खासदार काकडे यांचे केंद्रीय गृहमंत्री राजनाथ सिंह यांना पत्र
पुणे, दि. 13 ऑगस्ट : भारतीय राज्यघटनेची प्रत जाळण्याचे कृत्य करणाऱ्या श्रीनिवास पांडे व त्याच्या सहकाऱ्यांवर कायदेशीर कारवाई करावी आणि त्यांच्यावर देशद्रोहाचा गुन्हा दाखल करावा, अशी मागणी भाजपचे सहयोगी सदस्य व राज्यसभा खासदार संजय काकडे यांनी केली असून याप्रकरणी त्यांनी केंद्रीय गृहमंत्री राजनाथ सिंह यांना आज पत्र पाठविले आहे.
पुणे महापालिकेच्या क्रीडा समितीचे अध्यक्ष व नगरसेवक राहुल भंडारे व त्यांचे सहकारी आणि बोपोडी औंध रोड संविधान संरक्षण समितीचे संजय कांबळे आणि त्यांचे सहकाऱ्यांनी खासदार संजय काकडे यांची आज भेट घेऊन त्यांना निवेदन दिले. यावेळी खासदार काकडे यांनी केंद्रीय गृहमंत्री राजनाथ सिंह यांच्याकडे पाठपुरावा करण्याचे आश्वासन दिले. खासदार काकडे यांनी आज केंद्रीय गृहमंत्री राजनाथ सिंह यांना पत्र पाठवून राज्यघटना जाळणाऱ्या समाजकंटकांवर कडक कारवाई करण्याची मागणी केली.