पुणे, दि. 13: हर घर तिरंगा अभियानांतर्गत आळंदी नगरपरिषदेअंतर्गत राबविण्यात आलेल्या विविध उपक्रमांमध्ये विद्यार्थ्यांपासून नागरिक, कर्मचारी, महिला बचत गट, विविध संस्था यांचा उत्स्फूर्त प्रतिसाद लाभला आहे, अशी माहिती मुख्याधिकारी माधव खांडेकर यांनी दिली आहे.

आळंदी शहरात हर घर तिरंगा, हर घर स्वच्छता स्पर्धा व विविध देशभक्तीपर व जनजागृतीचे उपक्रमाचे पुढीलप्रमाणे आयोजन करण्यात आले. ७ ऑगस्ट रोजी आळंदी नगरपरिषद शिक्षण विभाग शाळा क्रमांक दोन व चार या शाळां मधील विद्यार्थ्यांमध्ये राष्ट्रीय अभिमानाची भावना स्वच्छतेचे महत्व आणि पर्यावरण संवर्धनाची जाणीव निर्माण करण्यासाठी जनजागृती करण्यात आली. ८ ऑगस्ट रोजी आळंदी नगरपरिषद शाळा क्र. 3 येथे चित्रकला स्पर्धा तसेच तिरंगा राखी मेकिंग स्पर्धा तिरंगा रांगोळी स्पर्धा घेण्यात आली. ११ ऑगस्ट रोजी आळंदी नगरपरिषद शाळा क्रमांक 4 मध्ये स्वातंत्र्यदिनानिमित्त “हस्ताक्षर स्पर्धा व माझे संविधान” या विषयावर निबंध स्पर्धेचे आयोजन करण्यात आले. १२ ऑगस्ट रोजी आळंदी नगरपरिषद शाळा क्रमांक चार मध्ये समूहगीत गायन स्पर्धा व चित्रकला स्पर्धा घेण्यात आली.

उपक्रमांच्या माध्यमातून स्वच्छता, पर्यावरण संरक्षण, देशभक्ती आणि सामूहिक जबाबदारी यांचे प्रभावी संदेश देण्यात आले.“हर घर तिरंगा, हर घर स्वच्छता” अभियानांतर्गत आळंदी शहरात घेतलेले हे विविध उपक्रम नागरिकांमध्ये राष्ट्रीय अभिमानाची भावना, स्वच्छतेचे महत्त्व आणि पर्यावरण संवर्धनाची जाणीव निर्माण करणारे ठरले, अशी माहिती श्री. खांडेकर यांनी प्रसिध्दीपत्रकान्वये दिली.

डिजिटल जगात स्वतःचे संरक्षण कसे करावे पद्मावती अ‍ॅरेझ व्हील्स कर्मचाऱ्यांमध्ये सायबर सुरक्षा जनजागृती उपक्रम संपन्न

पुणे- पद्मावती अ‍ॅरेझ व्हील्स येथे कर्मचाऱ्यांमध्ये सायबर सुरक्षा जनजागृतीसाठी इम्पॅक्ट अ‍ॅक्टिव्हिटी आयोजित करण्यात आली. परस्परसंवादी सत्रे, प्रत्यक्ष उदाहरणे आणि उपयुक्त सुरक्षा टिप्स यांच्या माध्यमातून आपण लोकांना डिजिटल जगात स्वतःचे संरक्षण कसे करावे याबद्दल सतत जनजागृती करत राहणे आवश्यक आहे असे येथे अवंती दळवी यांनी सांगितले .

हा उपक्रम एस.पी. कॉलेज आणि क्विक हील फाऊंडेशन यांच्या संयुक्त विद्यमाने ईशा जोशी आणि अवंती दळवी यांनी मार्गदर्शन केले. लोकांमध्ये जनजागृती निर्माण करण्यासाठी व त्यांना सायबर सुरक्षित ठेवण्यासाठी त्यांच्या समर्पित प्रयत्नांचे विशेष कौतुक करण्यात आले. सत्रादरम्यान कर्मचाऱ्यांनी उत्साहाने सहभाग घेतला व सायबर गुन्ह्यांबाबतचे स्वतःचे अनुभव शेअर केले, ज्यामुळे हा उपक्रम माहितीपूर्ण व परिणामकारक ठरला.

