पुणे , दि. 26 : मराठा समाजातील विद्यार्थ्यांसाठी प्रत्येक जिल्ह्यात वसतीगृह सुरू करण्याचे मा. मुख्यमंत्री महोदयांनी घेतलेल्या निर्णयानुसार राजर्षी शाहू महाराज संशोधन, प्रशिक्षण व मानव विकास संस्थेच्या (सारथी) मार्फत पुण्यात सुरू करण्यात येणाऱ्या शासकीय औद्योगिक प्रशिक्षण संस्था (आयटीआय) येथील वसतीगृहाच्या इमारतीची महसूल मंत्री चंद्रकांत पाटील यांनी आज भेट देऊन पाहणी केली. इमारतींची पाहणी करून येत्या महिनाभरात हे वसतीगृह सुरू करण्याचे निर्देश महसूल मंत्री श्री. पाटील यांनी यावेळी संबंधितांना दिले.
मराठा समाजाच्या मागणीनुसार प्रत्येक जिल्ह्यात मराठा समाजातील विद्यार्थ्यांसाठी वसतीगृह उभारण्यात येणार आहे. पुण्यात सध्या ‘सारथी’ संस्थेच्या अंतर्गत पुण्यातील औंधमधील औद्योगिक प्रशिक्षण संस्थेच्या परिसरातील इमारतीत मुलींसाठी हे वसतीगृह सुरू करण्यात येणार आहे. सुमारे 450 चौमी क्षेत्रफळात ही इमारत असून सध्या येथे 9 खोल्या निवासासाठी उपलब्ध आहेत. तसेच वसतीगृह अधीक्षकांसाठी एक, जेवणाच्या हॉलसाठी एक खोली उपलब्ध आहे. तसेच 8 स्वच्छतागृहे व 8 स्नानगृहे आहेत. सुमारे 50 मुलींच्या राहण्याची येथे व्यवस्था करण्यात येणार असून त्यासाठी पलंग, गादी, टेबल खुर्ची आदींची सुविधा उपलब्ध करून देण्यात येणार आहे.
या इमारतीची पाहणी महसूल मंत्री श्री. पाटील यांनी केली. वसतीगृहात प्रवेश घेणाऱ्या विद्यार्थींनीना आवश्यक सोयी सुविधा पुरविण्याचे निर्देश त्यांनी यावेळी संबंधितांना दिले. तसेच या परिसरातच लवकरच मुलांसाठीही वसतीगृह सुरू करण्यात येणार असल्याचे श्री. पाटील यांनी यावेळी सांगितले.
