श्रीनगर
‘आमची मशीद तोडून त्या जागेवर मंदिर बनवू इच्छिणारा आमचा भाऊ कसा होऊ शकतो? तो आमचा भाऊ नाही,’ असं उमर अब्दुल्ला यांनी म्हटलं आहे. उमर यांच्या या वक्तव्यामुळं काश्मिरातील निवडणूक प्रचाराला वेगळे वळण लागण्याची शक्यता आहे.सज्जाद लोण हे मतांसाठी नरेंद्र मोदी यांचे बूट साफ करत आहेत. पण आम्हाला ते करण्याची गरज वाटत नाही,’ अशी बोचरी टीका त्यांनी केली.पंतप्रधान नरेंद्र मोदी आपल्या भावासारखे आहेत, असे म्हणणारे एकेकाळचे फुटिरतावादी नेते सज्जाद लोण यांच्यावर टीका करताना त्यांनी हि वक्तव्ये केली
जम्मू-काश्मीर विधानसभेच्या निवडणुकीत भाजप सर्वशक्तिनिशी उतरला असून काही फुटिरतावादी नेतेही भाजपशी सलगी करू लागले आहेत. सज्जाद लोण यांनी नरेंद्र मोदी यांची भेट घेतल्यानंतर भाजपने लोण यांच्या पीपल्स काँग्रेसला काही जागांवर पाठिंबा दिला आहे. मोदी आणि लोण यांच्या या युतीमुळे उमर अब्दुल्ला संतापले आहेत. लोण यांचा बालेकिल्ला असलेल्या हंदवाडा येथील प्रचारसभेत शनिवारी बोलताना उमर यांनी हाच राग काढला. ‘सज्जाद लोण हे मतांसाठी नरेंद्र मोदी यांचे बूट साफ करत आहेत. पण आम्हाला ते करण्याची गरज वाटत नाही,’ अशी बोचरी टीका त्यांनी केली.
सज्जाद यांचे मन वळविणाऱ्या मोदींनाही उमर यांनी लक्ष्य केले. ‘लोण यांना मोदींमध्ये भाऊ दिसत आहे. पण हा भाऊ त्यांनाच लखलाभ असो. काश्मीरमधून कलम ३७० हटविण्याच्या प्रयत्नात असलेला… खोऱ्यातून आमचा झेंडा उतरवू पाहणारा… शरियतचा कायदा बदलून समान नागरी कायदा आणू पाहणारा आणि आमची मशीद तोडून तिथे मंदिर उभारण्याची इच्छा बाळगणारा आमचा भाऊ कसा होऊ शकतो,’ असा सवाल उमर यांनी केला.
पराभवाच्या भीतीमुळेच…
उमर अब्दुल्लांच्या या वक्तव्यांचा सज्जाद लोण यांनीही समाचार घेतला. ‘निवडणुकीनंतर उमर अब्दुल्ला राज्यातील सत्तेतून हद्दपार होणार आहेत. त्यांचा स्वत:चाही पराभव होण्याची भीती त्यांना आहे. त्यामुळे त्यांना नैराश्याने ग्रासले असून त्यातूनच ते असली वक्तव्ये करत आहेत. उमर अब्दुल्ला यांचा पक्ष भाजपप्रणीत एनडीए सरकारमध्ये असताना मी जेलमध्ये होतो. माझ्या निष्ठेबद्दल संशय व्यक्त करण्याचा त्यांना अजिबात अधिकार नाही, असे सज्जाद यांनी सुनावले.
