पुणे-

पुणे शहर राष्ट्रवादी काँग्रेस पार्टीच्या वतीने विविध क्षेत्रांमध्ये उल्लेखनीय कामगिरी करणाऱ्या महिला भगिनींचा “सन्मान नवदुर्गांचा २०२२” या अभियानाअंतर्गत त्यांच्या निवासस्थानी जाऊन सन्मान करण्यात येत आहे. काल भारताच्या माजी राष्ट्रपती सौ. प्रतिभाताई पाटील यांच्या निवासस्थानी बारामती टेक्स्टाईल पार्कच्या अध्यक्षा सौ. सुनेत्रावहिनी पवार, राष्ट्रवादी काँग्रेस पार्टीचे पुणे शहराध्यक्ष श्री प्रशांत जगताप व राष्ट्रवादी युवती काँग्रेसच्या शहराध्यक्षा सुषमा सातपुते यांच्या प्रमुख उपस्थितीमध्ये प्रतिभाताई पाटील यांचा सन्मान करण्यात आला.

यावेळी सुनेत्रा पवार यांनी सौ.प्रतिभाताई पाटील यांच्या तब्येतीची विचारपूस केली. प्रतिभाताईंनी देखील पवार साहेब व अजितदादा यांच्या समवेत त्या काही जुन्या आठवणींना उजाळा दिला.

यावेळी बोलताना शहराध्यक्ष प्रशांत जगताप म्हणाले की, “युगपुरुष छत्रपती शिवरायांच्या या महाराष्ट्राच्या भूमीमध्ये स्त्रियांचा सन्मान करणे, त्यांना विविध क्षेत्रांमध्ये यशस्वी होण्यासाठी प्रोत्साहन देणे हे आपल्या मराठी मातीचे संस्कार आहेत. नवरात्रीचा हा उत्सव आदिशक्तीच्या जागर करण्याचा उत्सव असतो. या उत्सव काळात देव-देवतांमधील दुर्गा सोबतच समाजात विविध क्षेत्रांमध्ये आपल्या आलौकीक कामगिरीतून नाव कमविलेल्या महिला भगिनी देखील आम्हाला दुर्गे इतक्यात वंदनीय आहेत. या महिलांचा मान सन्मान व्हावा या हेतूने पुणे शहर राष्ट्रवादी युवती काँग्रेसने या स्तुत्य उपक्रम आयोजन केले आहे.
प्रतिभाताई पाटील यांनी या पुरस्काराचा स्वीकार करत राष्ट्रवादी युवती काँग्रेसचे सर्व टीमचे कौतुक केले. या सन्मान सोहळ्याप्रसंगी माजी नगरसेवक महेंद्र पठारे,पुणे शहर उपाध्यक्ष संदीप बालवडकर, दिपक कामठे आदींसह मोठ्या संख्येत पदाधिकारी उपस्थित होते.

श्री महालक्ष्मी पूजन, मुखवटा उभारणे व देवीची दृष्ट काढणे असे पारंपरिक कार्यक्रम 
पुणे : श्री सप्तश्रृंगी महालक्ष्मी देवीची महापूजा, देवीचा मुखवटा उभारणे आणि घागरी फुंकणे यांसारख्या कार्यक्रमांतून महिलांनी देवीला नमन केले. रात्री १२ वाजता देवीची दृष्ट देखील काढण्यात आली. घागर फुंकणे हा नवरात्रीतील पारंपरिक कार्यक्रम… मात्र, आजमितीस हा फारसा बघायला मिळत नाही. त्यामुळे श्री सप्तश्रृंगी महालक्ष्मी मंदिरात झालेल्या घागरी फुंकणे कार्यक्रमात अनेक महिलांनी सहभाग घेत देवीची चरणी प्रार्थना केली. 

