्णाचे आधार कार्ड
• रूग्णाचे रेशन कार्ड
• रूग्ण दाखल असल्यास त्याचा जिओ टॅग फोटो जोडणे बंधनकारक आहे.
• तहसिलदार कार्यालयाचा उत्पन्नाचा दाखला (१.६० लाखांपेक्षा कमी असणे आवश्यक आहे)
• संबंधित आजाराचे वैद्यकिय रिपोर्ट जोडणे आवश्यक आहे.
• वैद्यकीय खर्चाचे प्रमाणपत्र
• रुग्णालयाची नोंद मुख्यमंत्री सहाय्यता निधी कार्यालयाच्या संगणक प्रणालीवर असावी
• अपघात ग्रस्त रूग्णांसाठी एफआयआर रिपोर्ट आवश्यक आहे.
• अवयव प्रत्यारोपण रूग्णांसाठी झेडटीसीसी नोंदणी पावती आवश्यक आहे.
  सर्व कागदपत्रे पीडीएफ स्वरूपात aao.cmrf-mh@gov.in या ईमेल वर पाठवावीत. अधिक माहिती करिता टोल फ्री ९३२१ १०३ १०३ या क्रमाकांवर चौकशी करावी.

पुणे विभागातील मदतीचा आढावा (१ जानेवारी ते ३१ जुलै २०२५)

जिल्हा रुग्णसंख्या मदत रक्कम
पुणे २१४२ २० कोटी ५६ लाख ९१ हजार
कोल्हापूर १७१३ १३ कोटी १७ लाख ६४ हजार
सांगली ९३६ ७ कोटी ३५ लाख ७८ हजार
सोलापूर ७६४ ६ कोटी ५८ लाख २० हजार
सातारा ८४० ७ कोटी २२ लाख ८५ हजार

संपूर्ण राज्यात पेपरलेस प्रणाली, जिल्हा कक्षांची स्थापना आणि विविध सकारात्मक बदलांमुळे गरजू रुग्णांपर्यंत वेळेत मदत पोहोचत आहे. मुख्यमंत्री देवेंद्र फडणवीस यांच्या मार्गदर्शनानुसार कक्षाचे कामकाज पारदर्शक पद्धतीने राबवले जात असून निधी खऱ्या गरजूंपर्यंत पोहोचत आहे. यापुढेही जास्तीतजास्त गरजू रूग्णांना मदत केली जाणार आहे, असे मुख्यमंत्री सहाय्यता निधी व धर्मादाय रुग्णालय मदत कक्ष प्रमुख रामेश्वर नाईक यांनी कळविले आहे.

पुणे- शहरातील नामांकित बी. जे. वैद्यकीय महाविद्यालयातील द्वितीय वर्षात शिक्षण घेणाऱ्या 23 वर्षीय तरुणीने मंगळवारी रात्री वसतिगृहातील एका रिकाम्या खोलीत गळफास घेऊन आत्महत्या केल्याची धक्कादायक घटना उघडकीस आलेली आहे.

ज्योती कृष्णकुमार मीना (वय 23, रा. राजस्थान) असे आत्महत्या केलेल्या तरुणीचे नाव आहे. ज्योती मीना ही मूळची राजस्थान येथील रहिवासी असून ती बी. जे. वैद्यकीय महाविद्यालयात द्वितीय वर्षात शिक्षण घेत होती. ती कॉलेजच्या वसतिगृहात राहत होती. मंगळवारी रात्री हॉस्टेल मधील तिच्या खोली समोरील एका मोकळ्या खोलीत तिने गळफास घेतला असल्याचे उघडकीस आले आहे. ही बाब लक्षात येताच सहकाऱ्यांनी आणि अधिवास कर्मचाऱ्यांनी तातडीने याची माहिती बंड गार्डन पोलिसांना दिली. घटनेची माहिती मिळताच बंड गार्डन पोलिसांनी घटनास्थळी धाव घेतली. आत्महत्येपूर्वी लिहिलेली एक चिठ्ठी सापडली असून, त्यातून ती नैराश्यात होती, हे प्राथमिक तपासातून समोर आले आहे. मात्र ,आत्महत्येचे नेमके कारण काय, हे स्पष्ट होणे बाकी आहे. बंड गार्डन पोलिस या प्रकरणाचा अधिक तपास करत आहेत.

