पालखीतून तुळशीबाग महागणपतीची पारंपरिक आगमन मिरवणूक; मानाचा चौथा गणपती श्री तुळशीबाग सार्वजनिक गणेशोत्सव मंडळ ट्रस्ट  शतकोत्तर रौप्य महोत्सवी वर्ष
पुणे : फुलांचा वर्षाव करीत ढोल-ताशांच्या गजरात आणि गणपती बाप्पा मोरयाच्या जयघोषात मानाचा चौथा श्री तुळशीबाग गणपतीची आगमन मिरवणूक काढण्यात आली. पारंपारिक पद्धतीने पालखीतून ही मिरवणूक काढण्यात आली. मंडळाने यंदा साकारलेल्या मथुरेतील वृंदावनात ‘तुळशीबागेचा महागणपती’ विराजमान झाला.

मानाचा चौथा गणपती श्री तुळशीबाग सार्वजनिक गणेशोत्सव मंडळ शतकोत्तर रौप्य महोत्सवी वर्ष (१२५ वे) साजरे करत आहे. श्रींची प्राणप्रतिष्ठापना दुपारी १२.१५ वाजता आळंदी देवाची प्रमुख विश्वस्त योगी निरंजन नाथ महाराज यांच्या हस्ते झाली. श्रींच्या आगमन सोहळ्याचा शुभारंभ उद्योजक पुनीत बालन यांच्या शुभहस्ते झाला. यावेळी उत्सवाचे स्वागताध्यक्ष कृष्णकुमार गोयल, वसंत नगरकर, परिसरातील व्यापारी वर्ग तसेच मंडळाचे अध्यक्ष विकास पवार, कोषाध्यक्ष नितीन पंडित, उपाध्यक्ष विनायक कदम यांसह पदाधिकारी व कार्यकर्ते मोठ्या संख्येने उपस्थित होते.  

सकाळी १० वाजता  गणपतीची पालखीतून मिरवणूक निघाली.  मिरवणूक गणपती चौकातून नगरकर चौक, आप्पा बळवंत चौक, बुधवार चौक, समाधान चौक, लक्ष्मी रोड मार्गे पुन्हा गणपती चौक ते उत्सव मंडपात आली. मिरवणुकीत लोणकर बंधूचे नगारा वादन झाले.  रुद्रांग व तालगर्जना वाद्यपथकांनी देखील वादन केले.

नितीन पंडित म्हणाले,  तुळशीबाग सार्वजनिक गणेशोत्सव मंडळाने  मथुरेतील ‘वृंदावन’ या संकल्पनेवर आधारित देखावा सादर केला आहे. तब्बल ८० फूट रुंद, १२० फूट लांब आणि ३५ फूट उंच असा भव्य देखावा असून देखाव्यात १४ फूट उंचीचे ४० खांब, दहा बाय दहा आकाराचे १४ पॅनल आणि सुमारे ३० मोर वृंदावनात विहार करताना साकारले आहेत. राधाकृष्णांचे मंदिर आणि २० फूट लांब, ४० फूट उंच भव्य प्रवेशद्वार या देखाव्याचे प्रमुख आकर्षण आहे. उत्सव काळात अभिषेक, गणेश याग, बृहस्पती याग, सत्यविनायक पूजा आदी विविध धार्मिक कार्यक्रमांचे आयोजन करण्यात आले आहे.

शेतकरी, महिला सुरक्षितता आणि राज्य-देशाच्या प्रगतीसाठी प्रार्थना

पुणे, दि. २७ ऑगस्ट २०२५ : गणेश चतुर्थीच्या शुभमुहूर्तावर सिल्व्हर रॉक्स, मॉडेल कॉलनी, शिवाजीनगर येथील निवासस्थानी महाराष्ट्र विधान परिषदेच्या उपसभापती डॉ. नीलम गोऱ्हे आणि त्यांची भगिनी श्रीमती जेहलम जोशी यांनी श्री गणेशाची प्रतिष्ठापना केली. जवळपास ५० वर्षांची ही परंपरा त्यांच्या आई-वडिलांनी – डॉ. दिवाकर गोऱ्हे व सौ. लतिका गोऱ्हे – यांनी सुरू केली होती आणि आजही ती भावपूर्णपणे पुढे नेली जात आहे.