आंबेडकरी चळवळीने दिलेल्या लढ्याला यश आले असून, महामंडळाने दिलेल्या स्थगितीच्या निर्णयाचे डॉ. बाबासाहेब आंबेडकर सांस्कृतिक भवन विस्तारीकरण समितीच्या वतीने स्वागत करतो. आंबेडकरी चळवळीतील कार्यकर्त्यासाठी आजचा दिवस आनंदाचा आहे. मुख्यमंत्री देवेंद्र फडणवीस उपमुख्यमंत्री अजित पवार केंद्रीय राज्यमंत्री मुरलीधर मोहोळ उच्च शिक्षण मंत्री चंद्रकांत पाटील राज्यमंत्री माधुरी मिसाळ यांच्यासह या लढ्यामध्ये साथ दिलेल्या सर्वच लोकप्रतिनिधींचे मनःपूर्वक आभार मानतो. हा आंबेडकरी जनतेचा अस्मितेचा विषय आहे. त्यामुळे केवळ स्थगिती न देता हा करार रद्द करावा, यासाठी आमचा लढा सुरू राहील.–अॅड. अविनाश साळवे

डॉ. बाबासाहेब आंबेडकर सांस्कृतिक भवन विस्तार कृती समितीने मानले शासनाचे आभार

पुणे: मंगळवार पेठ येथील डॉ बाबासाहेब आंबेडकर सांस्कृतिक भवन शेजारील जागा आंबेडकर भवनांच्या विस्तारीकरणासाठी मिळावी अशी आंबेडकरी चळवळीची मागणी होती. मात्र ही जागा एका खासगी बिल्डरला देण्याचा निर्णय घेतला गेला होता. आज मुख्यमंत्री देवेंद्र फडणवीस यांनी आंबेडकरी समाजाच्या तीव्र भावना लक्षात घेऊन बिल्डरला जागा देण्याचा निर्णय अखेर रद्द केला आहे.असा दावा करण्यात येत आहे . मात्र MSRDC ने एन जी व्हेंचर्स ला दिलेल्या पत्रात म्हटले आहेकी,’ मंगळवार पेठ, पुणे येथील नगर भूमापन क्र.४०५ मधील ८९०० चौ. मी. जमिनीबाबत.महामंडळ व आपलेत दि. ०४.०९.२०२४ रोजीचा झालेला भाडेपट्टा करार झाला आहे. या भाडेपट्टा करारा अन्वये आपणास महामंडळाने मंगळवार पेठ, पुणे येथील नगर भूमापन क्र.४०५ मधील ८९०० चौ. मी. जमिन भाडेतत्वावर ६० वर्षा करिता दिलेली आहे. सदर जागेचा ताबा महामंडळामार्फत दि.११.११.२०२४ रोजी आपणास देण्यात आलेला आहे.तथापि, प्रत्यक्ष जागेवर आपणामार्फत सुरु असलेल्या कामास महामंडळामार्फत पुढील आदेशापर्यंत स्थगिती देण्यात येत आहे.सदरचे पत्र उपाध्यक्ष व व्यवस्थापकीय संचालक यांच्या मान्यतेने निर्गमित करण्यात येत आहे.

डॉ बाबासाहेब आंबेडकर भवन विस्तार कृती समितीने मात्र मुख्यमंत्र्यांनी बिल्डरला जागा देण्याचा निर्णय अखेर रद्द केला असे सांगत या निर्णयाबद्दल आनंद व्यक्त करण्यात आला असून शासनाचे आभार मानले आहेत.

