पुणे-पुण्याची राष्ट्रीय निसर्गोपचार संस्था ही केंद्र सरकारच्या आयुष मंत्रालयाच्या अधीन असलेली, संस्था असून, पुण्याच्या मातोश्री रमाबाई आंबेडकर मार्ग  (ताडीवाला मार्ग)  इथली संस्थेची इमारत “बापू भवन” नावाने ओळखली जाते. या संस्थेत आज-  2 ऑक्टोबर 2022 रोजी, केंद्रीय दूरसंचार मंत्रालयाच्या महाराष्ट्र-गोवा प्रदेशाच्या टपाल विभागासह, संयुक्तरित्या, महात्मा गांधी जयंती साजरी करण्यात आली. यानिमित्त, टपाल कार्यालयाच्या मदतीने, महात्मा गांधी यांच्या जीवनचरित्राशी संबंधित टपाल टिकीटांचे प्रदर्शन आयोजित करण्यात आले आहे. आजपासून चार ऑक्टोबर पर्यंत सकाळी 10 ते संध्याकाळी 6 पर्यंत हे प्रदर्शन सर्वांसाठी खुले असणार आहे.

महात्मा गांधी यांच्या पुतळ्याला पुष्पहार अर्पण करुन, ह्या कार्यक्रमाची सुरुवात झाली. कार्यक्रमाचे प्रमुख पाहुणे पुणे विभागाचे पोस्टमास्टर जनरल गणेश सावळेश्वरकर यांच्या हस्ते समारंभाचे उद्घाटन झाले. यावेळी (निवृत्त) अतिरिक्त प्रधान मुख्य वनसंरक्षक अभय नारायण, टपाल सेवेच्या पुणे विभागाच्या संचालिका सिमरन कौर , केंद्रीय सहकार मंत्रालयाच्या अखत्यारीतील वैकुंठ मेहता राष्‍ट्रीय सहकारी प्रबंध संस्‍थेच्या संचालिका  डॉ. हेमा यादव, ‘इंटरनॅशनल रेअर कलेक्टिंग सोसायटी’चे  उपाध्यक्ष राजेंद्र शाह,  ज्येष्ठ मानववंशशास्त्रज्ञ आणि गांधीवादी प्रा. आर.के. मुटाटकर, आणि शासकीय पॉलिटेक्निकचे प्राचार्य डॉ. विठ्ठल एस. बांदल यावेळी उपस्थित होते.

संस्थेच्या संचालिका, प्रा. डॉ. के सत्यलक्ष्मी यांनी फळांची परडी आणि शाल देऊन सर्व मान्यवर पाहुण्यांचे स्वागत केले. आपल्या स्वागतपर प्रास्ताविकात, त्यांनी, राष्ट्रीय निसर्गोपचार संस्थेचा महात्मा गांधी यांच्याशी असलेला संबंध उलगडून सांगितला. महात्मा गांधी स्वतः या संस्थेत वास्तव्य करत असत आणि रुग्णांवर उपचारही करत. तसेच इथे त्यांनी निसर्गोपचाराचे अनेक प्रयोगही केले, त्यांनी यावेळी संस्थेतल्या, निसर्गोपचाराशी संबंधित अनेक उपक्रम आणि सुविधांची माहिती दिली.

प्रमुख पाहुणे पुणे विभागाचे पोस्टमास्टर जनरल गणेश सावळेश्वरकर, यांनी सांगितले की आपण जसजसे निसर्गापासून, नैसर्गिक जीवनशैलीपासून दूर जात आहोत, तसतसे आपण आजार आणि विविध रोगांना बळी पडतो आहोत. आपण निसर्गाकडून जेवढे घेतो, तेवढे त्याला परतही द्यायला हवे, असा विचार त्यांनी व्यक्त केला.