या प्रसंगी घरातील आरास पर्यावरणपूरक ठेवण्यात आली होती. सोनेरी मोदकाद्वारे भारताच्या समृद्धीचे प्रतीक मांडले गेले, तर पाठीमागील धनुष्यबाण व त्रिशूलाच्या सजावटीतून सामर्थ्य आणि श्रद्धेचा संगम व्यक्त करण्यात आला. ही आरास केवळ सजावट नसून श्रद्धा, कृतज्ञता आणि प्रगतीची प्रार्थना असल्याचे डॉ. गोऱ्हे यांनी सांगितले.

गणरायाच्या चरणी प्रार्थना करताना त्यांनी शेतकरी व सर्वसामान्य जनतेच्या कल्याणाची मनोकामना केली. “या वर्षी पाऊस समाधानकारक झाला असला तरी काही भागांत शेतकऱ्यांचे नुकसान झाले आहे. बळीराजाला सुख-समाधान मिळो, शेतीच्या उत्पादनास योग्य भाव मिळो आणि नवी उभारी घेण्यासाठी बाप्पाचे आशीर्वाद लाभोत. तसेच विद्यार्थी, महिला आणि कामगार यांचे जीवन सुजलाम-सुफलाम व्हावे,” असे त्यांनी नमूद केले.

महिलांच्या सुरक्षिततेवर भर देत डॉ. गोऱ्हे म्हणाल्या की, “‘लाडकी बहीण योजना’ ही महिलांच्या आर्थिक व सामाजिक सक्षमीकरणासाठी महत्त्वाची दिशा आहे. गावपातळीवर महिलांना सुरक्षितता, नेतृत्व आणि प्रगतीची संधी मिळावी, ही आमची गणरायाकडे प्रार्थना आहे.”

राज्याच्या महायुती सरकारसाठी प्रार्थना करताना त्यांनी सांगितले की, “मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या नेतृत्वाखाली महाराष्ट्र सर्वांगीण विकासाच्या मार्गावर आहे. या तिघा नेत्यांमध्ये कायम जिव्हाळा , मैत्री आणि सलोखा टिकून राहावा, जेणेकरून ते एकसंघपणे कार्य करून जनतेच्या अपेक्षा पूर्ण करू शकतील.” त्याचबरोबर, केंद्रात पंतप्रधान नरेंद्र मोदी यांच्या नेतृत्वाखाली भारताला जागतिक पातळीवर प्रगती व सामर्थ्य प्राप्त होवो, अशीही त्यांनी प्रार्थना केली.

गणरायाच्या आगमनानंतर लवकरच गौरी पूजनाचा मंगल सोहळा होणार असून कौटुंबिक ऐक्य आणि समाजातील स्त्रीशक्तीचे प्रतीक म्हणून तो साजरा केला जाणार आहे.

अखिल मंडई मंडळाचे गणेशोत्सवाचे १३२ वे वर्ष : कृष्णकुंज मध्ये मंडईचे बाप्पा विराजमान
पुणे: गणपती बाप्पा मोरया… आले रे आले गणपती आले आणि शारदा गणपतीचा जयघोष करत फुलांनी सजलेल्या भव्य मयूर रथातून अखिल मंडई मंडळाच्या शारदा गजाननाची आगमन मिरवणूक निघाली आणि निसर्गाच्या सानिध्यातील ‘कृष्णकुंज’ मध्ये मंडईचे बाप्पा विराजमान झाले.

गणेशाची प्रतिष्ठापना दुपारी १२ वाजता युनिटी एनर्जी प्रायव्हेट लिमिटेड चेअरमन नवीनचंद्र विप्रदास मेनकर, स्नेहल नवीनचंद्र मेनकर यांच्या हस्ते झाली. यावेळी  मंडळाचे अध्यक्ष अण्णा थोरात, कार्याध्यक्ष अभय थोरात, खजिनदार संजय मते, अध्यक्ष मिलिंद काची, विश्वास भोर, राजेश कराळे, सुरज थोरात, विकी खन्ना यावेळी उपस्थित होते.

अखिल मंडई मंडळाच्या गणेशोत्सवाचे यंदा १३२ वे वर्ष आहे. अखिल मंडई मंडळ – मंडई पोलीस चौकी, बाबू गेनू चौक, रामेश्वर चौक – गोटीराम भैया चौकातून उत्सव मंडप असा मिरवणुकीचा मार्ग होता.

