बारामती : राष्ट्रवादी काँग्रेसचे अध्यक्ष शरद पवार आणि त्यांच्या कुटुंबातील इतर व्यक्तींकडून बारामती येथे साजरा केला जाणारा दिवाळी पाडवा वैशिष्ट्यपूर्ण असतो. यानिमित्ताने पवार यांचे राज्यभरातील समर्थक त्यांना दिवाळीच्या शुभेच्छा देण्यासाठी बारामती येथील गोविंद बागेतील निवासस्थानी मोठी गर्दी करतात. आजही या ठिकाणी आपल्या आवडत्या नेत्याला शुभेच्छा देण्यासाठी कार्यकर्त्यांची रांग लागली आहे.दरम्यान, ‘पवारसाहेबांनी लोकांचं हे प्रेम कमावलं आहे. राज्यभरातील कार्यकर्ते आज साहेब, दादा आणि ताईंना भेटण्यासाठी आले असून त्यांच्यामध्ये मोठा उत्साह आहे. हाच उत्साह आम्हाला काम करण्यासाठी प्रेरणा देत असतो,’ अशी प्रतिक्रिया यावेळी आमदार रोहित पवार यांनी दिली.
दिवाळी पाडव्यानिमित्त बारामती शहरातील गोविंद बाग या निवासस्थानी राष्ट्रवादीचे सर्वेसर्वा शरद पवार, विधानसभेचे विरोधी पक्षनेते अजित पवार, खासदार सुप्रिया सुळे, आमदार रोहित पवार यांच्यासह सर्व पवार कुटुंबीय नागरिकांच्या भेटीसाठी उपस्थित आहेत. राज्याच्या आणि देशाच्या राजकारणात आपला वेगळा ठसा उमटवणाऱ्या नेत्याला जवळून पाहण्याची व त्यांच्याशी हस्तांदोलन करण्याची संधी म्हणून राष्ट्रवादीचे कार्यकर्ते आज गोविंद बागेत दाखल झाले असून शरद पवार यांच्यासह पवार कुटुंबातील विविध सदस्यांना ते भेटत आहेत.