इतर वक्त्यांनीही  महात्मा गांधी, त्यांचे विचार आणि तत्वे याबद्दल आपली मते व्यक्त केलीत. महात्मा गांधी यांचे तत्वज्ञान केवळ भारतासाठीच नव्हे, तर पृथ्वीवरील सर्व प्राणिमात्र आणि मानवजातीच्या कल्याणासाठी उपयुक्त आहे, असे त्यांनी सांगितले.

मान्यवर  पाहुण्यांच्या उपस्थितीत विजेत्यांची घोषणा करुन त्यांना प्रमाणपत्र प्रदान करण्यात आलीत. त्यानंतर ओझोन थेरपी महिला युनिटचे उद्घाटन करण्यात आले. संस्थेच्या विद्यार्थिनीनी यावेळी खादी फॅशन शोचे आयोजन केले होते.

पुणे- महात्मा गांधी जयंतीनिमित्त पुणे शहर काँग्रेसच्या वतीने ‘‘संवाद यात्रेचे’’ आयोजन करण्यात आले होते खंडोजी बाबा चौक येथून सुरू झालेली यात्रा आदमबाग येथील कै. काकासाहेब गाडगीळ यांच्या पुतळ्याजवळ या संवाद यात्रेचा समारोप करण्यात आला. यावेळी बोलताना शहराध्यक्ष अरविंद शिंदे म्हणाले की, ‘‘प.पू. महात्मा गांधी यांनी स्वातंत्र्यपूर्व काळामध्ये देशातील सर्व क्षेत्रातील बंधू – भगिनींना निरनिराळ्या उपक्रमांच्या माध्यमातून जोडण्याचे काम करून तिरंगा झेंड्याखाली स्वातंत्र्यलढ्यामध्ये सहभागी करून घेतले. आज खासदार राहुल गांधी हे कन्याकुमारी ते काश्मिरपर्यंत पदयात्रा काढून ‘भारत जोडो’ अभियान राबवित आहे. त्यांच्या समर्थनार्थ ह्या संवाद यात्रेचे आयोजन केले आहे. आजच्या पिढीला व्हॅट्सॲप युनिव्हरसिटीच्या माध्यमातून चूकीचा इतिहास सांगण्याचे षडयंत्र महात्मा गांधींच्या खुन्यांनी रचले आहे. त्यामुळेच गांधीजी आणि भगतसिंग, गांधीजी आणि आंबेडकर, गांधीजी आणि सरदार पटेल, यांच्या नावाने राष्ट्रपिता महात्मा गांधी यांच्या बदनामीचा कट रचला जात आहे. ही संवाद यात्रा या सर्व खोट्या व चूकीच्या इतिहासाला छेद देण्यासाठी काढण्यात आलेली आहे.’’ यानंतर अंधश्रध्दा निर्मुलनचे श्रीपाल ललवाणी, कामगार संघटनेचे नितीन पवार, मराठा सेवा संघाचे राजेंद्र कुंजीर, लोकायतचे निरज जैन, ॲड. अभय छाजेड यांनी आपले मनोगत व्यक्त केले. यावेळी बाळासाहेब शिवरकर, दिप्ती चवधरी, आबा बागुल, वीरेंद्र किराड, कमल व्यवहारे, चंदूशेठ कदम, अविनाश बागवे, रफिक शेख, अजित दरेकर, सुजाता शेट्टी, विनोद मथुरावाला, पुजा आनंद, संगीता तिवारी, मुख्तार शेख, द. स. पोळेकर, उस्मान तांबोळी, चेतन आगरवाल, प्रा.वाल्मिक जगताप, मनोहर गाडेकर, सतिश पवार, प्रविण करपे, भुतडा, सचिन आडेकर, यशराज पारखी, शाबीर खान, सुरेश काबंळे, अरूण वाघमारे, उमेश कंधारे, गोपाळ तिवारी, रजनी त्रिभुवन, मीरा शिंदे, विनोद रणपिसे, विनय ढेरे, प्रकाश पवार, सुजीत यादव, शिलार रतनगिरी, सौरभ अमराळे, राहुल तायडे, भगवान कडू, विनय ढेरे, बंडू नलावडे, आदींसह असंख्य कार्यकर्ते सवांद यात्रेत सहभागी होते. तसेच राष्ट्रपिता महात्मा गांधी व भारताचे माजी पंतप्रधान लालबहाद्दूर शास्त्री यांच्या जयंती निमित्त काँग्रेस भवन येथे शहराध्यक्ष अरविंद शिंदे व ॲड. अभय छाजेड यांच्या हस्ते पुष्पहार अर्पण करून आदरांजली वाहण्यात आली.

