पुणे- आज येथे पुण्याच्या गणेशोत्सव विसर्जन मिरवणूकीबाबत उपमुख्यमंत्री अजित पवार यांनी आपली आणि प्रशासनाची भूमिका स्पष्ट केली असून त्यानुसार आता मानाच्या पाचही गणपती मंडळांना जनभावना लक्षात घेऊन नेहमीप्रमाणे उशीर न करता सकाळी लवकर विसर्जन मिरवणुकीत सहभागी व्हावं लागणार असल्याचे स्पष्ट झाले आहे.

पुण्याच्या विसर्जन मिरवणुकीत पहिल्या पाच मानाच्या गणपती मंडळांनंतर लगेच सहभागी होण्याचा निर्णय अखिल मंडई मंडळ आणि श्रीमंत भाऊसाहेब रंगारी गणपती मंडळाने काल मागे घेतला, या दोन्ही मंडळांची विसर्जन मिरवणूक दरवर्षीप्रमाणे सायंकाळनंतर सुरू होईल, असे पुण्याचे पोलिस आयुक्त अमितेशकुमार यांनी कालच जाहीर केले होते .त्यानंतर विसर्जन मिरवणूक वेळेत म्हणजे विसर्जन दिवशीच पूर्ण व्हावी अशी प्रत्येकाची भावना असते पण मानाची ५ गणपती मंडळे उशिरा मिरवणुकीत सहभागी होतात आणि पूर्ण दिवस लक्ष्मी रस्त्यावर घालवितात अशी अनेकांची तक्रार होती त्यामुळे काही मंडळांनी तुम्ही ७ वाजता सकाळी मिरवणुकीला प्रारंभ करा अन्यथा आम्ही मिरवणूक सुरु करू अशीही भूमिका ६० मंडळांनी घेतली आणि विसर्जन मिरवणुकीत कोणी कधी सहभागी व्हायचे यावरून चर्चा सुरु झाली . या मुद्द्यावर पोलीस आयुक्त यांनी उपमुख्यमंत्री अजितदादा पवार यांच्याशी बोलून नियमावली केल्याचे वृत्त आहे या पार्श्वभूमीवर आज अजित पवार यांनी आपली भूमिका स्पष्ट केली आहे. यानंतर सविस्तर पणे माहिती पोलीस आयुक्त देतील अशी अपेक्षा आहे .

अजित पवार म्हणाले कि, काही मंडळांनी परस्पर आपण मिरवणुकीत कधी सहभागी होणार हे जाहीर केले होते ,काही गणेश मंडळांचे कार्यकर्ते मला भेटले आम्हाला सकाळी ७ वाजता निघू द्या म्हणाले,त्या सगळ्या मंडळाशी बोलून मतभेद राहणार नाही यासाठी आम्ही प्रयत्न करू, मानाचे गणपती यांचा मान ठेऊन त्जेयांना वढं सकाळी लवकर विसर्जनासाठी काढता येईल तेवढा प्रयत्न करू या शिवाय किती ढोल ताशा पथक संख्या हवी, मानाचे गणपती यांच्यासोबत सकारात्मक चर्चा होत आहे गणेशोत्सव महायुतीच्या राज्य महोत्सव म्हणून साजरी करण्याचा निर्णय घेतला आहे.अधिक उत्साहात यंदा गणेशोत्सव होईल, राज्यातील सगळी यंत्रणा झोकून काम करणार आहे.सकाळी ६ ते रात्री २ मेट्रो सुरू राहील, शेवटच्या दिवशी सगळा दिवस चालू राहील. गणपती पाहण्यासाठी कुठल्या स्टेशनला कुठे चढावे आणि उतरावे याबाबत सुद्धा नियोजन करणार आहोत.पुणे ग्रँड चॅलेंज टूर मध्ये दोन्ही पालिका, जिल्हा परिषद, अनेक वेगवेगळ्या यंत्रणा यांचे काम होणार आहे तसेच आज लोगो तयार केला आहे.

