पुणे महापालिका ई-गव्हर्नन्स सुधारणांच्या १५० दिवसांच्या कार्यक्रमात राज्यात अव्वल!

पुणे-महाराष्ट्र शासनाच्या १५० दिवसांच्या प्रशासकीय सुधारणा कार्यक्रमा अंतर्गत पुणे महानगरपालिकेने ई-गव्हर्नन्स सुधारणांच्या अंतरिम आढाव्यात प्रथम क्रमांक पटकावला आहे. महाराष्ट्र शासनाच्या १५० दिवसांच्या ई-गव्हर्नन्स सुधारणा कार्यक्रमाच्या अंतरिम आढाव्यात पुणे महानगरपालिकेने (PMC) सर्व महानगरपालिकांमध्ये सर्वोत्तम कामगिरी केली आहे. मुख्यमंत्री देवेंद्र फडणवीस यांच्या अध्यक्षतेखालील मुंबईतील सह्याद्री अतिथीगृहात आयोजित या आढावा बैठकीत, प्रत्येक विभागाच्या एका निवडक कार्यालयाने आपापल्या कामाची प्रगती सादर केली, ज्यामध्ये राज्यभरातील सर्व महानगरपालिकांमधून केवळ पुणे महानगरपालिकेची निवड झाली.

पुणे महानगरपालिकेचे आयुक्त नवल किशोर राम यांनी महानगरपालिकेने राबवलेल्या विविध ई-गव्हर्नन्स प्रकल्पांचा प्रगती अहवाल सादर केला या प्रसंगी अतिरिक्त महापलिका आयुक्त (ई) – पृथ्वीराज बी.पी उपस्थित होते . या सादरीकरणात प्रशासकीय कार्यक्षमता आणि नागरिक सेवा सुधारण्याच्या उद्देशाने यशस्वीपणे सुरू केलेल्या डिजिटल उपक्रमांवर भर देण्यात आला.

ई-गव्हर्नन्स उपक्रमांमधील प्रमुख मुद्दे पुढील प्रमाणे:

• वेबसाइट आणि मोबाईल ॲप्स: पुणे महानगरपालिकेने मराठी आणि इंग्रजी दोन्ही भाषांमध्ये ३६ मायक्रो-साइट्ससह एक नवीन, मोबाईल-फ्रेंडली वेबसाइट विकसित केली आहे. या वेबसाइटला वर्षाला ६७ लाखांहून अधिक नागरिक भेट देतात. तसेच, पीएमसी केअर, रोड मित्र आणि पीएमसी आयएसडब्ल्यूएम यांसारखी अनेक नागरिक-केंद्रित मोबाईल ॲप्लिकेशन्सही विकसित करण्यात आले आहेत.

लोकसेवा हक्क (RTS) आणि ऑनलाइन सेवा: लोकसेवा हक्क कायद्यांतर्गत एकूण ९७ सेवा अधिकृतपणे अधिसूचित करण्यात आल्या आहेत. यापैकी ८९ सेवा ऑनलाइन उपलब्ध असून, सर्व नागरिकांना सेवा विहित मुदतीत देण्याचे उद्दिष्ट आहे. गेल्या वर्षी २.२५ लाखांपेक्षा जास्त नागरिकांना सेवाप्रदान करण्यात आल्या आहेत.

• तक्रार निवारण प्रणाली: नागरिकांना मोबाईल ॲप्स, व्हॉट्सॲप आणि सोशल मीडियासह १० वेगवेगळ्या माध्यमांतून तक्रारी नोंदवण्याची सुविधा देण्यात आली आहे. गेल्या वर्षात एकूण १.१५ लाख तक्रारींचे निवारण करण्यात आले आहे.
• ई-ऑफिसची अंमलबजावणी: जून २०२५ पासून संपूर्ण पालिकेचेकामकाज ई-ऑफिस प्रणालीवर स्थलांतरित करण्यात आला आहे. या प्रणालीवर पालिकेचे २५०० हून अधिक अधिकारी आणि कर्मचारी सक्रिय वापरकर्ते आहेत.