विद्यार्थी साहाय्यक समितीमध्ये उद्योजकता विकास मार्गदर्शन
पुणे : “नोकरी तुमची गरज पूर्ण करते, तर उद्योग तुमची स्वप्न पूर्ण करतात. त्यामुळे उद्योग-व्यवसाय करण्यावर विद्यार्थ्यांनी भर द्यावा. उद्योगात भांडवल यापेक्षाही मानसिकता महत्वाची आहे. आपल्या मनातील आग, जिद्द, आत्मविश्वास, त्याला मिळालेली कठोर परिश्रम आणि बाजारपेठेची जाण यामुळे यशस्वी उद्योजक होता येते,” असा कानमंत्र ज्येष्ठ उद्योजक प्रतापराव पवार यांनी दिला.
विद्यार्थी साहाय्यक समितीच्या विद्यार्थी विकास केंद्रांतर्गत आपटे वसतिगृहात आयोजित उद्योजकता विकास मार्गदर्शन सत्रात पवार बोलत होते. प्रसंगी समितीचे कार्यकारी विश्वस्त तुकाराम गायकवाड, विश्वस्त सुप्रिया केळवकर, तुषार रंजनकर, ज्योती गोगटे, महाराष्ट्र उद्योजकता विकास केंद्राचे अधिकारी सुरेश उमाप आदी उपस्थित होते. प्रसंगी समितीतील विद्यार्थ्यांनी सुरु केलेल्या स्टार्टअपचे सादरीकरण करण्यात आले.
प्रतापराव पवार म्हणाले, “आजवर मोठे होऊन चांगली नोकरी करावी, अशीच शिकवण दिली जाते. मात्र, हे बदलून लहापणापासूनच उद्योगाचा संस्कार दिला पाहिजे. त्यातून येणारी पिढी उद्योगाची कास धरेल. आपल्या व्यवसायाची सखोल माहिती व लोकांची गरज याची सांगड घालता आली पाहिजे. आज अनेक पर्याय, तंत्रज्ञान उपलब्ध आहे. त्याचा उपयोग करून आपण उद्योग सुरु करावेत. अपयशातून शिकत जावे. जिद्द सोडू नये. उद्योजकासह चांगला व्यक्ती बनण्यावर लक्ष द्या. “
यावेळी पवार यांनी अनेक यशस्वी उद्योजकांची यशोगाथा सांगितली. महाराष्ट्रात लाखो उद्योग आहेत; परंतु उद्योगात मराठी माणूस नाही, हे खेदजनक चित्र आहे. हे चित्र बदलण्यासाठी उद्योजकता विकास केंद्र सुरु करीत आहोत. यातून मुलामुलींची नोकरीची मानसिकता बदलेल, असे सुरेश उमाप यांनी सांगितले. यावेळी त्यांनी उद्योजकता आणि सरकारी योजना याविषयी माहिती दिली.