बिबवेवाडीतील हजारे परिवाराच्या श्री सप्तश्रृंगी महालक्ष्मी मंदिरात आयोजित शारदीय नवरात्र महोत्सवात महालक्ष्मीपूजन, घागरी फुंकणे अशा कार्यक्रमाचे आयोजन करण्यात आले होते. महोत्सवात अनुराधा हजारे, संध्या तारांबळे, उषा चावरे, मिनल हजारे, कै.सितामाई शिवरामपंत करंदीकर भक्त मंडळ यांचे सहकार्य लाभले. घागरी फुंकणे यासोबतच फुगड्या, गरबा, दांडिया असे कार्यक्रम देखील महिलांनी केले. तर, कीर्ती कस्तुरे व सहका-यांचा सुगम संगीत कार्यक्रम व जंगली महाराज ग्रुपचा आत्मामालिक हा भक्ती संगीताचा कार्यक्रम देखील उत्साहात पार पडला. 
यज्ञदत्त हजारे म्हणाले, मंदिराची स्थापना सन १९८१ साली झाली असून  शारदीय नवरात्र महोत्सवाचे आयोजन कोजागिरी पौर्णिमेपर्यंत केले जाते. महोत्सवा दरम्यान महिला मंडळे विविध सांस्कृतिक कार्यक्रमांचे आयोजन करतात. वादन-गायन, कीर्तन, भजन, कविता, भक्तीगीते याचबरोबर सौंदर्य लहरी पठण, श्रीसुक्त, सप्तशती पाठ, कुंकुमार्चन, घागरी फुंकणे, मुखवटा उभारणे, देवीची दृष्ट काढणे असे विविध पारंपरिक सोहळे देखील केले जातात. त्याचबरोबर मंदिरात विश्व कल्याणासाठी १ कोटी श्रीसुक्त आवर्तन म्हणण्याचा संकल्प केला असून आजपर्यंत ६४ लाख आवर्तने पूर्ण झाली आहेत, असेही त्यांनी सांगितले. 

श्री महालक्ष्मी मंदिर सारसबागतर्फे आयोजन ; पं. नंदकिशोर कपोते यांची उपस्थिती
पुणे :  श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने आयोजित नवरात्र उत्सवात शिक्षक महाभोंडला स्पर्धा घेण्यात आली. त्यामध्ये धायरी येथील धारेश्वर विद्या व क्रीडा प्रतिष्ठानने प्रथम क्रमांक पटकाविला. पुण्यातील १४ शाळांतील शिक्षकांच्या संघांनी स्पर्धेमध्ये सहभाग घेतला होता. 
मंदिरामध्ये आयोजित कार्यक्रमाला पं. नंदकिशोर कपोते, पूजा थिगळे, खासदार अ‍ॅड.वंदना चव्हाण हे प्रमुख पाहुणे म्हणून उपस्थित होते. तर, परीक्षक शिरीषा जोशी, निवेदिता मेहेंदळे, मंदिराचे विश्वस्त तृप्ती अग्रवाल, प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड.प्रताप परदेशी, प्रविण चोरबेले, हेमंत अर्नाळकर, भरत अग्रवाल आदी उपस्थित होते. 
मॉडर्न हायस्कूल शिवाजीनगर शाळेच्या शिक्षक संघाचा द्वितीय तर, चंद्रकांत दरोडे विद्यालयाचा तृतीय क्रमांक आला. स्मृतीचिन्ह, रोख रक्कम, प्रशस्तीपत्रक असे सन्मानाचे स्वरुप होते. यावेळी पहिल्या तिन्ही क्रमांकाच्या विजेत्यांच्या हस्ते देवीची आरती देखील करण्यात आली. 
स्त्री भ्रूण हत्या, देवीची नऊ रुपे, स्त्री शक्तीचे महत्व आणि महात्म्या भोंडल्याच्या वेळी झालेल्या खेळांतून शिक्षकांनी उलगडले. भोंडल्याच्या पारंपरिक गाणी व खेळ मंदिराच्या सभामंडपात सादर करण्यात आले. शिक्षक पारंपरिक वेशात स्पर्धेत सहभागी झाले होते. 
प्रमुख विश्वस्त अमिता अग्रवाल म्हणाल्या, भारतीय संस्कृतीमध्ये भोंडला हा एक प्रकार अनेक वर्षांपासून नवरात्रीमध्ये केला जातो. मात्र, आज भोंडल्याविषयी माहिती लहान मुली व तरुणांनी फारशी नाही. त्यामुळे शाळेतील शिक्षकांनी भोंडल्याविषयी अधिकाधिक माहिती गोळा करावी आणि विद्यार्थ्यांनाही याची माहिती सांगावी, याकरिता स्पर्धेचे आयोजन करण्यात आले होते, असेही त्यांनी सांगितले. प्रविण चोरबेले यांनी आभार मानले.

पुणे-देवस्थानच्या वतीने महिलांसाठी मोफत आरोग्य तपासणी शिबिरपुणे : तळजाई माता देवस्थानतर्फे महिलांसाठी मोफत आरोग्य तपासणी शिबिराचे आयोजन करण्यात आले होते. यावेळी ३२५ महिलांनी शिबिरात सहभाग घेऊन आरोग्य तपासणी करून घेतली. स्तन कर्करोगाबद्दल जनजागृती करून उपस्थित महिलांना माहिती देखील शिबिरात देण्यात आली.

