मुंबई
पंतप्रधान नरेंद्र मोदी प्रचारकी थाटात भाषणे करीत देशविदेशात फिरत आहेत. काम कमी आणि प्रचार जादा या प्रवृत्तीने काम करणाऱ्या वर्षभराचा मोदी सरकारचा ताळेबंद पाहिला तर आर्थिक पातळीवर कमालीची घसरण सुरू आहे. ही घसरण भविष्यातही सुधारणार नाही. त्यानंतर कदाचित सत्तेसाठी ते धार्मिक हिंसाचाराचा आधार घेण्याची भीती आहे, तसेच निवडणुकीपूर्वी ज्या भांडवलदारांनी मदत केली, त्यांना फायदा पोहचविण्याचे काम त्यांचे सरकार करीत आहे .’ अशी घणाघाती टीका माकपचे सरचिटणीस सिताराम येचुरी यांनी मंगळवारी पत्रकारांशी बोलताना केली.
हिंदू व्होटबँक शाबूत राखण्यासाठी सांप्रदायिक तणाव वाढवून असुरक्षिततेचे वातावरण निर्माण केले जात आहे. सरकारची वर्षभरातील कामगिरी देशाची एकात्मता आणि अखंडतेसाठी घातक आहे. मोदी यांच्या कारकिर्दीत लोकशाही संघराज्यातील केंद्र व राज्य सरकारच्या संबंधात कमालीचे अंतर निर्माण झाले आहे. मागासलेल्या ईशान्येकडील राज्यांचा प्रगत राज्यांइतका विकास व्हावा, यासाठी गेल्या दोन दशकांपासून त्या राज्यांना १० टक्के जादा निधी केंद्राकडून दिला जातो. पण तेथील ८ राज्यांच्या मुख्यमंत्र्यांच्या मागणीला पंतप्रधानांनी केराची टोपली दाखवली, असा आरोप येचुरींनी केला.
एका वर्षात पंतप्रधानांनी १८ देशांचे दौरे केले. तिकडे जाऊन ते भारतातील विरोधी पक्षांवर टीका करतात हे अनुचित आहे. मोदी सरकारने वर्षभरात ५५ कायदे केले. त्यापैकी ५० कायदे हे जुन्या सरकारने आणलेले होते. मोदी सरकारची सात विधेयके राज्यसभेत रोखून ते विधेयक संयुक्त चिकीत्सा समितीकडे देण्यास सरकारला भाग पाडले, याकडेही त्यांनी लक्ष वेधले.
जगात कमी अधिक प्रमाणात इंधनाचे दर वाढतात पण यांच्या सरकारने पेट्रोल डिझेलची भरमसाठ दरवाढ करून प्रचंड महागाई जनतेवर लादली आहे, असे येचुरी म्हणाले. जमीन अधिग्रहण कायदा करून निवडणुकीपूर्वी ज्या भांडवलदारांनी मदत केली, त्यांना फायदा पोहचविण्याचे केंद्र सरकारचे स्वप्न देशातील शेतकरी हाणून पाडतील, असा विश्वासही येचुरी यांनी यावेळी व्यक्त केला.