पुणे-पालकमंत्री म्हणून जबाबदारी स्वीकारल्यानंतर मी पुण्यातील प्रलंबित प्रश्नांच्या सोडवणूकसाठी कालबद्ध नियोजन करणार असल्याचे नवनियुक्त पालकमंत्री चंद्रकांतदादा पाटील म्हणाले. क्रिएटिव्ह फाउंडेशन आणि कै. विश्वनाथ भेलके प्रतिष्ठान आयोजित कोथरूड नवरात्र महोत्सवात चंद्रकांतदादांचा सत्कार करण्यात आला त्यानंतर कार्यकर्त्यांशी बोलताना त्यांनी हा मनोदय व्यक्त केला. यावेळी क्रिएटिव्ह फाउंडेशन चे अध्यक्ष संदीप खर्डेकर, विश्वस्त सतीश कोंडाळकर, कै. विश्वनाथ भेलके प्रतिष्ठान चे अध्यक्ष विशाल भेलके, उमेश भेलके, महिला उत्सव प्रमुख माजी शिक्षण मंडल अध्यक्ष नगरसेविका मंजुश्री खर्डेकर, सौ. श्वेताली भेलके, सौ.अक्षदा भेलके, सौ. कल्याणी खर्डेकर,प्रसिद्ध उद्योगपती संजीव अरोरा,ग्लोबल ग्रुप चे मनोज हिंगोरानी,मुकुलमाधव फाउंडेशन चे सचिन कुलकर्णी, प्रवीण मसालेवाले चे संचालक विशाल चोरडिया, भाजपा कोथरूड मंडल अध्यक्ष पुनीत जोशी, युवा उत्सव प्रमुख प्रतीक खर्डेकर, मोहित भेलके, आरपीआय चे प्रदेश कार्यकारिणी सदस्य मंदार जोशी,व इतर मान्यवर उपस्थित होते.
यावेळी चंद्रकांतदादा पाटील यांनी कोरोना नंतर मुक्त वातावरणात साजऱ्या होत असलेल्या नवरात्र उत्सवाच्या नागरिकांना शुभेच्छा देताना “आमच्या सरकारने निर्बंधमुक्त उत्सवाची घोषणा केली असली तरी स्वयंशिस्त महत्वाची असून दुसऱ्यांना त्रास होणार नाही अश्या पद्धतीने उत्सव साजरे करावेत असे सांगितलं. क्रिएटिव्ह फाउंडेशन आणि कै. विश्वनाथ भेलके प्रतिष्ठान सांस्कृतिक कार्यक्रमासोबतच सामाजिक बांधिलकी जोपासात असून दुर्गम भागातील विद्यार्थिनींना स्वेटर वाटप, दिव्यांगाना व्यवसायासाठी अर्थसहाय्य, गरजू विद्यार्थिनींची फी भरणे अश्या विविध उपक्रमांनी ते खऱ्या अर्थाने नवरात्र साजरी करत असल्याचे ही ना. चंद्रकांतदादा पाटील म्हणाले. मी कोरोना काळात क्रिएटिव्ह फाउंडेशन ने केलेले समाजकार्य जवळून बघितले असून असेच समजसेवेचे व्रत घेऊन सर्वांनी कार्य करावे असेही ते म्हणाले.
यावेळी चंद्रकांतदादांच्या हस्ते समाजकार्यासाठी सातत्याने मदत करणारे उद्योगपती संजीव अरोरा,ग्लोबल ग्रुप चे मनोज हिंगोरानी,मुकुलमाधव फाउंडेशन चे सचिन कुलकर्णी, प्रवीण मसालेवाले चे संचालक विशाल चोरडिया यांचा तसेच लावणी कलावंत योगेश देशमुख, पूनम कुडाळकर, माधवी सातपुते तसेच सत्यजित धांडेकर यांचा सत्कार करण्यात आला.
आजच्या ढगफुटी सदृश पावसाचा फटका पुणे शहराला बसला असताना आणि ऐन कार्यक्रमाच्या वेळी धुव्वाधार पाऊस असतानाही मोठ्या संख्येने प्रेक्षक उपस्थित राहिले ही क्रिएटिव्ह फाउंडेशन आणि कै. विश्वनाथ भेलके प्रतिष्ठान च्या कार्याची पावती असल्याचे संदीप खर्डेकर म्हणाले.नाटक आणि लावणी च्या कार्यक्रमाला प्रेक्षागृहाला हाऊसफुल चा बोर्ड लागणे दुर्मिळ असून आता भोंडला, मंगळागौरीचे खेळ, बालजत्रा व दांडियाच्या कार्यक्रमालाही कोथरूडकर उत्स्फूर्त प्रतिसाद देतील असा विश्वास संदीप खर्डेकर यांनी व्यक्त केला. मंजुश्री खर्डेकर, श्वेताली भेलके व अक्षदा भेलके यांच्या हस्ते दिव्यांगांनी बनविलेल्या वस्तू देऊन चंद्रकांतदादा पाटील व अन्य मान्यवरांचा सत्कार करण्यात आला.