 मिरवणुकीच्या अग्रभागी न्यू गंधर्व बॅन्ड पथक तसेच मल्हार ढोल ताशा पथक सांगवी, स्वराज्य पथक काळभोर नगर चिंचवड, समर्थ पथक यांनी वादन केले.

कृष्णकुंज’ मध्ये विराजमान झाले शारदा गजानन

गणेशोत्सवात ‘कृष्णकुंज’ ही आकर्षक सजावट मंडळातर्फे साकारण्यात येणार आली आहे. यावर्षी हलत्या झोपाळ्यावर शारदा गणपती विराजमान झाले आहेत. सजावटीतील श्री राधाकृष्णाच्या हस्तचित्रित मनमोहक कलाकृती गणेशभक्तांसाठी विशेष आकर्षण आहेत. राजस्थानी शैलीतील ही सजावट असून प्रवेशद्वारावर झोपाळ्यावरील राधा-कृष्ण मूर्ती आहे. महिरप आणि मोरांच्या कलाकृती, कलमकारी शैलीतील श्रीकृष्णाच्या जीवनावर आधारित मोठी चित्रे भाविकांचे लक्ष वेधून घेत आहेत.  

अण्णा थोरात म्हणाले, झोपाळ्यावर विराजमान शारदा गजानन यंदा भाविकांसाठी आकर्षण ठरणार आहे. दर तीन वर्षांनी  शारदा गजानन झोपाळ्यावर विराजमान होतात. झोपाळा राजस्थानी शैलीने फुलांनी सजवण्यात आला आहे.  उत्सव काळात मोरया गोसावी यज्ञ मंडपात विविध धार्मिक व सांस्कृतिक कार्यक्रमांचे आयोजन करण्यात आले आहे. कीर्तन, प्रवचन, भजन, आणि सामूहिक आरती यांसह विविध कार्यक्रमाचे आयोजन करण्यात आले आहे. तरी गणेशभक्तांनी मोठ्या संख्येने उत्सवात सहभागी व्हावे, असे आवाहन मंडळातर्फे करण्यात आले आहे.

पुणे, – उंड्री-मोहम्मदवाडी येथील नागरिकांना मंगळवारी पुणे महापालिका आयुक्त नवल किशोर राम यांनी दिलेल्या अचानक भेटीने दिलासा मिळाला. महापालिकेच्या प्रमुख विभागांच्या अधिकाऱ्यांसह आलेल्या आयुक्तांनी परिसरातील विविध नागरी समस्या पाहणी करून त्यांचे तातडीने निराकरण केले जाईल, असे आश्वासन दिले. पाणीपुरवठ्याची कमतरता ही सर्वात गंभीर समस्या असल्याचे त्यांनी मान्य केले आणि ती तातडीने सोडविण्याचे आदेश अधिकाऱ्यांना दिले.

राम यांच्यासोबत रस्ता, पाणीपुरवठा, मलनिस्सारण, स्वच्छता, कचरा व्यवस्थापन आणि उद्यान विभागाचे अधिकारी होते. मोहम्मदवाडी–उंड्री रहिवासी कल्याण विकास फाउंडेशन (MURWDF) यांनी नुकतेच आयुक्तांना निवेदन देऊन प्रत्यक्ष पाहणी करण्याची विनंती केल्यामुळे ही भेट आयोजित करण्यात आली.

पाहणी दरम्यान संघटनेच्या सदस्यांनी अनेक समस्या मांडल्या. यात न्याती इस्टेट ते कंट्री क्लब आणि न्याती इस्टेट ते डीपीएस स्कूल या रस्त्यांची दयनीय स्थिती, कडनगरमधील ओव्हरहेड केबल्सचे योग्य व्यवस्थापन, मलनिस्सारण प्रणालीतील त्रुटी, रस्त्यांवरील अपुरी प्रकाशयोजना, सुरक्षा वाढवण्यासाठी सीसीटीव्ही कॅमेऱ्यांची गरज आणि काही ठिकाणांचे सौंदर्यीकरण या प्रमुख होत्या.

पाणीपुरवठ्याच्या समस्येवर राम यांनी जलपुरवठा विभागप्रमुख नंदकुमार जगताप यांना अल्पकालीन व दीर्घकालीन उपाय तत्काळ राबवण्याचे निर्देश दिले. तसेच रस्त्यांची दुरुस्ती, जलनिस्सारण सुधारणा व स्ट्रीटलाइट बसविण्याचे कामही वेगाने करण्यास सांगितले.

