पुणे :- जागतिक महिला दिनाच्या औचित्याने दलित इंडियन चेंबर ऑफ कॉमर्स अँड इंडस्ट्रीज, सिडबी आणि एनएसआयसी यांच्यावतीने महिला उद्योजकांसाठी येत्या ८ मार्चला पुणे स्टेशन जवळील हॉटेल लेमन ट्री येथे एक दिवसीय ‘उद्योजकता विकास परिषदेचे’ आयोजन करण्यात आले आहे.ही परिषद १० ते ५ या वेळेत होणार आहे.
या कार्यक्रमाचे उद्घाटन सिम्बायोसिस ओपन एज्युकेशन सोसायटीच्या मुख्य संचालिका डॉ. स्वाती मुजुमदार, टाटा मोटर्सच्या (इनडायरेक्ट मटेरियल) सरव्यवस्थापक सतरुपा रॉय सरकार यांच्या हस्ते होणार आहे.सुप्रसिद्ध गायिका वैशाली माडे देखील यावेळी उपस्थित असणार आहेत. यावेळी डिक्कीचे संस्थापक अध्यक्ष पद्मश्री मिलिंद कांबळे, डिक्कीचे पश्चिम भारत अध्यक्ष निश्चय शेळके, डिक्की नॅशनल वुमन विंगच्या मेंटॉर सीमा कांबळे, महाराष्ट्राच्या वुमन विंग अध्यक्षा स्नेहल लोंढे, विदर्भाच्या विनी मेश्राम व डिक्की महाराष्ट्र प्रदेश अध्यक्ष अविनाश जगताप उपस्थित असणार आहेत.
या परिषदेत महिला उद्योजिकांसमोरील आव्हाने,व्यक्तिमत्व विकास, महाराष्ट्राचे महिला उद्योग धोरण,राज्य व केंद्र शासनाच्या विविध योजना,महिलांसाठी विविध क्षेत्रातील उपलब्ध असणाऱ्या संधी याबाबत मार्गदर्शन करण्यात येणार आहे याशिवाय विविध बँकाचे अधिकारी, टॅक्स कन्सल्टंटस यांना ऐकण्याची संधी देखील यावेळी मिळणार आहे.
हा कार्यक्रम सशुल्क असून अधिकाधिक महिला उद्योजकांनी त्याचा लाभ घ्यावा असे आवाहन डिक्कीच्या वतीने करण्यात आले आहे.