तळजाई माता देवस्थानचे प्रमुख अण्णा थोरात यांच्या मार्गदर्शनाखाली शिबिर संपन्न झाले. विजय थोरात, सुरज थोरात, अमोल पडळकर, प्रणव मलभारे, तन्मय पारवे, ओंकार थोरात, किरण जगताप, शाम खंडेलवाल, यश खंडेलवाल, नाना साठे यांनी शिबिरात सक्रिय सहभाग घेतला. तळजाई माता देवस्थानच्या वतीने सहकार नगरमधील पाचगाव पर्वती पठारावर मंदिराच्या परिसरात आरोग्य शिबिराचे आयोजन करण्यात आले होते. शिबिरासाठी शेठ ताराचंद रामनाथ चॅरिटेबल आयुर्वेदिक हॉस्पिटल, लायन्स क्लब ऑफ पुणे अशोकनगर गोल्ड, लायन्स क्लब ऑफ पुणे २१ सेंचुरी, लायन्स क्लब ऑफ पुणे प्लॅटिनम यांचे सहकार्य मिळाले.

अण्णा थोरात म्हणाले, महिला संपूर्ण कुटुंबाची काळजी घेतात परंतु स्वतःची काळजी घेण्याकडे मात्र त्या दुर्लक्ष करतात. नवरात्रीनिमित्त असंख्य महिला मंदिरात दर्शनासाठी येतात, याचे निमित्त साधून देवस्थानच्यावतीने महिलांसाठी आरोग्य शिबिराचे आयोजन करण्यात आले होते. यावेळी रोग निदान, उपचार व तज्ञ डॉक्टरांचे मार्गदर्शन महिलांना उपलब्ध करून देण्यात आले. ब्रेस्ट कॅन्सर चेकअप, डोळ्यांची तपासणी, मधुमेह आणि रक्तदाब तपासणी या शिबिरात करण्यात आली.

ज्ञान प्रबोधिनी माजी विद्यार्थी मंडळ कला गटाच्या    ‘ नृत्य समिधा’ कार्यक्रमाला चांगला प्रतिसाद 
पुणे :
ज्ञान प्रबोधिनी माजी विद्यार्थी मंडळाच्या  कला व संस्कृती विशेष उद्दिष्ट गटातर्फे आयोजित ‘नृत्य समिधा’ कार्यक्रमाला चांगला प्रतिसाद मिळाला. डॉ.सुचेता परांजपे,डॉ.स्वाती दैठणकर,सुवर्णा गोखले यांच्या उपस्थितीत ‘शेडस् ऑफ वूमनहूड’ या  माहितीपट-मालिकेचे यू ट्यूबवर प्रकाशन झाले.या मालिकेच्या पहिल्या टप्प्यामध्ये ‘भरतनाट्यम’ नृत्य माध्यमातून स्त्रीचा प्रवास उलगडण्याचा प्रयत्न केला गेला. ‘वेदांमधील स्त्रिया,कला व आनंद’ या विषयावर डॉ.सुचेता परांजपे यांनी संवाद साधला. माहितीपट मालिकेचा रसास्वाद डॉ.स्वाती दैठणकर यांनी सादर केला. ज्ञानप्रबोधिनी स्त्री शक्ती विभागाच्या प्रमुख सुवर्णा गोखले यांनी ग्रामीण भागातील स्त्री सशक्तीकरणाबद्दल विचार मांडले. ज्ञानप्रबोधिनी माजी विद्यार्थी  मंडळ कला गटातर्फे डॉ.वैदेही केळकर,मिलिंद संत यांनी स्वागत केले.माहितीपटाचे दिग्दर्शक देवेंद्र भोमे आणि माहितीपटाची संकल्पना आणि लेखन करणाऱ्या धनश्री पुणतांबेकर यांनी आपले मनोगत व्यक्त केले.