रहिवाशांनी न्याती एस्तेबानजवळील सुविधा जागेला उद्यानात रूपांतरित करण्याची मागणी केली असता आयुक्तांनी सकारात्मक प्रतिसाद दिला.

संघटनेच्या प्रतिनिधीने सांगितले, “ही भेट ही वर्षानुवर्षे प्रलंबित असलेल्या समस्यांच्या सोडवणुकीसाठी केलेले सकारात्मक पाऊल आहे. आम्हाला विश्वास आहे की पीएमसी ठोस कृती आराखड्याद्वारे मोहम्मदवाडी आणि उंड्रीतील नागरिकांच्या जीवनमानात लवकरच सुधारणा करेल.”

बैठक एमयूआरडब्ल्यूडीएफच्या सदस्यांनी आयोजित केली होती – सुनील अय्यर, संदीप कोल्हटकर, रेणुका सूर्यवंशी, नदिम इनामदार, सुनील कोलोटी, आशिष गुप्ता, दीपा चीमा, कौस्तुभ पानसरे, उमेश राजमाने आणि सजीव नायर.

सजीव नायर, उंड्रीतील रहिवासी म्हणाले,
“आपल्या सकारात्मक प्रतिसादासाठी आणि नागरी पायाभूत सुविधा व घरगुती पाणीपुरवठा यासंबंधी त्वरित दिलेल्या सूचनांसाठी आम्ही मनापासून आभारी आहोत.
आपला दौरा हा केवळ औपचारिकता नाही – तर आमच्या परिसरातील ठोस व कृतीशील बदलांची हमी आहे. त्यामुळे आमच्यात आशा आणि विश्वास निर्माण झाला आहे की आमचे जुने प्रश्न आता निकाली निघतील.
आमच्या समस्या ऐकण्यासाठी, त्यावर उपाययोजना आखण्यासाठी आणि स्वतः भेट देण्यासाठी वेळ, ऊर्जा आणि नेतृत्व दिल्याबद्दल आपले आभार.”

उमेश राजमाने, उंड्रीतील आणखी एक रहिवासी म्हणाले,
“आमच्या उंड्री-मोहम्मदवाडी परिसराला भेट देऊन मूळ पातळीवरील समस्या जाणून घेतल्याबद्दल आम्ही राम साहेबांचे मनःपूर्वक आभार मानतो. गेल्या दहा वर्षांहून अधिक काळ या भागाकडे दुर्लक्ष होत असताना इतक्या वरिष्ठ अधिकाऱ्यांनी प्रथमच भेट दिली आहे. त्यांनी नागरिकांनी मांडलेल्या मागण्यांची गंभीरता आणि गरज त्वरित ओळखली. विविध विभागातील अधिकाऱ्यांसह ते स्वतः परिसरात फेरफटका मारत परिस्थितीचे मूल्यांकन करताना पाहणे खूप आनंददायी होते.
रस्ता विभागातील अनिरुद्ध पावसकर यांनी आम्हाला संयमाने ऐकले, तात्काळ उपाययोजना आणि काही दीर्घकालीन कामांची नोंद घेतली. आमच्या गरजांकडे पाहण्याचा सकारात्मक दृष्टिकोन पाहून आम्ही खूश आहोत. अशा अर्थपूर्ण आणि परिणामकारक कामाची आम्ही अपेक्षा करतो, जेणेकरून आपले भविष्य उज्ज्वल आणि शहर अभिमानास्पद होईल.”

सुनील कोलोटी, मोहम्मदवाडी-उंड्री रेसिडेंट्स वेल्फेअर डेव्हलपमेंट फाऊंडेशन (MURWDF) म्हणाले,
“आयुक्त नवल किशोर राम यांनी संपूर्ण पथकासह उंड्री आणि मोहम्मदवाडीला दिलेल्या भेटीसाठी आम्ही मनापासून आभार मानतो. नागरिकांना अद्याप टँकरवर अवलंबून राहावे लागणाऱ्या पाणीपुरवठा समस्येची त्यांनी केलेली दखल व स्थळावरची पाहणी यामुळे अल्पकालीन दिलासा व दीर्घकालीन उपाय यांना प्राधान्य दिले जाईल असा विश्वास वाटतो. त्यांनी खड्डेमय उंड्री मार्ग, जो हजारो प्रवाशांचा जीवनवाहिनी आहे, त्याच्या दुरुस्तीबाबत तसेच ड्रेनेज, रस्त्यावरील दिवे आणि इतर नागरी सुविधांच्या उन्नतीबाबत त्वरित कारवाईचे आश्वासन दिले. नागरिक आणि पीएमसी नेतृत्व यांच्यातील हा रचनात्मक संवाद हा सकारात्मक आरंभ आहे आणि आपल्या समुदायाच्या उन्नतीसाठी केलेली आश्वासने लवकरात लवकर पूर्ण होतील अशी आम्ही अपेक्षा करतो.”

