नागझिरा अभयारण्यातील पक्षी, निसर्गचित्रांसह ‘डेक्कन क्वीन’ एक्सप्रेस रवाना
मुंबई, दि. १४ : महाराष्ट्रामध्ये फार मोठे पर्यटन वैभव आहे. महाराष्ट्राचा हा ठेवा जगासमोर आला पाहिजे. पर्यटन विभाग आणि एमटीडीसी यासाठी व्यापक प्रयत्न करत असून राज्यातील पर्यटनाची देश-विदेशात प्रसिद्धी करुन जगभरातील पर्यटकांना महाराष्ट्राकडे आकर्षित केले जाईल, असे मुख्यमंत्री उद्धव ठाकरे यांनी आज येथे सांगितले.
भंडारा, गोंदीया जिल्ह्यातील नागझिरा अभयारण्यातील पक्षी आणि निसर्गाची चित्रे मुंबई – पुणे डेक्कन क्वीन एक्सप्रेसवर प्रसिद्ध करण्यात आली आहेत. आज छत्रपती शिवाजी महाराज टर्मिनस येथून मुख्यमंत्री श्री. ठाकरे यांच्या हस्ते या उपक्रमाचे उद्घाटन करण्यात आले. हिरवी झेंडी दाखवून त्यांनी या सुशोभित एक्सप्रेसला रवाना केले. विविध रेल्वे एक्सप्रेसवर महाराष्ट्रातील पर्यटनस्थळांची अशीच जाहीरात करुन देशभरातील पर्यटकांना महाराष्ट्राकडे आकर्षित करु, असेही मुख्यमंत्र्यांनी यावेळी सांगितले.
एक्सप्रेसवर नागझिरा अभयारण्यातील पक्षी आणि निसर्गचित्रांसह एमटीडीसीच्या बोधलकसा पर्यटक निवासाची चित्रेही झळकली आहेत. एमटीडीसीचे व्यवस्थापकीय संचालक अभिमन्यू काळे यांच्या संकल्पनेतून आणि राज्याच्या पर्यटन सचिव विनिता वेद – सिंगल, मध्य रेल्वेचे महाव्यवस्थापक संजीव मित्तल यांच्या मार्गदर्शनातून हा उपक्रम साकारला आहे.
मुख्यमंत्री श्री. ठाकरे पुढे म्हणाले की, एमटीडीसीच्या या उपक्रमातून दख्खनची राणी आता वेगळ्या स्वरुपात जनतेसमोर येत आहे. पर्यटनस्थळांची माहिती लोकांपर्यंत पोहोचविण्यासाठीची ही फारच चांगली संकल्पना आहे. पर्यटक आले तर त्यांच्यामार्फत स्थानिकांना मोठा रोजगार मिळतो. राज्यात बोधलकसा, नागझिरा सारखी अनेक दुर्लक्षित पर्यटनस्थळे आहेत. एमटीडीसीने अशा पर्यटनस्थळांना प्रकाशझोतात आणण्यासाठी राबविलेला हा उपक्रम निश्चितच कौतुकास्पद आहे. यापुढील काळात राज्यातील इतरही पर्यटनस्थळांची माहिती रेल्वे, एसटी आदींच्या माध्यमातून प्रसारित करुन राज्यातील पर्यटनाला चालना देण्यात येईल, असे त्यांनी सांगितले.
क्रुझ पर्यटन ते अॅडव्हेंचर टुरीजम
राज्याच्या पर्यटन सचिव विनिता वेद – सिंगल यावेळी म्हणाल्या की, महाराष्ट्रात समुद्र किनारे, गड-किल्ले, प्राचीन गुंफा, व्याघ्र प्रकल्प, जंगले, थंड हवेची ठिकाणे, बॉलीवूड अशा विविध प्रकारातील पर्यटनस्थळे आहेत. अशा प्रकारचे पर्यटन वैविध्य असलेले महाराष्ट्र हे देशातील प्रमुख राज्य आहे. याबरोबरच क्रुझ पर्यटन, ॲडव्हेंचर टुरीजम, मेडीकल टुरीजम, एक्सपिरिएन्शल टुरीजम, कृषी तथा ग्रामपर्यटन आदींनाही राज्यात चालना देण्यात येत आहे. राज्यातील पर्यटन वैभवाची व्यापक प्रसिद्धी करुन जगभरातील पर्यटकांना महाराष्ट्राकडे आकर्षित केले जाईल, असे त्यांनी सांगितले.
नाविन्यपूर्ण उपक्रमातून पर्यटनाला चालना
एमटीडीसीचे व्यवस्थापकीय संचालक अभिमन्यू काळे म्हणाले की, विदर्भातील नागझिरा अभयारण्य आणि त्यात वसलेल्या एमटीडीसीच्या बोधलकसा पर्यटन निवास परिसरात अद्भूत निसर्गसौंदर्य आहे. पर्यटक निवासाच्या बाजूला मोठा जलाशय असून सर्व बाजूंनी नागझिरा अभयारण्याची गर्द हिरवी झाडी आहे. अभयारण्याच्या परीसरात बाराही महिने लाल डोक्याचे पोपट, हरियाल (हिरवे कबुतर), विविध जातीचे गरूड, पोपट तसेच स्थलांतरीत पक्षी इत्यादी दुर्मिळ पक्षांचा वावर असतो. परिसरात पळस व मोह वृक्ष फुलण्याच्या सुमारास खूप नेत्रसुखद दृष्य असते. आता या परिसरातील पक्षांची व निसर्गाची चित्रे डेक्कन क्वीन रेल्वेच्या बाह्य भागावर लावून या पर्यटक निवासाची माहिती मुंबई आणि पुण्यातील पर्यटकांपर्यंत पोहोचविण्यात आली आहे. या माध्यमातून नागझिरा अभयारण्य तसेच विदर्भाकडे पर्यटक मोठ्या प्रमाणात आकर्षित होतील, असा विश्वास त्यांनी व्यक्त केला.
निसर्गचित्रे पाहण्यासाठी प्रवाशांची गर्दी
डेक्कन क्वीन ही रेल्वे महाराष्ट्राचा मानबिंदू असून तिच्या 17 बोगींवर ही चित्रे लावण्यात आली आहेत. आज या एक्सप्रेसमधून प्रवास करणाऱ्या प्रवाशांची ही चित्रे आकर्षणबिंदू ठरली होती. लहान मुलांसह उपस्थित प्रवासी नागझिरा अभयारण्यातील विविध पक्षी, प्राणी आणि निसर्गचित्रांची माहिती घेत होते. महाराष्ट्रात पर्यटन विकास महामंडळाची (एमटीडीसी) विविध ठिकाणी 23 पर्यटक निवासे आहेत. त्यापैकी नागझिरा अभयारण्यातील बोधलकसा या ठिकाणी महामंडळाचे अत्याधुनिक सोयी – सुविधांनीयुक्त प्रशस्त पर्यटक निवास (रिसॉर्ट) आहे.
कार्यक्रमास राज्याचे पर्यटन मंत्री एकनाथ शिंदे, उद्योग मंत्री सुभाष देसाई, आमदार आदित्य ठाकरे, दीपक केसरकर, माजी खासदार आनंदराव अडसूळ, मध्य रेल्वेचे महाव्यवस्थापक संजीव मित्तल, पर्यटन संचालक दिलीप गावडे आदी मान्यवर उपस्थित होते.
