महाराष्ट्रात राजदंड प्राप्त प्रथम स्त्री संन्यासिनी सद्गुरु श्री वेणाभारती महाराज यांचा श्री क्षेत्र काशी येथे सन्मान चिन्ह व सन्मान पदवी देऊन सत्कार

काशी विद्वत परिषदेच्या इतिहासातील पहिलीच घटना

पुणे- महाराष्ट्राच्या कानाकोपर्‍यात आणि भारतभर गावात-शहरात गेली अनेक वर्षे आध्यात्मिक विचारांचे आणि भक्तीधर्मांचे प्रसार कार्य करणार्‍या सद्गुरु श्री वेणाभारती महाराज यांचा काशी येथे काशीपेठाचे शंकराचार्य जगद्गुरु स्वामी चिन्मयानंद सरस्वती यांच्या संमंतीने सन्मानपत्र व सन्मान चिन्ह देऊन सत्कार करण्यात आला.
ज्योतिर्पीठ, द्वारिकापीठ आणि शारदापीठाचे शंकराचार्य यांच्यावतीने दीक्षित स्वामी श्रीअक्षय्यानंद महाराज यांच्या दिव्य हस्ते तसेच संस्कृत विद्वान श्रीमान वसिष्ठ त्रिपाठी, महंत श्रीमंडलाचार्य डॉ. अनिकेत शास्त्री-देशपांडे आणि काशीचे विद्वत परिषदेचे समस्त विद्वतजन आणि नारायण स्वरुप समस्त दंडी स्वामी यांच्या उपस्थितीत वेदमंत्रोच्चाराने अभिषेक करुन सद्गुरु वेणाभारती महाराजांना राजछत्र, राजदंडासह व त्यांचे कार्याचे वर्णन करणारे संस्कृत अष्टलोकी काव्य लिहिलेले सन्मानपत्र आणि श्री महंत तपोमूर्ती सद्गुरु मां एवम् कपिकुल सिद्धपीठम् पीठाधिश्वरी वेणाभारती महाराज यांचा पदवीने सन्मान केला.
श्री वेणास्वामींनी ग्रंथराज दासबोध, श्रीज्ञानेश्‍वरी, रामायण, महाभारत, भीमरुपीस्त्रोत्र, हनुमान उपासना, श्रीमद्भागवत, हरीपाठ, मनाचे श्‍लोक, भगवत गीता, श्रीगजानन विजय ग्रंथ, श्रीगुरु गीता आदी अनेक ग्रंथावर अभ्यासपूर्ण प्रवचने करुन नवीन युगात घरात राहून जमेल अशी सहज उपासना, कुळधर्म कुळाचार करण्याचे महत्व पटवून दिले. स्त्री शक्ती जागरण, उत्तम गृहस्थ-गृहिणी लक्षण, साधक सिद्ध लक्षण आत्मनिरुपण इत्यादी बोधपर व्याख्याने, प्रवचने देऊन मार्गदर्शन केले.