पुण्यातील टाटा सेन्ट्रल अर्काईव्ज् मध्ये समूहाच्या ‘विंटेज प्रिंट’ जाहिरातींचे प्रदर्शन
पुणे, २५ जुलै २०१८: असं म्हणतात कि एखादे जुने मुद्रण तुम्हाला अगदी सहज भूतकाळात घेवून जाते. आणि याची प्रचिती देण्यासाठीच पुण्यातील ‘टाटा सेन्ट्रल अर्काईव्ज्’ खास पुणेकरांसाठी घेवून येत आहे एक खास चित्र प्रदर्शन – ‘विंटेज अॅडव्हर्टायजिंग अँड पब्लिसिटी’. टाटा समूहाच्या अगदी दुर्मिळ जाहिरात मुद्रणांपासून ते अलीकडच्या १९९० पर्यंतच्या जाहिरातींचा खजिना या निमित्ताने पुणेकरांना पहायला मिळणार आहे.
या प्रदर्शनातील अनेक साध्या परंतु संस्मरणीय जाहिराती तुम्हाला गतकाळात घेवून जातील. बदलते तंत्रज्ञान, स्पर्धात्मक दबाव, बाजारातील किरकोळ मागणी आणि या सगळ्याबरोबर ‘राष्ट्र उभारणीची’ मार्गदर्शक तत्वे कायमच हृदयात जपत तयार केलेल्या या जाहिराती टाटा समूहाची वाटचाल तुम्हाला उलगडवून दाखवतील.
प्रदर्शनातील काही जाहिराती या समाजाचे देणे दर्शविणाऱ्या, काही ‘राष्ट्र उभारणीची’ मार्गदर्शक तत्वे जपणाऱ्या, तर काही जाहिराती या बदलत्या फॅशन दाखविणाऱ्या आहेत. याशिवाय इंडियन हॉटेल्स च्या जाहिराती या सर्वोत्तम भव्यता प्रतीत करणाऱ्या, टाटा एअरलाईन आणि एअर इंडियाच्या जाहिराती आकाशात भरारी घेणाऱ्या, टाटा मोटर्सच्या जाहिराती या यशस्वी मार्गक्रमण करणाऱ्या तर टाटा स्टीलच्या जाहिराती या मजबुती दाखविणाऱ्या आहेत.
हे विनामुल्य प्रदर्शन सोमवार, दिनांक ३० जुलै ते सोमवार, ३१ डिसेंबर २०१८ पर्यंत सर्वांसाठी खुले असेल. प्रदर्शनाची वेळ सकाळी १०.०० ते सायंकाळी ५.०० अशी असून, अधिक माहितीसाठी नागरिकांनी 020- 66092054 या क्रमांकावर संपर्क करावा.