प्रगत तंत्रज्ञानाचा वापर: पालिकेनेत्यांचा रोड ॲसेट मॅनेजमेंट सिस्टीम (RAMS) आणि इंटिग्रेटेड वर्क्स मॅनेजमेंट सिस्टीम (IWMS) साठी जीआयएस (GIS) चा प्रभावी वापर केला आहे.

• डेटा आणि ॲनालिटिक्स: ४० विभागांमधील ५०० प्रमुख कामगिरी निर्देशकांसह (KPIs) एक केंद्रीय डॅशबोर्ड विकसित करण्याचे काम सुरू आहे, ज्यामध्ये निर्णय घेण्यासाठी २० डॅशबोर्ड आधीच तयार आहेत. आयुक्तांनी “पीएमसी स्पार्क” नावाचा वॉर रूमही सुरू केला आहे, जिथे ५० प्रकल्पांचा पंधरवड्यातून एकदा आढावा घेतला जातो.
• एआय आणि तंत्रज्ञान: वेबसाइट आणि व्हॉट्सॲपवरील पीएमसी चॅटबॉट नागरिकांना सहजपणे माहिती मिळवून देतो. तसेच, व्हॉट्सॲपचा वापर नागरिकांना माहिती प्रसारित करण्यासाठी केला जातो. व्हॉट्सॲप चॅटबॉटचा वापर मिळकत कराची बिले आणि नोटिसा वितरीत करण्यासाठी देखील केला जातो. पीएमसीने आर्टिफिशियल इंटेलिजन्स (AI) चा वापर करत थकबाकीदार करदात्यांकडून मिळकत कर वसुलीसाठी व्हॉइस बॉट (voice bot) चा वापर सुरू करणार आहे. तक्रारींचे भाकित करणारे विश्लेषण (Predictive Analysis), सोशल मीडियावरील प्रतिक्रियांचे विश्लेषण (Sentiment Analysis) आणि इतर एआय उपक्रमांसाठी प्रतिष्ठित संस्थांसोबत भागीदारी करण्याची योजनाही आखली आहे.

या प्रकल्पांच्या यशस्वी अंमलबजावणीमुळे पीएमसी महाराष्ट्रातील ई-गव्हर्नन्स सुधारणांमध्ये एक अग्रणी बनली आहे. महानगरपालिका १५० दिवसांच्या कार्यक्रमातील प्रलंबित कामे पूर्ण करण्यासाठी आणि नागरिकांच्या हितासाठी तंत्रज्ञानाचा फायदा घेण्यासाठी कटिबद्ध आहे.

पुणे:-दिनांक २९ ऑगस्ट २०२५,

सत्ताधारी पक्षाला लाभ पोहचवण्यासाठी कशाप्रकारे महानगर पालिकेची प्रारूप प्रभाग रचना करण्यात आल्या आहेत, याचे उदाहरण पुणे महानगर पालिकेने प्रसिद्ध केलेल्या प्रारूप प्रभाग रचनेवरून दिसून आले आहे. आगामी पालिका निवडणुकीच्या पार्श्वभूमीवर प्रसिद्ध करण्यात आलेल्या या प्रारूप प्रभाग रचनेवर बहुजन समाज पक्षाचे प्रदेश महासचिव,पश्चिम महाराष्ट्र झोन मुख्य प्रभारी, माजी नगरसेवक डॉ.हुलगेश चलवादी यांनी आक्षेप नोंदवला आहे.

यासंदर्भात शुक्रवारी (ता.२९) डॉ.चलवादी यांनी बसप शिष्टमंडळाचे नेतृत्व करीत पालिकेच्या निवडणूक विभागाचे उपायुक्त वसंत काटकर यांना निवेदन सादर करीत हरकत नोंदवली. पक्षाचे जिल्हा महासचिव प्रविण वाकोडे, अनिल त्रिपाठी तसेच शिवाजी नगर विधानसभा मतदार संघाचे पदाधिकारी किशोर अडागळे यावेळी प्रामुख्याने उपस्थित होते.

पुणे मनपाच्या प्रारुपानूसार सर्वच प्रभागांच्या रचना नैसर्गिक व भौगोलिक परिस्थितीने पुर्णपणे चुकीची असल्याचा बसपाचा आक्षेप आहे. नव्याने तयार करण्यात आलेल्या प्रारूप प्रभाग रचनेनूसार प्रभागामध्ये मतदारांची संख्या ३० ते ४० हजारांनी कमी-जास्त दिसून येते. यानूसार प्रारूप प्रभागांची रचना कायद्या विरूद्ध आहे, असा युक्तिवाद डॉ.चलवादी यांनी केला आहे.