पुणे-

पोलिसांवर जो राजकीय दबाव येतो त्यामुळे सत्यशोधन करण्याचा रस्ता पोलिस सोडून देतात. मालेगाव बॉम्ब खटला आणि डॉ. दाभोलकर खून खटला तसेच ७/११ ट्रेन बॉम्ब ब्लास्टमधील बळींना न्याय मिळाला नाही. या सर्व केसमध्ये गुन्हेगार आणि कट करणारे निर्दोष सुटले यात व्यवस्थेचे अपयश आहे. या मोठ्या गुन्ह्यांत मृत्युमुखी पडलेल्या लोकांना आपण न्याय देऊ शकलो नाही. याला राजकारणी लोकांचा हस्तक्षेप कारणीभूत आहे असे माजी आय. पी.एस.अधिकारी मीरा बोरवणकर यांनी येथे म्हटले आहे ,शहीद डॉ.नरेंद्र दाभोलकर यांच्या बाराव्या स्मृतिदिनानिमित्त राष्ट्र सेवा दल, पुणे येथे झालेल्या कार्यक्रमात माजी पोलिस अधिकारी मीरा चड्डा बोरवणकर यांनी डॉ. दाभोलकर यांच्या लिखाणावर आधारित पाच पुस्तकांचे प्रकाशन केले. या ग्रंथमालेचे संपादक प्रभाकर नानावटी, डॉ.शरद बाविस्कर, अंनिस ट्रस्टी अरविंद पाखले हे विचारमंचावर उपस्थित होते.

या प्रकारचे केसेस वर्षानुवर्षे चालतात आणि यामुळे न्याय होत नाही. गौरी लंकेश, गोविंद पानसरे आणि प्रा.कलबुर्गी यांचे केसेस मध्ये तर अजून खटला चालूच झाला नाही, ही भयानक अवस्था आहे. याला उपाय म्हणजे नागरिकांशी तार्किक आणि लोकशाही संवाद वाढवता येईल. लोक दररोजच्या रोजीरोटीच्या कामात एवढी व्यस्त आहे त्यांच्याशी संवाद साधला पाहिजे. आपली निष्ठा संविधान प्रति असली पाहिजे. आपण मूलभूत हक्काबद्दल बोलतो पण आपण मूलभूत कर्तव्य बद्दल का विसरतो? असा सवालही त्यांनी केला.

जवाहरलाल नेहरू विद्यापीठाचे फ्रेंच तत्वज्ञानाचे प्राध्यापक डॉ.शरद बाविस्कर म्हणाले, डॉक्टर दाभोलकर यांचा समाजातील हस्तक्षेप हा केवळ खटाटोप नव्हता तर त्याला एक सैद्धांतिक बैठक होती. आपला आजचा समाज खरंच चिकित्सक बनला आहे का ? जे महत्त्वाचे न्यायाचे मुद्दे आहेत त्या मुद्द्यावर समाजात निराशा का असते? पुरोगामी चळवळी महाराष्ट्रात यशस्वी झाल्या. महाराष्ट्राप्रमाणे इतर राज्यात संविधानवादी चळवळ होत नाही. आपल्याकडील शैक्षणिक संस्था चिकित्सक मने घडवणारी नाहीत. यावर आपले काम व्हावे. अंधश्रद्धा फक्त आस्था, धार्मिकता नाही तर अर्थकारण, हितसंबंध हे सुद्धा असते. जेव्हा हे हितसंबंध धोक्यात येतात तेव्हा अडचण येते. इथे राजकारणाची भूमिका महत्त्वाची असते. पुरोगामी चळवळीची राजकीय संवादशक्ती कमी पडते. डॉ. दाभोलकर ही आशा आणि ऊर्जा निर्माण करू शकायचे. त्यामुळे त्यांचे वेगळेपण जाणवते.