याबाबत बंड गार्डन पोलिस ठाण्याचे वरिष्ठ पोलिस निरीक्षक रवींद्र गायकवाड म्हणाले,मयत तरुणी बी. जे. वैद्यकीय महाविद्यालयात द्वितीय वर्षात शिक्षण घेत आहे. मंगळवारी संध्याकाळी साडेसहा वाजता ती रूम मधून बाहेर पडली होती. सध्या वैद्यकीय महाविद्यालयात परीक्षा सुरू असल्याने ती अभ्यास करण्यासाठी हॉस्टेल मध्ये दुसरीकडे गेली असल्याचा संशय तिचा रूम मधील दुसऱ्या मैत्रिणीला होता. परंतु रात्री उशीर होऊनही ती रूम मध्ये परत आली नसल्याने तिचा शोध सुरू झाला. हॉस्टेल मधील वॉर्डन यांनी याबाबत पोलिसांकडे रात्री साडेअकरा वाजता तक्रार दिली. तिचा शोध घेताना, बुधवारी रात्री एक वाजता तिच्या रूम समोरील दुसऱ्या रूम मध्ये तिचा गळफास घेतलेला मृतदेह मिळून आला आहे. याबाबत अधिक तपास करण्यात येत आहे.

पुणे, ६ ऑगस्ट : जागतिक पातळीवर लोकशाही संवाद बळकट करण्याच्या दिशेने एक महत्त्वपूर्ण पाऊल उचलत, भारतीय विधिमंडळातील १३० हून अधिक सदस्यांचे एक शिष्टमंडळ ४ ते ६ ऑगस्ट २०२५ दरम्यान अमेरिकेच्या बोस्टन शहरात होणार्‍या नॅशनल कॉन्फरन्स ऑफ स्टेट लिजिस्लेटर्स ( NCSL) समिटमध्ये सहभाग घेत आहे. या उपक्रमाची माहिती एमआयटी स्कूल ऑफ गव्हर्नमेंट चे डॉ. परिमल माया सुधाकर (एनएलसी भारत) यांनी पुण्यात आयोजित पत्रकार परिषदेत दिली. या ऐतिहासिक सहभागासाठी नॅशनल लेजिस्लेटर्स कॉन्फरन्स भारत ( NLC भारत) या मंचाने पुढाकार घेतला असून, एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्वनाथ दा. कराड यांचे मार्गदर्शन आणि आशीर्वाद लाभले आहेत.
एनएलसी भारत हे भारतीय लोकप्रतिनिधींना सक्षम करणारे आणि राष्ट्रीय तसेच आंतरराष्ट्रीय पातळीवर विधिमंडळीय सहकार्य, संवाद व चांगल्या कार्यपद्धतींचे आदानप्रदान घडवून आणणारे एक अग्रगण्य व्यासपीठ आहे.
या शिष्टमंडळात देशभरातील २४ हून अधिक राज्यांमधून आलेले आमदार आणि विधान परिषदेचे सदस्य (MLA व MLC) सहभागी असून, हे प्रतिनिधी २१ वेगवेगळ्या राजकीय पक्षांचे प्रतिनिधित्व करतात. हे शिष्टमंडळ भारताच्या समावेशक, लोकशाही आणि वैविध्यपूर्ण नेतृत्वाचे प्रतीक आहे.
या उपक्रमाची सुरुवात २०२४ मध्ये, जेव्हा ५० लोकप्रतिनिधींनी लुईव्हिल, अमेरिका येथे झालेल्या विधिमंडळ परिषदेत सहभाग घेतला होता, अशा ऐतिहासिक प्रयत्नाने झाली. हा स्वतंत्र भारताच्या इतिहासात एक वेगळा टप्पा होता, कारण अशा प्रकारची संकल्पना ना सरकारने घेतली होती ना इतर कोणत्याही संस्थेने.
आता ही चळवळ अधिक बळकट होत, एकूण १३० लोकप्रतिनिधींनी सहभागी होऊन जगातील कोणत्याही परिषदेत भारतीय विधिमंडळाचे सर्वात मोठे प्रतिनिधित्व घडवून आणले आहे. या उपक्रमाचा मुख्य उद्देश आहे – सीमापार ज्ञानविनिमय, विधिमंडळीय कार्यक्षमता वाढवणे, तसेच शासन व कायदेप्रक्रियेसाठी आंतरराष्ट्रीय दर्जाच्या उत्तम पद्धतींचा थेट अनुभव घेणे.
गेल्या दोन दिवसांमध्ये शिष्टमंडळाने अनेक महत्त्वपूर्ण कार्यक्रमांत सहभाग घेतला. बोस्टन कन्वेन्शन अ‍ॅण्ड एक्झिबिशन सेंटरमध्ये झालेल्या जनरल सेशनमध्ये त्यांनी उपस्थिती लावली. त्यानंतर आरोग्य सेवा, कृत्रिम बुद्धिमत्ता (AI) आणि वाहतूक व्यवस्था यांसारख्या महत्त्वाच्या विषयांवरील सत्रांमध्येही सहभाग घेतला.
यानंतर त्यांनी मॅसेच्युसेट्स स्टेट हाऊसला शैक्षणिक भेट दिली, ज्यामध्ये तेथील विधानप्रक्रिया व इतिहास याचा अभ्यास करण्यात आला. याच दौर्‍यात, छउडङ चे अध्यक्ष श्री. वेन हार्पर यांच्याशी झालेल्या औपचारिक संवादातून दोन्ही देशांतील संस्थात्मक संबंध अधिक दृढ झाले.
या दौर्‍यादरम्यान, शिष्टमंडळाने विविध राज्यांतील आणि इतर देशांतील विधिमंडळ सदस्यांशी उत्स्फूर्त संवाद साधला, ज्यातून आंतरराष्ट्रीय सहकार्य व परस्पर समजूत वाढवण्याचा मार्ग मोकळा झाला.
मुंबईत २०२३ मध्ये पार पडलेल्या एनएलसी भारतच्या पहिल्या परिषदेनंतर, हा दौरा निरपेक्ष, माहितीवर आधारित व पक्षभेदापलीकडचा लोकशाही संवाद वाढवण्यासाठी आखलेल्या दीर्घकालीन दृष्टिकोनाचा एक महत्त्वाचा टप्पा आहे. या समिटमध्ये भारतीय लोकप्रतिनिधी २,००० हून अधिक अमेरिकी आणि ७,००० पेक्षा जास्त आंतरराष्ट्रीय प्रतिनिधींसोबत सहभागी होत आहेत. चर्चेचे विषय आहेत – कृत्रिम बुद्धिमत्ता व प्रशासन, डिजिटल लोकशाही, सायबर सुरक्षा, मतदारांचा विश्वास आणि धोरणात्मक नवकल्पना.
एनएलसी भारतचे संस्थापक डॉ. राहुल कराड म्हणाले, हे केवळ एक शिष्टमंडळ नाही, तर भारताच्या लोकशाही शक्तीचे आणि विविधतेतील एकतेचे जिवंत प्रतीक आहे. एवढ्या व्यापक प्रमाणावर आमदार व विधान परिषदेचे सदस्य आंतरराष्ट्रीय स्तरावर प्रथमच एकत्र आले आहेत. हे प्रतिनिधी जेव्हा या व्यासपीठावर पाऊल ठेवतात, तेव्हा केवळ वैयक्तिक आकांक्षा नाही, तर अब्जावधी नागरिकांची आशा आणि आपल्या प्राचीन संस्कृतीचे प्रतिनिधित्व ते करतात. आमचा हेतू साधा पण प्रभावी आहे – जगभरातील लोकशाहींच्या दरम्यान बंध निर्माण करणे, परस्पर शिकणे आणि उत्तम प्रशासनासाठी संवाद सुरू ठेवणे.
या दौर्‍यात अमेरिकन विधिमंडळ व्यवस्थेवर आधारित शैक्षणिक सत्रे, स्थानिक संस्था व विधानसभांना भेटी, तसेच राजकारण, शिक्षण व उद्योग क्षेत्रातील भारतीय वंशाच्या नेतृत्वाशी संवाद यांचा समावेश आहे. या सहभागामागील प्रमुख उद्देश आहे जगातील दोन सर्वात मोठ्या लोकशाहींमध्ये अर्थपूर्ण संवाद घडवणे आणि भारतीय वंशीय समुदायांशी संबंध दृढ करणे.
बोस्टनमधील हे शिष्टमंडळ भारतीय लोकप्रतिनिधींसाठी नियोजित आंतरराष्ट्रीय अनुभववृद्धी कार्यक्रमांच्या मालिकेतील एक भाग आहे. येत्या काळात आशिया, युरोप आणि अमेरिका खंडांतील इतर देशांमध्ये अशा दौर्‍यांचे आयोजन होणार आहे. या सहकार्याधारित सहभागाच्या मॉडेलमधून एनएलसी भारतचे उद्दिष्ट आहे – एक सशक्त, माहितीपूर्ण, आणि जागतिक स्तरावर जोडलेले विधिमंडळीय वातावरण तयार करणे, जे भारताच्या लोकशाही मूल्यांना बळकटी देईल आणि भारताला जागतिक लोकशाही नवोन्मेषाचा अग्रदूत म्हणून प्रतिष्ठा मिळवून देईल.