पुण्याच्या मध्यवर्ती भागात स्थित पेठांमध्ये प्रारुप प्रभागांची रचना छोटी करून संख्या वाढवण्यात आली आहे. एका विशिष्ट विचारधारेच्या सत्ताधारी पक्षाला फायदा करून देण्यासाठी ५० टक्क्यांपेक्षा अधिक प्रारुप प्रभाग त्यांच्या सोयीचे करण्यात आले आहे.ही रचना पुर्णत: मतदारांच्या हक्काचे हनन करणारी असून देशद्रोहासारखे आहे, असे डॉ.चलवादी म्हणाले.

उलटपक्षी मनपाच्या उपनगरातील गावांचे रचनेनुसार २ किंवा अधिक तुकडे करून गावाच्या विकासामध्ये फुट पाडण्याचा प्रयत्न प्रभाग रचनेच्या माध्यमातून होत असल्याचे निरीक्षण डॉ.चलवादी यांनी नोंदवले. चुकीच्या पद्धतीने प्रभागांची रचना करण्यात आली आहे. प्रारुप प्रभागाची नावे निश्चित करतांना गावाप्रमाणे आणि नैसर्गिक नियमाने करणे अपेक्षित आहे. पंरतु, प्रसिद्ध करण्यात आलेल्या प्रारूपात चुकीचे नामकरण करण्यात आले आहे. अनुसूचित जाती, अनुसूचित जमातीच्या सक्षम उमेदवारांना अडचणीचे ठरू शकतात, अशा पद्धतीने प्रारूप प्रभाग रचना चुकीच्या पद्धतीने तयार करण्यात आली असल्याचे डॉ.चलवादी म्हणाले.

पुणे हे विद्येचे माहेरघर आहे. सुशिक्षित, प्रामाणिक, कष्टकरी, मध्यमवर्गीय, आणि सर्व जातीधर्माचे नागरिक येथे गुण्यागोविंदाने नांदतात. सर्व नागरिकांचा सन्मान करीत देशाच्या संविधानाच्या अधिन राहून, घटनेला अभिप्रेत प्रभाग रचना करणे प्रशासनावर बंधनकारक आहे. अशात चुकीची प्रभाग रचना रद्द करीत योग्य प्रभाग रचना करण्याची मागणी डॉ.चलवादी यांनी केली.

शनिवार पेठ मेहुणपुरा सार्वजनिक गणेशोत्सव मंडळ  देखाव्याचे उद्घाटन
पुणे: एकाच देशातून एकाच वेळी बारा वास्तूंना हेरिटेजचा दर्जा मिळण्याची ही पहिलीच वेळ आहे. केंद्र सरकार आणि राज्य सरकारच्या प्रयत्नामुळे हे शक्य झाले आहे. महाराष्ट्रातील गड किल्ले हे केवळ शिवाजी महाराजांशी किंवा इतिहासाशी संबंधित आहेत असे नाही, तर महाराष्ट्र  भूमीची ते ओळख आहेत. म्हणून त्यांना हेरिटेज दर्जा मिळणे आपल्यासाठी अभिमानाची गोष्ट आहे, अशी भावना छत्रपती शिवाजी महाराजांचे वंशज आमदार शिवेंद्र राजे भोसले यांनी व्यक्त केली.

शनिवार पेठ मेहुणपुरा सार्वजनिक गणेशोत्सव मंडळ ट्रस्टच्यावतीने यंदाच्या गणेशोत्सवात युनेस्को वर्ल्ड हेरिटेज मध्ये समाविष्ट १२ किल्ल्यांची प्रतिकृती आणि त्यांचा इतिहास सांगणारी ध्वनी चित्रफीत असा देखावा सादर करण्यात आला आहे. या देखाव्याचे उद्घाटन शिवेंद्रसिंह राजे भोसले यांच्या हस्ते झाले. यावेळी माजी नगरसेविका गायत्री खडके, इतिहास अभ्यासक मोहन शेटे, मंडळाचे अध्यक्ष सचिन शिंदे, उपाध्यक्ष अनंत कावणकर, सचिव पराग ठाकूर, कार्याध्यक्ष कौस्तुभ गोखले, गिरीश सरदेशपांडे, महेश काटदरे यांसह पदाधिकारी व कार्यकर्ते उपस्थित होते.