डॉ. दाभोलकर यांना अभिवादन
डॉक्टर नरेंद्र दाभोलकर यांच्या १२व्या स्मृतिदिनानिमित्त काल महाराष्ट्र अंधश्रद्धा निर्मूलन समिती पुणे शाखेतर्फे, वि. रा. शिंदे पुलावर त्यांना अभिवादन करण्यात आले. मेळघाट येथे लहान बालकांना पोटावर गरम डागण्या देण्याच्या प्रथेविरुद्ध प्रबोधन करण्यासाठी पुण्याहून काही कार्यकर्ते एक टेम्पो घेऊन मेळघाटला जाणार आहेत. या गाडीला यावेळी विश्वस्त अध्यक्ष गणेश चिंचोले यांच्या हस्ते हिरवा झेंडा दाखवण्यात आला. डॉक्टर दाभोलकरांच्या खुनाचे सूत्रधार पकडण्यात यावे अशी मागणी यावेळी अनिसतर्फे करण्यात आली. यावेळी नंदिनी जाधव, मिलिंद देशमुख,, शंकर कणसे,प्रवीण देशमुख श्रीपाल ललवाणी, अनिल वेल्हाळ, भगवान रणदिवे, अरुण जाधव इत्यादी कार्यकर्ते उपस्थित होते.

विश्वशांती दर्शन वाहिनीच्या चौथ्या वर्धापन दिनानिमित्त माजी राज्यसभा सदस्य सुनील शास्त्री यांचे विचार
पुणे” मानवतेचा प्रचार करायचा असेल तर मानवता अंगीकारणे सर्वात महत्वाचे आहे. जर मानवता नसेल तर जागतिक शांती कशी येईल. सध्याच्या काळात प्रत्येक व्यक्ती शांती विसरला आहे. अशा वेळी जयपूरमध्ये भारतरत्न लाल बहाद्दू शास्त्री यांच्या नावाने विश्वधर्म संग्रहालय बांधून जागतिक शांतीचा नारा दिला जाईल.” असे विचार माजी राज्यसभा सदस्य आणि भारतरत्न लाल बहाद्दूर शास्त्री यांचे सुपुत्र सुनील शास्त्री यांनी व्यक्त केले.
माइर्स एमआयटी ने सुरू केलेल्या विश्वशांती दर्शन वाहिनीच्या चौथ्या वर्धापन दिनानिमित्त ते प्रमुख पाहुणे म्हणून बोलत होते.
या प्रसंगी अ‍ॅड गुरू भारत दाभोळकर आणि श्रीमती शास्त्री सन्माननीय पाहुणे म्हणून उपस्थित होते. कार्यक्रमाच्या अध्यक्षस्थानी माइर्स एमआयटीचे संस्थापक अध्यक्ष विश्वधर्मी प्रा.डॉ. विश्वनाथ दा. कराड हे होते. तसेच विश्वशांती दर्शन वाहिनीचे सीईओ डॉ. मुकेश शर्मा आणि प्रसिद्ध कवी डॉ. संजय उपाध्ये उपस्थित होते.
सुनील शास्त्री म्हणाले,” जय जवान, जय किसान हा नारा देणारे भारतरत्न लाला बहादूर शास्त्री यांनी नेहमीच देशाच्या कल्याणाचा विचार केला. या नार्‍यामुळे संपूर्ण देश एक झाला. त्याच मार्गावर चालत डॉ. विश्वनाथ कराड यांनी जागतिक शांती हे आपल्या जीवनाचे ध्येय बनवले आहे. ते विश्वशांती दर्शन वाहिनीद्वारे शांतीचा संदेश पसरवत आहेत आणि सर्वांच्या मनात शांतीचे बीज पेरत आहेत.”
” विद्यार्थी जीवनाची गोष्ट सांगतांना सुनील शास्त्री म्हणाले की, माझ्या बालपणी माझे वडील लाल बहादूर शास्त्री यांना २१ दिवस भेटू शकलो नाही. त्यानंतर मला राग आला आणि मी माझ्या वडिलांशी तो विषय बोललो. त्यावेळी लाल बहादूर शास्त्री यांनी उत्तर दिले की, बेटा येथील लोकांनी मला देशातील सर्वोच्च पदावर बसवले आहे. म्हणून भारत देश हा माझे संपूर्ण कुटुंब आहे. त्यांची काळजी घेणे माझे कर्तव्य आहे. म्हणूनच मी माझ्या कुटुंबातील सदस्यांना भेटू शकलो नाही. डॉ. कराड देखील या जागतिक विचारसरणीवर विश्वास ठेवणार्‍या शास्त्रीजींच्या पावलावर पाऊल ठेवून चालत आहेत.”
आपल्या स्वागत पर भाषणात डॉ. मुकेश शर्मा म्हणाले, या वाहिनीचा पाया वसुधैव कुटुंब कमच्या विचासरणीवर आणि जागतिक शांतीच्या तत्वावर रचला गेला आहे. या माध्यमातून प्रत्येक व्यक्तीला शांती कशी मिळू शकते या विषयावर सतत प्रसारण केले जात आहे. त्यानंतर भारत दाभोळकर यांनी प्रश्नोत्तरांच्या माध्यमातून आपले विचार व्यक्त केले.
येथे डॉ. विश्वनाथ कराड यांच्या जीवनकार्यावर आधारित लघु चित्रपट दाखविण्यात आला.
विद्यार्थीनी संज्ञा उपाध्ये हिने आपल्या सुरेल आवाजात सूत्रसंचालन करून प्रेक्षकांची मने जिंकली. डॉ. संजय उपाध्ये यांनी आभार मानले.

