अखिल मंडई मंडळाच्या वतीने स्वच्छता कर्मचाऱ्यांचा ‘कृतज्ञता सन्मान सोहळा’
पुणे : गणपती विसर्जनाच्या उत्साही सोहळ्यानंतर जी स्वच्छता आपल्याला दिसते ती आपोआप होत नाही. त्याच्या मागे सफाई कर्मचाऱ्यांची  रात्रंदिवस केलेली मेहनत असते. पावसामुळे झालेली घाण, दुर्गंधी, कचरा यांना तोंड देत पहाटेपासून त्यांचे काम सुरू होते. त्यांच्याकडून होणारे शहर स्वच्छ ठेवण्याचे काम खरोखरच कौतुकास्पद आहे. त्यांच्या श्रमाचा मान राखून सफाई कर्मचाऱ्यांचा आपण आदर करायला हवा, शहराचे ते खरे हिरो आहेत, असे मत परिमंडळ एकचे पोलीस उपायुक्त कृषिकेश रावले यांनी व्यक्त केले.

अखिल मंडई मंडळाच्यावतीने गणेशोत्सवात आणि विसर्जन मिरवणूकीनंतर शहराची स्वच्छता करणाऱ्या सफाई कर्मचाऱ्यांच्या कृतज्ञता सन्मान सोहळ्याचे आयोजन करण्यात आले होते. यावेळी गणेशोत्सवातील सजीव देखावा क्षेत्रातील कलाकारांचा सन्मान देखील करण्यात आला.  लोकमान्य सोसायटीचे संस्थापक किरण ठाकूर, विभागीय व्यवस्थापक सुशील जाधव, अखिल मंडई मंडळाचे अध्यक्ष अण्णा थोरात, सचिव विश्वास भोर, देविदास बहिरट, सामाजिक कार्यकर्ते आनंद सराफ, राजेश कराळे, तुषार शिंदे, सुरज थोरात, विकी खन्ना, नारायण चांदणे यावेळी उपस्थित होते. भेटवस्तू, मानाचे उपरणे, मिठाईचा डबा असे सन्मानाचे स्वरूप होते.

किरण ठाकूर म्हणाले, पुण्याचा गणेशोत्सव जगप्रसिद्ध आहे. सण हे केवळ उत्साहाचे नव्हे तर राष्ट्रभक्ती जागवण्याचे माध्यम आहेत. हिंदुस्तान विश्वरूप बनण्यासाठी प्रत्येकाने प्रयत्न करणे आवश्यक आहे. आज दुर्दैवाने सुशिक्षित लोकसुद्धा रस्त्यावर कचरा करतात. स्वच्छता ही प्रत्येकाची जबाबदारी आहे, असेही त्यांनी सांगितले.

अण्णा थोरात म्हणाले, विसर्जन मिरवणुकीनंतर शहरात कचऱ्याचे साम्राज्य दिसते. रस्त्यांवर फुलांचे हार, प्लास्टिक व खाण्याची पाकिटे, रिकाम्या बाटल्या पडलेले दिसतात मात्र, स्वच्छता कर्मचाऱ्यांच्या कष्टामुळे काही तासांतच पुण्याचे रस्ते पुन्हा चकचकीत होतात. या कर्मवीरांचा सन्मान राखणे आणि त्यांचे मनापासून आभार मानणे हे प्रत्येक नागरिकाचे कर्तव्य आहे. आनंद सराफ यांनी सूत्रसंचालन केले.

