पुणेकरांना पाणी मिळावे म्हणून काँग्रेस कार्यकर्त्यांचे गणरायाला साकडे

पुणे – पुणेकरांना सोळा टीएमसी पाणी मिळावे यासाठी शहर काँग्रेसतर्फे बुधवारी कसबा गणपती मंदिरात आरती आणि भजन करून जोरदार आंदोलन करण्यात आले. पालकमंत्री गिरीश बापट यांना गणरायाने सुबुद्धी देऊन पुणेकरांना हक्काचे पाणी द्यावे असे साकडेही या वेळी घालण्यात आले.
शहराध्यक्ष रमेश बागवे आणि प्रदेश सरचिटणीस मोहन जोशी यांच्या नेतृत्वाखाली आंदोलनाचे आयोजन करण्यात आले होते. पुणेकरांना हक्काचे सोळा टीएमसी पाणी मिळावे, यासाठी आंदोलन करण्यात आले. ‘गणरायाने बापट यांना सुबुद्धी देऊन पुणेकरांवर आलेले पाण्याचे संकट टळावे, यासाठी गणरायाला साकडे घातले आहे,’ अशी प्रतिक्रिया जोशी यांनी व्यक्त केली. जोशी यांनीही ध्वनिक्षेपकाचा आणि हार्मोनियमचा ताबा घेऊन भजन म्हटले, तर बागवे यांनी त्यांना तबल्याची साथ केली.
आमदार अनंत गाडगीळ, माजी मंत्री बाळासाहेब शिवरकर, प्रदेश सरचिटणीस अॅड. अभय छाजेड, काँग्रेसचे महापालिकेतील गटनेते अरविंद शिंदे, माजी महापौर कमल व्यवहारे, शांतीलाल सुरतवाला, कैलास कदम, महिला काँग्रेसच्या शहराध्यक्ष सोनाली मारणे, माजी नगरसेवक गोपाळ तिवारी, नगरसेवक अविनाश बागवे,रवींद्र धंगेकर, अजित दरेकर, नगरसेविका लता राजगुरू,  विकास लांडगे, माजी नगरसेवक मिलिंद काची, माजी नगरसेविका नीता रजपूत, बुवा नलावडे, जयसिंग गोंधळे, बाळासाहेब आमराळे, प्रकाश पवार, सुनील पंडित, शेखर कपोते, चेतन अग्रवाल, अयुब पठाण, बबलू कोळी, काका धर्मावत, राजीव शिरसाठ, रमेश सकट, उस्मान तांबोळी, चित्राताई माळवे, स्वाती शिंदे यांच्यासह पदाधिकारी, कार्यकर्ते सहभागी झाले होते.
प्रास्ताविक संगीता तिवारी यांनी, सूत्रसंचलन प्रशांत सुरसे यांनी केले. प्रवीण करपे यांनी आभार मानले. या आंदोलनात काँग्रेसचे सर्व गट सहभागी झाले होते. त्यामुळे गणरायाने काँग्रेसजनांना तरी एकत्र आणले, अशीही चर्चा कार्यकर्त्यांमध्ये रंगली होती.