पुणे :
‘रोटरी क्लब ऑफ पुणे पर्वती’च्या वतीने बालकांसाठी घेण्यात आलेल्या मोफत हृदयशस्त्रक्रिया मदत प्रकल्पातील रूग्ण बालकांची डॉ. प्रकाश आमटे आणि डॉ. मंदा आमटे प्रत्यक्ष भेट घेणार आहेत. दिनांक 4 डिसेंबर रोजी सायंकाळी 5 वाजता ‘दीनानाथ मंगेशकर सुपरस्पेशालिटी हॉस्पिटल’च्या नवीन इमारतीमधील कार्डियाक विभाग येथे हेमलकसा मधील रूग्ण बालकांना डॉ. आमटे दांपत्याच्या हस्ते भेटवस्तू देण्यात येणार आहे, अशी माहिती क्लबचे अध्यक्ष सुरेश अभ्यंकर यांनी दिली.
हृदयविकार झालेल्या बालकांसाठी मोफत हृदयशस्त्रक्रिया करण्याचा प्रकल्प ‘रोटरी क्लब ऑफ पुणे पर्वती’ने हाती घेतला आहे. या प्रकल्पा अंतर्गत नवजात अर्भके, अल्पवयीन गरीब, गरजू बालके यांना या ‘हृदय शस्त्रक्रिया मदत प्रकल्पा’चा लाभ दिला जातो. हेमंत खिरे यांनी प्रकल्प समन्वयक म्हणून काम पाहिले.
‘रोटरी क्लब ऑफ पुणे पर्वती’च्या वतीने दानशूर, देणगीदार, रुग्णालये, पालिका, सरकार अशांशी देखील संपर्क साधून मदत मिळवून दिली जाते. आतापर्यंत 26 बालकांवर या प्रकल्पांतर्गत हदय शस्त्रक्रिया करण्यात आल्या आहेत. त्यातील 15 दीनानाथ मंगेशकर हॉस्पिटलमध्ये, 11 शस्त्रक्रिया यशवंतराव चव्हाण मेमोरियल हॉस्पिटलमध्ये करण्यात आल्या आहेत. आत्तापर्यंत एकूण 26 लाख रूपये खर्च रोटेरियन विनय कुलकर्णी आणि रश्मी कुलकर्णी यांनी दिलेल्या देणगीतून करण्यात आला आहे.
या शस्त्रक्रियेसाठी दीनानाथ मंगेशकर हॉस्पिटलमधील डॉ. धनंजय केळकर, डॉ. रणजीत जगताप, डॉ. संतोष जोशी, डॉ. अमोल सहस्त्रबुद्धे यांनी सहकार्य केले. तर यशवंतराव चव्हाण मेमोरियल हॉस्पिटलमधील डॉ. अपुर्वा शहा, डॉ. सिद्धार्थ गाडगे यांनी सहकार्य केले.