“ राज्य शासनाने आंबेडकरी जनभावनेची व आंदोलनाची दखल घेऊन नियोजित स्मारकाच्या जागेतील खासगी विकसकाच्या कामाला स्थगिती दिल्याबद्दल शासनाचे , मुख्यमंत्र्यांचे आम्ही आभार मानत आहोत. तसेच हा विजय आंबेडकरी पक्ष संघटनांच्या एकजुटीचा व सामाजिक संघटनांच्या आंदोलनाच्या दबावामुळे झाल्यामुळे सर्व आंदोलकांचे सुद्धा आभार व्यक्त करतो.”-शैलेंद्र चव्हाण , आंदोलनाचे निमंत्रक

“ आंबेडकरी आंदोलकांनी २५ वर्षांपासुन सातत्यपूर्ण केलेली लढाई व चळवळीतील दोन पीढ्यांचा हा विजय असून शासनाने शक्य तितक्या लवकर या ठिकाणी बाबासाहेबांचे स्मारक उभे करावी अशी भावना आंबेडकरी जनतेमध्ये आहे. मुख्यमंत्री देवेंद्र फडणवीस तसेच केंद्रीय नागरी उड्डयण राज्यमंत्री मुरलीधर मोहोळ यांचे तसेच पुणे पोलीस आयुक्त अमितेश कुमार यांचेही आभार व्यक्त करीत आहोत. आमच्यासाठी हा आनंदाचा क्षण आहे.-राहुल डंबाळे , आंदोलनाचे समन्वयक

डॉ बाबासाहेब आंबेडकर यांचे पुण्यात भव्य स्मारक व्हावे ही आंबेडकरी समाजाची मागणी होती. त्यासाठीचा ठराव पुणे महापालिकेने मंजूर केलेला असताना सदरची जमीन खासगी बिल्डरला देण्यात आली होती, कृती समितीने मुख्यमंत्री आणि दोन्ही उपमुख्यमंत्र्यांकडे या बाबत पाठपुरावा केला होता, येत्या १५ ऑगस्ट रोजी ५० ते ६० हजार लोक ठिय्या आंदोलन करणार होते, त्याची जोरदार तयारी सुरू होती, आंबेडकरी समाजाच्या तीव्र भावना लक्षात घेऊन मुख्यमंत्री देवेंद्र फडणवीस यांनी खासगी बिल्डरला जमीन देण्याचा निर्णय रद्द केला याबद्दल समिती त्यांची आभारी आहे, आता लवकरात लवकर डॉ बाबासाहेब आंबेडकर यांचे भव्य स्मारक या जागेवर उभारावे ही शासनाला विनंती.-परशुराम वाडेकर, आंदोलनाचे समन्वयक

पुणे- अखिल भारतीय गांधर्व महाविद्यालय मंडळाच्या वतीने प्रतिष्ठेचा व मानाचा समजला जाणारा “महामहोपाध्याय” पुरस्कार प्रसिद्ध व ज्येष्ठ कथक नर्तक डॉ.नंदकिशोर कपोते यांना जाहीर झाला आहे. डॉ.नंदकिशोर कपोते यांना या पूर्वी भारत सरकार चा संगीत नाटक अकादमी राष्ट्रीय पुरस्कार माननीय राष्ट्रपती द्रौपदी मुर्मु यांच्या हस्ते मिळाला आहे. तसेच याशिवाय महाराष्ट्र शासनाचा राज्य सांस्कृतिक पुरस्कार, शासनाचा डॉ बाबासाहेब आंबेडकर दलित मित्र पुरस्कार , पुणे महानगरपालिकेचा बालगंधर्व पुरस्कार असे अनेक पुरस्कार मिळाले आहेत. पं.विष्णू दिगंबर पलुस्कर यांच्या स्मरणार्थ हा महामहोपाध्याय पुरस्कार देण्यात येतो. महामहोपाध्याय पुरस्कार हा कलाक्षेत्रातील सर्वोच्च सन्मान मानला जातो. डॉ.नंदकिशोर कपोते यांना सोमवार दिनांक १८ ऑगस्ट ला मुंबई येथे रविंद्र नाटयमंदीर येथे अखिल भारतीय गांधर्व महाविद्यालय मंडळाच्या दीक्षांत समारोह कार्यक्रमात हा महामहोपाध्याय पुरस्कार देण्यात येणार आहे.

