‘डॅडी’ सिनेमासाठी डॅडी अरुण गवळी यांची विनापरवानगी भेट घेतल्याने अर्जुन रामपाल अडचणीत

मुंबई-कुख्यात गुंड अरुण गवळीची भेट घेतल्यानं बॉलिवूड अभिनेता अर्जुन रामपाल कायद्याच्या कचाट्यात अडकलाय. मुंबई पोलिसांनी त्याला समन्स बजावलं असून त्याची चौकशीही होऊ शकते.
नगरसेवक हत्येप्रकरणी जन्मठेपेची शिक्षा अरुण गवळी भोगत आहे
अरुण गवळीच्या जीवनावर आधारित ‘डॅडी’ नावाच्या सिनेमाची तयारी सध्या सुरू आहे. या चित्रपटात अर्जुन रामपाल गवळीची भूमिका साकारणार आहे. त्यादृष्टीनं, गवळीचा गुंड म्हणून झालेला उदय, गिरणगावातील त्याची दहशत, दगडी चाळ, ‘डॅडी’चं वागणं-बोलणं-स्वभाव, राजकीय वाटचाल यासंदर्भात जमेल तेवढी माहिती तो गोळा करतोय. अशातच, २९ डिसेंबरला अरुण गवळीला चेक-अपसाठी जे जे हॉस्पिटलमध्ये आणलं जाणार असल्याचं समजताच त्यानं तडक हॉस्पिटल गाठलं होतं. त्यावरून तो अडचणीत येण्याची शक्यता आहे.
२००८मधील नगरसेवक कमलाकर जामसंडे हत्येप्रकरणी अरुण गवळीला जन्मठेपेची शिक्षा ठोठावण्यात आली आहे. तो सध्या तळोजा जेलमध्ये आहे. तिथूनच त्याला जे जे हॉस्पिटलच्या ओपीडीमध्ये रुटीन चेक-अपसाठी आणण्यात आलं होतं. त्यावेळी, परवानगी नसतानाही अर्जुन रामपाल गवळीला भेटल्याचं आणि जवळपास तासभर त्याच्यात गप्पाही झाल्याचं समोर आलंय. त्याची गंभीर दखल घेऊन, जे जे मार्ग पोलिसांनी अर्जुनला समन्स बजावलंय. तसंच, गवळीला हॉस्पिटलमध्ये घेऊन आलेल्या पोलीस पथकाच्या खातेनिहाय चौकशीचेही आदेश देण्यात आलेत. त्यात अर्जुन रामपाल दोषी आढळल्यास त्याच्यावर कायदेशीर कारवाई होऊ शकते