: ‘एमआयटी एडीटी’ विद्यापीठात ‘विद्यारंभ-२५’ला प्रारंभ 
पुणेः एकविसाव्या शतकातशिक्षणाची परिभाषा पूर्णपणे बदलली आहे. शिक्षण आता केवळ विद्यापीठे, प्रयोगशाळा, पदवी घेण्यापर्यंत मर्यादित राहिले नसून ते राष्ट्राच्या प्रगतीचे एक साधन बनले आहे. त्यामुळे, विकसित भारत@२०४७ चे स्वप्न पूर्ण करण्यासाठी विज्ञान, तंत्रज्ञान आणि अभियांत्रिकीसह इतर क्षेत्रात 

राष्ट्रासमोर असणाऱ्या समस्या सोडविण्यासाठीचे शिक्षण विद्यार्थ्यांना द्यायला हवे. धाडसी विचारांनीच भारत देश घडला असून, विद्यार्थ्यांनीही सर्वोत्तम देत आपल्या क्षेत्रात असणाऱ्या समस्यांना सोडविण्याचे धाडस दाखवावे, असे मत भारत सरकारच्या विज्ञान व तंत्रज्ञान विभागाचे (डीएसटी) सचिव प्रा. डाॅ.अभय करंदीकर यांनी व्यक्त केले. 

