बिहार-उत्तर प्रदेशच्या राजकारणातील दोन दिग्गज लालू आणि मुलायम यादव झाले एकमेकांचे ‘सोयरे’

लालू प्रसाद आणि मुलायम हे बिहार-उत्तर प्रदेशच्या राजकारणातील दोन दिग्गज यादव आजपासून ‘सोयरे’ होणार आहेत. मुलायम यांचा नातू तेज प्रताप आणि लालूंची धाकटी कन्या राजलक्ष्मी यांच्या लग्नाचा ‘शगुन’ सोहळा आज धुमधडाक्यात मुलायम यांच्या घरी होत असून लालू ‘शगुन’ घेऊन लखनऊला दाखलही झाले आहेत.
बदलत्या राजकीय गणितांबरोबर लालू प्रसाद यादव आणि मुलायम सिंह यादव यांच्यातील कटुता आधीच संपलेली आहे. दोन्ही नेत्यांनी गळ्यात गळे घालून राजकीय वाटचाल सुरू केली आहे. या मैत्रीला आज नात्याचीही किनार लागत आहे. गाझियाबादमधील एका नेत्याच्या मध्यस्थीने लालूंची मुलगी आणि मुलायम याच्या नातवाचं लग्न ठरलं आहे. लालूंच्या कन्येचा विवाह ज्या खासदार तेज प्रताप यादव यांच्याशी होत आहे तो मुलायम यांचा सर्वात लाडका आहे. त्यामुळेच मैनपुरीची खासदारकी सोडल्यानंतर मुलायम यांनी तेथून तेज प्रतापला मैदानात उतरवले होते. तेज प्रताप मुलायम यांचा थोरला भाऊ दिवंगत रतन सिंह यांच्या मुलाचा मुलगा आहे. तेज प्रताप याचे वडील रणवीर सिंह यांचंही निधन झालेलं आहे.
राजलक्ष्मी आणि तेज प्रताप यांच्यातील लग्नाची बोलणी आज होणार आहे. त्याचवेळी मुहूर्त काढून लग्नाची तारीखही पक्की केली जाणार आहे. खुद्द लालू यांनीच लखनऊला निघताना ही माहिती दिली. आज शगुन सोहळा पार पडल्यानंतर दिल्लीत याच महिन्यात साखरपुड्याचा शाही कार्यक्रम होणार आहे, असे सूत्रांकडून सांगण्यात आले. या लग्नाचा मुहूर्त फेब्रुवारी महिन्यातील काढावा यावर दोन्ही कुटुंबांचे एकमत झाल्याचेही सांगण्यात आले.