पराग ठाकूर म्हणाले,  युनेस्को ने छत्रपती शिवाजी महाराजांच्या १२ किल्ल्यांना जागतिक वारसा स्थळ म्हणून नामांकित केले आहे.  त्यानिमित्त शनिवार पेठ मेहुणपुरा सार्वजनिक गणेशोत्सव मंडळ ट्रस्टच्यावतीने शिवजन्म ते शिवराज्याभिषेक असा प्रवास किल्ल्यांच्या माध्यमातून सांगण्यात येत आहे. रायगड स्मारक मंडळ, कात्रज शिवसृष्टी आणि नारळकर इन्स्टिट्यूट यांच्या सहकार्याने हा देखावा साकारण्यात आला आहे.

मोहन शेटे म्हणाले,  छत्रपती शिवाजी महाराज किती महान होते हे आपल्याला माहित आहे, परंतु जगाला त्याचा परिचय नव्हता. युनेस्कोच्या वर्ल्ड हेरिटेज साईटमध्ये समावेश झाल्यानंतर महाराजांचे कर्तृत्व जगाला कळले आहे. त्याचप्रमाणे शिवचरित्र सुद्धा जगभर पोहोचले पाहिजे. शिवाजी महाराजांची आठवण करून देणाऱ्या किल्ल्यांच्या प्रतिकृती मेहुणपुरा गणेशोत्सव मंडळात साकारण्यात आल्या आहेत. हे गड किल्ले जिवंत शाहीर आहेत.

पुणे- माजी खासदार संजय काकडे यांना वाढदिवसाच्या शुभेछ्या देण्यासाठी आज सकाळपासून त्यांच्या हजारो चाहत्यांनी तोबा गर्दी केली होती . काही सर्वपक्षीय माजी लोकप्रतिनिधी ,पदाधिकारी यांच्याहून अधिक गर्दी होती ती तरुणाईची नाव युवकांची … राजकारणापेक्षा अधिक समाजकारणाला महत्व दिलेल्या संजय काकडे यांना शुभेछ्या द्यायला इथे येणारे सर्व केक आणि पुष्पगुच्छ घेऊन येत होते .हिंदी सिनेसृष्टीतील ख्यातनाम अभिनेता धर्मेंद्र यांनी काकडे यांना व्हिडीओ कॉल करून शुभेछ्या दिल्या .

नारायण पेठ माती गणपती मंडळ ट्रस्ट : डॉ. रोहित टिळक यांच्या हस्ते देखाव्याचे उद्धाटन
पुणे: ‘गोंद्या आला रे आला’ हे सांकेतिक शब्द वापरुन दिनांक २२ जून १८९७ रोजी पुण्याच्या मातीने एक अभूतपूर्व क्रांतिकारी घटना अनुभवली. क्रांतिवीर चाफेकर बंधूंनी प्लेग आयुक्त रॅंडचा वध करून ब्रिटिश साम्राज्याच्या दडपशाहीला थेट आव्हान दिले.  आपल्या कृत्याचा शेवट फाशीमध्ये होईल, याची पूर्ण जाणीव असूनही त्यांनी स्वातंत्र्याच्या कार्यासाठी पुढे पाऊल टाकले. एवढेच नव्हे, तर यातील दोन भावंडांना बायका-मुलं असतानाही त्यांनी मातृभूमीच्या प्रेमासाठी आपल्या संसाराला व प्राणाला तिलांजली दिली. स्वातंत्र्यलढ्याला दिशा देणारी ही घटना पुन्हा जिवंत करण्याचे काम माती गणपतीच्या यंदाच्या देखाव्यात करण्यात आले आहे.