पुणे दि. २: स्वच्छ भारत अभियानांतर्गत २०२१-२२ मध्ये झालेल्या स्वच्छ सर्वेक्षण २०२२ मध्ये पुणे जिल्ह्यातील ५ शहरांनी विविध श्रेणीमध्ये अव्वल स्थान पटकावून पुणे जिल्ह्याच्या शिरपेचात मानाचा तुरा खोवलेला आहे.

राष्ट्रपती द्रौपदी मुर्मू यांच्या उपस्थितीत काल नवी दिल्ली येथील तालकटोरा स्टेडियम वर संपन्न झालेल्या कार्यक्रमात केंद्रीय गृहनिर्माण व शहर राज्यमंत्री कौशल किशोर यांच्या हस्ते पिंपरी चिंचवड महानगरपालिका, बारामती, लोणावळा, सासवड व  इंदापूर नागरपालिकेस विविध श्रेणीमधील पुरस्कार  देऊन सन्मानित करण्यात आले.

‘सर्वोत्तम नागरिक अभिप्राय’ यामध्ये पिंपरी चिंचवड शहर देशात प्रथम

केंद्र सरकारच्या स्वच्छ सर्वेक्षणांतर्गत देश पातळीवर शहरांच्या स्वच्छतेबाबतचे परीक्षण करण्यात आले.  नागरिकांचा प्रतिसाद अर्थात फिडबॅक ऑनलाइन पद्धतीने घेण्यात आला. त्यासाठी दिलेली लिंक ओपन करून त्यात विचारलेल्या प्रश्नांची उत्तरे द्यायची होती. त्यामध्ये सर्वाधिक नागरिकांनी फिडबॅक नोंदवला असून योग्य उत्तरे दिल्याने शहराला देशामध्ये प्रथम क्रमांकाचे पारितोषिक मिळाले आहे. महापालिका आयुक्त शेखर सिंह यांनी पुरस्कार स्वीकारला.

स्वच्छ सर्वेक्षण २०२२ मध्ये बारामती नगरपरिषद देशात नववी

स्वच्छ सर्वेक्षण २०२२ मध्ये बारामती नगरपरिषदेला देशात नववा तर महाराष्ट्रात दुसरा क्रमांक मिळाला आहे. तसेच १ ते ३ लाख लोकसंख्या असलेल्या छोट्या शहरांमध्ये वेगाने कामगिरी करणारे शहर म्हणून पुरस्कार मिळवला आहे. बारामती शहराने स्टार वन आणि वॉटर प्लस मानांकन मिळवून चमकदार कामगिरी केली आहे. बारामती नगरपरिषदेचे मुख्याधिकारी महेश रोकडे यांनी हा पुरस्कार स्वीकारला.

सासवड नगरपालिका वेस्ट झोन मध्ये दुसऱ्या क्रमांकावर

सासवड नगरपालिका वेस्ट झोन मध्ये दुसऱ्या क्रमांकावर असून सेल्फ सस्टेनेबल सिटी चा बहुमान देश पातळीवर मिळाला  आहे. इंडियन स्वच्छता लीग मध्ये २५ ते ५० हजार लोकसंख्येमध्ये देशपातळीवर अव्वल क्रमांक पटकावला आहे. सासवडचे मुख्याधिकारी निखिल मोरे यांनी हा पुरस्कार स्वीकारला.