ते येथील एमआयटी आर्ट, डिजाईन व टेक्नाॅलाॅजी विद्यापीठ, विश्वराजबाग, पुणेच्या १०व्या विद्यारंभ-२५ कार्यक्रमात बोलत होते.यावेळी, व्यासपीठावर, माईर्स एमआयटी शिक्षण समुहाचे संस्थापक अध्यक्ष विश्वधर्मी प्रा.डाॅ.विश्वनाथ दा. कराड, एमआयटी एडीटी विद्यापीठाचे कार्याध्यक्ष  प्रा.डाॅ.मंगेश कराड, कुलगुरू प्रा.डाॅ.राजेश एस., कार्यकारी संचालक 

प्रा.डाॅ.सुनीता कराड, कार्यकारी संचालक डाॅ.विनायक घैसास, प्र.कुलगुरू डाॅ.रामचंद्र पुजेरी, 

डाॅ.मोहित दुबे यांच्यासह विद्यापीठातील सर्व विभागांचे संचालक उपस्थित होते.डाॅ.करंदीकर पुढे म्हणाले, डाॅ.अब्दुल कलाम यांनी म्हटल्याप्रमाणे, विद्यार्थ्यांनी मोठी स्वप्ने पाहावीत. कारण, त्यातून येणारे अपयश देखील ऐतिहासिक असते. तसेच,

 एमआयटी एडीटी विद्यापीठाच्या १५०+ एकरांच्या सुसज्ज अशा या कॅम्पसमध्ये विद्यार्थ्यांसाठी क्रेया, रिसर्च अँड डेव्हलपमेंट सेंटर यांसारखे अनेक नाविण्यपूर्ण उपक्रम राबविले जातात, व त्यातून सध्या ७५+ संशोधन प्रकल्प चालू असल्याचे पाहून आनंद झाला.विश्वशांती प्रार्थनेने सुरु झालेल्या या कार्यक्रमाची सांगता राष्ट्रगीताने करण्यात आली. कार्यक्रमाचे प्रास्ताविक डाॅ.राजेश एस., यांनी तर आभार डाॅ.दुबे यांनी मानले. तर सूत्रसंचालन प्रा. 

श्रद्धा वाघटकर व डाॅ.अशोक घुगे यांनी केले. 

संपूर्ण विश्वाचे लक्ष भारताकडेः प्रा.डाॅ.विश्वनाथ कराड….अध्यक्षीय भाषणात प्रा.डाॅ. विश्वनाथ कराड यांनी विद्यार्थ्यांना मंत्रमुग्ध केले. ते म्हणाले, विद्यार्थी दशेत गुरे चारत असतानाच शहरात जावून मोठा अधिकारी होण्याचे स्वप्न पाहिले होते. त्यामुळे, विद्यार्थ्यांनी नक्कीच मोठी स्पप्ने पाहावीत, कारण ती एक दिवस नक्कीच पूर्ण होतात. अमेरिका भेटीत मला समजले की, संपूर्ण विश्वाचे लक्ष सध्या भारताकडे आहे. कारण, सध्या अशांतता, युद्धाचे सावट, उठाव यांच्यात गुरफटलेल्या विश्वाला सुख, शांती आणि समाधानाचा राजमार्ग दाखविण्याचे सामर्थ्य भारतीय संस्कृतीत आहे, असेही त्यांनी पुढे म्हटले. 

एआयसारख्या तंत्रज्ञानामुळे सध्या सर्व क्षेत्रामध्ये मोठी क्रांती घडत आहे. शिक्षण क्षेत्रातही याचा मोठा प्रभाव पडला आहे. विद्यार्थ्यांनीही या संसाधनाचा विधायक वापर करून बदलत्या जगासोबत राहिले पाहिजे. पारंपारिक शिक्षणाबरोबर विद्यार्थ्यांच्या कौशल्य विकासावर भर द्यायला हवा. त्यासाठी, नोकऱ्यांसाठी आवश्यक असणारी कौशल्य व नवउद्योजक घडवणारे शिक्षण देण्याची जबाबदारी आता विद्यापीठांची आहे. अगदी तसेच अभिप्रेत शिक्षण एमआयटी एडीटी विद्यापीठ पुरवित असून त्याचमुळे यंदा ५ हजारांहून अधिक विद्यार्थ्यांनी नव्याने प्रवेश घेत पुनश्च एमआयटी ब्रँड वर विश्वास दर्शविला आहे.