पुणे-
गणेश विसर्जन मिरवणुकी दरम्यान दोन ढोल ताशा पथक यांच्याकडून पत्रकारांसोबत गैरवर्तन झाल्याचा प्रकार घडला होता. या पार्श्वभूमीवर पुणे श्रमिक पत्रकार संघाच्या शिष्टमंडळाने पुणे पोलीस आयुक्त अमितेश कुमार यांची सोमवारी भेट घेतली. यावेळी पत्रकार यांच्या वार्तांकनाबाबत विविध विषयांवर सविस्तर चर्चा करण्यात आली. पुणे पोलीस आयुक्त यांनी पत्रकारांना वार्तांकन योग्य प्रकारे करता येईल तसेच पत्रकारांची सुरक्षा देखील राहील याची पुरेशी काळजी आगामी काळात घेऊ असे आश्वासन शिष्टमंडळास त्यांनी दिले. यावेळी पुणे श्रमिक पत्रकार संघाचे अध्यक्ष ब्रिजमोहन पाटील, सरचिटणीस मंगेश फल्ले, खजिनदार दिलीप तायडे यांच्यासह मोठ्या संख्येने पत्रकार उपस्थित होते.

पोलीस आयुक्त अमितेश कुमार यांनी सांगितले की, विसर्जन मिरवणुकी दरम्यान ढोल ताशा पथक यांचे नियमन करण्यासाठी आगामी काळात विशिष्ट कार्यपद्धती (एसओपी) तयार केली जाईल. पथकातील सदस्य संख्या मर्यादित राहावी यासाठी ढोल ताशा पथक संघटना आणि गणेश मंडळे यांना देखील सूचना दिल्या जातील. महिला पत्रकाराचा विनयभंग झाल्याप्रकरणी गुन्हा दाखल करण्यात आला असून पुढील कारवाई देखील तात्काळ करू असे आश्वासन शिष्टमंडळास त्यांनी दिले. पत्रकारांना वार्तांकन करण्यासाठी जे पोलीस पासेस दिलेले असतात त्यानुसार, नियमित वार्तांकन करण्याची मुभा देखील असते याची कल्पना संबंधितांना दिली जाईल असे त्यांनी सांगितले. भविष्यात योग्य प्रकारे वार्तांकन पत्रकारांना करता यावे यादृष्टीने कार्यक्रमांपूर्वीच योग्य प्रकारे चर्चा विनिमय करून आवश्यक त्या उपाययोजना राबवल्या जातील असे देखील त्यांनी सांगितले.