पुणे-काल (सोमवारी)तळजाई परिसरात जुगार अड्ड्यावर पुणे पोलिसांनी छापा टाकत कारवाई केली. यावेळी अड्ड्यावरती जुगार खेळताना एका भाजप पदाधिकाऱ्याला पोलिसांनी रंगेहाथ पकडलं आहे. या प्रकरणी भाजप पदाधिकाऱ्यासह 2 ते 3 जणांना पोलिसांनी ताब्यात घेतलं. या सर्वांविरोधात गुन्हा दाखल करण्यात आला आहे. भाजप पदाधिकाऱ्याला पकडण्यात आल्यामुळे पुण्यात खळबळ उडाली आहे.

पुणे पोलिसांच्या गुन्हे शाखेची आणि सहकारनगर पोलिसांनी ही छापेमारी केली होती, औदुंबर विठ्ठल कांबळे असे या भाजपच्या पदाधिकाऱ्याचे नाव आहे. कांबळे याच्यासोबत इतर 2 ते 3 जण जुगार खेळत असताना पोलिसांनी ही कारवाई केली आहे. सहकारनगर पोलिस ठाण्यात गुन्हा दाखल करण्यात आला आहे.औदुंबर कांबळे हा पर्वती विधानसभा मतदारसंघाचा चिटणीस म्हणून कार्यरत आहे. कांबळे त्याच्या इतर दोन ते तीन सहकाऱ्यांसोबत तळजाई परिसरात असणाऱ्या एका रिकाम्या कारखान्यात रमी खेळत होता. यावेळी सहकार नगर पोलीस आणि गुन्हे शाखेच्या युनिट दोनने छापा टाकला असता ते सर्वजण जुगार खेळत असल्याचे आढळून आले. या सर्वांना पोलिसांनी ताब्यात घेतले असून सहकारनगर पोलीस ठाण्यात गुन्हा दाखल करण्यात आला आहे.

पुणे : नंजनगुडू श्री वरदेंद्र श्री राघवेंद्र स्वामी मठातर्फे श्री राघवेंद्र स्वामी यांच्या ३५४व्या आराधना महोत्सवाची आज (दि. १२ ऑगस्ट) भव्य रथोत्सवाने भक्तीमय वातावरणात सांगता झाली.

महोत्सव दि. १० ते १२ ऑगस्ट या कालावधीत सदाशिव पेठेतील लक्ष्मी रस्त्यावरील श्री वरदेंद्र श्री राघवेंद्र स्वामी मठ येथे आयोजित करण्यात आला होता. श्री राघवेंद्र स्वामी महासंस्थानचे मंत्रालय (आंध्रप्रदेश) पिठाधीश्वर श्री श्री १०८ श्री सुबुधेंद्रतीर्थ श्रीपादा: पिठाधीपतिगलू नंजनगुडू यांच्या शुभआशीर्वादाने महोत्सवाचे आयोजन करण्यात आले होते.

रथोत्सवाला श्री वरदेंद्र श्री राघवेंद्र स्वामी मठापासून सुरुवात झाली. लक्ष्मी रस्त्याने हा रथोत्सव असंख्य भाविकांच्या उपस्थितीत नगरकर तालिम चौकातून शनिपाराकडे जाणाऱ्या रस्त्यावरील लिंबाजी महाराज विठ्ठल मंदिरात आला. येथे श्री राघवेंद्र स्वामी आणि भक्त प्रल्हादराय यांची भेट झाली. रथोत्सव कुमठेकर रस्त्याने मार्गस्थ होत खालकर मारुती येथे आला. येथे महाआरती होऊन रथोत्सवाची सांगता झाली. आकर्षक फुलांनी रथ सजविण्यात आला होता. सजावटीसाठी फुले बंगळुरू येथून आणण्यात आली होती. रथोत्सवापुढे भाविकांनी भक्तीगीतांवर ताल धरत ‘गोविंदा गोविंदा..’ असा जयघोष केला.

