अमित शहा यांच्याकडून ममता बॅनर्जीना उखडून टाकण्याचा इशारा -सारदा चिटफंडमधील पैसा हा काळा आहे की पांढरा?

कोलकाता-भाजप अध्यक्ष अमित शहा यांनी आज रविवारी ‘आम्ही महाराष्ट्र आणि हरियाणा या राज्यांत विजय मिळवला, मी तृणमूल काँग्रेसला सत्तेवरून उखडून टाकण्यासाठीच येथे आलो आहे,’ अशा शब्दांत त्यांनी ममता यांना इशाराच दिला.
‘पश्चिम बंगालच्या मुख्यमंत्री ममता बॅनर्जी या वर्धमान स्फोटातील आणि सारदा चिटफंड घोटाळ्यातील आरोपींना पाठीशी घालत आहेत. या प्रकरणात राज्य सरकारची भूमिका संशयास्पद आहे. संसदेत काळ्या पैशांच्या मुद्द्यावरून तृणमूल काँग्रेसच्या सदस्यांनी आंदोलन केले होते. मग सारदा चिटफंडमधील पैसा हा काळा आहे की पांढरा आहे?,’ असा सणसणीत सवाल भारतीय जनता पक्षाचे राष्ट्रीय अध्यक्ष अमित शहा यांनी रविवारी येथे केला.
आगामी महानगपालिका निवडणुकीच्या पार्श्वभूमीवर शहा यांची रविवारी कोलकात्यात झालेल्या जाहीर सभेत त्यांनी ममता बॅनर्जी व तृणमूल काँग्रेसवर सडकून टीका केली. शहा यांच्या या नियोजित सभेला तृणमूलची सत्ता असलेल्या कोलकाता महापालिकेने परवानगी नाकारल्याने वाद निर्माण झाला होता. हायकोर्टाने तीनदा कान पिरगळ्यानंतर अखेर महापालिका आणि अग्निशमन दलाने शनिवारी या सभेस परवानगी दिली होती.
‘राज्यातील विकासासाठी आता जनतेने बदल घडविण्याची गरज आहे. तृणमूल सरकारमुळे राज्यातील विकासाला खीळ बसली आहे. सारदा चिटफंडप्रकरणी आरोपींना शिक्षा देण्याऐवजी ममता त्यांना पाठीशी घालत आहेत. काही दिवसांपूर्वी ममता बॅनर्जी यांनी, ‘कोण अमित शहा?’ असा प्रश्न केला होता. आज त्या मला ऐकत असतील, पाहात असतील. नीट बघा मीच भाजपचा एक लहान कार्यकर्ता अमित शहा असून, राज्यातून तृणमूल काँग्रेसच्या भ्रष्ट राजवटीला उखडून टाकण्यासाठी पश्चिम बंगालमध्ये आलो आहे,’ असे शहा म्हणाले.
‘जनतेच्या अपेक्षांची पूर्तता केवळ भाजपच करू शकतो. त्यामुळे ममता बॅनर्जी यांचे सरकार सत्तेवरून पायउतार होण्याचे काउंटडाऊन आता सुरू झाले आहे. आम्ही महाराष्ट्र आणि हरियाणा या राज्यांत विजय मिळवला. झारखंड, दिल्ली व जम्मू आणि काश्मीरमध्येही ही विजयाची मालिका अखंड राहील. परंतु, पश्चिम बंगालमध्ये सरकार स्थापन केल्याशिवाय आमचा विजयी मालिका पूर्ण होणार नाही,’ असे ते म्हणाले.