या कार्यक्रमाला ज्ञान प्रबोधिनीचे संचालक डॉ.  गिरीश बापट, रामभाऊ डिंबळे, सुभाष देशपांडे, डॉ. विवेक कुलकर्णी, डॉ. सविता कुलकर्णी, डॉ अनघा लवळेकर, डॉ  समीर दुबळे, माजी विद्यार्थी व ज्ञानप्रबोधिनी परिवारातील अनेक मान्यवर उपस्थित होते.
       ‘शेडस् ऑफ वूमनहूड ‘ या माहितीपटातून आपल्याला भरतनाट्यम चा इतिहास समजला, वेद काळातील स्त्रिया कलेचा आनंद घेत होत्या. चौसष्ठ कला आपल्याकडे आहेत. कला या शब्दाचे वीस अर्थ आहेत. कोणत्याही क्षेत्रातील कलाकाराच्या प्रतिभेला प्रतिमेत प्रतिबिंबीत करून ती सृजनशक्ती अविष्कृत करतो त्याला कला असे म्हणावे, कला म्हणजे आनंद देणे, प्रसन्न करणे, असे प्रतिपादन डॉ. सुचेता परांजपे यांनी केले. त्या पुढे म्हणाल्या, ‘सिंधू संस्कृती, वैदिक संस्कृती, यज्ञ, भक्ती, ऋग्वेदापासून नृत्यकलेला मान्यता आहे, त्याचे संदर्भ उपलब्ध आहेत. ऋग्वेदात नर्तकीचे वर्णन आहे. जे जे वाड़मयात होते, त्याला मान्यता होती. समाजात मान्यता असो वा नसो धर्म आणि संस्कृतीने सर्व कलांना मान्यता दिली आहे.’
‘शेडस् ऑफ वूमनहूड’  या भरतनाट्यावर आधारित माहितीपटाविषयी बोलताना  डॉ. स्वाती दैठणकर म्हणाल्या, ‘ हा माहितीपट अतिशय उत्तम झाला आहे. नृत्य म्हणजे स्वतःचा स्वतःशी मुक्तसंवाद असतो. नृत्य म्हणजे आसिधारा व्रत आहे. माहितीपटात देवदासींपासून चालत आलेला भरतनाट्यम चा इतिहास खूप छान मांडला आहे. मनोरंजनाबरोबरच प्रबोधनही होत आहे हे वाखाणण्याजोगे आहे. हा सगळा इतिहास पुढच्या पिढीपर्यंत जतन करून ठेवला पाहिजे. नवरात्र उत्सवाचे औचित्य साधून हा कार्यक्रम होत आहे ही खूप चांगली बाब आहे. ज्ञानप्रबोधिनी स्त्री शक्ती विभागाच्या प्रमुख सुवर्णा गोखले या ग्रामीण भागातील स्त्री सशक्तीकरणाबद्दल विचार मांडताना म्हणाल्या, ‘नवरात्राच्या पार्श्वभूमीवर माजी विद्यार्थांच्या पुढाकारातून झालेला हा कार्यक्रम अतिशय सुंदर आहे. कला ही उपजत असते. ग्रामीण भागातील स्त्री यांच्या गटात राहून सहज शिकली जाते. स्वतःच्या आतला झरा शोधायला ग्रामीण भागातील व्यक्ती असो किंवा शिक्षण न घेणारी व्यक्ती असो ती सहज व्यक्त होते. त्यामुळे कला तिच्या अभिव्यक्तीचा अविभाज्य भाग असतो.
    महिलांच्या वेगवेगळ्या गटात वावरताना वाटतं, कला म्हणजे फक्त स्टेजवर सादर केलेली अशी नाही तर गावात फिरताना जात्यावरच्या ओवीत, पंचमीच्या निमित्ताने पारावर रंगलेले खेळ हा सुद्धा कलेचा अविष्कार आहे. उस्फूर्त प्रतिसाद आतून दिला जातो आणि निरपेक्षपणे स्वत: कडे बघता येणे, त्यातून आनंद शोधणे  त्याचा या ‘नृत्य समिधा’ या कार्यक्रमाशी खूप जवळचा संबंध आहे,असेही त्या म्हणाल्या.

ऋचा बोंद्रे यांच्या ‘गणेश वर्णन’ गायनाने कार्यक्रमाची सुरुवात झाली. मान्यवरांच्या उपस्थितीत दीपप्रज्वलन करण्यात आले. ज्ञानप्रबोधिनी माजी विद्यार्थी मंडळ कला गट व नृत्य विभागाविषयी मिलिंद संत यांनी प्रास्ताविक केले. वैष्णवी पुणतांबेकर आणि ईशा म्हसकर यांनी आदी तालात ‘अर्धनारीनटेश्वर ‘या नृत्याचे सादरीकरण केले. नीरजा आपटे यांनी सूत्रसंचालन केले. मान्यवरांच्या हस्ते सहभागी कलाकारांचा सत्कार करण्यात आला. डॉ. वैदही केळकर यांनी आभार मानले. हा कार्यक्रम सर्वांसाठी  विनामुल्य होता. हा कार्यक्रम १ ऑक्टोबर रोजी सायंकाळी साडेपाच वाजता गोखले इन्स्टिट्यूटच्या काळे सभागृह येथे झाला.  

