पत्नीच्या वाढदिवसावर २०० कोटीचा खर्च

वाराणसी-शहाजहान ने मुमताज साठी ताजमहाल बांधला हा इतिहास ज्या देशात अभिमानाने मिरविला जातो आहे आहे त्याच देशात आपल्या पत्नीच्या वाढदिवसावर २०० कोटी रुपये खर्च करण्यासाठी एक उद्योजकसरसावले आहेत… मुकेश अंबानी असे त्यांचे सुपरिचित नाव आहे . नीता अंबानी यांच्या वाढदिवसाच्या कार्यक्रमावर यंदा २०० कोटी रुपये खर्च करण्याचा निर्णय मुकेश अंबानी यांनी घेतल्याचे वृत्त आहे . पत्नी नीता यांचा ५१ वा वाढदिवसा साजरा करण्यासाठी उद्योजक मुकेश अंबानी कुटुंबीयांसह वाराणसीला आज आले आहेत. त्यांच्यासोबत खास ५०पाहुणे आहेत. यात बॉलिवूड, क्रिकेट, बिझनेस आणि राजकारणाशी संबंधित व्यक्ती आहेत.विशेष म्हणजे दिवाळीनंतर येणाऱ्या या कार्यक्रमाबाबत अंबानी यांच्या विविध कंपन्यांमधून कामगार-अधिकारी वर्गातही कुतूहल आहे . विविध क्षेत्रात अंबानी यांनी आपली व्यावसायिकता वाढविलेली आहे आणि उत्पन्नातही भरारी घेतलेली आहे .
काशीत त्यांची दोन चार्टड विमाने आली . सर्वांत आधी मुकेश यांची आई किकोलाबेन विमानातून उतरल्या. यावेळी विमानतळावर६ बीएमडब्ल्यू,८मर्सिडीज गाड्या ठेवण्यात आल्या आहेत. याशिवाय पाहुण्यांसाठी५० लक्झरी गाड्या आहेत.दरम्यान अंबानी कुटुंंबीयांनी काशी विश्वनाथ मंदिरात जाऊन दर्शन घेतले. सुमारे तासभर अंबानी कुटुंबीय येथे थांबले होते. यावेळी मुकेश आणि नीता यांना बघण्यासाठी मंदिराबाहेर बरीच गर्दी जमली होती. नागरिकांनी नीता यांना वाढदिवसाच्या शुभेच्छा दिल्या.
पाहुण्यांसाठी नादेसर पॅलेसमध्ये १० खोल्या आणि ३० सुट बुक करण्यात आले आहेत. त्यावर ३५ लाख रुपये खर्च झाला आहे. काशी विश्वनाथाचे दर्शन घेतल्यावर अंबानी कुटुंबीयांनी राजेंद्र प्रसाद घाटावर गंगा आरती केली. यासाठी मंदिर आणि घाटांवर फुलांची आकर्षक सजावट करण्यात आली होती. यासाठी १० लाख रुपये खर्च करण्यात आला. या घाटावर पहिल्यांदाच लाकडी शिड्या तयार करण्यात आल्या होत्या.
नीता अंबानी यांच्या वाढदिवसासाठी स्पेशल मलाई केक तयार करण्यात आला. वाराणसी येथील प्रसिद्ध हलवाई राजबंधू मिष्ठान भंडार यांनी केक तयार केला आहे. सायंकाळी होणाऱ्या सांस्कृतिक कार्यक्रमात बॉलिवूडचे अनेक कलाकार सादरीकरण करणार आहे. या संपूर्ण दौऱ्यावर सुमारे २०० कोटी रुपये खर्च येणार असल्याचे सांगितले जात आहे.येत्या सोमवारी अंबानी दांपत्य मुंबईत परतणार आहे .