अभिनेता संजय दत्त राष्ट्रीय समाज पक्ष (रासप)मध्ये प्रवेश करणार असल्याचे मी कधीच म्हटलं नव्हतं, असे रासपचे अध्यक्ष महादेव जानकर यांनी स्पष्ट केले आहे. २५ ऑगस्ट रोजी पक्षाच्या मेळाव्यात संजय दत्त रासपात प्रवेश करणार अशी माहिती स्वतः महादेव जानकर यांनी दिल्याचे वृत्त प्रसारमाध्यमांत झळकले होते.
दरम्यान काही माध्यमांशी बोलताना काल महादेव जानकर म्हणाले, ‘संजय दत्त रासपामध्ये प्रवेश करणार नाहीत. प्रसारमाध्यमांत आलेल्या बातम्या चुकीच्या आहेत.’ ते म्हणाले की, ‘संजय दत्त रासपात प्रवेश करणार नाहीत. पण इतर पक्षाचा जसा प्रचार करतात तसाच ते रासपाचा प्रचार करणार आहेत. यंदाच्या निवडणुकीत माझ्या पक्षाचा प्रचार करणार असल्याचे संजय दत्त यांनी मला आश्वासन दिले आहे.’
रविवारी मुंबईत रासपच्या राष्ट्रीय समाज पक्षाचा वर्धापन दिन दादरच्या शिवाजी पार्क मैदानावर साजरा करण्यात आला. यावेळी प्रचंड शक्तिप्रदर्शन करण्यात आले. याप्रसंगी महिला व बालकल्याण मंत्री पंकजा मुंडे यांची देखील उपस्थिती होती. या मेळाव्याला संबोधित करताना जानकर यांनी संजय दत्त रासपमध्ये प्रवेश करणार असल्याचं जाहीर केलं.
काय म्हणाले होते जानकर ?
‘तारीख चुकल्याने संजय दत्त यांचा पक्ष प्रवेश पुढे ढकलला गेला आहे. पक्षप्रवेशासाठी संजय दत्त यांना २५ ऑगस्ट तारीख मागितली होती पण त्यांनी चुकून २५ सप्टेंबर तारीख नोंद केली. त्यामुळे त्यांचा आज प्रवेश होऊ शकला नाही. पण पुढच्या काळात ते पक्षात प्रवेश करतील.