नारायण पेठ माती गणपती मंडळ ट्रस्टच्या वतीने यंदाच्या गणेशोत्सवात ‘गोंद्या आला रे आला’ हा सजीव देखावा सादर करण्यात येत आहे. देखाव्याचे उद्घाटन लोकमान्य टिळक यांचे खापर पणतू डॉ. रोहित टिळक यांच्या हस्ते झाले. प्रोग्रेसिव्ह एज्युकेशन सोसायटीच्या डॉ. निवेदिता एकबोटे, परेश हराळे, विशाल नांगरे, महेश हराळे, शुभम आदवडे, निखिल देशपांडे व मंडळाचे पदाधिकारी व  कार्यकर्ते उपस्थित होते. मारवा क्रिएशन यांनी देखाव्याची निर्मिती केली असून लेखन दिग्दर्शन राहुल गाजरे प्रज्ञा दंडवते यांचे आहे.

रोहित टिळक म्हणाले, माती गणपती मंडळ नेहमीच अतिशय चांगले उपक्रम राबवत असते. वर्षभर आयोजित शिबिरे आणि कोविड काळात केलेले कार्य हाच लोकमान्य टिळकांना अपेक्षित गणेशोत्सव आहे. अशा उपक्रमांतून सामाजिक बांधिलकी निर्माण होते. ‘गोंद्या आला रे आला’ या देखाव्यातून इतिहासाची ओळख तर होतेच, पण समाजात सामाजिक जाणीवही दृढ होते. आजच्या धावपळीच्या जीवनात आपण बलिदान विसरतो, तसे होऊ नये.

कौस्तुभ खाकुर्डीकर म्हणाले,  माती गणपती मंडळाचा उद्देश केवळ धार्मिक सण साजरा करण्यापुरता मर्यादित नसून सामाजिक, सांस्कृतिक आणि ऐतिहासिक जाणीवा जनमानसात रुजवणे हाही आहे. या देखाव्याद्वारे आम्ही चाफेकर बंधूंचे शौर्य, त्याग आणि देशभक्ती पुढच्या पिढीपर्यंत पोहोचवण्याचा प्रयत्न करत आहोत. ‘गणेशोत्सव हा लोकशिक्षणाचा उत्सव असावा’, ही लोकमान्य टिळकांची कल्पना होती, त्याच धर्तीवर आमचे उपक्रम राबवले जातात. या देखाव्याला नागरिकांचा उत्स्फूर्त प्रतिसाद लाभत आहे, असेही त्यांनी सांगितले.

उत्सवाचे १३२ वे वर्ष ;  हलत्या झोपाळ्यावर शारदा गणपती
पुणे : अखिल मंडई मंडळाच्या वतीने यंदाच्या गणेशोत्सवात ‘कृष्णकुंज’ ही आकर्षक सजावट साकारण्यात आली आहे. यावर्षी हलत्या झोपाळ्यावर शारदा गणपती विराजमान झाले आहेत. सजावटीतील श्री राधाकृष्णाच्या हस्तचित्रित मनमोहक कलाकृती गणेशभक्तांसाठी विशेष आकर्षण ठरत आहेत.

अखिल मंडई मंडळाचे उत्सवाचे यंदा १३२ वे वर्ष आहे.  हिरव्यागार जंगलाच्या सान्निध्यात ‘कृष्णकुंज’ ही भव्य सजावट मंडळातर्फे साकारण्यात आली आहे. तब्बल ९० फूट बाय ६० फूट आकारात  राजस्थानी शैलीतील ही सजावट असून प्रवेशद्वारावर झोपाळ्यावरील राधा-कृष्ण मूर्ती आहे. महिरप आणि मोरांच्या कलाकृती, कलमकारी शैलीतील श्रीकृष्णाच्या जीवनावर आधारित मोठी चित्रे भाविकांचे लक्ष वेधून घेत आहेत. याशिवाय ५ ते ६ मोठी झुंबरे सजावटीच्या सौंदर्यात भर घालत आहेत.

