पुणे :
हिंजवडी – माण या माहिती-तंत्रज्ञान नगरीत असलेल्या भव्य विठ्ठल रुक्मिणी मंदिराचा पाचवा वर्धापनदिन गुरुवार, दि. 26 मार्च 2015 रोजी साजरा करण्यात आला. यानिमित्त विठ्ठल -रुक्मिणी मंदिर समितीच्या वतीने सोमनाथ महाराज चौधरी (आळंदी) यांना ‘वारकरी भूषण’ पुरस्कार प्रदान करण्यात आला. हा पुरस्कार विणेकरी ह.भ.प.सोपान महाराज पारखी यांच्या हस्ते देण्यात आला.
यावेळी सौ.बाळूमावशी धुमाळ, श्री. सुदाम धुमाळ, गुरूवर्य मृदुंग महर्षी तुकाराम बुवा भूमकर गुरूजी (पुणे, कसबा) उपस्थित होते.
गुरूवार दिनांक 26 मार्च रोजी सायंकाळी 7 वाजता विठ्ठल रुक्मिणी मंदिरामध्ये (माण (गवारेवाडी), बापूजीबुवा मंदिराजवळ, विठ्ठल रुखुमाई मंदिर, ता.मुळशी, जि.पुणे) येथे हा कार्यक्रम संपन्न झाला.
पुरस्कार प्रदान कार्यक्रमप्रसंगी बोलताना सौ. बाळूमावशी धुमाळ म्हणाल्या ‘वारकरी संप्रदायाच्या योगदानासाठी हा पुरस्कार देण्यात आला आहे.’
विठ्ठल रुक्मिणी मंदिरामध्ये वर्धापनदिनानिमित्त काकड आरती, होमहवन, दाभाडे महाराज कोळवण यांचा हरिपाठ, महाप्रसाद, संगीत भजन कार्यक्रमांचे आयोजन करण्यात आले होते.