पुणे, दि. 31 : दुचाकी वाहनांसाठी सुरु होणाऱ्या मालिकेतील आकर्षक नोंदणी क्रमांक तीनपट शुल्क भरुन चारचाकी तसेच दुचाकी वाहनांसाठी राखून ठेवण्याकरिता आगाऊ अर्ज स्वीकारण्यात येणार आहेत व लिलाव कार्यपद्धती वापरण्यात येणार आहे, असे प्रादेशिक परिवहन अधिकारी यांनी कळविले आहे.
दुचाकी वाहनांसाठी सुरु होणाऱ्या मालिकेतील आकर्षक तसेच पसंतीचे क्रमांक विहीत तीनपट शुल्क भरुन चारचाकी वाहनांसाठी हवे असतील त्यांनी दिनांक 2 एप्रिल 2018 व दुचाकी वाहनांसाठी राखून ठेवण्याकरिता दिनांक 3 एप्रिल 2018 रोजी कार्यालयीन वेळेत सकाळी 11 ते दुपारी 2.30 या दरम्यान विहित नमुन्यात अर्ज करावा.
अर्ज प्रादेशिक कार्यालयाच्या नवीन नोंदणी विभागात डी.डी, पत्त्याचा पुरावा, ओळखपत्र, पॅनकार्डच्या साक्षांकित प्रतीसह जमा करावा. डी.डी. R.T.O Pune या नावाने राष्ट्रीयीकृत/शेड्युल्ड बँक, पुणे येथील असणे आवश्यक आहे. डीडी हा अर्जदाराने स्वत: च्या बँक खात्यातून काढल्याचे हमी पत्र जोडणे आवश्यक आहे.अर्जदाराने अर्जासोबत फोटो ओळखपत्र, उदा. आधार कार्ड किंवा निवडणूक आयोगाचे ओळखपत्र किंवा पासपोर्ट किंवा पॅन कार्ड आदीची साक्षांकित प्रत सादर करणे आवश्यक आहे.
दुचाकी वाहनांसाठी सुरु होणाऱ्या मालिकेतील आकर्षक नोंदणी क्रमांक तीनपट शुल्क भरुन चारचाकीसाठी राखून ठेवण्याकरीता एकाच क्रमांकाकरिता एकापेक्षा जास्त अर्ज आल्यास त्यांची यादी दिनांक 3 एप्रिल 2018 रोजी व दुचाकी वाहनांसाठी सूरु होणाऱ्या मालिकेतील आकर्षक नोंदणी क्रमांक राखून ठेवण्याकरिता दिनांक 4 एप्रिल 2018 रोजी सकाळी 10.30 वा. कार्यालयाच्या सुचना फलकावर लावण्यात येणार आहे. लिलावाकरिता जर जास्त रकमेचा डीडी जमा करावयाचा असेल तर त्यांनी त्याच दिवशी दुपारी 3.30वाजेपर्यंत सीलबंद पाकीटात प्रादेशिक कार्यालयात जमा करावा. त्याच दिवशी दुपारी 4.30 वा. सहकार सभागृह, प्रादेशिक परिवहन कार्यालय, पुणे येथे उपप्रादेशिक परिवहन अधिकारी व सहा. प्रादेशिक अधिकारी यांच्या उपस्थित पात्र व्यक्तीसमोर (संबंधीत अर्जदार) लिफाफे उघडून अर्जदाराने विनिर्दीष्ट शुल्कापेक्षा जास्तीत जास्त रकमेचा डी.डी. सादर केला असेल त्यास नमूद पसंती क्रमांक वितरित केला जाईल. राखून ठेवलेला क्रमांक 30 दिवसांच्या आत नोंदणीसाठी वाहन सादर केले नाही तर राखून ठेवलेला क्रमांक आपोआप रद्द होईल व शुल्क सरकारजमा होईल. शुल्क कोणत्याही परिस्थिती परत केले जाणार नाही अथवा समायोजन करता येणार नाही, असे प्रसिध्दी पत्रकाद्वामध्ये नमूद केले आहे.