-प्रा.डाॅ.मंगेश कराड, कार्याध्यक्ष,
एमआयटी एडीटी विद्यापीठ, लोणी-काळभोर, पुणे

जिल्हास्तरीय ‌‘अमृतप्रभा समूहगान‌’ स्पर्धेचे पारितोषिक वितरण

पुणे : ध्वजगीतातून देशाचा गौरवशाली इतिहास जागविला जातो, उर्जा संचारते. अशा गीतांद्वारेच सैन्याचेही मनोबल वाढविण्यासह मदत होते. त्याचप्रमाणे एकता, शिस्त, राष्ट्रसन्मान आणि उर्जानिर्मितीसह देशप्रेमाचा जागर अशा स्फूर्तीदायक गीतांमधून होतो, असे प्रतिपादन एअर मार्शल (निवृत्त) प्रदीप बापट यांनी केले.

दि रास्ता पेठ एज्युकेशन सोसायटीतर्फे शालेय तसेच कनिष्ठ महाविद्यालयीन विद्यार्थ्यांसाठी आयोजित जिल्हास्तरीय ‌‘अमृतप्रभा समूहगान‌’ स्पर्धेचे पारितोषिक वितरण आज (दि. 6) एअर मार्शल (निवृत्त) प्रदीप बापट यांच्या हस्ते झाले. त्या वेळी ते बोलत होते. सोमवार पेठेतील संस्थेच्या आबासाहेब अत्रे प्रशालेच्या सभागृहात कार्यक्रमाचे आयोजन करण्यात आले होते. प्रशस्तीपत्र आणि सन्मानचिन्ह असे पुरस्काराचे स्वरूप होते.

दि रास्ता पेठ एज्युकेशन सोसायटीचे मानद अध्यक्ष संजीव ब्रह्मे, कार्यकारी मंडळ मानद सदस्य भारत वेदपाठक तसेच स्पर्धेचे परीक्षक संजय गोगटे, भरत कामत, मोहन पारसनीस, सुयोग कुंडलकर, रेवती कामत, आरती कुंडलकर मंचावर होते. स्पर्धेसाठी यंदा ‌‘ध्वजगीत/झेंडागीत‌’ असा विषय देण्यात आला होता. स्पर्धेचे यंदाचे तिसरे वर्ष आहे. या समूहगीत स्पर्धेसाठी पाचवी ते सातवी, आठवी ते दहावी व कनिष्ठ महाविद्यालय अशा तीन गटांमध्ये 65 शाळा सहभागी झाल्या होत्या. स्पर्धेचे संयोजन डॉ. भारती एम. डी., संतोष अत्रे व प्रसाद भडसावळे यांनी केले.

‌‘ऑपरेशन सिंदूर‌’मुळे आत्मनिर्भर भारत संकल्पना प्रत्यक्षात

‌‘ऑपरेशन सिंदूर‌’च्या माध्यमातून आत्मनिर्भर भारत संकल्पना प्रत्यक्षात आणली गेली असे सांगून एअर मार्शल प्रदीप बापट म्हणाले, ‌‘ऑपरेशन सिंदूर‌’ दरम्यान ब्रह्मोस, आकाश अशी भारतीय बनावटीची क्षेपणास्त्रे वापरली गेली यातून भारतीय तंत्रज्ञान उत्तम आहे हे सिद्ध झाले आणि या कामगीरीतून देशाच्या तिरंग्याचा मान राखला जात तो डौलाने उंचचउंच फडकत आहे. आजचे विद्यार्थी देशाचे भविष्य आहेत. विद्यार्थ्याने कोणत्याही क्षेत्रात कारकीर्द घडविली तरी देशसेवेसाठी सदैव तत्पर रहावे.

परीक्षकांच्या वतीने भरत कामत, सुयोग कुंडलकर यांनी मनोगत व्यक्त केले. स्पर्धेला कशापद्धतीने सामोरे जावे याविषयी त्यांनी मार्गदर्शन केले. स्पर्धेत प्रथम आलेल्या तीनही गटातील संघांनी गीत सादरीकरण केले. मान्यवरांचे स्वागत संजीव ब्रह्मे, भारत वेदपाठक यांनी केले.

स्पर्धेचा सविस्तर निकाल

इयत्ता 5वी ते 7वी
प्रथम क्रमांक : भारतीय विद्या भवन परांजपे विद्यालय (कोथरूड)
द्वितीय क्रमांक : सरहद सी. बी. एस. ई. इंग्लिश मिडीयम स्कूल (कात्रज, पुणे)
तृतीय क्रमांक : सह्याद्री नॅशनल स्कूल ( वारजे माळवाडी )
उत्तेजनार्थ : जयवंत पब्लिक स्कूल (हडपसर), एंजल्स हायस्कूल (लोणी काळभोर)

इयत्ता 8वी ते 10वी
प्रथम क्रमांक : माधव सदाशिव गोळवलकर गुरुजी माध्यमिक विद्यालय (टिळक रस्ता)
द्वितीय क्रमांक: न्यू इंडिया मिडीयम स्कूल (कोथरूड)
तृतीय क्रमांक: एंजल्स हायस्कूल आणि ज्युनियर कॉलेज (लोणी काळभोर)
उत्तेजनार्थ : सरहद ग्लोबल स्कूल अँड ज्युनिअर कॉलेज (निंबाळकरवाडी, कात्रज)
इनोव्हेरा स्कूल (हडपसर), एच. एच. सी. पी., हुजूरपागा हायस्कूल (लक्ष्मी रस्ता)