अण्णा थोरात म्हणाले, दर तीन वर्षांनी  शारदा गजानन झोपाळ्यावर विराजमान होतात. यावर्षी शारदा गजानन झोपाळ्यावर विराजमान झाले असून तो झोपाळा राजस्थानी शैलीने तसेच फुलांनी सजवण्यात आला आहे.  या सजावटीच्या निर्मितीसाठी तब्बल ४० कारागीर महिनाभर काम करत होतें संपूर्ण कलादिग्दर्शन सुप्रसिद्ध विशाल ताजनेकर यांचे आहे. उत्सव काळात मोरया गोसावी यज्ञ मंडपात विविध धार्मिक व सांस्कृतिक कार्यक्रमांचे आयोजन करण्यात येणार आहे. कीर्तन, प्रवचन, भजन, आणि सामूहिक आरती यांसह विविध कार्यक्रमाचे आयोजन करण्यात आले आहे. तरी गणेशभक्तांनी मोठ्या संख्येने उत्सवात सहभागी व्हावे, असे आवाहन मंडळातर्फे करण्यात आले आहे.

पुणे, दि. २९ ऑगस्ट २०२५ — पुणे शहराच्या गौरवशाली परंपरेचे प्रतीक असलेल्या आणि मानाच्या पहिल्या कसबा गणपतीच्या महाआरतीचा सोहळा महाराष्ट्र विधान परिषदेच्या उपसभापती डॉ. नीलम गोऱ्हे यांच्या हस्ते भक्तिभाव आणि उत्साहात पार पडला. हा कार्यक्रम डॉ. गोऱ्हे यांच्या पुढाकाराने तसेच सौ. सोनाली डांगे यांच्या ‘श्री शक्ती प्रतिष्ठान’च्या नियोजनातून आयोजित करण्यात आला होता.

या महाआरतीत शिवसेना महिला आघाडीच्या अनेक पदाधिकारी व कार्यकर्त्या उपस्थित होत्या. प्रमुख पाहुण्यांमध्ये सहसंपर्क प्रमुख सुदर्शना त्रिगुणाईत, माजी नगरसेविका प्रतिभा रवींद्र धंगेकर, उपशहरप्रमुख श्रद्धा शिंदे, सुरेखा कदम, अभिनेत्री मीरा सारंग तसेच कार्यकर्त्या साक्षी रायकर, जानवी घंटी, प्रीती मेरवाडे, पूनम कुरपे आणि लता लेंबे यांचा समावेश होता. सर्व भगिनींनी एकत्र येऊन श्रद्धा, एकोपा आणि सामाजिक बांधिलकीचा संदेश दिला.

समारंभात बोलताना डॉ. गोऱ्हे म्हणाल्या, “महिलांची सुरक्षितता ही केवळ सामाजिक जबाबदारी नसून आपले सामूहिक कर्तव्य आहे. विशेषतः विसर्जन मिरवणुकीदरम्यान महिला व बालकांच्या सुरक्षिततेसाठी अधिक सक्षम उपाययोजना आवश्यक आहेत.” तसेच कसबा गणपती मंडळाच्या विकासकामांसाठी शासनाने अधिक निधी उपलब्ध करून द्यावा, अशी मागणीही त्यांनी केली.

त्यांनी पुढे महाराष्ट्र सुजलाम-सुफलाम व्हावा आणि जनतेच्या सर्व समस्यांचे निराकरण व्हावे, अशी प्रार्थना केली. तसेच महायुती सरकारवर विश्वास व्यक्त करत त्यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे व उपमुख्यमंत्री अजित पवार, तसेच पंतप्रधान नरेंद्र मोदी आणि केंद्रीय गृहमंत्री अमित शहा यांच्या प्रयत्नांमुळे स्त्रीशक्तीला चालना मिळत असल्याचे नमूद केले.

“मी स्वतः २५ वर्षांपासून गणेश आरतीत सहभागी होत आहे. आजही याच श्रद्धेने आणि विश्वासाने सांगू इच्छिते की आपण सर्वजणी एकत्र राहून समाजातील प्रश्न सोडवण्याचा संकल्प पाळू. जय महाराष्ट्र!” अशा निर्धारपूर्ण शब्दांत त्यांनी आपले मनोगत व्यक्त केले.

या भव्य महाआरतीचा समारोप महिलांच्या एकजुटीचा, श्रद्धेचा आणि सामाजिक बांधिलकीचा ठसा उमटवत करण्यात आला.