पुणे : ढोलकीच्या तालावर…सोडा सोडा राया हा नांद खुळा… तुमच्या पुढ्यात बसले मी… चंद्रा चित्रपटातील बान नजंतला घेऊनी अवतरली चंद्रा, नटरंग चित्रपटातील नटरंग उभा अशा एकाहून एक सरस अशा लावण्या व गौळणीच्या सादरीकरणाने रसिकांवर लावणी या लोकप्रिय लोककलेची भुरळ घातली. हावभाव, पदन्यास आणि ढोलकीची थाप यांच्या एकत्रित सादरीकरणाने लावणी या लोककलेचा अप्रतिम कलाविष्कार रसिकांनी अनुभविला. आणि तोही सलग 12 तास!
वर्षा पवार, सोनाली जळगावकर सिनेअभिनेत्री शिवानी कोरे, पुनम कापसे, सुप्रिया जावळे, कावेरी घंगाळे यांनी आपल्या नृत्याने रसिकांची मने जिंकली.
पुणे नवरात्रौ महोत्सवातर्फे शारदीय नवरात्रौत्सवानिमित्त गणेश कला क्रिडा रंगमंच येथे सांस्कृतिक महोत्सव आयोजित करण्यात आला आहे. या कार्यक्रमाअंतर्गत सलग बारा तास लावणी महोत्सव पार पडला. यावेळी लावणी महोत्सवाचे सात संचानी सहभाग घेतला होता. शंभरहून अधिक लावण्यवतींनी आपला नृत्यविष्कार दाखवून प्रेक्षकांच्या डोळ्याचे पारणे फडले. यावेळी प्रेक्षकांनी शिट्या, टाळ्या व नृत्य करुन लावणीला वन्समोअरची दाद दिली. विचार काय हाय तुमचा… पैलवान आला हो पैलवान आला… बाजीराव मस्तानी चित्रपटातील पिंगा… ज्वानीच्या आगीची मशाल हाती… या लावण्यांच्या सादरीकरणाला रसिकांनी दाद दिली.
वर्षा पवार यांनी सादर केलेल्या हिर्‍याची अंगठी रुतून बसली, बाई मी लाडाची गं… या लावणीला रसिकांनी विशेष दाद दिली. तर सोनाली जवळगावकर यांनी चंद्रा लावणी सादर करुन प्रेक्षकांची मने जिंकली.
वाजले की बारा…. अप्सरा आली… नटरंग उभा… या नटरंग चित्रपटातील लावण्यांना रसिकांनी भरभरून दाद दिली.
पिकल्या पानाचा देठ की हो हिरवा… या बैठकीच्या लावणीच्या सादरीकरणाने आपल्या हावभावातून लावण्यवतींनी रसिकांची मने जिंकली. मी मेनका ऊर्वशी… आणि छत्तीस नखरेवाली… या लावण्यांच्या सादरीकरणाने कार्यक्रमात बहार आणली. भैरवीच्या सुरातील लावणीचे सादरीकरण करण्यात आले. केसात गुंफूणी गजरा तुम्हाला मानाचा मुजरा.. तुमच्या पुढ्यात बसले मी.. तुझ्या उसाला लागल कोल्हा, वाजले की बारा, बाई माझी करंगळी मोडली, आई मला नेसव शालू नवा, अशा ठसकेबाज लावण्यांचे सादरीकरणाने प्रेक्षकांनी टाळ्यांची दाद दिली. तसेच अनेक लावण्यांनी शिट्या आणि वन्समोअरही वसूल केले. महोत्सवाचे वैशिष्ट्ये म्हणले महिलांसाठी बसण्याची व्यवस्थाही करण्यात होती. महिलांची मोठी गर्दी होती. या लावणी महोत्सवात इश्काचा नाद खुळा, लावण्य जल्लोष, जल्लोष अप्सरांचा, लावणी धमाका, अहो नाद खुळा, तुझ्यात जीव रंगला यातील लावणीवती वर्षा पवार, सोनाली जळगावकर, शिवानी कोरे, पुनम कापसे, सुप्रिया जावळे, कावेरी घंगाळे, चतुर्थी पुणेकर, पतंजली पाटील, वैजयंती पाष्टे, वासंती पुणेकर, माया खुटेगावकर, प्रिया मुंबईकर, अर्चना जावळेकर व नमिता पाटील व त्यांच्या सहकार्‍यांनी तब्बल बारा तास ठसकेबाज लावणी सादर करुन प्रक्षेकांची वाहवा मिळविली.