कनिष्ठ महाविद्यालय गट
प्रथम क्रमांक : एच.एच.सी.पी.हुजूरपागा हायस्कूल (नारायण पेठ)
द्वितीय क्रमांक : विमलाबाई गरवारे प्रशाला
तृतीय क्रमांक : म.ए.सो. राणी लक्ष्मीबाई मुलींची सैनिकी शाळा

पुणे : दृष्टी नसली तरी दृष्टिकोन असतो, ध्येय असते आणि त्या ध्येयापर्यंत पोहोचण्यासाठी हवी असते योग्य दिशा. ही दिशा आता पुण्यातील दृष्टिहीन विद्यार्थ्यांना मिळाली आहे ‘ऐकाकी ऑडिओ लर्निंग लॅब’च्या रूपाने. शिक्षणाच्या प्रकाशाकडे नेणारा हा आवाज दृष्टिहीन विद्यार्थ्यांच्या आयुष्यातील नवी आशा आहे. दृष्टिहीन विद्यार्थ्यांसाठी शिक्षण सुलभ करण्याच्या दिशेने एक महत्त्वपूर्ण पाऊल उचलत, कोथरूडमधील पुणे ब्लाइंड स्कूलमध्ये ‘ऐकाकी ऑडिओ लर्निंग लॅब’ची स्थापना करण्यात आली आहे.

लर्नकीज एज्युटेन्मेंट प्रा. लि. आणि विकसित भारत इनोव्हेट प्रा.लि. यांच्या संयुक्त विद्यमाने या लॅबची निर्मिती करण्यात आली असून, शैक्षणिक दृष्टिकोनातून हा महत्त्वाचा उपक्रम ठरत आहे, असे ऐकाकी ऍपचे निर्माते सचिन पंडित यांनी सांगितले. विकसित भारत इनोव्हेट प्रा.लि.  या संस्थेने लॅबचे संपूर्ण नियोजन, तांत्रिक रचना व कार्यान्वयन प्रभावीपणे पार पाडले आहे.

विकसित भारत इनोव्हेट प्रा. ली. च्या मंजुषा वैद्य म्हणाल्या की, या लॅबच्या माध्यमातून इयत्ता १ ली ते १० वी पर्यंतच्या विद्यार्थ्यांसाठी अभ्यासक्रमावर आधारित ऑडिओ कंटेट उपलब्ध करून देण्यात आले आहेत. पाठ्यपुस्तकातील प्रत्येक धड्याचे ऑडिओ रूपांतर केले गेले असून, विद्यार्थ्यांना हेडफोन व ऑडिओ प्लेयरद्वारे सहजतेने अभ्यास करता येतो. प्रत्येक धडा आवाजाच्या चढ-उतारासह शास्त्रीय दृष्टीकोनातून वाचिक अभिनयातून रेकाॅर्ड केल्यामुळे विद्यार्थ्यांना विशेष रस निर्माण झाला आहे. त्यांना न समजलेल्या गोष्टी देखील पुन्हा ऐकता येतात. विद्यार्थ्यांना हेडफोन व आॅडिओ प्लेअरच्या माध्यमातून वैयक्तिक पातळीवर ऐकण्याची सुविधा ‘ऐकाकी ऑडिओ लर्निंग लॅब’ च्या माध्यमातून करण्यात आली आहे.  स्व-अध्ययनासोबतच स्वतःच्या गतीप्रमाणे शिक्षण घेण्याची संधी उपलब्ध झाली आहे.

या प्रकल्पाला प्रतिष्ठित कंपनीच्या सामाजिक उत्तरदायित्व कार्यक्रमांतर्गत विशेष प्राधान्य देण्यात आले आहे. दृष्टिहीन विद्यार्थ्यांच्या अभ्यासाला नवी दिशा देणाऱ्या या प्रकल्पामुळे, दृष्टिहीन विद्यार्थ्यांच्या शिक्षण क्षेत्रात एक आशादायक आणि परिणामकारक पाऊल उचलले गेले आहे, असे अंध शाळेच्या मुख्याध्यापिका वर्षा रांका यांनी सांगितले. या संपूर्ण उपक्रमात अश्विनी भालेकर, समीर साळुंके व नेहा तातुसकर यांनी मोलाचा सहभाग घेतला.

