पुणे – ‘आई माझा गुरु’ या उक्तीप्रमाणे आपल्या आईलाच गुरु मानून मुग्धा पाटणकर आणि सिद्धी अभय यांनी कथक नृत्यात प्राविण्य प्राप्त केले. आपल्या गुरुला कलेतून वंदन करण्याच्या कृतज्ञतापूर्वक उद्देशाने, उद्गारतर्फे ‘आवर्तन’ या नृत्यसंध्येचे येत्या 25 तारखेला आयोजन करण्यात आले आहे. कर्वे नगर येथील नवीन कर्नाटका शाळेच्या शकुंतला शेट्टी सभागृहात सायं. 6 वाजता ही मैफल रंगणार आहे.
आसावरी व मुग्धा पाटणकर तसेच मनीषा व सिद्धी अभय यांच्या एकत्रित युगल सादरीकरणातून मैफलीस प्रारंभ होईल. त्यानंतर कथक परंपरेनुसार आसावरी आणि मुग्धा पाटणकर यांची युगल प्रस्तुती होईल. मैफलीच्या दुसऱ्या सत्रात मनीषा व सिद्धी अभय आपले युगल सादरीकरण करतील. सहभागी कलाकारांच्या एकत्रित प्रस्तुतीतून मैफलीची सांगता होईल.
आपल्या आईसमवेत आपली कला सादर करण्याची मुग्धा आणि सिद्धी यांना एकाच व्यासपीठावर लाभलेली संधी हे या मैफलीचे वेगळेपण म्हणावे लागेल. गुरु पं. रोहिणीताई भाटे यांच्या आसावरी पाटणकर व मनीषा अभय या शिष्या आहेत. रोहिणीताईंच्या कलेचा वारसा पुढील पिढीपर्यंत पोहोचावा तसेच कथकचा प्रचार व प्रसार व्हावा हा देखील या मैफलीमागील हेतू आहे.