आडकर फौंडेशनतर्फे डॉ. संजय चोरडिया यांचा ॲड. भास्करराव आव्हाड स्मृती पुरस्काराने गौरव
पुणे : सर्वांगिण विकासासाठी समाजातील प्रत्येक घटकाने नैतिकता जपणे आवश्यक आहे. कायद्याचे राज्य निर्माण करण्यासाठी प्रत्येकापर्यंत कायद्याचे ज्ञान पोहोचले पाहिजे. ॲड. भास्करराव आव्हाड यांच्याप्रमाणे सामाजिकतेचा आग्रह धरत ज्ञान देण्याची वृत्ती असणाऱ्या प्रकाशवाटेची आज समाजाला गरज आहे, असे प्रतिपादन मराठी साहित्य संमेलनाचे माजी अध्यक्ष, प्रसिद्ध कथाकार भारत सासणे यांनी केले. सर्वांगिण विकास साधताना संवेदनशीलता आणि बंधुता जपत दर्जेदार शिक्षण देण्याचे कार्य डॉ. संजय चोरडिया करीत असल्याचे गौरवोद्गारही त्यांनी काढले.
आडकर फौंडेशनतर्फे ॲड. भास्करराव आव्हाड स्मृती पुरस्काराने शिक्षणतज्ज्ञ, सूर्यदत्ता इन्स्टिट्यूटचे संस्थापक अध्यक्ष डॉ. संजय चोरडिया यांचा सोमवारी (दि. 8) गौरव करण्यात आला. पुरस्कार वितरण भारत सासणे यांच्या हस्ते यांच्या हस्ते झाले. त्या वेळी ते बोलत होते. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते. महाराष्ट्र आर्थिक विकास मंडळाचे उपाध्यक्ष सचिन ईटकर, डॉ. सुषमा चोरडिया महाराष्ट्र व गोवा बार कौन्सिलचे सदस्य ॲड. अविनाश आव्हाड, आडकर फौंडेशनचे अध्यक्ष ॲड. प्रमोद आडकर मंचावर होते. सन्मानपत्र, शाल, श्रीफळ असे पुरस्काराचे स्वरूप होते.
भारत सासणे पुढे म्हणाले, आजच्या सामाजिक नैराश्येच्या वातावरणात आपण सर्वच पातळींवर विभाजित होत आहोत. अशा परिस्थितीत सुसंवाद, शांतता आणि विश्वासाचे वातावरण निर्माण करण्यासाठी दर्जेदार, आरोग्यपूर्ण व पर्यावरणपूरक शैक्षणिक वातावरण निर्माण झाले पाहिजे. शालेय जीवनापासूनच विद्यार्थ्यांना संविधानातील तरतुदी, मुलभूत अधिकार याविषयी ज्ञान मिळणे आवश्यक आहे.
सत्काराला उत्तर देताना डॉ. संजय चोरडिया म्हणाले, कायद्याचे देव समजल्या जाणाऱ्या व्यक्तीच्या नावे मिळणारा पुरस्कार माझ्यासाठी मोलाचा आहे. ॲड. आव्हाड यांनी समाजासाठी अखंडितपणे कार्य केले. ते आदर्श शिक्षकही होते. त्यांच्या संकल्पनेनुसार मूल्याधारित शिक्षण देण्याचा प्रयत्न केला जात आहे. ॲड. आव्हाड हे दूरदृष्टी असलेले व्यक्तिमत्त्व होते. त्यांचा पुरस्काररूपी आशीर्वाद मी आनंदाने स्वीकारत आहे.
सचिन ईटकर म्हणाले, ॲड. आव्हाड हे वैचारिक दिशा देणारे प्रेरणादायी व्यक्तिमत्त्व होते. त्यांचा वैचारिक वारसा पुढे नेणाऱ्या संवेदनशील डॉ. चोरडिया यांना पुरस्कार देण्यात आला ही अभिनंदनीय बाब आहे. ॲड. आडकर यांनी आपले गुरू ॲड. आव्हाड यांचा कृतज्ञतेचा वारसा जपत गुरूंच्या नावे पुरस्कार सुरू केला याचा विशेष आनंद आहे.
ॲड. अविनाश आव्हाड म्हणाले, माझे वडिल व ॲड. आडकर यांचे नाते कौटुंबिक होते. वडिलांमधील अनेक पैलू मला त्यांच्यामुळे समजले. त्यांच्या स्मृती जतन करण्यासाठी ॲड. आडकर यांनी वडिलांच्या नावे पुरस्कार सुरू करून आदर्श निर्माण केला आहे.
प्रास्ताविकात ॲड. प्रमोद आडकर यांनी पुरस्काराविषयी माहिती दिली. ॲड. आव्हाड हे फक्त कायद्याच्या क्षेत्रातच नव्हे तर समाजकारण, साहित्य, काव्य अशा अनेकविध क्षेत्रात कार्यरत होते. त्यांच्या स्मृती जागृत ठेवण्यासाठी पुरस्काराचे वितरण केले जात आहे.
परिचय राजकुमार सुराणा यांनी करून दिला तर मानपत्राचे वाचन वैजयंती आपटे यांनी केले. सूत्रसंचालन निरुपमा महाजन यांचे होते.

पुणे/पिंपरी-चिंचवड(प्रतिनिधी), : पिंपरी-चिंचवड भाजपा चार्टर्ड अकाउंटंट्स सेल (BJPCA Cell) तर्फे केंद्रीय वित्तमंत्री निर्मला सीतारामन यांना निवेदन देऊन आयकर विवरणपत्रे (ITR) आणि टॅक्स ऑडिट रिपोर्ट (TAR) सादर करण्याच्या अंतिम तारखेत वाढ करण्याची मागणी करण्यात आली आहे. वाढत्या करदात्यांची संख्या, पोर्टलवरील तांत्रिक अडचणी, तसेच पावसामुळे विस्कळीत झालेले कामकाज या पार्श्वभूमीवर ही मुदतवाढ अत्यावश्यक असल्याचे निवेदनात नमूद करण्यात आले आहे.

