दहा दिशांनी येईल आता अंधाराला पूर;अशा अवेळी असू नका रे (मायमराठी )आईपासून दूर
मुंबई – शिवसेना पक्षप्रमुख उद्धव ठाकरे आणि मनसे अध्यक्ष राज ठाकरे यांच्या जाहीर भेटीनं आज महाराष्ट्राच्या मायमराठी वातावरणात पुन्हा आशा पल्लवित झाल्या . शिवसेनाप्रमुख बाळासाहेब ठाकरे यांनी ज्या शिवाजी पार्कवरून इतिहास घडवला, त्याच शिवतीर्थावर आज बाळासाहेबांच्या या दोन कट्टर भक्तांनी नव्या राजकीय भविष्याची चाहुल दिली आहे. ‘उद्धवदादू’च्या शेजारी बसून ‘राजा’नं त्याच्या पाठीवर आधाराचा हात ठेवला, तेव्हा शिवसैनिक-मनसैनिकांसह, तमाम मराठीजन सुखावले. ‘एकत्र या-एकत्र या उद्धव-राज एकत्र या’, अशी हळवी सादच त्यांच्या मनानं पुन्हा घातली. अर्थात, उद्धव आणि राज यांची ही भेट दबावतंत्राचा भाग असल्याचं राजकीय विश्लेषकांचं मत आहे. दोघांसाठीही सध्या ‘बुरे दिन’ सुरू असल्यानं ‘अच्छे दिन’वाल्यांना इशारा देण्यासाठीच त्यांनी हे गुफ्तगू केलं असावं, याकडे ते लक्ष वेधत आहेत .
शिवसेनाप्रमुख बाळासाहेब ठाकरे यांच्या दुसऱ्या स्मृतिदिनानिमित्त आज सकाळपासूनच शिवाजी पार्कवर ‘स्मृतिस्थळा’चं दर्शन घेण्यासाठी राज्यभरातून हजारो शिवसैनिक येताहेत. ‘बाळासाहेब अमर रहे’च्या घोषणा शिवतीर्थावर घुमत आहेत. आपल्या लाडक्या नेत्यांचं स्मरण करताना, त्यांना भावपूर्ण श्रद्धांजली वाहताना अनेकांचे डोळे पाणवताहेत. अशातच, दुपारी दीडच्या सुमारास राज ठाकरे शिवाजी पार्कवर आले . बाळासाहेबांच्या पहिल्या स्मृतिदिनी, ‘कृष्णकुंज’पासून हाकेच्या अंतरावर असलेल्या ‘स्मृतिस्थळा’वर राज गेले नव्हते. त्यामुळे ते यंदाही शिवतीर्थावर जाणं टाळतील, असाच अंदाज होता. परंतु, राज आपल्या शिलेदारांसोबत तिथे गेले. त्यांनी बाळासाहेबांच्या स्मृतिस्थळी पुष्पांजली वाहिली आणि मग सगळंच अकल्पित घडलं.
राज यांनी उद्धवना भेटणं स्वाभाविकच होतं; पण हस्तांदोलनानंतर, रामदास कदम यांच्या आग्रहावरून, खासदार संजय राऊत यांनी त्यांना बसायला आपली खुर्ची दिली आणि मग दोन भाऊ अगदी आरामात शेजारी-शेजारी बसले. हे दृश्यं टिपण्यासाठी असंख्य कॅमेरे सरसावले असतानाच, राज यांनी उद्धव यांच्या पाठीवर आपला हात ठेवला आणि अनेकांना भरून आलं. राज-उद्धव अगदी मोळकेपणानं गप्पा मारत होते, हसत होते. संजय राऊत हे जणू या गप्पा फुलवण्याचं काम करत होते. ठाकरे कुटुंबाचे निकटवर्तीय रवी जसरा यांनीही हे दृश्य आपल्या मोबाइलमध्ये बंदिस्त करून घेतलं, या दोघांसोबत स्वतःचाही फोटो काढून घेतला. मग संजय राऊत यांनाही हा मोह आवरला नाही.
असंख्य मराठी माणसांना हवीहवीशी वाटणारी ही राज-उद्धव भेट साधारण दहा मिनिटं चालली. त्यात हे दोन भाऊ नेमकं काय बोलले, हे कळू शकलेलं नाही. पण त्यातून राजकीय वर्तुळात तर्कवितर्कांना उधाण आलं आहे. नातं वेगळं आणि राजकारण वेगळं, असं राज यांनी अनेकदा स्पष्ट केलंय. उद्धव यांच्या ऑपरेशनवेळी बाळासाहेबांनी राज यांना बोलावून घेतलं होतं. अलीकडेच, उर्वशीच्या अपघातानंतर उद्धव-रश्मी यांनी तिची भेट घेतली होती. परंतु, राज शिवसेनेतून बाहेर पडल्यानंतर या दोघांनी अशा गप्पा पहिल्यांदाच जाहीरपणे मारल्या. अर्थात, त्यांच्यात राजकीय चर्चा झाल्याची शक्यता बिलकूलच नाही. परंतु, या दोघांच्या भेटीनं त्यांच्या विरोधकांचं धाबं नक्कीच दणाणलंय.
विधानसभा निवडणुकीनंतर मनसेची अवस्था बिकट आहे आणि भाजपनं शिवसेनेची गोची केली आहे. त्यामुळे राज आणि उद्धव यांनी एकप्रकारे ‘शक्तिप्रदर्शन’च केल्याचं बोललं जातंय. त्याचे राजकारणात कसे पडसाद उमटतात, शिवसेनेला अपेक्षित सन्मान मिळतो का, ही मनोमीलनाची नांदी ठरते का, याबद्दल उत्सुकता ताणली गेली आहे.
या दोघांच्या देहबोलीतून स्पष्टपणे दिसून येत होते की, या दोन्ही बंधूंमध्ये आता कोणताही दुरावा नाही तसेच हे दोघे राजकीयदृष्ट्या एकत्र येऊ शकतात. दरम्यान, या भेटीबाबत मनसेचे नेते बाळा नांदगावकर यांना छेडले असता ते म्हणाले, आज आमच्या सर्वांसाठी दु:खाचा क्षण आहे. तरीही यातून काही आनंदाची वार्ता आली तर महाराष्ट्राचे व मराठी माणसाचेच भले होईल. नांदगावकर यांनी बोलण्यातून राज आणि उद्धव ठाकरे काही दिवसातच एकाच राजकीय मंचावर दिसतील असे संकेत दिले.
