पुणे-नेटवर्क ऑफ ह्युमन मिल्क बँक व डॉ. डी. वाय पाटील वैद्यकीय महाविद्यालय व संशोधन केंद्र,
पिंपरी यांच्या संयुक्त विद्यमाने दोन दिवसीय माता दुग्ध पेढी (ह्युमन मिल्क बँक) आंतरराष्ट्रीय
परिषदेस शुक्रवारपासून प्रारंभ झाला. केंद्रीय आरोग्य विभागाचे उपायुक्त डॉ. अजय खेरा यांच्या हस्ते या
परिषदेचे उद्घाटन झाले.
डॉ. डी. वाय पाटील वैद्यकीय महाविद्यालय व संशोधन केंद्र येथील सभागृहामध्ये ही परिषद आयोजित
करण्यात आली आहे. भारतातील माता दुग्ध पेढ्यांचे सिंहावलोकन व सध्याची प्रगती याविषयावर
आयोजित या परिषदेला भारतातील १० माता दुग्ध पेढ्यांचे (ह्युमन मिल्क बँक) १५० डॉक्टर्स सहभागी
झाले आहेत. या परिषदेच्या उद्घाटनप्रसंगी नॉर्वे इंडिया पार्टनरशिप इनिशिएटिव्ह (एनआयपीआय) प्रमुख
उन्नी सिल्कोसेट, युरोपियन मिल्क बँकिंग असोसिशनचे अध्यक्ष गीलीअन वेवर, डॉ. डी. वाय पाटील
विद्यापीठाच्या विश्वस्त स्मिता जाधव, डॉ. डी. वाय पाटील विद्यापीठाचे कुलगुरू डॉ. पी. एन. राझदान,
डॉ. डी. वाय पाटील वैद्यकीय महाविद्यालयाचे अधिष्ठाता ब्रिगेडियर डॉ. अमरजित सिंह , नेटवर्क ऑफ
ह्युमन मिल्क बँकचे संस्थापक सदस्य डॉ. उमेश वैद्य, अॅकॅडमी ऑफ पिडियाट्रिक्सचे राष्ट्रीय अध्यक्ष डॉ.
प्रमिद जोग, अॅकॅडमी ऑफ पेडियाट्रिक्स, पुणेचे अध्यक्ष डॉ. आनंद देशपांडे, या परिषदेच्या संयोजन
समितीचे अध्यक्ष डॉ. शरद आगरखेडकर यावेळी उपस्थित होते.
डॉ. अजय खेरा, भारत सरकारच्या आरोग्य विभागाच्या पुढाकाराने देशात नवजात बालकांच्या
आरोग्यासंदर्भात अनेक उपक्रम हाती घेण्यात आले आहेत. भारतात नवजात बालकांच्या मृत्यूचा दर हा
निम्म्यापेक्षा अधिक आहे. त्यामुळे नवजात बालकांच्या मृत्यूचा दर कमी करण्यासाठी केंद्र सरकारकडून
अनेक पावले उचलली जात आहेत. नवजात बालकाच्या आरोग्यासाठी मातेचे दुध हे महत्वाचे आहे. परंतु
अनेक वेळेला नवजात बालकाला त्याच्या आईचे दुध मिळू शकत नाही. अशावेळी इतर मातांनी त्यांचे
दुधदान करणे हा योग्य पर्याय आहे. त्यातूनच माता दुग्ध पेढीची (ह्युमन मिल्क बँक) संकल्पना पुढे
आली आहे.
उन्नी सिल्कोसेट म्हणाल्या, नॉर्वेला माता दुग्ध पेढ्या चालवण्याचा दीर्घकाळापासून अनुभव आहे. पहिली
माता दुग्ध पेढी १९४२ मध्ये सुरु करण्यात आली. एनआयपीआयच्या सहकार्याने कलकत्ता येथील
एसएसकेएम रुग्णालयात सन २०१३ पासून माता दुग्ध पेढी सुरु करण्यात आली आहे. तसेच जयपूर
येथील महिला चीकीच्छा रुग्णालयात २०१५ मध्ये माता दुग्ध पेढी सुरु करण्यात आली आहे. नवजात
बालकाला माता दुग्धपेढीच्या माध्यमातून स्तनपानाची सुविधा उपलब्ध करून देवून त्यांचा जीव कसा
वाचवता येतो या आमच्या अनुभवाचा उपयोग होतो आहे याचा आम्हाला सार्थ अभिमान आहे.
या परिषदेचा शनिवार दिनांक ११ एप्रिल रोजी समारोप केंद्रीय आरोग्यमंत्री जे.पी.नड्डा यांच्या उपस्थितीत
होणार असून पुण्याचे खासदार अनिल शिरोळे हे उपस्थित राहणार आहेत.
या परिषदेला इंडियन मेडिकल असोसीएशन, पुणे चाप्टर, नॉर्वे इंडिया पार्टनरशिप इनिशिएटिव्ह
(एनआयपीआय),नॅशनल नेनोटोलॉजी (एनएनएफ) महाराष्ट्र स्टेट चाप्टर, नॅशनल मेडीक्लोज ऑर्गनायझेशन
(एनएमओ), अॅकॅडमी ऑफ पिडियाट्रिक्स, आरोग्य भारती यांचे सहकार्य लाभले आहे.
परिषदेच्या आयोजनामागचा हेतू संयोजन समितीचे अध्यक्ष डॉ. शरद आगरखेडकर व राष्ट्रीय समन्वयक
डॉ. उमेश वैद्य यांनी विशद केला. डॉ. शरद आगरखेडकर यांनी आभार मानले.
