पुणे :
‘सुंदरता का रंगमंच-जायकवाडी बांध’ या डॉ. बाळकृष्ण दामले दिग्दर्शित माहितीपटाची सहाव्या ‘नॅशनल सायन्स फिल्म फेस्टिव्हल’मध्ये निवड झाली आहे. ‘सावित्रीबाई फुले पुणे विद्यापीठा’च्या ‘शैक्षणिक बहुमाध्यम संशोधन केंद्रा’च्या वतीने या माहितीपटाची निर्मिती करण्यात आली आहे.
केंद्रीय विज्ञान-तंत्रज्ञान मंत्रालयाच्या ‘विज्ञान प्रसार’ इन्स्टिट्यूटतर्फे सहावा ‘नॅशनल सायन्स फिल्म फेस्टिव्हल’ ‘नेहरू सायन्स सेंटर’ (मुंबई) येथे 9 ते 14 फेब्रुवारी 2016 दरम्यान आयोजित केला जात आहे.
या माहितीपटात जायकवाडी धरण परिसरात येणार्या स्थलांतरित पक्षांचा विषय हाताळण्यात आला आहे. देश-परदेशातून येथे येणारे इबिल, स्टीव्ह, ब्राहमणी डक, पर्पल मॉर्गन, फ्लोमिंगो पक्षांची जीवनशैली टिपण्यात आली आहे. त्यासाठी संशोधनाची माहिती डॉ. लक्ष्मण मटकर यांनी तयार केली आहे.
निसर्ग अभ्यासक, पक्षी निरीक्षक, विज्ञानाचे विद्यार्थी यांच्यासाठी हा माहितीपट महत्त्वपूर्ण आहे.
या माहितीपटाचे दिग्दर्शन डॉ. बाळकृष्ण दामले यांनी केले असून, यापूर्वी त्यांनी शंभरहून अधिक माहितीपट केले आहेत. त्यांना चार पारितोषिके मिळाली आहेत. ते ‘एज्युकेशनल मल्टीमीडिया रिसर्च सेंटर’ ( सावित्रीबाई फुले पुणे विद्यापीठाच्या शैक्षणिक बहुमाध्यम संशोधन केंद्र) येथे कार्यरत आहेत.
