मराठी चित्रपटसृष्टीत अनेक चित्रपट प्रेमावरती भाष्य करणारे आलेले आहेत. किशोरवयीन अल्लड प्रेमकथा, तारुण्यातील हळूवार प्रेम असणारे शाळा, फँन्डी, टाईमपास अशा चित्रपटांचा उल्लेख केल्याशिवाय पुढे जाता येणार नाही. अशा चित्रपटांना रसिकप्रेक्षकांनी डोक्यावर घेतले आणि या चित्रपटांनी मोठ्या प्रमाणात चित्रपटगृहांवर चांगलाच गल्ला जमवला. टाईमपास या चित्रपटातून घराघरात आणि तरुणाईच्या मनात ठाण मांडून बसलेला दगडू शांताराम परब या नावाने प्रत्येकाच्या ओठावर रुळलेले हे नाव म्हणजेच प्रथमेश परब पुन्हा एकदा त्याच उत्साहात त्याच्या आगामी ‘ उर्फी ’ चित्रपटातून रसिकप्रेक्षकांच्या भेटीस येणार आहे.
अभिनेत्री मिताली मयेकर व प्रथमेश परब हि जोडी पहिल्यांदाच रुपेरी पडद्यावर झळकणार आहे. मिताली या अगोदर २००९ मध्ये प्रदर्शित झालेल्या प्रियदर्शन यांच्या ‘बिल्लू’ या हिंदी चित्रपटात आपणास ती बालकलाकार म्हणून आपण तिला पाहिले आहे. ‘उर्फी’ या चित्रपटात उपेंद्र लिमये, कविता लाड, मिलिंद पाठक हे कलाकार आहेत. मनोरंजनाचा फूल ऑन तडका ‘उर्फी’ या चित्रपटात पाहायला मिळणार आहे. मनोरंजनाबरोबरच श्रवणीय गीतांची मेजवानी ही ‘उर्फी’ चित्रपटात आहे. मंगेश कांगणे आणि क्षितिज पटवर्धन यांनी लिहिलेल्या या गीतांना चिनार-महेश यांनी संगीतसाज चढवला आहे.उमेश जाधव यांनी या गाण्यांची कोरिओग्राफी केली आहे.
एनबीएस एण्टरटेन्मेंट प्रा. लि. या बॅनरखाली निर्माते युवराज वर्मा, सरताज मिर्झा आणि महेलका शेख यांनी या चित्रपटाची निर्मिती केली आहे. स्वप्ना प्रधान यांची सहनिर्मिती असून दिग्दर्शन विक्रम प्रधान यांनी केले आहे. चित्रपटाची कथा विक्रम प्रधान यांची असून संवाद आशिष पाथरे यांचे आहेत. प्रथमेश परब याच्यासह ही प्रेमकथा असली तरी तिला विनोद आणि थराराचा तडका आहे. २३ ऑक्टोबरला ‘उर्फी’चित्रपट सर्वत्र प्रदर्शित होणार आहे. असे पुण्यात झालेल्या पत्रकार परिषदेत नुकतेच जाहीर करण्यात आले.