पुणे विभागात 2018-19 मध्ये सुमारे 75 लाख करदाते होते. सततच्या वाढीमुळे 2024-25 या आर्थिक वर्षात हा आकडा दीड कोटींवर पोहोचल्याचा अंदाज आहे. इतक्या प्रचंड संख्येतील करदात्यांचे काम सांभाळण्यासाठी चार्टर्ड अकाउंटंट्सना अधिक वेळ मिळणे गरजेचे असल्याचे सनदी लेखापाल बबन डांगले यांनी सांगितले.

सध्या नॉन-ऑडिट आयटीआर दाखल करण्याची अंतिम तारीख 15 सप्टेंबर 2025 आहे. टॅक्स ऑडिट रिपोर्ट सादर करण्यासाठी 30 सप्टेंबर 2025 ही मुदत ठरविण्यात आली असून ऑडिट प्रकरणांतील आयटीआर 31 ऑक्टोबर 2025 पर्यंत भरायचे आहेत. मात्र, प्रत्यक्षात या तारखा पूर्ण करणे कर व्यावसायिकांसाठी कठीण ठरत असल्याचे भाजपा सनदी लेखापाल आघाडीचे (सीए सेल) पिंपरी-चिंचवडचे शहराध्यक्ष बबन डांगले यांनी स्पष्ट केले.

भाजपा CA सेलचे सचिव शैलेश बोरे म्हणाले की, आयटीआर युटिलिटीज आणि टॅक्स ऑडिट स्कीमा उशिरा प्रसिद्ध झाल्याने कामात अडथळे निर्माण झाले. पोर्टलवरील तांत्रिक त्रुटींमुळे लॉगिन फेल्युअर, अपलोड एरर्स, ई-व्हेरिफिकेशनमधील अडचणी कायम आहेत. सप्टेंबर-ऑक्टोबर महिन्यांत येणारे सण-उत्सव आणि अलीकडील अतिवृष्टीमुळे उपलब्ध कामाचे दिवस मोठ्या प्रमाणात कमी झाले आहेत. याशिवाय जीएसटी, एमसीए यांसारख्या इतर अनुपालनांचा वाढलेला भारही मोठा अडथळा ठरत आहे.

या सर्व परिस्थितीचा विचार करून नॉन-ऑडिट ITR दाखल करण्याची अंतिम तारीख 15 सप्टेंबरवरून 30 सप्टेंबरपर्यंत, टॅक्स ऑडिट रिपोर्टची तारीख 30 सप्टेंबरवरून 30 नोव्हेंबरपर्यंत आणि ऑडिट प्रकरणांतील आयटीआरची अंतिम मुदत 31 ऑक्टोबरवरून 31 डिसेंबरपर्यंत वाढविण्याची मागणी करण्यात आली आहे. प्रस्तावित मुदतवाढ मिळाल्यास करदाते आणि करसल्लागार दोघांनाही दिलासा मिळेल. तसेच कर अहवालांची अचूकता आणि दर्जाही सुनिश्चित होईल. या मागणीवर वित्त मंत्रालयाने तातडीने सकारात्मक निर्णय घ्यावा, अशी अपेक्षा व्यक्त करण्यात आली आहे.

पुणे : सालाबाद प्रमाणे यंदाच्या वर्षीही हजरत महंमद पैगंबर यांची जयंती जगभराप्रमाणे पुणे शहरांमध्ये देखील मोठ्या उत्साहाने  साजरी करण्यात आली . यंदाची वर्ष हे १५०० वे जयंती वर्ष असल्यामुळे यावर्षी अधिक उत्साहाने व धार्मिक प्रथा परंपरांचे पालन करत मुस्लिम बांधव मोठ्या संख्येने सहभागी झाले होते. 