तीन दिवसीय उत्सवानिमित्त सुप्रभात सेवा, दुग्धाभिषेक, अलंकार, महामंगल आरती, अन्नदान सेवा, पारायण आदी धार्मिक कार्यक्रमांचे आयोजन करण्यात आले होते, अशी माहिती मठाचे व्यवस्थापक दत्तात्रय जोशी यांनी सांगितली. या निमित्ताने मठातील वृंदावनास फुलांची आकर्षक सजावट करण्यात आली होती.

जेधे सोशल वेल्फेअर फाऊंडेशन, इंद्राणी बालन फाऊंडेशनतर्फे आयोजन

पुणे: जेधे सोशल वेल्फेअर फाऊंडेशन आणि इंद्राणी बालन फाऊंडेशन यांच्या वतीने यंदाही अभिनव बालगोपाळ सायकल दहीहंडीचे आयोजन केले आहे. येत्या शनिवारी (ता. १६) सकाळी ११.३० वाजता जेधे मॅन्शन, पंचमुखी मारुती मंदिराजवळ, शुक्रवार पेठ, पुणे येथे ही दहीहंडी बालगोपाळांच्या हस्ते फोडण्यात येणार आहे. या सायकल दहीहंडीमध्ये २०० सायकल आहेत. दहीहंडी फोडल्यानंतर अतिदुर्गम भागातील १००, तर शहराच्या मध्यवस्तीतील १०० गरजू विद्यार्थ्यांना या सायकलींचे मोफत वाटप करण्यात येणार आहे. बालगोपाळ सायकल दहीहंडीच्या माध्यमातून गरजू बालगोपाळांच्या जीवनात आनंदाचे क्षण भरविण्याचा या उपक्रमाचा हेतू आहे, अशी माहिती उपक्रमाचे आयोजक पुनितदादा बालन आणि कान्होजी दयानंद जेधे यांनी पत्रकाद्वारे दिली आहे.

कान्होजी जेधे म्हणाले, “जेधे सोशल वेल्फेअर फाउंडेशन आणि इंद्राणी बालन फाऊंडेशनच्या माध्यमातून दरवर्षी अभिनव पद्धतीने दहीहंडी साजरी केली जाते. याआधी सायकल दहीहंडी, खेळण्यांची दहीहंडी आयोजित केली होती. त्यातून समाजाच्या वंचित घटकांतील मुलांना हजारो खेळण्यांचे वाटप केले होते. गेल्यावर्षीपासून इंद्राणी बालन फाऊंडेशन यांच्या माध्यमातून पुनीत दादा बालन यांच्या सहकार्याने सायकल दहीहंडी घेतली जात आहे. यंदा या उपक्रमात भोर, राजगड, मुळशी तालुक्यातील रायरी, सोंडे माथाना, कोंदवाडी, मेटपिलावरे, पाली बुद्रुक, वाजेघर बुद्रुक, लव्ही बुद्रुक, खेचरे, कळमशेत, बेलावडे, मांदेडे आणि बावीसमैल या अतिदुर्गम भागात वसलेल्या गावांमधील विद्यार्थ्यांना व पुणे शहरातील मध्यवर्ती भागातील गरजू विद्यार्थ्यांना सायकली मोफत दिल्या जातील. श्री शिव छत्रपती मित्र मंडळ कार्यक्रमाचे संयोजक आहे. याप्रसंगी मृत्युंजय पथक आणि गणेशा वाद्य पथक यांचे ढोल-ताशा वादन होणार आहे.”