पुणे- सोळावी स्वर्गीय राजीव गांधी स्मृती जिल्हा टेनिक्वाईट स्पर्धा महाराष्ट्रीयन मंडळ टिळक रोड येथे दिनांक 19 व 20 ऑगस्ट दरम्यान संपन्न झाली .स्पर्धा सब ज्युनिअर( 14 वर्षाखालील) मुले मुली ज्युनियर (18 वर्षाखालील) मुले मुली व खुला गट पुरुष व महिला अशा तीन गटात झाली. अत्यंत चुरशीच्या झालेल्या या स्पर्धेत खुल्या गटांमध्ये प्रथमेश ढवळे यांनी प्रणव पाटील वर 1921 21 21 18 21 11 असा पराभव करून अंतिम फेरी गाठली तर साहिल खेडेकर यांनी आदित्य मेस्त्री 18 21 19 21 13 असा पराभव करून अंतिम फेरी गाठली अंतिम फेरीमध्ये प्रथमेश ढवळे यांनी साहिल खेडेकर यांचा 19 21 ,21 17 ,21 16 असाच असे चुरशीच्या सामन्यात पराभव करून सलग चौथ्या वर्षी या स्पर्धेचे विजेतेपद पटकावले. महिला गटामध्ये कस्तुरी बाजारे हिने वैष्णवी ठिगळे हिचा 21 11, 21 9 असा सरळ पराभव करून अंतिम फेरी गाठली दुसऱ्या सामन्यात प्राप्ती बालवडकर तिने वैष्णवी रिठे हिचा 21 8, 21 5 असा पराभव केला करून अंतिम फेरीत प्रवेश केला तर कस्तुरी बाजरे येणे वैष्णवी ठिगळे हिचा 21 13 21 9 असा पराभव करून अंतिम फेरी गाठले अंतिम फेरीत कस्तुरी बाजरेने प्राप्ती बालवडकर हिचा 21 16 असा पराभव करून अंतिम फेरी गाठली अंतिम फेरीत कस्तुरी बाजरेने प्राप्ती बालवडकर तिचा २१ १८ २१. १२ असा सरळ पराभव करून विजेतेपद पटकावले कस्तुरी बाजरेने जूनियर 18 वर्षाखालील गटातही विजेतेपद मिळवला आहे सविस्तर निकाल पुढीलप्रमाणे 14 वर्षाखालील मुले