सिरत कमिटीच्या वतिने आयोजित केलेल्या मुख्य मिरवणुकीची सुरुवात नाना पेठेतील मन्नूशाह मशिदीपासून झाली. यावेळी सह पोलिस आयुक्त रंजन कुमार , पोलिस उपायुक्त विवेक मासाळ , मौलाना ज़मीरुद्दिन, मौलाना निजामुद्दीन फखरुद्दीन, मौलाना खालिद निजामी, मौलाना गुलाम अहमद खान , रफीउद्दिन शेख ,माजी आमदार मोहन  जोशी, रिपब्लिकन सोशालिस्ट पाक्षाचे राहुल डंबाळे, राष्ट्रवादी कॉंग्रेसचे प्रशांत जगताप , माजी नगरसेवक अविनाश बागवे, डॉ. सिध्दार्थ धेंडे, सिराज बागवान, जावेद खान, आबिद सय्यद , जावेद शेख , हाजी नजीर तांबोळी , आसिफ शेख , सूफियान कुरैशी आदि मान्यवर उपस्थित होते. 

यावेळी सह पोलिस आयुक्त रंजन कुमार म्हणाले, पुण्यातील सिरत कमिटी पदाधिकारी अत्यंत महत्वपूर्ण कामगिरी करत सामाजिक सलोखा जोपासण्याचे काम करत आहेत. गणेशोत्सवाच्या पार्श्वभूमीवर पैगंबर जयंती विसर्जन मिरवणूक संपल्यानंतर साजरी करण्याचा निर्णय कौतुकास्पद असल्याचे त्यांनी नमूद केले.

संत कबीर चौक, एडी कॅम्प चौक, भारत चित्रपटगृह, पदमजी पोलिस चौकी, निशांत चित्रपटगृह, भगवानदास चाळ, चुडामण तालीम चौक, मुक्तीफौज चौक, कुरेशी मशिद, जान महंमद रस्ता, बाबाजान चौक, चारबावडी चौक, छत्रपती शिवाजी महाराज मार्केट, सेंट्रल स्ट्रीट, भोपळे चौक, पूलगेट चौक, महात्मा गांधी रस्ता, महंमद रफी चौक, कोहिनूर चौक, महावीर चौक, सरबतवाला चौक, क्वार्टर गेट चौक, संत कबीर चौक, नाना चावडी चौक, अल्पना चित्रपटगृह, हमजेखान चौक, महाराणा प्रतापसिंह रस्ता, गोविंद विंद हलवाई चौक, सुभानशहा दर्गा चौक या मार्गांनी मिरवणूक निघून शुक्रवार पेठेतील सिटी जामा चौक येथे समाप्त झाली. 

यावेळी जवळपास सर्च प्रमुख चौकांत विविध पक्ष संघटना व स्वयंसेवी संस्थांच्या वतिने मिरवणुकीचे सावागत करण्यात आले. डि जे विरहीत हि मिरवणुक निघाल्याने नागरिकांनी याचे विशेष कौतुक केले.

दरम्यानपैगंबर जयंतीचे १५०० वे वर्ष लक्षात घेवुन सिरत कमिटीच्या वतिने शहरातील विविध भागात वरिषभर प्रबोधनात्मक कार्यक्रम केले जाणार असल्याचे सिरत कमिटीचे सिराज बागवान व जावेद शेख यांनी सांगितले.

पुणे- गणपती विसर्जन मिरवणुकी दरम्यान गणेश भक्तांचे खिशातील मोबाईल फोन गर्दीचा फायदा घेवुन चोरी करणा-या दोन भुरट्याना पोलिसांनी शिताफिने अटक करुन,त्यांच्याकडून १३ वेग-वेगळ्या कंपनीचे महागडे फोन जप्त केले ज्यांची किंमत सुमारे पावणेदोन लाकाहाच्या आसपास आहे.