▪️ स्वच्छ भारत मिशन अंतर्गत जिल्ह्यात जिल्हा परिषदेकडून कचरा प्रक्रियासाठी 10 प्रकल्प सुरु होणार

पुणे, दि. 29 ऑगस्ट : पुणे जिल्ह्यातील प्रमुख नद्या प्रदूषणमुक्त करण्यासाठी राबविण्यात येणाऱ्या प्रकल्पांना गती मिळाली असून, या प्रकल्पांच्या यशस्वी अंमलबजावणीसाठी केवळ मोठ्या नद्यांवरच नव्हे, तर त्यात मिळणाऱ्या छोट्या नदी-नाल्यांच्या पाण्यावर देखील प्रक्रिया करण्याची गरज आहे. यासाठी लवकरच पुणे महानगरपालिका, पिंपरी चिंचवड महानगरपालिका, पीएमआरडीए व जिल्हा परिषद यांच्या संयुक्त बैठकीचे आयोजन केले जाणार असल्याची माहिती केंद्रीय नागरी विमान वाहतूक राज्यमंत्री मुरलीधर मोहोळ यांनी दिली.

आज जिल्हाधिकारी कार्यालयात आयोजित जिल्हा विकास समन्वय व सनियंत्रण समिती (दिशा) आढावा बैठकीत ते बोलत होते.
या बैठकीत नगरविकास व सामाजिक न्याय विभागाच्या राज्यमंत्री श्रीमती माधुरी मिसाळ, खासदार श्री. श्रीरंग बारणे, आमदार बापूसाहेब पठारे, आमदार बाबाजी काळे, जिल्हाधिकारी जितेंद्र डुडी, पिंपरी चिंचवड महानगरपालिका आयुक्त शेखरसिंह, जिल्हा परिषदेचे मुख्य कार्यकारी अधिकारी गजानन पाटील तसेच विविध विभागांचे प्रमुख अधिकारी उपस्थित होते.
यावेळी मंत्री श्री. मोहोळ म्हणाले की, पुणे जिल्हा हा औद्योगिक, शैक्षणिक तसेच माहिती-तंत्रज्ञान क्षेत्रात देशात अग्रस्थानी असून जलप्रदूषणाचा प्रश्न गंभीर बनत चालला आहे. ग्रामीण व शहरी भागातील गटार व औद्योगिक सांडपाणी थेट नद्यांमध्ये मिसळल्याने पाणी प्रदूषण वाढले आहे. यावर नियंत्रण आणण्यासाठी केंद्र आणि राज्य सरकारच्या माध्यमातून प्रकल्प उभारले जात आहेत. परंतु, फक्त प्रमुख नद्यांवरच प्रकल्प उभारून उपयोग होणार नाही, तर उपनद्या, नाले व गटार पाण्यावरही शास्त्रोक्त पद्धतीने प्रक्रिया होणे अत्यावश्यक आहे. यासाठी सर्व संबंधित स्थानिक स्वराज्य संस्था व नियोजन प्राधिकरणांनी उत्तम समन्वयासाठी प्रयत्न करावेत.
स्वच्छ भारत मिशन अंतर्गत पुणे जिल्ह्यात जिल्हा परिषदेकडून 10 नवे प्रकल्प राबविण्यात येणार आहेत. यामुळे कचरा व्यवस्थापन, मलनिस्सारण व स्वच्छता उपक्रमांना चालना मिळून पर्यावरण संतुलन साधण्यास मदत होणार आहे.
पुणे शहरातील रस्त्यावरील वाहतुकीचा ताण कमी करण्यासाठी पुणे मेट्रोचा वाटा वाढत असून जुलै मध्ये एक लाख 92 हजार प्रवासी तर ऑगस्ट मध्ये हा आकडा वाढून 2 लाख 13 हजार प्रवासी असा झाल्याचे पुणे मेट्रो कडून सांगण्यात आले. पुढचा टप्पा दोनचे प्रस्ताव वेगवेगळ्या टप्यावर आहेत. त्याची तांत्रिक प्रक्रिया पूर्ण होताच त्याचे काम सुरु होईल. त्या कामाला अधिक गती देण्याचे निर्देश यावेळी मंत्री श्री. मोहोळ यांनी दिले.
पुणे विमानतळाच्या जुन्या टर्मीनलच्या नूतनीकरणाचे काम डिसेंबर पर्यंत पूर्ण होणार असल्याचे जिल्हाधिकारी जितेंद्र डुडी यांनी सांगितले. तसेच नव्या टर्मीनलच्या जागेच्या अधिग्रहणाचे काम सुरु करण्यात आले असून मार्किंगचे काम पूर्ण झाल्याची माहितीही त्यांनी यावेळी दिली.
या बैठकीत जिल्ह्यात सुरू असलेल्या रस्ते विकास, पाणीपुरवठा, स्वच्छता, शिक्षण, आरोग्य, सामाजिक न्याय व कल्याण विभागाच्या योजनांचा सविस्तर आढावा घेण्यात आला. विशेषतः केंद्र पुरस्कृत योजनांच्या अंमलबजावणीत गती आणण्यासाठी लोकप्रतिनिधी व प्रशासन यांच्यातील समन्वय वाढविण्याचे निर्देश बैठकीतून देण्यात आले.
जिल्ह्यातील नदी स्वच्छता, शाश्वत कचरा व्यवस्थापन, हरित ऊर्जा निर्मिती, ग्रामीण विकास आणि शहरी भागातील मूलभूत सुविधा या सर्वच क्षेत्रांमध्ये कार्यक्षम व पारदर्शक अंमलबजावणी होणे हीच जिल्हा विकास समितीची प्राथमिकता असल्याचेही यावेळी सांगण्यात आले.