अंतिम फेरी

अर्णव लोणारी विजय विरुद्ध जावेद आतार 21 19 21 18

14 वर्षाखालील मुली

अंतिम फेरी जानवी टिळेकर विजय विरुद्ध धनश्री भोईटे 21 13 21 16

18 वर्षाखालील मुले अंतिम फेरी

मयूर शेलार विजयविरुद्ध विराज मोरे 21 19 22 20

सविस्तर निकाल पुढील प्रमाणे

14 वर्षाखालील मुली

प्रथम क्रमांक जानवी टिळेकर उरळीकांचन

द्वितीय क्रमांक धनश्री भोईटे उरळी कांचन

14 वर्षाखालील मुले

प्रथम क्रमांक मयूर शेलार उरळीकांचन

द्वितीय क्रमांक विराज मोरे गरवारे कॉलेज

17 वर्षाखालील मुली

प्रथम क्रमांक जानवी बाजरे मॉडर्न कॉलेज

द्वितीय क्रमांक प्राप्ती बालवडकर भारती विद्यापीठ बालेवाडी

खुला गट पुरुष

प्रथम क्रमांक प्रथमेश ढवळे उरळी कांचन

द्वितीय क्रमांक साहिल खेडेकर उरळी कांचन

      स्पर्धेचे बक्षीस वितरण समारंभ माजी नगरसेवक अविनाश बागवे यांच्या हस्ते झाला अध्यक्षस्थानी संस्थेचे उपाध्यक्ष चंद्रकांत पिंपळे होते. प्रास्ताविक अनिल वरपे सचिव यांनी केले. चेतन अग्रवाल सहसचिव यांनी पाहुण्यांची ओळख करून दिली  आपल्या भाषणांमध्ये अविनाश बागवे यांनी खेळाडूंना खेळाचे महत्व व त्यासाठी पुणे महानगरपालिका क्रीडा समिती अध्यक्ष असताना केलेल्या कामाची माहिती देऊन संघटनेस रिंग टेनिस या खेळासाठी सर्वतोपरी मदत करण्याचे आश्वासन दिले . या स्पर्धेत सलोनी फाऊंडेशन तर्फे रेखा ऐतवडेकर यांनी उत्कृष्ट खेळाडूंसाठी बक्षिसे दिली.स्पर्धा डॉ.विकास आबनावे फाऊंडेशन यांनी पुरस्कृत केली होती.आभार प्रदर्शन स्मिता गांगुर्डे यांनी तर सूत्रसंचालन सौ रुपाली पवार यांनी केले

सार्वजनिक बांधकाममंत्री शिवेंद्रसिंहराजे भोसले यांचा महत्त्वपूर्ण निर्णय

मुंबई, दि. 21 ऑगस्ट

यंदाच्या गणेशोत्सवात कोकणात जाणाऱ्या गणेशभक्तांना मोठा दिलासा मिळाला आहे. सार्वजनिक बांधकाममंत्री शिवेंद्रसिंहराजे भोसले यांनी 23 ऑगस्ट ते 8 सप्टेंबर 2025 या कालावधीत मुंबई-बेंगळूरू राष्ट्रीय महामार्ग, मुंबई-गोवा राष्ट्रीय महामार्ग, तसेच सार्वजनिक बांधकाम विभाग आणि महाराष्ट्र राज्य रस्ते विकास महामंडळाच्या अखत्यारीतील रस्त्यांवरील टोल नाक्यांवर टोलमाफी जाहीर केली आहे. ही सवलत कोकणात जाणाऱ्या सर्व खासगी वाहनांना आणि एसटी बसेसना लागू असणार आहे.

या सवलतीसाठी “गणेशोत्सव 2025 – कोकण दर्शन” नावाचे विशेष टोलमाफी पास उपलब्ध करून देण्यात येणार आहे. या पासवर वाहन क्रमांक आणि वाहन मालकाची माहिती नोंदवली जाईल. हे पास प्रादेशिक परिवहन कार्यालय, पोलीस आणि वाहतूक विभागाकडे उपलब्ध असतील. परतीच्या प्रवासासाठीही हेच पास वैध राहील. या निर्णयामुळे कोकणातील गणेशोत्सव साजरा करण्यासाठी गावी जाणाऱ्या लाखो गणेशभक्तांना आर्थिक दिलासा मिळणार आहे. दरवर्षी गणेशोत्सवात कोकणात मोठ्या संख्येने जात असतात. या टोलमाफीमुळे त्यांचा प्रवास अधिक सुलभ आणि खर्चात बचत होणार आहे. मंत्री शिवेंद्रसिंहराजे भोसले यांनी गणेशोत्सवाच्या काळात घेतलेल्या या निर्णयामुळे कोकणातील गणेशभक्तांच्या उत्साहात निश्चितच भर पडणार आहे.