पोलिसांनी सांगितले कि,’दिनांक ०६/०९/२०२५ रोजी फरासखाना पोलीस स्टेशन हद्दीत रोजी पुणे शहरामधील मध्यवर्ती भाग बेलबाग चौक, लक्ष्मीरोड, बुधवार चौक येथे गणेश विसर्जन मिरवणुक बधण्यासाठी मोठ्या प्रमाणात भाविक येत असतात. त्यादरम्यान दिनांक ०७/०९/२०२५ रोजी रात्रौ ०२.३० ते ०३.३० वा. चे सुमारास फिर्यादी यांचे व त्यांचे दोन मित्र यांचे खिशातील मोबाईल फोन अज्ञात इसमाने चोरी केल्याबाबत फरासखाना पोलीस स्टेशन मध्ये दाखल होताच फरासखाना पोलीस स्टेशन येथील प्रभारी प्रशांत भस्मे यांनी तपास पथकातील अधिकारी वैभव गायकवाड व अरविंद शिंदे तसेच तपास पथकातील पोलीस अमंलदार यांना दाखल गुन्हयातील अज्ञात आरोपीचा शोध घेणे बाबत मार्गदर्शन व महत्वाच्या सुचना दिल्यानंतर तपास अधिकारी महेबुब मोकाशी व तपापथकातील पोलीस अमंलदार तानाजी नांगरे, नितीन तेलंगे, मनिषा पुकाळे, नितीन जाधव, गजानन सोनुने, महेश पवार व चेतन होळकर यांचेसह अज्ञात आरोपीचा शोध घेत असतांना तपास पथकातील पोलीस अमंलदार तानाजी नांगरे व गजानन सोनुने यांचे गोपनीय बातमी वरुन, दिनांक ०७/०९/२०२५ रोजी मोठ्या प्रमाणात गर्दीतुन शिताफीने पासोड्या विठोबा मंदीराजवळ पुणे येथुन तपास पथकातील पोलीस स्टाफचे मदतीने अलीम मुस्ताक शेख वय २६ वर्षे, रा. गल्ली नं. ६ समोर, अमिन किराणा दुकानाजवळ, मालेगांव जिल्हा नाशिक , अत्तर अहमद एजाज अहमद वय २५ वर्षे, रा. मुस्लीम नगर, बी-गल्ली नं. ५. सर्व्हे नं. १५९ प्लॉट नं. १६ बडे कब्रस्थान जवळ, मालेगाव जिल्हा नाशिक यांना ताब्यात घेवुन, त्यांना दाखल गुन्हयात अटक करुन, त्यांचे ताब्यातुन एकुण १३ नग वेग-वेगळ्या कंपनीचे महागडे फोन जप्त करुन, असा सर्व मिळुन १,७८,०००/- रु किमंतीचा मुद्देमाल हस्तगत करण्यात तपास पथकाला यश आले आहे. दाखल गुन्हयाचा तपास सहा. पोलीस उप-निरीक्षक महेबुब मोकाशी, हे करीत आहे.
सदरची कामगिरी अपर पोलीस आयुक्त पश्चिम प्रादेशिक विभाग राजेश बनसोडे, पोलीस उप-आयुक्त, परि-१ कृषिकेश रावले, सहा. पो. आयुक्त अनुजा देशमाने यांचे मार्गदर्शनाखाली वरिष्ठ पोलीस निरीक्षक प्रशांत भस्मे, पो.नि. (गुन्हे) उत्तम नामवाडे, पो.नि. (गुन्हे) अजित जाधव, स.पो.नि. वैभव गायकवाड, अरविंद शिंदे, पोलीस उप-निरीक्षक, सहा. पोलीस-उप निरीक्षक महेबुब मोकाशी, कृष्णा निढाळकर तसेच पोलीस अमंलदार तानाजी नांगरे, नितीन तेलंगे, नितीन जाधव, गजानन सोनुने, महेश पवार, चेतन होळकर, महेश राठोड, प्रविण पासलकर, विशाल शिदे, प्रशांत पालांडे, सुमित खुट्टे, शशीकांत ननावरे, वशिम शेख, म.पो. अंमलदार मनिषा पुकाळे यांच्या पथकाने केलेली आहे.