पिंपरी (दि.२९) : पुणे महानगर प्रदेश विकास प्राधिकरणाच्या आकुर्डी मुख्यालयात दरवर्षीप्रमाणे यंदाही गणेशोत्सव, भक्तीभावासह विविध सांस्कृतिक कार्यक्रमाच्या माध्यमातून पर्यावरणपूरक पद्धतीने साजरा करण्यात येत आहे. गणेशोत्सवासाठी पर्यावरणपूरक मूर्ती व सजावटीसाठी नैसर्गिक फुलांना प्राधान्य देण्यात आले आहे. गुरुवारी ज्ञानप्रबोधिनीने पारंपरिक बर्ची नृत्य तसेच ढोल-ताश्याचे प्रात्यक्षिक सादर करून गणेशोत्सवाच्या उत्साहात भर घातली.

या गणेशोत्सवनिमित्त तुळजा भवानी मर्दानी खेळ प्रशिक्षण व सांस्कृतिक सेवा संस्थेच्या वतीने एकदिवसीय शिवकालीन शस्त्रे, चिलखते, अमुक्त आणि मुक्त शस्त्रे यांचे ऐतिहासिक प्रदर्शन पीएमआरडीएमध्ये गुरुवारी आयोजित करण्यात आले होते. या प्रसंगी संस्थेचे रवींद्र जगदाळे यांनी उपस्थित अधिकारी व कर्मचारी यांना मार्गदर्शन करून शिवकालीन वारसा, युद्धकला आणि शस्त्रांची ओळख करून दिली. यावेळी महानगर आयुक्त डॉ. योगेश म्हसे यांनी प्रदर्शनास भेट देऊन शस्त्रसंग्रहाचे निरीक्षण केले.

युनेस्कोने जागतिक वारसा स्थळ यादीत १२ गड किल्ल्यांचा समावेश केला असून त्यातील ११ किल्ले हे महाराष्ट्रातील आहेत. याबाबत जनजागृती व्हावी, या उद्देशाने पीएमआरडीएमध्ये गणेशोत्सवानिमित्त फलकाद्वारे संबंधित गड किल्ल्यांची सविस्तर माहिती देण्यात आली आहे. गुरुवारी महानगर आयुक्त डॉ. योगेश म्हसे यांच्या हस्ते गणरायाची आरती करण्यात आली. यावेळी प्रशासन विभागाच्या सह आयुक्त पूनम मेहता, विकास परवानगी व नियोजन विभागाचे संचालक अविनाश पाटील, मुख्य अभियंता रिनाज पठाण, मुख्य वित्तीय नियंत्रक पद्मश्री तळदेकर, मुख्य अग्निशमन अधिकारी देवेंद्र पोटफोडे यांच्यासह इतर अधिकारी व कर्मचारी उपस्थित होते.