बुधवारी अभिनेते प्रवीण तरडे यांच्या हस्ते देखाव्याचे उद्घाटन

पिंपरी, पुणे (दि. २६ ऑगस्ट २०२५) वर्षभर धार्मिक, सामाजिक उपक्रमाबरोबरच सांस्कृतिक, प्रबोधनात्मक कार्यक्रम आयोजित करण्याची परंपरा कायम राखणाऱ्या पिंपरी गावातील सुवर्ण मित्र मंडळ आणि शंभू प्रतिष्ठानने सुवर्ण महोत्सवी वर्षात पदार्पण केले आहे. बुधवारी (दि.२७) “श्रीं”ची प्रतिष्ठापना करून रात्री ९ वाजता, प्रसिद्ध दिग्दर्शक व सिने अभिनेते प्रवीण तरडे यांच्या हस्ते देखाव्याचे उद्घाटन करण्यात येणार आहे अशी माहिती अध्यक्ष विनायक कुलकर्णी व मंडळाचे माजी अध्यक्ष तथा विश्वस्त प्रवीण कुदळे यांनी प्रसिद्धीस दिली आहे.
वमंडळाची धार्मिक व सामाजिक उपक्रमांची परंपरा कायम राखत या वर्षी गणेशोत्सवात ज्येष्ठ नागरिक मंडळाचे भजन, ज्येष्ठ नागरिकांसाठी कॅरम व बुद्धिबळ स्पर्धा, आरोग्य तपासणी शिबिर, युवती व महिला भगिनींचे मर्दानी खेळ, निबंध, चित्रकला, वकृत्व स्पर्धा, धीरज वानखेडे यांच्या भक्ती गीत आणि शिवगीतांचा कार्यक्रम आणि महिला भगिनींचा आवडता “खेळ पैठणीचा” अशा अनेक कार्यक्रमांचे आयोजन करण्यात आले आहे अशी माहिती संस्थेचे उपाध्यक्ष केतन जाचक, खजिनदार समीर कुदळे आणि उपखजिनदार सौरभ कुदळे यांनी प्रसिद्धीस दिली आहे. सर्व स्पर्धा मोफत असून स्पर्धेतील बक्षीस विजेत्यांना आकर्षक बक्षीस देऊन गौरविण्यात येणार आहे.
पिंपरी चिंचवड शहरातील या जुन्या आणि नामांकित या मंडळाची स्थापना १९७६ साली झाली होती. माजी नगरसेवक नगरसेवक नंदकुमार जाधव, प्रदीप कुदळे, राजेंद्र परदेशी, दिपक उत्तेकर, गजानन गवळी, प्रवीण कुदळे अशा मान्यवरांनी मंडळाचे अध्यक्ष पद भूषवून संस्थेच्या नावलौकिकात भर घातली आहे. सुवर्णमहोत्सवी वर्ष म्हणून या वर्षीचा गणेशोत्सव विशेषत्वाने साजरा होणार आहे. गेल्या पाच दशकांपासून सुवर्ण मित्र मंडळाने समाजहिताचे अनेक उपक्रम राबवत गावकऱ्यांच्या मनात विशेष स्थान मिळवले आहे. धार्मिक व सांस्कृतिक परंपरेबरोबरच सामाजिक प्रबोधन करणे हा मंडळाचा प्रमुख हेतू आहे. सर्व गावकऱ्यांचा सक्रिय सहभाग, तरुणाईचा उत्साह आणि महिला भगिनींच्या सहभागाने या वर्षी पंचक्रोशीत आदर्श ठरेल असे उपक्रम यंदाच्या सुवर्णमहोत्सवी वर्षात राबवून गणेशोत्सव अधिक उपयुक्त व आदर्शवत करण्याचा संकल्प केला आहे, सर्व ग्रामस्थांनी व नागरिकांनी या उपक्रमांना उपस्थित राहून उत्सवाची शोभा वाढवावी, असे आवाहन सुवर्ण मित्र मंडळ, शंभू प्रतिष्ठान, पिंपरीगाव यांच्याकडून करण्यात आले आहे.
कार्यक्रमाचे वेळापत्रक :- बुधवारी, दि.२७ ऑगस्ट, रात्री नऊ वाजता, “श्रीं” चा आगमन सोहळा आणि अभिनेते प्रवीण तरडे यांच्या हस्ते देखाव्याचे उदघाटन; गुरुवारी (दि.२८ ऑगस्ट) सायंकाळी सहा वाजता, जेष्ठ नागरिकांचे भजन आणि “श्रीं”ची आरती आठ वाजता; शुक्रवारी (दि. २९ ऑगस्ट) सायंकाळी सहा वाजता, विठ्ठल रुक्मणी भजनी मंडळ ,काळेवाडी यांचे भजन नंतर ८ वाजता “श्रीं”ची आरती; शनिवारी ( दि. ३० ऑगस्ट) दुपारी एक ते रात्री आठ वाजेपर्यंत जेष्ठ नागरीक कॅरम आणि बुद्धिबळ स्पर्धा, रात्री ८ वाजता “श्रीं”ची आरती; रविवारी (दि.३१ ऑगस्ट) सकाळी ११ ते दुपारी ३, मोफत आरोग्य तपासणी शिबिर, सायंकाळी सहा वाजता, सावतामाळी भजन मंडळ, पिंपरीगाव यांचे भजन, ७:३० वाजता युवती व महिला भगिनींचे मर्दानी खेळ त्यानंतर ८ वाजता “श्रीं”ची आरती;
सोमवारी (दि.१ सेप्टेंबर) सायंकाळी सहा वाजता, तुळजाभवानी भजनी मंडळ यांचे भजन आणि ८ वाजता “श्रीं”ची आरती; मंगळवारी (दि.२ सप्टेंबर) सकाळी ११ ते दुपारी ३ वाजेपर्यंत निबंध, चित्रकला आणि वक्तृत्व स्पर्धा, सायंकाळी सहा वाजता भजन आणि ८ वाजता “श्रीं”ची आरती होईल;