आडकर फौंडेशनतर्फे कोमल पवार स्मृती पुरस्काराने पंकज मोदाणी यांचा सन्मान

पुणे : देशात अवयव प्रत्यारोपणाची शस्त्रक्रिया होऊन पन्नास वर्षांहून अधिक काळ लोटला तरीही आज समाजात पाहिजे तेवढ्या प्रमाणात अवयव दानाविषयी जागृती झालेली दिसत नाही. गरजू रुग्ण आणि अवयवदात्याची उपलब्धता यात मोठी तफावत आहे. या करिता अवयवदान विषयी जनजागृती मोठ्या प्रमाणात होणे काळाची गरज आहे. अवयवदान व प्रत्यारोपणाची अत्यंत खर्चिक असल्यामुळे शासकीय रुग्णालयांमध्ये अवयव प्रत्यारोपणाची सुविधा उपलब्ध होणे आवश्यक आहे. ज्या योगे अवयव तस्करीला आळा बसण्यास मदत होईल, असे प्रतिपादन आय. एम. ए.चे माजी अध्यक्ष डॉ. अविनाश भोंडवे यांनी केले.

अवयवदानासाठी जनजागृती करणारे रिबर्थ फौंडेशनचे अध्यक्ष पंकज मोदाणी यांचा आडकर फौंडेशनतर्फे आज (दि. १२ ऑगस्ट) कोमल पवार स्मृती पुरस्कार देऊन गौरव करण्यात आला. पुरस्काराचे वितरण आय. एम. ए.चे माजी अध्यक्ष डॉ. अविनाश भोंडवे यांच्या हस्ते झाले. त्या वेळी ते बोलत होते. सामाजिक कार्यकर्ते राजेश शेट्टी यांची प्रमुख उपस्थिती होती. आडकर फौंडेशनचे अध्यक्ष ॲड. प्रमोद आडकर, मैथिली आडकर मंचावर होते. शाल, श्रीफळ, सन्मानपत्र असे पुरस्काराचे स्वरूप होते. पत्रकार भवन, नवी पेठ येथे कार्यक्रम झाला. अवयव दानाविषयी माहिती मिळाल्यानंतर उपस्थितांपैकी काही जणांनी अवयव दानाचा अर्ज देखील भरून दिला.
अवयवदानाविषयीची जनजागृती फक्त सुशिक्षित, उच्चवर्गीयांमध्ये न होता समाजातील सर्व स्तरात होणे अत्यंत आवश्यक आहे, असे सांगून डॉ. भोंडवे म्हणाले, अवयवदान म्हणजे मृतदेहाची विटंबना हा गैरसमज दूर करून अवयवदानाची चळवळ मोठ्या प्रमाणात पुढे नेणे आवश्यक आहे. मेंदूमृत व्यक्ती, मृत व्यक्ती तसेच जीवंत व्यक्ती देखील अवयव दान करू शकते या विषयी देखील त्यांनी माहिती दिली.
सत्काराला उत्तर देताना पंकज मोदाणी म्हणाले, घरातील आजारापणामुळे अवयवदानाचे महत्त्व कळले, त्यानंतर या क्षेत्रात कार्य करण्याचा निर्णय घेतला. यातूनच रिबर्थ फाऊंडेशनची स्थापना करण्यात आली. फाऊंडेशनच्या माध्यमातून अवयवदानाविषयी जनजागृती करण्याचे मोलाचे कार्य विविध माध्यमातून मोठ्या प्रमाणात केले जात आहे. ज्यात विविध रुग्णालये, सामाजिक संस्था, प्रसारमाध्यमे, ग्रीन कॉरिडॉर मुव्ही कॉम्पिटिशनमध्ये सहभाग यासारखे उपक्रम राबविले जात आहेत. कोमल पवार स्मृती पुरस्कार ही आमच्या संस्थेच्या कामाची फक्त पोचपावतीच नव्हे तर जबाबदारीची जाणीव करून देणारा आहे. या पुरस्काराच्या माध्यमातून आमच्या कार्याचा विस्तार करण्यासाठी आम्हाला प्रेरणा मिळाली आहे. हा पुरस्कार मी माझ्या मातोश्री तसेच रिबर्थ फाऊंडेशनच्या सर्व कार्यकर्त्यांना समर्पित करीत आहे.
अवयवदानाच्या जनजागृतीसाठी आम्ही प्रयत्नरत आहोत, असे राजेश शेट्टी यांनी सांगितले.
प्रास्ताविकात ॲड. प्रमोद आडकर यांनी पुरस्काराविषयी माहिती सांगितली. पुरस्काराच्या माध्यमातून अवयवदानासारख्या महत्त्वाच्या विषयावर जनजागृती व्हावी हा उद्देश आहे. कार्यक्रमाचे सूत्रसंचालन आणि मानपत्राचे वाचन निरुपमा महाजन यांनी केले. मानपत्राचे लेखन प्रभा सोनवणे यांचे होते.

