पुणे-भाजपचा बालेकिल्ला समजणाऱ्या कोथरूड मध्येच भाजपच्या अधिकृत उमेदवाराच्या पहिल्याच प्रचार सभेला सुरुंग लागल्याचे चित्र आज सायंकाळी दिसून आले.सर्वप्रथम उमेदवाराच्या नावाची घोषणा करून सर्वप्रथम प्रचार यंत्रणेचा प्रारंभ करून पहिल्याच सभेला आलेल्या अनुभवाने आता खरी भाजपची कसौटी लागू शकते असे म्हटले तर वावगे होणार नाही .
पुणे लोकसभा मतदारसंघासाठी महायुतीकडून पालकमंत्री गिरीश बापट यांच्या नावाची घोषणा करण्यात आली. या सभेचा प्रचाराचा नारळ प्रकाश जावडेकर यांच्या हस्ते कोथरूड येथे फोडण्यात आला.या सभेतील भाषणे लांबली आणि कंटाळवाणी ठरली, त्यामुळे शिस्तबद्ध असा हवाला देणाऱ्या या पक्षाच्या प्रचार सभेस दीड तासाहून अधिक काळ नागरिक तग धरून बसू शकले नाही . काही नगरसेवकांनी आणलेली लोकं नगरसेवकांच्या फोटोचे फलक आणि भाजपचे झेंडे जागेवरच सोडून निघून गेले .
या सभेला सायंकाळी सहा वाजण्याच्या सुमारास सुरुवात झाली. या सभेदरम्यान महायुतीमधील घटक पक्षाच्या तब्बल सात नेत्यांची खूप वेळ चाललेल्या भाषणामुळे सभा ठिकाणी असलेल्या निम्म्याहून अधिक नागरिकांनी प्रकाश जावडेकर यांच्या भाषणापूर्वी बाहेर पडणे पसंत केले. नागरिक बाहेर जाताना पाहून आयोजकांची एकच तारांबळ उडाल्याचे चित्र पाहावयास मिळाले.
पुणे लोकसभा मतदारसंघाचे महायुतीचे उमेदवार पालकमंत्री गिरीश बापट यांच्या प्रचाराचा नारळ केंद्रीय मंत्री प्रकाश जावडेकर यांच्या हस्ते फोडण्यात आला. यावेळी महापौर मुक्ता टिळक, खासदार अनिल शिरोळे, भाजप शहर अध्यक्ष योगेश गोगावले, शिवसेना आमदार नीलम गोऱ्हे तसेच भाजपचे शहरातील आमदार आणि पदाधिकारी सभेला उपस्थित होते.
पुण्यातील कोथरूड हा परिसर भाजपचा बालेकिल्ला समजला जातो .आमदार येथे भाजपचेच आणि बहुसंख्य नगरसेवक हि भाजपचेच आहेत . पुण्यात 100 नगरसेवकांचे बाहू बल लाभलेल्या आणि पालकमंत्री हेच उमेदवार असलेल्या त्यांच्या पहिल्या सभेची हि अवस्था पाहून भाजपच्या कार्यकत्यांच्या डोक्यातील हवा निश्चित वेळेत निघून जाईल असे समीक्षकांना वाटते आहे.