या सर्व लावणीवती व सह कलाकारांचा सत्कार पुणे नवरात्रौ महोत्सवाचे आयोजक अध्यक्ष आबा बागुल व सदस्य अमित बागुल यांनी केला. पुणे नवरात्रौ महोत्सवात सलग बारा तासांच्या लावणी महोत्सवाची सुरुवात केली. तेव्हापासून गेली 28 वर्षे रसिक प्रेक्षकांचा उदंड प्रतिसाद लाभत आहे. तसेच यापासून प्रेरणा घेऊन अनेकांनी लावणी महोत्सव सुरु केले ही आनंदाची बाब आहे, असे आबा बागुल म्हणाले.
प्रारंभी लावणी महोत्सवाचे उदघाटन नारळ वाढवून ज्येष्ठ लावणी सम्राज्ञी व अभिनेत्री लिला गांधी यांच्या हस्ते करण्यात आले. गांधी यांनी या नवरात्रौत्सवाला शुभेच्छा दिल्या. हा महोत्सव कलाकारांसाठी महत्वाचा असल्याचे यावेळी त्यांनी सांगितले.
यावेळी ज्येष्ठ अभिनेत्री व नृत्यगंणा जयमाला इनामदार, लावणी अभ्यासिका आसावरी तारे, पुणे नवरौत्र महोत्सवाचे आयोजक अध्यक्ष आबा बागुल, पुणे नवरात्रौ महिला महोत्सवाच्या अध्यक्षा जयश्री बागुल, सदस्य अमित बागुल, काँग्रेसचे ज्येष्ठ नेते उल्हास पवार, संवादचे अध्यक्ष सुनिल महाजन, मराठी चित्रपट महामंडळाच्या संचालिका व नृत्य दिग्दर्शिका निकीता मोघे, महोत्सवाचे उपाध्यक्ष घनश्याम सावंत, कोषाध्यक्ष नंदकुमार बानगुडे, चिटणीस नंदकुमार कोंढाळकर, सदस्य अमित बागुल, सदस्य रमेश भंडारी, सतिश मानकामे, विलास रत्नपारखी, राजेंद्र बागुल, महेश ढवळे, सागर बागुल, सागर आरोळे, धनंजय कांबळे, अभिषेक बागुल, दुर्गादास देवकर, इम्तियाज तांबोळी, संतोष शिंदे, संतोष पवार, राहुल तौर, गणेश खांदवे, आस्मिन शेख, गणेश पवार यावेळी इत्यादी मंचावर उपस्थित होते. कार्यक्रमाचे महोत्सवाचे उपाध्यक्ष घनश्याम सावंत यांनी सुत्रसंचालन केले. हा लावणी महोत्सव रात्री उशीरापर्यंत संपला. लावणी रसिकांनी सारे प्रक्षेगृहा खचाखच भरले होते.

आमचा काळ खुप वेगळा होता. त्याकाळी साजुक तुपातील लावणी होती. आता लावणीचा रंग बदलत गेला असून खुलला आहे. लावणीत होणारा बदलदेखील चांगला आहे. तो झालाही पाहिजे, मात्र लावणीचे सौंदर्यात बदल करु नये. त्याचे ते रुप तसेच टिकवून ठेवण्याची गरज आहे. पूर्वी नववारी नेसूनच लावणी व्हायची. आता ती बदलत आहे. लावणीचे सौंदर्य टिकवून ठेवण्यासाठी आपण देखील प्रयत्न करायला हवा. गाण्याचे शब्द, ताल, सौंदर्य व चेहर्‍यावरील हावभाव लावणीवतींना समजून घेतला पाहिजे. लावणीसारखे सौंदर्य नाही, अशी भावना यावेळी ज्येष्ठ अभिनेत्री व नृत्यगंणा जयमाला इनामदार यांनी व्यक्त केली.

लावणी परंपरा पुणे नवरात्रौत्सवात कायम टिकून आहे. यामध्ये पारंपारिक लावण्या झाल्या पाहिजे. लावणी आयटम साँगकडे वळली आहे. लावणीचे रुप बदलण्यात येऊ नाही, अशी भावना यावेळी लावणी अभ्यासक आसावरी तारे यांनी व्यक्त केली.