विद्यार्थी साहाय्यक समितीमध्ये ‘मोबाईल व्यसनमुक्ती’ पुस्तकाचे प्रकाशन

पुणे: “मोबाईल हे मूलतः संवादाचे माध्यम होते. मात्र, तंत्रज्ञानाच्या प्रगतीमुळे त्यातील संवाद हरपून अन्य गोष्टी मानवी मेंदूला वेडे करू पाहत आहेत. मोबाईलचा गरजेपुरता वापर केला, तर आपल्या जगण्याला पूरक असे साधन आहे. मात्र, त्याचा अतिवापर माणसाला अधोगतीकडे घेऊन जाणारा आहे. कृत्रिम बुद्धिमतेमुळे आपली विचार करण्याची क्षमता खुंटत असून, माणसाच्या बौद्धिक क्षमतेवर त्याचा विपरीत परिणाम होताना दिसत आहे,” असे प्रतिपादन प्रसिद्ध लेखक व वक्ते अच्युत गोडबोले यांनी केले. 

विद्यार्थी साहाय्यक समितीचे कार्यकारी विश्वस्त तुषार रंजनकर व माजी विद्यार्थी नवनाथ जगताप लिखित, रुद्र प्रकाशनातर्फे प्रकाशित ‘मोबाईल व्यसनमुक्ती’ या पुस्तकाचे प्रकाशन अच्युत गोडबोले व ज्येष्ठ उद्योजक प्रतापराव पवार यांच्या हस्ते झाले. समितीच्या सेनापती बापट रस्त्यावरील लजपतराय भवन विद्यार्थी संकुलात झालेल्या कार्यक्रमात समितीचे कायम विश्वस्त डॉ. भाऊसाहेब जाधव, सी. ई. पोतनीस, सामाजिक कार्यकर्ते यजुर्वेंद्र महाजन, प्रदीप गारटकर यांच्यासह विविध क्षेत्रातील मान्यवर उपस्थित होते. जवळपास ५०० पेक्षा अधिक लोकांनी या कार्यक्रमाला उपस्थिती लावली.

अच्युत गोडबोले म्हणाले, “टीव्हीपाठोपाठ आलेल्या मोबाईल, इंटरनेट आणि स्मार्टफोनमुळे एक मोठा विस्फोट झाला आहे. ज्ञानवर्धनाचे साधन होण्याऐवजी त्याचे व्यसन लागून न्यूनगंड तयार होऊ लागला आहे. तुलनात्मक मानसिकतेमुळे नैराश्य येण्यासह आत्मविशास खालावत आहे. मानसिक आरोग्याच्या समस्या उद्भवत आहेत. सतत गुंतून राहिल्याने शारीरिक व्याधींनाही सामोरे जावे लागत आहे. त्यामुळे अतिवापर टाळा. स्वतःची विचार क्षमता विकसित करा. सोशल व इमोशनल इंटेलिजन्स, सांघिक भावना, श्रवणकला, वाचन यावर भर दिला पाहिजे. समितीमध्ये या सर्व गोष्टींवर भर दिला जातो, याचा आनंद आहे.”

प्रतापराव पवार म्हणाले, “मोबाईलचा उपयुक्त वापर चांगला आहे. मात्र, सर्वकाही त्यावर अवलंबून असता कामा नये. स्वतःसाठी वेळ देता यावा. आपला प्राधान्यक्रम ठरवून वेळेचे योग्य नियोजन केले, तर तुमचे चारित्र्य अधिक संपन्न होण्यास मदत होईल. सबबी न सांगता केलेले कष्ट, जपलेला प्रामाणिकपणा आणि शिस्त आपल्याला यशाकडे घेऊन जाते. तुमचे चारित्र्य मोबाईल नव्हे, तर स्वतः तुम्ही घडवत असता. त्यामुळे स्वतःला समृद्ध करण्यासाठी इतर अनेक पर्यायांचा योग्य वापर करा.”

यजुर्वेंद्र महाजन यांनी मोबाईलचा वापर अनेकांना फायद्याचा ठरतो, असे सांगत नात्यांमध्ये दुरावा निर्माण होण्याचे कारणही मोबाईलच असल्याचे सांगितले. तुषार रंजनकर यांनी मोबाईल, इंटरनेटच्या विळख्यातून समाजाला बाहेर काढण्याची गरज अधोरेखित केली. मेंदूवर थेट परिणाम करणाऱ्या मोबाईलच्या व्यसनाला आपण गांभीर्याने घ्यायला हवे, असे नवनाथ जगताप यांनी नमूद केले. पर्णवी म्हस्के, सुप्रिया केळवकर यांनी सूत्रसंचालन केले व आभार मानले.

