पुणे-नुकत्याच पार पडलेल्या पुणे, नाशिक, मालेगाव आणि अहमदनगर येथील पदवीधर मेळाव्यांना मिळालेल्या उत्स्फूर्त प्रतिसादानंतर सावित्रीबाई फुले पुणे विद्यापीठ अधिसभेच्या पदवीधर निवडणुकीसाठी विद्यापीठ विकास मंचचे सर्व उमेदवार विजयी होतील असा विश्वास मंचचे समन्वयक राजेश पांडे यांनी आज पुण्यात बोलतांना व्यक्त केला.
विद्यापीठ विकास मंचने नुकतेच नाशिक, मालेगाव, पुणे, पिंपरी चिंचवड, अहमदनगर येथे पदवीधर मेळाव्यांचे आयोजन केले होते. मेळाव्यातील प्रतिसादाबद्दल बोलतांना पांडे म्हणाले “आमच्या विद्यापीठ विकास मंचाच्या व्यासपीठावर राजकीय पक्षांचा हस्तक्षेप आम्ही खपवून घेत नाही. संस्थाचालक गटातील पाचही जागा विद्यापीठ विकास मंचाने बिनविरोध जिंकल्या. या धक्क्यातून महाविकास आघाडीचे तथाकथित नेते सावरू शकलेले नाहीत. त्यांचे मनोधैर्य खचलेले आहे, हे मतदारांच्या लक्षात येते आहे. विद्यापीठ विकास मंचचे संपूर्ण पॅनेल निवडून येणार आहे. कारण पाच वर्षांत सावित्रीबाई फुले पुणे विद्यापीठात स्वच्छ, दूरदृष्टीचा, विद्यार्थीहिताचा कारभाराचा आदर्श आम्ही उभा केला आहे. महाविकास आघाडी म्हणून जे लोक सावित्रीबाई फुले पुणे विद्यापीठात राजकारण घुसवू पाहात असतील, त्यांना विद्यापीठाचा सुशिक्षित मतदार धडा शिकवेल हे नक्की.”
विद्यापीठ विकासाकडे महाविकास आघाडी सरकारने पूर्णपणे दुर्लक्ष केले असा आरोप करत पांडे यांनी सिनेटने विद्यापीठात विद्यार्थी केंद्रित निर्णय कसे घेतले याबद्दल माहिती दिली. ते म्हणाले “कोरोनाकाळात महाविकास आघाडी सरकार निर्णय घेण्यात टाळाटाळ करत असताना सावित्रीबाई फुले पुणे विद्यापीठात आम्ही शुल्कवाढीबाबत विद्यार्थीहिताचे निर्णय घेतले. संलग्न महाविद्यालयांच्या शुल्कात २०२१-२२ या शैक्षणिक वर्षासाठी कपात केली आहे. विद्यापीठे, महाविद्यालये बंद असल्याने वापरण्यात न आलेल्या विविध शैक्षणिक सुविधांच्या शुल्कात २५ ते १०० टक्के शुल्क कपात लागू केली. या निर्णयामुळे पदवी, पदविका, पदव्युत्तर अभ्यासक्रमांना शिकणाऱ्या सात लाख विद्यार्थ्यांना दिलासा मिळाला.”
पांडे पुढे म्हणाले “कोरोनामुळे पालकत्व गमावलेल्या पाल्यांचे संपूर्ण शुल्क माफ करण्याचा निर्णय विद्यापीठाने घेतला. विद्यापीठाने कतारमधील दोहा शहरात स्थानिक शैक्षणिक संस्था आणि प्रशासनाशी समन्वय साधत रोजगाराभिमुख पदवी अभ्यासक्रमांच्या शैक्षणिक वर्गांना सुरूवात केली आहे. परदेशात अभ्यासक्रम सुरू करणारे हे देशातले पहिले विद्यापीठ ठरले. याशिवाय उपकेंद्रांची स्थापना केली. ज्यातील नाशिक येथील उपकेंद्र कार्यान्वितही झाले आहे. विद्यापीठाच्या कारभाराची काडीचीही माहिती नसलेल्या लोकांनी अधिसभेच्या निवडणुकीचे निमित्त करून आरोपांची राळ उडवून सावित्रीबाई फुले पुणे विद्यापीठाची बदनामी करायची, हा प्रकार आम्ही खपवून घेणार नाही.”
मतदार याद्यांचा घोळ
यावेळी पांडे यांनी विद्यापीठ प्रशासनाच्या कारभारावरही टीका केली. ते म्हणाले, “मेळाव्यात अनेक ठिकाणी आम्हाला मिळालेल्या फीडबॅकनुसार मतदार याद्यांमध्ये भरपूर घोळ आहे. पदवीधर मतदारांची नावं आणि केंद्र यांचा ताळमेळ लागत नाहीये. विद्यापीठ प्रशासनाच्या भोंगळ बेजबाबदार कारभारामुळे पदवीधर मतदारांना गैरसोयीचा सामना करावा लागणार आहे.”
