मुंबई: इंडियन हॉटेल्स कंपनी लिमिटेड अर्थात आयएचसीएलला आपल्या अॅस्पिरेशन २०२२ या ध्येयपूर्तीच्या प्रवासात लोणावळ्यातील प्रवेशाची घोषणा करण्यात खूप आनंद होत आहे. कंपनीने काकडे समूहाचा भाग असलेल्या वाइल्ड्स अॅण्ड वॉटर डेव्हलपर्ससोबत व्यवस्थापन कंत्राटाच्या माध्यमातून ताजचे नवीन हॉटेल सुरू करण्यासाठी करार केला आहे. भारतामध्ये सर्वाधिक आरामदायी हॉटेल्स चालवणारी कंपनी हे आयएचसीएलचे स्थान या घोषणेमुळे आणखी भक्कम झाले आहे.
आयएचसीएलच्या रिअल इस्टेट आणि विकास विभागाच्या कार्यकारी उपाध्यक्ष सुमा वेंकटेश यावेळी म्हणाल्या, “आमचे नवीन आरामदायी (लीझर) हॉटेल लोणावळ्यात आणण्यासाठी काकडे समूहासोबत भागीदारी झाल्याचा आम्हाला आनंद आहे. आरामदायी हॉटेलिंगच्या क्षेत्रातील स्थान अधिक बळकट करण्यावर आमचा कायम भर राहिला आहे आणि मुंबई व पुणे या दोन्ही महानगरांतील तसेच भोवतालच्या भागांतील पर्यटकांसाठी लोणावळा हे मोक्याचे ठिकाण असल्याने ही आमच्यासाठी मोठी संधी आहे.”
मुंबई-पुणे एक्स्प्रेस हायवेवरून सहज पोहोचता येईल अशा ठिकाणी ताज ब्रॅण्डेड रिसॉर्ट उभे राहणार आहे. पवना तलावातील नितळ पाण्याच्या सान्निध्यात, निसर्गरम्य डोंगरांच्या पार्श्वभूमीवर ३० एकर भूभागावर हे रिसॉर्ट बांधले जाणार असून, यामध्ये १५० खोल्या, दिवसभर खुले राहणारे रेस्तराँ, स्पेशालिटी रेस्टोरंट आणि बार या सुविधा असतील.
काकडे समूहाचे श्री. विक्रम काकडे म्हणाले, “प्रतिष्ठेच्या ताज ब्रॅण्डसोबत भागीदारी करण्याची तसेच त्यांचे सुप्रसिद्ध आदरातिथ्य लोणावळ्यात आणण्याची संधी मिळाल्याबद्दल आम्हाला अभिमान वाटतो. या भागीदारीच्या माध्यमातून (आमचे विकसन भागीदार श्री. डेव्हिड लाझारस यांच्यासह) महाराष्ट्रातील अव्वल दर्जाचे ताज रिसॉर्ट उभारण्याचे आणि ग्राहकांना एक आगळा अनुभव देण्याचे लक्ष्य आमच्यापुढे आहे.”
लोणावळा हे छोटेसे शांत गाव महाराष्ट्रातील आघाडीचे पर्यटनस्थळ म्हणून विकसित झाले आहे. एक निसर्गरम्य थंड हवेचे ठिकाण म्हणून गेली अनेक वर्षे मुंबई व पुण्यातील पर्यटकांची पसंती लोणावळ्याला आहे.
काकडे समूहाविषयी
काकडे समूह हा महाराष्ट्रातील आघाडीच्या बांधकाम आणि विकसन समूहांपैकी एक असून कंपनीकडे बांधकाम आणि विकासकामांचा २५ वर्षांहून अधिक अनुभव आहे. आतिथ्य आस्थापने, मॉल्स, गृहनिर्माण तसेच टाउनशिप विकासाच्या असंख्य आगामी प्रकल्पांमध्ये काकडे समूहाचा सहभाग आहे.
इंडियन हॉटेल्स कंपनी लिमिटेडविषयी
इंडियन हॉटेल्स कंपनी लिमिटेड अर्थात आयएचसीएल आणि तिच्या उपकंपन्या असा अनेक ब्रॅण्ड्स व व्यवसायांचा समूह भारतीय आतिथ्यशीलता व जागतिक दर्जाची सेवा यांचा मिलाफ साधून काम करत आहे. टाटा समूहाचे संस्थापक जमशेटजी टाटा यांनी स्थापन केलेल्या या कंपनीने आपले पहिले हॉटेल ताजमहाल पॅलेस मुंबईत १९०३ साली सुरू केले आणि आज जगातील चार खंडांत, ११ देशांमधील ७२ ठिकाणी कंपनीची १४५ हॉटेल्स आहेत.
बाजारपेठेतील भांडवलाचा विचार करता, इंडियन हॉटेल्स कंपनी लिमिटेड (आयएचसीएल) ही दक्षिण आशियातील सर्वांत मोठी भारतीय हॉस्पिटॅलिटी कंपनी आहे. बीएसई व एनएसईच्या प्राथमिक सूचींमध्ये कंपनीचा समावेश आहे.
