” ‘बायोस्कोप’ चित्रपट हा मराठीतील एक आगळा वेगळा प्रयोग”

” ‘बायोस्कोप’ चित्रपट हा मराठीतील एक आगळा वेगळा प्रयोग”
पुणे-
”वेगवेगळ्या कवितांमधील आशयाचा समान धागा शोधून काढून चार निरनिराळ्या कथांवरती ‘बायोस्कोप’ हा एकच चित्रपट निर्माण करून मराठीमध्ये एक आगळा वेगळा प्रयोग करण्यात आला आहे असे असे या चित्रपटाचे दिग्दर्शक सर्वश्री गजेंद्र अहिरे आणि गिरीश मोहिते यांनी सोमवारी पुण्यात सांगितले. तेराव्या पुणे आंतरराष्ट्रीय चित्रपट महोत्सवात मराठी विभागात ‘बायोस्कोप’ हा चित्रपट प्रदर्शित होत आहे त्यानिमित्त पत्रकारांशी संवाद साधताना गजेंद्र अहिरे आणि गिरीश मोहिते यांनी सांगितले की, एक वेगळी संकल्पना घेवून ‘बायोस्कोप’ ची निर्मिती करण्यात आली असून या एकाच चित्रपटामध्ये चार वेगवेगळ्या दिग्दर्शकांनी दिग्दर्शित केलेल्या चार स्वतंत्र कथा पहावयास मिळणार आहेत.
‘बैल’ (दिग्दर्शक – गिरीश मोहिते ), ‘मित्र’ ( (दिग्दर्शक – रवि जाधव), ‘एक होता काऊ’ ((दिग्दर्शक – विजू माने ), आणि ‘दिल-ए-नादान’ ((दिग्दर्शक – गजेंद्र अहिरे) हे ते चार चित्रपट अनुक्रमे लोकनाथ यशवंत, संदीप खरे, किशोर कदम आणि मिर्झा गालिब या कवींच्या कवितांवर आधारित आहेत. याप्रसंगी या चित्रपटाचे निर्माते अभय शेवडे, अभिनेत्री नेहा पेंडसे, संदीप खरे,संगीतकार सलील कुलकर्णी हेही उपस्थित होते. अभिनेत्री नेहा पेंडसे या चित्रपटाद्वारे प्रथमच निर्मातीच्या भूमिकेत दिसणार आहे. प्रारंभी लेखक व पत्रकार राज काझी यांनी ‘बायोस्कोप’ च्या टीमचे स्वागत करून सूत्रसंचालन केले.
” भळभळत्या हृदयातील वेदना’ या समान आशयावर आधारित या चार स्वतंत्र कथा असून प्रत्येक कथेत स्वतंत्र कलाकार पहावयास मिळतील असे सांगून गिरीश मोहिते म्हणाले की, या चित्रपटाचे आणखी एक वैशिष्ट म्हणजे या ‘बायोस्कोप’ बद्दल काय वाटते यासंबधी प्रसिद्ध कवी गुलजार यांचे चित्रपटाच्या सुरुवातीला मनोगतही आहे त्यामुळे रसिकांनी या चित्रपटाची सुरुवात चुकवू नये असे आवाहनही त्यांनी केले. निर्माते अभय शेवडे म्हणाले की, या चित्रपटाची संकल्पना मला खूप आवडली त्यामुळे व्यावसायिक दृष्टीकोन न ठेवता मी या चित्रपटाची निर्मिती करण्याचा निर्णय घेतला. तर संगीतकार सलील कुलकर्णी यांनी या वेगळ्या प्रयोगाचा आपण एक भागीदार झाल्याचा आनंद यावेळी आपल्या मनोगतामधून व्यक्त केला. अभिनेत्री नेहा पेंडसे, तसेच ‘मित्र’ कथेत भूमिका करणारे संदीप खरे यांनीही यावेळी आपले मनोगत व्यक्त केले.