नवी दिल्ली : प्रवाशांची वाढती संख्या विचारात घेऊन पुणे स्टेशनवरील गर्दी कमी करण्यासाठी खडकी रेल्वे स्टेशनवर टर्मिनल विकसित करावे. अशी मागणी खासदार गिरीश बापट यांनी बुधवारी केली. या विषयाकडे रेल्वे मंत्र्यांचे लक्ष वेधण्यासाठी खा. बापट यांनी कामकाज नियमावलीतील नियम 377 अन्वये लोकसभेच्या अध्यक्षांना निवेदन दिले असून ते आज पटलावर घेण्यात आले. बापट यांनी पत्रकारांना ही माहिती दिली.
ते म्हणाले की, पुणे रेल्वे स्थानक हे मध्य महाराष्ट्राचे सेंट्रल रेल्वेचे मुख्य जंक्शन आहे. पुणे रेल्वे स्थानक मुंबई गुजरात आणि मध्य प्रदेशातून दक्षिणेकडे जाणाऱ्या गाड्यांसाठी थांबा म्हणून वापरात येते. गोवा आणि कर्नाटकातून उत्तरेकडे जाणाऱ्या गाड्यांचा थांबा म्हणूनही पुणे रेल्वे स्थानकाचे महत्त्व खूप मोठे आहे. हे स्थानक मालवाहतूकही प्रमुख केंद्र आहे. पुणे हे भारतातील प्रमुख माहिती तंत्रज्ञान आणि शिक्षण केंद्र आहे. ते देशाच्या कानाकोपऱ्यातून प्रवाशांना आकर्षित करते. त्यामुळे खूप गर्दी झाली आहे. पुणे रेल्वे स्टेशनची गर्दी कमी करणे ही काळाची गरज आहे. त्यासाठी जवळच्या रेल्वे स्थानकांना टर्मिनल म्हणून विकसित करणे अत्यंत आवश्यक झाले आहे.
हडपसर रेल्वे स्थानक किंवा शिवाजीनगर रेल्वे स्थानकावर जागेअभावी टर्मिनल म्हणून विकास होण्यास विलंब होत असून प्रवाशांना अडचणी येत आहेत. खडकी हे पुणे शहराच्या मध्यभागी असलेले रेल्वे स्थानक आहे.तेथे विस्तारासाठी जमीन देखील उपलब्ध आहे.खडकी रेल्वे स्थानक टर्मिनल म्हणून विकसित करण्यासाठी रेल्वे प्रशासनाने अभ्यास करण्याची गरज आहे.
लोकसभा अध्यक्षांनी रेल्वे अधिकाऱ्यांना व्यवहार्यता तपासण्याचे आणि खडकी रेल्वे स्टेशन येथे टर्मिनल विकसित करण्यासाठी आराखडा सादर करण्याचे आदेश द्यावेत अशी विनंती मी या निवेदनात केली आहे.
