पुणे
एकीकडे देशात काय राज्यात ज्येष्ठ नागरिकांसाठी दिलासा देण्यासाठी धोरण राबविण्यात येत आहे ;पण दुसरीकडे पुण्यात मात्र या धोरणाची पायमल्ली करून ज्येष्ठ नागरिकांना वेठीस धरण्याचा प्रकार भाजपने पीएमपीएल बस प्रवासासाठी पास दर वाढवून केला असल्याची टीका काँग्रेसचे वरिष्ठ उपाध्यक्ष आणि माजी उपमहापौर आबा बागुल यांनी केली आहे.
शहराची सार्वजनिक वाहतूक सेवा असलेल्या पुणे महानगर परिवहन महामंडळाच्या पास दर वाढीचा निर्णय घेताना संस्काराची शिदोरी देणारे ,कुटुंब असो किंवा समाज सर्वांना दिशादर्शक ठरणाऱ्या ज्येष्ठ नागरिकांना पीएमपीएलचा प्रवास दिलासादायक करण्याऐवजी उतारवयात त्यांच्यावर पाससाठी जादा दर लादून सत्ताधारी भाजपने ‘बुरे दिन ‘ चा दाखला दिला आहे. एकीकडे सार्वजनिक गणेशोत्सवाच्या नावाखाली कोट्यवधी रुपयांची उधळपट्टी करताना ज्येष्ठ नागरिकांना मात्र पीएमपीएल प्रवासासाठी पासमध्ये आणखी सवलत देण्याऐवजी दर वाढविण्याचा प्रकार दुर्दैवी असल्याचे आबा बागुल यांनी म्हटले आहे. तसेच कोणत्याही परिस्थितीत ज्येष्ठ नागरिकांवर पासदर वाढ होऊ देणार नाही वेळ पडली तर रस्त्यावर उतरून विरोध करताना भीक मागो आंदोलन केले जाईल असा इशाराही आबा बागुल यांनी दिला आहे.यासंदर्भांत ,मुख्यमंत्री , पालकमंत्री यांच्याकडेही दाद मागण्यात येणार आहे.
