गवत कापण्याची छावा मराठा संघटनेची मागणी
सांगवी-
पावसाळा सुरु असल्याने खडकी कॅन्टोन्मेंट रेंज हिल सी टाईप येथे मोठ्या प्रमाणात गवत वाढले आहे. मात्र, तक्रार करूनही गवत कापले जात नाही. त्यामुळे येथे सापाचा वावर वाढला आहे. परिणामी नागरीकांच्या जिवाला धोका निर्माण होऊ शकतो. त्यामुळे वाढलेले गवत कापण्याची मागणी आंतरराष्ट्रीय मानवाधिकार संघटना, छावा मराठा संघटनेतर्फे खडकी कॅन्टोन्मेंटकडे करण्यात आली आहे. लवकरात लवकर गवत न कापल्यास आंदोलनाचा इशाराही संघटनेमार्फत देण्यात आला आहे.
गेल्या अनेक दिवसापासून परिसरात मोठ्या प्रमाणात गवत वाढले आहे. याबाबत गणेशोत्सवात शिवशक्ती मित्र मंडळाने कॅन्टोन्मेंट बोर्डाकडे गवत कापण्याची मागणी केली होती. मात्र, कोणताही कर्मचारी गवत कापण्यासाठी आला नाही. त्यामुळे मंडळाच्या कार्यकर्त्यांनी स्वत: गवत कापले. नवरात्रोत्सवात आंतरराष्ट्रीय मानवाधिकार संघटनेचे पुणे जिल्हा अध्यक्ष रामभाऊ जाधव यांनी अर्ज करून गवत कापण्याची मागणी केली. मात्र, गवत न कापताच कर्मचारी सही घेण्यासाठी आले. पण त्यांना काम न केल्यामुळे कुणी सही दिली नाही. इथे अनेकदा सापही पाहायला मिळतात. त्यामुळे सर्पदंश होऊन दगावण्याची भिती व्यक्त होत आहे. मात्र, कॅन्टोन्मेंट बोर्डाच्या कर्मचार्यांना याचे कसलेच सोयरसुतक नाही.
त्यामुळे या कामगारांची त्वरित बदली करण्यात यावी आणि दुसरे काम कामगार इथे कामासाठी पाठवावेत. तसेच वाढलेले गवत कापून टाकण्यात यावे. अन्यथा छावा मराठा संघटनेतर्फे तीव्र आंदोलन छेडण्यात येणार असल्याचा इशाराही देण्यात आला आहे.
