मुंबई
काँग्रेसचे ज्येष्ठ नेते आणि माजी केंद्रीय पेट्रोलियम मंत्री मुरली देवरा (७७) यांचे आज पहाटे ३ वाजून २५ मिनिटांनी दक्षिण मुंबईतील निवासस्थानी निधन झाले. देवरा यांच्या जाण्याने काँग्रेसने महाराष्ट्रातील एक जुना जाणता नेता गमावला आहे. देवरा यांच्या पार्थिवावर चंदनवाडी स्मशानभूमीत अंत्यसंस्कार करण्यात येणार आहेत.
देवरा यांचे पार्थिव अंत्यदर्शनासाठी दुपारी १२ ते २ वाजेपर्यंत मुंबई काँग्रेस कार्यालयात ठेवण्यात येणार आहे. त्यानंतर तेथून दुपारी २ वाजता त्यांची अंत्ययात्रा निघेल, अशी माहिती नसीम खान यांच्याकडून देण्यात आली.महाराष्ट्रात विशेषत: मुंबईतील काँग्रेस संघटनेवर मुरली देवरा यांचे सातत्याने वर्चस्व राहिले. देवरा हे १९८१ ते २००३ असे तब्बल २२ वर्षे मुंबई काँग्रेसचे अध्यक्ष होते. देवरा यांच्यामुळेच दक्षिण मुंबई हा काँग्रेसचा गड म्हणून ओळखला जात होता. देवरा यांचा वारसा पुढे नेत असेलेले मिलिंद देवरा यांनीही पित्याप्रमाणेच हायकमांडवर आपली छाप पाडली आहे. त्यामुळेच मनमोहन सिंग यांच्या सरकारमधून देवरा यांनी विश्रांती घेतल्यानंतर मिलिंद देवरा यांची मंत्रिमंडळात वर्णी लागली होती.