बॉलीवूड सुपरस्टार आणि महेश मांजरेकरांचा खास दोस्त सलमान खानने आपल्या ट्वीटर अकाउंट वरून ‘FU’ चे ऑफिशिअल पोस्टर ट्वीट केले आणि बघता बघता आकाश ठोसरचा हा नवीन मेकओव्हर इंटरनेटवर चांगलाच व्हायरल झाला.
सैराट मध्ये चॉकलेटबॉय परश्या साकारल्यानंतर आकाश ठोसर आता महेश मांजरेकर दिग्दर्शित ‘FU’ म्हणजेच फ्रेंडशिप अनलिमिटेड या सिनेमामध्ये रॉकिंग आणि ‘दोस्तीसाठी काय पण’ करायला तयार असणाऱ्या शहरी कॉलेजगोइंग युवकाची भूमिका करण्यास सज्ज झाला आहे. पोस्टरमधील पूर्णपणे वेगळ्या आणि रॉकस्टार लूकमुळे आकाश ठोसर आता रॉकिंग अंदाजात आणि दमदार भूमिकेसह चाहत्यांच्या भेटीला येणार आहे याची खात्री पटते.
सैराटनंतर आकाश ठोसर याचा हा पहिलाच चित्रपट असून त्याचे हे नवीन पोस्टर सोशल मिडियावर खूपच प्रसिद्ध झाले आहे. आणि या स्टायलीश लूकमुळे आकाश ठोसरची तरुणींमध्ये क्रेझ निर्माण झाली आहे.
महेश मांजरेकरांचा सिनेमा म्हणजे सिनेमाचा आशय, विषय आणि सादरीकरण या सगळ्यातच भव्यता आढळून येते. वि. वा. शिरवाडकरांच्या ‘नटसम्राट’ चे शिवधनुष्य त्याच भव्यतेसह यशस्वीपणे पेलल्यानंतर मांजरेकर आता तरुणाईला भुरळ पाडणारा सिनेमा घेऊन येत आहेत याची खात्री ‘FU’ या सिनेमाचे पोस्टर बघितल्यावर पटते.
ताज्या दमाची स्टायलिश स्टारकास्ट असणारा ‘FU’ हा चित्रपट लवकरच म्हणजेच २ जून रोजी प्रेक्षकांच्या भेटीस येणार आहे.
