बेंगलोर -विधानसभेत ऊसाच्या प्रश्नावर गंभीर चर्चा सुरू असताना भाजपचे एक आमदार मोबाइलवर प्रियंका गांधींचा फोटो बघत होते. भाजपचे औरादचे आमदार प्रभू चव्हाण हे काँग्रेस अध्यक्ष सोनिया गांधी यांची मुलगी प्रियंका गांधींचा पांढरा शर्ट आणि पँटमधील फोटो मोबाइलवर झूम करून बघत असल्याचं टीव्ही फुटेजमधून समोर आलंय. तर यु.बी. बनकर हे आमदार कँडी क्रश खेळत होते.आपल्या आमदारांच्या वाईट वर्तणुकीमुळे कर्नाटक भाजपला पुन्हा एकदा शरमेनं मान खाली घालावी लागलीय.
टीव्ही फुटेज व्हायरल झाल्याने शरमेनं मान खाली घालाव्या लागलेल्या भाजपला टीकेचा सामना करावा लागतोय. अशा प्रकारच्या घटना सतत घडत असल्याने विधानसभा अध्यक्षांनी सभागृहात मोबाइलवर बंदीचा विचार मांडला होता. आता अध्यक्षांच्या या मतावर सोमवारी होणाऱ्या एका बैठकीत निर्णय घेतला जाईल.
कर्नाटक विधानसभेत बुधवारी ऊस दरावरून धर्मनिरपेक्ष जनता दलाचे नेते एच.डी. कुमारस्वामी सभागृहात बोलत होते. तर मीडिया गॅलरीतला कॅमेरा आमदार चव्हाणांच्या हालचाली टीपत होता. चव्हाण मोबाइलवर आपल्या कुटुंबाचे, नरेंद्र मोदींचे आणि प्रियंका गांधींचे फोटो बघत होते. पांढरा शर्ट आणि पँटमधील प्रियंका गांधींचा फोटो ते झूम करून बघत होते. यानंतर त्यांनी आपल्या एका साथीदाराचेही फोटो पाहिले.
एक मॅसेज पाहण्यासाठी मी मोबाइल सुरू केला. त्यानंतर पंतप्रधान मोदी, आणि रामदेव बाबांचा फोटो बघताना प्रियंका गांधींचाही एक फोटो आला. या फोटच्या खाली काहीतरी लिहिलं होतं ते वाचण्यासाठी मी झूम केलं, फोटो झूम केला नाही’, असं स्पष्टीकरण आमदार चव्हाण यांनी दिलं. पण सभागृहात मोबाइलचा उपयोग केल्याबद्दल चव्हाण यांनी माफी मागितली.
भाजपच्या अडचणीत चव्हाणांबरोबर आणखी एका आमदाराने भर घातली. चव्हाण फोटो बघत होते तर यु.बी. बनकर हे आमदार कँडी क्रश खेळत होते. फेब्रुवारी २०१२ मध्ये भाजपचे तीन मंत्री लक्ष्मण सावदी, कृष्णा पालेमर आणि सी.सी. पाटील हे सभागृहात अश्लील चित्रफित बघताना आढळून आले होते. त्यानंतर त्यांना मंत्रीपदाचा राजीनामा द्यावा लागला होता. ‘आमच्या सोबत यापूर्वी असंच झालं आहे. या घटनेमुळे आता तर भाजप आमदार असेच आहेत, असं लोक म्हणतील’, अशी टीप्पणी भाजपच्या एका माजी मंत्र्याने केली. आता याप्रकरणातून बाहेर कसं पडायचं याचे धडे चव्हाणांसह इतर नेत्यांना भाजप देत असल्याचं सांगितलं जातंय.
