पुणे- जितेंद्र जगताप यांस आत्महत्या करण्यास प्रवृत्त केल्याप्रकरणी न्यायालयीन कोठडीत असलेले माजी उपमहापौर व राष्ट्रवादी काँग्रेसचे नगरसेवक दीपक मानकर यांच्यासह दोघांची मुंबई हायकोर्टाने एक लाख रुपयांच्या जामिनावर सुटका करण्याचा आदेश दिला. मोकाच्या गुन्ह्यातून वगळण्याच्या मागणीला तूर्तास हायकोर्टाने दिलासा दिला नाही. मुंबई हायकोर्टाचे न्यायमूर्ती रणजित मोरे, ए. जे. जमादार यांनी हा आदेश दिला.. लोकसभा, विधानसभा निवडणूक झाल्यावर ही प्रक्रिया झाली .
दीपक मानकर आणि सुधीर सुतार या दोघांची जामिनावर सुटका करण्याचा आदेश कोर्टाने दिला. त्यांच्यातर्फे अॅड. अबद पोण्डा, अॅड. प्रफुल सोनी, अॅड. अजिंक्य उडणे, अॅड. प्रशांत पाटील यांनी बाजू मांडली.
मानकर यांच्याकडे गेली अनेक वर्षे काम करणाऱ्या जगताप यांनी दोन जून 2018 साली घोरपडी भागात रेल्वेखाली उडी घेऊन आत्महत्या केली होती. जगताप यांना आत्महत्येस प्रवृत्त केल्याप्रकरणी मानकर, बिल्डर सुधीर कर्नाटकी, विनोद रमेश भोळे (वय 34, रा जोशी वाडी, घोरपडी पेठ), सुधीर दत्तात्रेय सुतार (वय 30,रा जयभवानी नगर, कोथरूड), अमित उत्तम तनपुरे (वय 28, रा मांडवी खुर्द), अतुल शांताराम पवार (वय 36 ) आणि विशांत श्रीरंग कांबळे (वय 30, रा शांतिनगर येरवडा), नाना कुदळे (रा.केळेवाडी) आणि अजय कंधारे यांना अटक केली होती.उच्च न्यायालयाने जामीन फेटाळल्यानंतर मानकर पोलिसांत हजर झाले होते. या प्रकरणात दोषारोपपत्र देखील दाखल आहे. तब्येत खराब झाल्यामुळे त्यांच्यावर काही दिवस खासगी रुग्णालयात उपचार सुरू होते. दरम्यान त्यांनी उच्च न्यायालयात जामिनासाठी अर्ज केला होता. मात्र तो फेटाळण्यात आला होता.
मानकर आणि सुतार या दोघांतर्फे त्यांच्यावर लावण्यात आलेला ‘मोका’चा गुन्हा वगळण्यात यावा आणि त्यांना जामीन देण्यात यावा म्हणून हायकोर्टात अर्ज दाखल करण्यात आला होता. हायकोर्टाने दोन्ही बाजूचे म्हणणे ऐकल्यानंतर या दोघांची एक लाख रुपयांच्या जामिनावर सुटका करण्याचा आदेश दिला. प्रथमदर्शनी या प्रकरणात ‘मोका’ लागू होत नसल्याचे निरीक्षण कोर्टाने नमूद केले आहे.दीपक मानकर यांच्यावर ‘मोका’नुसार गुन्हा दाखल करण्यात आला. गेली एक वर्षे मानकर तुरुंगात आहेत.