आदर्श मित्र मंडळाच्या वतीने इंडिया स्टार्टअप स्टुडिओ आयोजित परदेशातील नवीन बिझनेस व स्टार्टअप या विषयावरील ‘ले छलांग’ या कार्यक्रमाचे आयोजन

पुणे :  तुम्ही जेव्हा स्टार्टअप सुरू करता तेव्हा तुमची विनिंग पर्सनॅलिटी असणे आवश्यक आहे. त्यासाठी तुम्ही शारीरिकदृष्ट्या तंदुरुस्त, मानसिकदृष्ट्या सतर्क, बौद्धिकदृष्ट्या तीक्ष्ण आणि आध्यात्मिकदृष्ट्या उन्नत असले पाहिजे. त्याचबरोबर सामाजिकदृष्ट्या जबाबदार असणे देखील तितकेच गरजेचे आहे. समाजाच्या गरज समजून त्यांचे समाधान केल्यास स्टार्टअप निश्चितच यशस्वी ठरतो, असे मत एमआयटी विश्वशांती विद्यापीठ, पुणेचे कुलगुरू डॉ. मिलिंद पांडे यांनी व्यक्त केले.

धनकवडीतील आदर्श मित्र मंडळाच्या वतीने इंडिया स्टार्टअप स्टुडिओ आयोजित ‘परदेशातील नवीन बिझनेस व स्टार्टअप’ या विषयावरील ले छलांग या मार्गदर्शनपर कार्यक्रमाचे आयोजन सहकारनगर येथील मुक्तांगण शाळेतील सभागृहात करण्यात आले. यावेळी ते बोलत होते. या प्रसंगी नवी दिल्ली शिक्षण मंत्रालय इनोव्हेशन सेलचे सहाय्यक इनोव्हेशन संचालक प्रदीपकुमार ढगे, व्हेंचर बिल्डर्सचे संस्थापक सुरज जुनेजा, आदर्श मित्र मंडळाचे उदय जगताप, अनिरुद्ध येवले, रणधीर गायकवाड, गणेश दिघे, माऊली पांचाळ, पार्थ जगताप  उपस्थित होते. यावेळी स्टार्टअप सुरू करून यशस्वी झालेल्या डॉ. पंकज जैन, प्रशांत वाळुंज, योगेश थिटे, आशिष जगताप, डॉ. अनिरुद्ध जोशी या व्यावसायिकांचा सन्मान करण्यात आला. त्याचबरोबर काही स्टार्टअपचे उद्घाटनही करण्यात आले.

प्रदीपकुमार ढगे म्हणाले, बाजारातील ग्राहकांची मागणी काय आहे, हे समजून तुम्ही तंत्रज्ञानाचा वापर करून स्टार्टअप सुरू केला, तर तो नक्कीच यशस्वी होईल, यात शंकाच नाही. ग्राहकांच्या मागणीचा विचार करून तंत्रज्ञानाचा वापर करून तुम्ही तुमचे विचार पुढे मांडा. त्याचबरोबर, सरकारच्या अनेक योजनांचा लाभ घेऊन तुम्ही तुमचा स्टार्टअप नक्कीच यशस्वी करू शकता. 

उदय जगताप म्हणाले, आजही व्यवसाय क्षेत्रात ठराविक माहिती असलेले व्यवसायच पुन्हा सुरू केले जातात. आजच्या नव्या पिढीला भारताबाहेरील स्टार्टअपविषयी माहिती मिळावी आणि त्याची सुरुवात कशी करावी, हे समजावे, यासाठी या कार्यक्रमाचे आयोजन करण्यात आले. श्रीमंत लोक पैसे कमावतात आणि आणखी श्रीमंत होतात, पण नवीन कल्पना असूनही पैशाच्या कमतरतेमुळे अनेक होतकरू अधिक गरीब होतात. मात्र, योग्य मार्गदर्शन मिळाले तर अनेक जण स्टार्टअप सुरू करून ही दरी कमी करू शकतात. अशा अनेक युवकांना उत्तम मार्गदर्शन व मदत मिळावी, यासाठी या कार्यक्रमाचे आयोजन केले आहे, असेही त्यांनी सांगितले.