माईर्स एमआयटी शिक्षण संस्थेचा ४३ वा स्थापनादिन  संपन्न

पुणे, : ” शिक्षणाचा प्रचार व प्रसार करत असताना त्याचे प्रयोजन काय आहे, हा चिंतनाचा मुद्दा आहे. शिक्षणाचा केंद्रबिंदू व्यक्ती असून त्याचा सर्वांगीण विकास हेच मुख्य प्रयोजन असावे.” असे विचार श्रुतिसागर आश्रम फुलगाव चे संस्थापक स्वामी स्वरूपानंद सरस्वती यांनी व्यक्त केले.
माईर्स एमआयटी शिक्षणसंस्था समूहाचा ४३ व्या  स्थापनादिनाच्या समारंभात मुख्य पाहुणे म्हणून ते बोलत होते.
 कार्यक्रमाच्या अध्यक्ष स्थानी मुंबई विद्यापीठाचे माजी कुलगुरू डॉ. संजय देशमुख होते. तसेच गरीबे इन्स्टिट्यूट फॉर सॉफ्ट पॉवर अँड पब्लिक डिप्लोमसी यूएसचे संस्थापक आणि ग्रॅमी पुरस्कार विजेते प्रा. फर्नांडो गरिबे , गरिबे इन्स्टिट्यूटचे अध्यक्ष  रोनाल्ड सी. गुनेल हे प्रमुख पाहुणे म्हणून उपस्थित होते.
तसेच माईर्स एमआयटीचे संस्थापक अध्यक्ष, विश्वधर्मी प्रा. डॉ. विश्वनाथ दा. कराड, संस्थापक विश्वस्त प्रा. प्रकाश जोशी, अध्यक्ष डॉ. मंगेश कराड, विश्वस्त व सचिव प्रा. स्वाती कराड – चाटे, विश्वस्त डॉ. विनायक घैसास, एमआयटी डब्ल्यूपीयू चे कुलगुरू डॉ. आर.एम.चिटणीस उपस्थित होते.
या प्रसंगी डॉ. संजय उपाध्ये लिखित आणि प्रा. शशांक दिवेकर प्रस्तुत “गीत विश्वनाथ, विश्वधर्मी विश्वनाथ शोध विश्वशांतीचा: यात्रा वचनपूर्तीची” हा कार्यक्रम झाला.
स्वामी स्वरूपानंद सरस्वती म्हणाले, “शिक्षणाद्वारे विद्यार्थ्यांच्या कर्तृत्वाचा, बुद्धीचा आणि मनाचा विकास  झाला तर सामाजिक स्वास्थ्य अबाधित राहील.  मनाची मशागत करणारी मूल्याधिष्ठित शिक्षण पद्धती आवश्यक असून व्यक्तिमत्वाचा विकास हेच खरे शिक्षण ठरू शकेल”
प्रा. डॉ. विश्वनाथ दा. कराड म्हणाले,”  मूल्याधिष्ठित नागरिक घडावा या विचारातून ही शिक्षण संस्था  कार्यरत आहे. अध्यात्म आणि विज्ञानाच्या समन्वयातून जगात शांती नांदेल. विश्वशांती साठी मानवतावादाचे वैश्विक सिद्धांत विद्यार्थ्यांमध्ये  रुजावे यासाठी ही संस्था प्रयत्नशील आहे.”
प्रा. फर्नांडो गरिबे म्हणाले, “सध्याचे जग जिथे विसंगती आणि मतभेदांना तोंड देत आहे. अशावेळी आंतरिक ज्ञानाचा शोध घेणे हे महत्त्वाचे आहे. विद्यार्थ्यांनी  ज्ञानाबरोबर आंतरिक ज्ञानाचा शोध घ्यावा व वैश्विक मानवता जागवावी.”
संजय देशमुख म्हणाले, ” विश्वशांतीचा मंत्र देणारे संत ज्ञानेश्वर महाराज यांनी पसायदानातून विश्वबंधुत्वाचा मार्ग दाखविला आहे. ही शिक्षणसंस्था पसायदानाचा  वैश्विक विचार शिक्षणाच्या माध्यमातून नव्या पिढीमध्ये रुजविण्याचे महत्वपूर्ण कार्य करीत आहे.
 माईर्सचे कार्यकारी अध्यक्ष डॉ. राहुल कराड यांनी दृकश्राव्य माध्यमातून संस्थेच्या कार्याचा आढावा सांगितला.
यानंतर माईर्स शिक्षण संस्था समूहातील विविध शाखांमधील उल्लेखनीय सेवा देणाऱ्या शिक्षक व शिक्षकेतर कर्मचाऱ्यांना मानपत्र व  रोख रक्कम देऊन सन्मानित करण्यात आले. तसेच, संस्थेचा माजी विद्यार्थी म्हणून जागतिक स्तरावर केलेल्या रचनात्मक कार्यासाठी माईर्स शिक्षण संस्थेचे कोषाध्यक्ष व विश्वस्त डॉ. सुनिल कराड यांना  गोल्डन हॉल ऑफ फेम अवॉर्ड मोस्ट प्रिव्हियस ज्वेल्स ऑफ नॉलेज डिवाइन अँड युनिक पर्ल्स ऑफ विस्डम ने सन्मानित करण्यात आले.
 डॉ. मंगेश कराड यांनी  प्रास्ताविक केले.
प्रा. स्वाती कराड चाटे यांनी आभार मानले व  डॉ. रत्नदीप जोशी यांनी सूत्रसंचालन केले.