लोणावळा नगरपालिका देशपातळीवर चौथा क्रमांकावर

लोणावळा नगरपरिषदेने स्वच्छ सर्वेक्षण सुरू झाल्यापासून प्रत्येक वर्षी अव्वल राहून देश पातळीवर आपली एक वेगळी ओळख निर्माण केली आहे. यावर्षी लोणावळा नगरपालिकेला देशपातळीवर चौथा क्रमांक तर वेस्ट झोन मध्ये सर्वात स्वच्छ शहर म्हणून मान मिळाला आहे. इंडियन स्वच्छता लीग मध्ये ५० हजार ते १ लाख लोकसंख्येमध्ये देश पातळीवर अव्वल क्रमांक मिळवला आहे. लोणावळाचे मुख्याधिकारी पंडीत पाटील यांनी हा पुरस्कार स्वीकारला.

इंदापूर नगरपालिकेला इंडियन स्वच्छता लीगमध्ये विशेष बहुमान

इंडियन स्वच्छता लीग ही भारतातील पहिली आंतर-शहर स्पर्धा आहे ज्याचे नेतृत्व युवकांनी कचरामुक्त शहरे बनवण्याच्या दिशेने केले आहे. १७ सप्टेंबर रोजी हाती घेण्यात येणार्‍या उपक्रमांचे नियोजन यामध्ये उल्लेखनीय कामगिरी केल्याबद्दल ‘विशेष उल्लेखनीय गुणगौरव’ या पुरस्काराने इंदापूर नगरपरिषदेचा गुणगौरव करण्यात आला. मुख्याधिकारी राम कापरे यांनी पुरस्कार स्वीकारला.

पुणे जिल्ह्यातील ५ शहरांना स्वच्छ भारत अभियान २०२१-२२ अंतर्गत विविध श्रेणीमध्ये पुरस्कार मिळाल्याने सर्वत्र कौतुक होत आहे. पुढील वर्षीही या अभियानांतर्गत नागरिकांच्या सहभागातून या वर्षापेक्षा चांगली कामगिरी होईल, असा विश्वास मुख्याधिकाऱ्यांनी व्यक्त केला आहे.

पुणे : महिलांना समाजामध्ये बरोबरीची संधी मिळाली तर त्या केवळ स्वत:चेच आयुष्य बदलत नाहीत, तर त्यांच्यामध्ये समाजामध्ये सकारात्मक बदल घडवण्याची ताकद असते. त्यामुळे महिलांनी स्वत:च्या पायावर उभे राहून स्वत:ला प्रोत्साहन दिले पाहिजे. तर त्या समाजामध्ये अधिक खंबीरपणे उभ्या राहू शकतात, अशी भावना कॅन्सरतज्ञ डॉ. शेखर कुलकर्णी यांनी व्यक्त केली.
एस.एस.असोसिएशन संचलित मानिनी अ‍ॅक्टिव्हिटी ग्रुपतर्फे दरवर्षी विविध क्षेत्रात आपला ठसा उमटविणा-या महिलांना मानिनी पुरस्काराने सन्मानित करण्यात येते. यावर्षी हा कार्यक्र म सिंहगड रस्ता, माणिकबाग येथे झाला. कार्यक्रमाला असोसिएशनच्या संस्थापिका स्मिता इंदापूरकर, माजी नगरसेवक, मंजुषा नागपुरे, प्रसन्न जगताप,सुहास इंदापूरकर आदी उपस्थित होते. 
ढोल-ताशा व्यापारी चंदा गाडे आणि ढोल वादन करणा-या स्तन कर्करोग रुग्ण माधुरी पिंगळे, ज्योती भोसले, शुभदा भाटे, अमिता गुजराथी, आश्लेषा राजहंस, सुनीता गानू, शुभदा पेडणेकर, नीता दर्जे यांना मानिनी पुरस्काराने गौरविण्यात आले. पुरस्कार सोहळ्यानंतर महाभोंडला व दांडियाचे आयोजन देखील करण्यात आले होते. 
डॉ.शेखर कुलकर्णी म्हणाले, ब्रेस्ट कॅन्सर चे प्रमाण पुण्यामध्ये प्रत्येक २२ महिलांच्या मागे एका असे आहे, अशा परिस्थितीतही अनेक महिला या आजाराचा ताकदीने सामना करीत आहेत. या महिलांना कुटुंबाचा आधार मिळाला तर त्या अधिक आनंदी जीवन जगू शकता. 
स्मिता इंदापूरकर म्हणाल्या, उच्च पदावर असलेल्या महिलांचा गौरव होतो, परंतु ब-याचशा महिला या सामाजिक आणि मानसिकरित्या भरडल्या जातात, अशा महिलांना समाजामध्ये मानाचे स्थान मिळावे, यासाठी आम्ही कार्यरत आहोत. महिलांची ताकद लक्षात घेऊन त्यांना समाजामध्ये अधिक चांगले बदल घडविण्यासाठी प्रोत्साहित करणे हा आमचा मुख्य उद्देश आहे, असेही त्यांनी सांगितले. जयश्री देशपांडे यांनी सूत्रसंचालन केले. मोहिती थोरात यांनी आभार मानले.

