पुणे :
‘मुंबईचा डबेवाला ग्राहकांना जास्तीत जास्त चांगल्याप्रकारे सेवा देऊन समाधानी कसे करता येईल याकडे अधिक लक्ष देतो आणि त्याप्रमाणे व्यवस्थापन करून आपले काम पूर्ण करण्याचा प्रयत्न करतो. डबेवाल्यांची कार्यप्रणाली म्हणजे ‘कार्य ही उपासना आणि ग्राहक म्हणजे देव’अशी असते. त्यांच्या या कार्यप्रणालीमुळे ‘मुंबई डबेवाला असोसिएशन’ला सहा वेळा ‘सिग्मा आयएसओ’ चे प्रमाणपत्र मिळाले आहे.त्यांच्या अचूक व्यवस्थापनाचा आदर्श व्यवस्थापन विद्यार्थ्यांनी डोळ्यासमोर ठेवला पाहिजे’ असे डॉ.पवन आगरवाल यांनी विद्यार्थ्यांना मार्गदर्शन करताना सांगितले.
भारती विद्यापीठच्या ‘इन्स्टिट्यूट ऑफ मॅनेजमेंट अ‍ॅण्ड आंत्रप्रुनरशीप डेव्हलपमेंट’(आयएमईडी) एमबीए, एमसीए च्या नवीन बॅच 2015-17 च्या विद्यार्थ्यांसाठी आयोजित ‘ओरिएंटेशन प्रोग्राम’मध्ये ‘पुरवठा साखळी व्यवस्थापनातील गुणवत्ता’ या विषयावर डॉ. पवन आगरवाल हे मार्गदर्शन करताना बोलत होते.
मानवी मुल्यांबाबत बोलताना पुढे ते म्हणाले, ‘मुंबईचा डबेवाला हा प्रमाणपत्र मिळविण्याच्या उद्देशाने काम न करता ग्राहकांच्या सेवेसाठी काम करतो.अशिक्षित असला तरी अचूकतेचे जागतिक मानदंड पूर्ण करतो. यातुन व्यवस्थापनशास्त्र शिकता येण्यासारखे आहे.’ व्यवस्थापन, मुंबई डबेवाल्यांची कार्यपद्धत याविषयी विद्यार्थ्यांनी विचारलेल्या प्रश्‍नांना डॉ. पवन आगरवाल यांनी सविस्तर उत्तरे दिली.
भारती विद्यापीठ विश्‍वविद्यालयाच्या व्यवस्थापनशास्त्र शाखेचे अधिष्ठाता आणि आयएमईडीचे संचालक डॉ.सचिन वेर्णेकर यांच्या मार्गदर्शनाखाली आयोजित हा ‘ओरिएंटेशन प्रोग्राम’ ‘अभिजीतदादा कदम ऑडीटोरियम’मध्ये संपन्न झाला.
प्रा. डॉ. एच जी. अभ्यंकर, डॉ. अजित मोरे, यांनी स्वागत केले. जयटिळक मुजुमदार (जीएम सेल, भारती एअरटेल), डॉ. उज्वल भट्टाचार्यजी (संचालक, एच आर, जीकेएन सिंटर मेटल इंडिया), विजय नायर (एचआर महिंद्रा व्हेईकल मॅन्युफॅक्चर्स), रिचा मेदीरत्त्ता आदी मान्यवरांनी विद्यार्थ्यांना मार्गदर्शन केले.
स्वत:चे करिअर, स्वत:ची प्रगती हे एकमेव उद्दिष्ट न ठेवता आपल्या ज्ञानाचा उपयोग करून समाज आणि देशाच्या समस्या सोडविण्यामध्ये कार्पोरेट क्षेत्राचे योगदान कसे वाढविता येईल या प्रमुख हेतूने या ओरीएंटेशन प्रोग्रॅम चे आयोजन करण्यात आले आहे.
