पुणे, दि. 27 : महाराष्ट्र राज्य परीक्षा परिषदेमार्फत 7,8 आणि 10 ते 12 ऑगस्ट 2017 रोजी घेण्यात आलेल्या शासकीय वाणिज्य प्रमाणपत्र परीक्षेचा निकाल 26 ऑक्टोबर 2017 रोजी ऑनलाईन पध्दतीने जाहिर करण्यात आला आहे. तसेच हा निकाल विद्यार्थ्यांना परिषदेच्या www.mscepune.in या संकेतस्थळावर उपलब्ध करुन देण्यात आला असून विद्यार्थ्यांना गुणपत्रकाची ऑनलाईन प्रिंटही घेता येईल, अशी माहिती महाराष्ट्र राज्य परीक्षा परिषदेचे आयुक्त सुखदेव डेरे यांनी दिली.
विद्यार्थ्यांची मुळ प्रमाणपत्रे, गुणपत्रके व निकालाच्या प्रती सर्व जिल्हयांचे शिक्षणाधिकारी (माध्यमिक) जिल्हा परिषद व मुंबईसाठी शिक्षण उपसंचालक, मुंबई विभाग, बालभवन, चर्नी रोड, मुंबई यांचे कार्यालयामार्फत संबंधीत टंकलेखन संस्थांना यशावकाश वितरीत करण्यात येतील. त्यानंतर विद्यार्थ्यांना त्यांच्या टंकलेखन संस्थामधून कार्यालयीन वेळेत मिळतील.
गुणपडताळणी व उत्तरपत्रिकेच्या छायांकित प्रतीसाठी परीक्षार्थ्यांनी आपल्या संस्थेतून ऑनलाईन अर्ज करणे आवश्यक आहे. गुणपडताळणीसाठी प्रति विषय रु.100/- व उत्तरपत्रिका छायाप्रती मिळण्यासाठी प्रति विषय रु.400/- ऑनलाईन पध्दतीने दिनांक 5 नोव्हेंबर 2017 पर्यंत भरावे. याबाबतच्या सविस्तर सूचना स्वतंत्र परिपत्रकाव्दारे सर्व संबंधितांना देण्यात आलेल्या आहेत तसेच परिषदेच्या www.mscepune.in या संकेतस्थळावर उपलब्ध करुन देण्यात आलेल्या आहेत असेही श्री. डेरे यांनी प्रसिध्दीपत्रकान्वये कळविले आहे.