बुधवारी (दि.३ सप्टेंबर) सकाळी ११ ते ३ वाजेपर्यंत निबंध, चित्रकला आणि वक्तृत्व स्पर्धा, रात्री आठ वाजता “श्रीं”ची आरती होईल; गुरुवारी (दि.४ सप्टेंबर) सायंकाळी सात वाजता धीरज वानखेडे यांच्या भक्ती गीत आणि शिवगीतांचा कार्यक्रम आणि ८ वाजता “श्रीं”ची आरती होईल आणि महिला भगिनींचे विशेष आकर्षण असणारा ‘खेळ पैठणीचा’ हा कार्यक्रम शुक्रवारी (दि.५ सप्टेंबर) सायंकाळी ७ वाजता सुरू होणार आहे त्यानंतर “श्रीं”ची आरती होईल या सर्व कार्यक्रमाला गणेश भक्तांनी, मंडळाचे हितचिंतक, देणगीदार आणि पंचक्रोशीतील नागरिक बंधू भगिनींनी उपस्थित रहावे असे आवाहन पिंपरी गावातील सुवर्ण मित्र मंडळ आणि शंभू प्रतिष्ठान च्या वतीने करण्यात आले आहे.

पुणे, दि. २६ : जिल्ह्यातून २७ ते २९ ऑगस्ट दरम्याण मराठा समाजाच्या आरक्षणाच्या मागणीसाठी समाज बांधव मोर्चा काढणार आहेत. हा मोर्चा २७ ऑगस्ट रोजी अहिल्यानगर ते आळेफाटामार्गे ओतूर ते बनकर फाटामार्गे किल्ले शिवनेरी येथे येणार असून दुसऱ्या दिवशी २८ ऑगस्ट रोजी किल्ले शिवनेरीवरुन नारायणगाव मार्गे मंचर-खेड-चाकण-तळेगाव ते लोणावळामार्गे मुंबईकडे जाणार आहे. समाज बांधवांची गर्दी होऊन वाहतूक कोंडी व कायदा व सुव्यसस्था अबाधित रहावी याकरिता जिल्हाधिकारी तथा जिल्हादंडाधिकारी जितेंद्र डूडी यांनी २७ ते २९ ऑगस्ट २०२५ दरम्याण मोटार वाहन कायदा, १९८८ चे कलम ११५ मधील तरतुदीनुसार व गृह विभागाच्या १९ मे १९९० च्या अधिसूचनेनुसार वाहतुकीमध्ये बदल करुन पर्यायी मार्गाने वाहतूक वळविण्याचे आदेश जारी केले आहेत.