महा एनजीओ फेडरेशनच्या वतीने सेवा पंधरवडा ; तब्बल ९० महिलांना मदतीचा हात 

पुणे : महा एनजीओ फेडरेशनच्या माध्यमातून आणि सामाजिक कार्यकर्ते शेखर मुंदडा यांच्या संकल्पनेतून महाराष्ट्रातील सामाजिक संस्था राष्ट्रनेता ते राष्ट्रपिता सेवा पंधरवडा साजरा करीत आहेत. यानिमित्त बुधवार पेठेतील एचआयव्ही बाधित ९० महिलांना पोषण आहार देण्यात आला. 
राजेंद्र तापडिया यांच्या भगीरथ तापडिया ट्रस्टच्या माध्यमातून पोषण आहार महिलांना देण्यात आला आहे. यावेळी आर्ट ऑफ लिविंग चे राजेजी शास्त्रेय, पोलीस उपनिरीक्षक कीर्ती म्हस्के, तापडिया ट्रस्टचे संदेश मानकर, महा एनजीओ फेडरेशनचे संचालक मुकुंद शिंदे, कार्यकारी संचालक अक्षयमहाराज भोसले, गणेश बाकले, अस्मिता शिंदे, आशा भट, दीपक निकम व इतर सामाजिक कार्यकर्ते उपस्थित होते. यावेळी उपस्थित महिलांनी ध्यान शिबिराची अनुभूती घेतली. 
महाराष्ट्राचे उपमुख्यमंत्री देवेंद्र फडणवीस यांनी महाराष्ट्र शासनाच्या वतीने सेवा पंधरवडा साजरा करण्याबाबत सरकारी कार्यालयास निर्देश दिले आहेत, त्या प्रेरणेतून महाराष्ट्रातील सामाजिक संस्था देखील महा एनजीओ फेडरेशनच्या माध्यमातून प्रेरित होऊन राष्ट्रनेता ते राष्ट्रपिता सेवा पंधरवडा साजरा करत आहेत. 
शेखर मुंदडा म्हणाले, समाजाने देहविक्री करणाऱ्या महिलांकडे देखील आदराने पाहणे गरजेचे आहे. आर्ट ऑफ लिविंग च्या माध्यमातून या महिलांच्या मानसिक आरोग्यासाठी विशेष प्रयत्न करण्यात येणार आहेत, असेही त्यांनी सांगितले.