कार्यक्रमाच्या दुसऱ्या सत्रात ‘पुनर्जन्म’ या विषयावर कविसंमेलन झाले. यात प्रभा सोनावणे, भारती पांडे, सुजाता पवार, ऋचा कर्वे, अनुराधा काळे, तनुजा चव्हाण, कपिल घोलप, प्रतिमा कुलकर्णी, स्वप्नील पोरे, प्रतिमा जोशी यांचा सहभाग होता.

पुणे- अवघ्या २५ वर्षाची तरुणीने आत्महत्या करण्यासाठी रात्री साडेअकरा वाजता कॅनालमध्ये उडी तर घेतली पण …. तेथून जाणाऱ्या एका बीट मार्शलने कॅनालमध्ये उडी मारुन या तरुणीचा जीव वाचविला

पर्वती पोलीस स्टेशन पर्वती दर्शन बीट मार्शल वरील पोलीस अंमलदार किरण पवार व पोलीस अंमलदार राहुल उन्हाळे हे दि.११/०८/२०२५ रोजी रात्रपाळी ड्युटीवर असताना रात्रौ २३/३० वा.च्या सुमारास सावरकर चौक येथुन मित्रमंडळ चौकाकडे निघाले असता त्या ठिकाणी कॅनाल संरक्षक जाळीचे आतील कठड्यावर एक २५ वर्ष वयाची महिला आत्महत्या करण्यासाठी उभी होती. लोक तिला बाहेर ये म्हणत होते. त्यावेळी मार्शल डयुटीवरील अंमलदार हे त्या ठिकाणी गेले तेवढयात त्या महिलेने पुर्ण क्षमतेने वाहत असलेल्या कॅनालचे पाण्यात उडी मारली. त्यावेळी पोलीस अंमलदार किरण पवार यांनी स्वतःच्या जिवाची पर्वा न करता कॅनालमध्ये उडी घेवुन वाहत्या पाण्यात बुडत असलेल्या महिलेस कॅनालमधुन बाहेर काढुन तिचा जीव वाचविला. त्यावेळी पोलीस अंमलदार राहुल उन्हाळे यांनीही त्या महिलेस बाहेर काढण्यास मदत केली. त्यावेळी त्या ठिकाणी सदर महिलेचे मित्र व नातेवाईक आले. तिला उपचारार्थ राव हॉस्पीटल येथे नेले त्या महिलेची प्रकृती चांगली आहे.
पोलीस अंमलदार किरण पवार व पोलीस अंमलदार राहुल उन्हाळे यांचे उल्लेखनीय कामगिरीबद्दल तसेच सदर कामगिरीबाबत पोलीस आयुक्त, अमितेश कुमार, पोलीस सह आयुक्त रंजनकुमार शर्मा, अपर पोलीस आयुक्त, पश्चिम प्रादेशिक विभागराजेश बनसोडे,पोलीस उप-आयुक्त परिमंडळ ०३, संभाजी कदम, सहाय्यक पोलीस आयुक्त सिंहगड रोड, अजय परमार, वरीष्ठ पोलीस निरीक्षक नंदकुमार गायकवाड, पोलीस निरीक्षक (गुन्हे) श्रीमती अनिता हिवरकर यांनी व्यक्तीशः त्यांचा सन्मान केला. तसेच पोलीस उप-आयुक्त परिमंडळ ०३ पुणे शहर यांनी प्रत्येकी १० हजार रुपयांचे रिवार्ड जाहीर केले.