त्यानुसार नगर कल्याण मार्गावरील वाहतूक १४ नंबर जांबुत फाटा येथून नगरकडे जाणारी वाहतूक बोर-बेल्हे-अळकुटी-पारनेर-अहिल्यानगर मार्गे जातील.
नारायणगावकडून जुन्नरकडे जाणारी वाहतूक ओझर फाटा-कारखाना फाटा-शिरोली बुद्रुक मार्गे वळविण्यात आली आहे.

नारायणगावकडून पुण्याकडे जाणारी वाहतूक पुणे-नाशिक महामार्ग क्र.५० व बायपास महामार्ग यावरील नारायणगावकडून चाकणकडे जाणारी वाहतूक नारायणगाव बायपासमार्गे कारफाटा-मंजर पोलिस स्टेशन-नागापूर-रोडेवाडीफाटा ते लोणी-पाबळ मार्गे शिक्रापूर-नगर रोडमार्गे पुणे अशी वळविण्यात आली आहे.

नारायणगावकडून येताना बायपास क्र.६० मार्गे मंचर ते निघोटवाडी सरळमार्गे मोर्चा जाताना जीवन खिंड-मंचर शहर-अवसरी फाटा ते जीवन खिंड-नंदी चौक अशी वळविण्यात आली आहे.

खेड शहराकडून पुण्याकडे जाणारी वाहने पाबळमार्गे जातील.

जुना पुणे-मुंबई महामार्ग क्र.४८ वरील वाहतूक नवीन पुणे-मुंबई द्रुतगती मार्गावर वळविण्यात आली असून चाकण-देहुरोडकडून मुंबईकडे जाणारी वाहतूक वडगाव फाट्यावरुन द्रुतगती मार्गावरुन उर्से टोलनाकामार्गे मुंबईकडे वळविण्यात येईल.

मुंबई ते पुणे द्रुतगती मार्गावरुन मुंबईकडे जाणारी सर्व वाहने वलवण एक्झीटवरुन लोणावळा शहरात न वळविता मुंबईकडे जातील.
जुना मुंबई ते पुणे मार्गावरुन पुण्याकडे जाणारी सर्व वाहने खंडाळा-वलवण एक्झीटवरुन लोणावळा शहरात अथवा जुन्या महामार्गावर न वळविता पुण्याकडे जातील.

लोणावळा शहर परिसरातून पुणे व मुंबईकडे जाणारी वाहतूक जुन्या महामार्गावरुन न जाता वलवण पुलावरुन द्रुतगती मार्गाने मुंबई व पुण्याकडे जातील.
या आदेशाची अंमलबजावणी २७ ऑगस्टच्या रात्री १० वाजल्यापासून २९ ऑगस्टच्या रात्री १२ पर्यंत लागू राहील.
०००००

पुणे, दि. २६ : केंद्र शासनाने निश्चित केलेल्या आधारभूत दरानुसार हंगाम २०२५-२६ मध्ये राज्यात नाफेड व एनसीसीएफच्या वतीने पणन महासंघामार्फत कडधान्य व तेलबियांची (मुंग, उडिद, सोयाबीन व तुर) खरेदी करण्यात येणार आहे.

आधारभूत दराने खरेदी करण्याकरीता ई-पिक पाहणी असलेला ७/१२ उतारा आवश्यक आहे. ही खरेदी प्रक्रिया शेतकऱ्यांच्या हितासाठी पारदर्शक, कार्यक्षम व संपूर्णपणे ऑनलाईन प्रणालीद्वारे पार पाडली जाणार आहे.

केंद्र शासनाच्या आधारभूत किंमत खरेदी योजनेचा लाभ घेण्याकरिता जिल्ह्यातील सर्व शेतकऱ्यांनी आपल्या पिकांची ई-पिक पाहणी शासनाने दिलेल्या कालावधीत पूर्ण करावी, असे आवाहन जिल्हा पणन अधिकारी यांनी प्रसिद्धी पत्रकान्वये केले आहे.
०००००