पुन्हा अपयशाच्या भीतीने जगतापांचे बेछूट आरोप, जगताप यांचा सुनेत्रा पवारांसारख्या जाणकारांवर विश्वास नाही का ?
सावित्रीबाई फुले पुणे विद्यापीठ अधिसभा निवडणुकीच्या निमित्ताने राष्ट्रवादी काँग्रेसचे शहराध्यक्ष प्रशांत जगताप यांनी केलेले आरोप वाचनात आले. या निवडणुकीत जगताप यांनी पॅनेल उभे केले आहे. त्या पॅनेलचा पराभव समोर दिसत असल्याने जगताप यांच्या पायाखालची वाळू सरकली आहे.
जगताप यांनी सावित्रीबाई फुले पुणे विद्यापीठात एकाधिकारशाही आणि भ्रष्टाचार झाल्याचा बेजबाबदार आरोप केला. महाविकास आघाडीचे सरकार महाराष्ट्रात अडीच वर्षे होते. सुनेत्राताई पवार यांच्यासारखे अनुभवी सदस्य अधिसभेवर होते. एकाधिकारशाही आणि भ्रष्टाचार झाला असता, तर सरकार, सुनेत्राताईंसारखे अनुभवी सदस्य गप्प राहिले असते का? सरकार डोळे मिटून कारभार पाहात होते, असे जगताप यांना म्हणायचे आहे का? सरकार आणि अनुभवी सदस्यांच्या कार्यक्षमतेवर जगतापांचा विश्वास नाही का?
बिनबुडाचे आरोप करायचे आणि नंतर ‘तडजोडी’ करायच्या असे जगतापांचे महापालिकेतील राजकारण आहे. हेच राजकारण ते सावित्रीबाई फुले पुणे विद्यापीठात आणू इच्छितात, असे त्यांच्या आरोपांवरून दिसते आहे.
जगताप पुण्याचे महापौर असताना २०१७ मध्ये त्यांच्या पक्षाची सत्ता गेली. तेव्हापासून त्यांना पक्षाने अडगळीत टाकले होते. आता अधिसभा निवडणुकीचे प्रमुखपद त्यांच्याकडे आहे आणि या निवडणुकीत पराभव होणार असल्यामुळे त्यांच्या नेतृत्वावर पुन्हा एकदा प्रश्नचिन्ह उपस्थित होणार आहे. अपयशाच्या पुनरावृत्तीने अस्वस्थ होऊन त्यांनी बेछूट, बेजबाबदार आरोप चालविले आहेत.
विद्यापीठ विकास मंचच्या जाहीरनाम्यातले मुद्दे :
राष्ट्रीय शैक्षणिक धोरण पारदर्शक पद्धतीने अंमलात आणण्यासाठी कटीबद्ध.
रोजगारभिमुख शिक्षण, शिकाऊ उमेदवारी व निवड योजनेच्या विकासाला गती देणे.
विद्यापीठात अद्यावत क्रीडा सुविधा निर्माण करून आंतरराष्ट्रीय दर्जाचे खेळाडू तयार होतील असे वातावरण रुजवणे.
विद्यापीठातील प्राध्यापक भरती करून शैक्षणिक व्यवस्था मजबूत करणे.
नवे व उत्तम कॅम्पस तयार करण्यासाठी योगदान देणे.
खुल्या विद्यार्थी निवडणुका सुरू करून त्यात पारदर्शकता आणण्यासाठी प्रयत्न करणे.
अभ्यासक्रमात कलानुरूप बदल करण्यासाठी प्रयत्न करणे.
राष्ट्रीय व आंतरराष्ट्रीय मानांकनांमध्ये अधिक उच्च दर्जासाठी प्रयत्न करणार.
उद्योग – शेतीपुरक नवनवीन अभ्यासक्रम आणि रोजगाराभिमुख अभ्यासक्रम करून देणार.
संशोधनासाठी अधिकाधिक संधी उपलब्ध करून देणार.
स्टार्टअपसाठी विशेष कार्यक्रम घेऊन, त्यातून युवकांना उद्योग व्यवसायात अधिक संधीसाठी प्रयत्न करणार.
सांस्कृतिक आणि क्रीडा व्यवस्था अधिक सक्षम करणार.
विद्यार्थी आणि विद्यार्थिनी साठी स्वतंत्र वसतिगृहांच्या संख्येत वाढ करणार.
विद्यापीठ विकास मंच: आवाहक
डॉ गजानन एकबोटे, डॉ राजेंद्र विखे पाटील, ॲड एस के जैन, राजेश पांडे, डॉ अपूर्व हिरे, ॲड नितीन ठाकरे, डॉ सोमनाथ पाटील, डॉ सुधाकर जाधवर, हेमंत धात्रक, प्रशांत साठे, एन डी पाटील
