पुणे :‘तिरकस पुणेकरांनी सरळ पुणेकरांवर काढलेला दिवाळी अंक’ अशी ख्याती असलेल्या ८ व्या ‘पुण्यभूषण’ दिवाळी अंकाचे प्रकाशन शुक्रवार दिनांक १९ ऑक्टोबर रोजी विधान परिषद सभापती रामराजे निंबाळकर, माजी मुख्यमंत्री, खा.नारायण राणे, सहकारी बँकिंग तज्ञ बाळासाहेब उर्फ विद्याधर अनास्कर यांच्या हस्ते सायंकाळी ६ वाजता होणार आहे. यावेळी युवराज शहा हे मान्यवरांच्या मुलाखतीतुन राजकीय फटकेबाजी करणार आहेत. ‘पुण्यभूषण फाऊंडेशन’चे अध्यक्ष डॉ. सतीश देसाई यांनी ही माहिती पत्रकाद्वारे दिली.
प्रकाशन समारंभ महावीर जैन विद्यालय पटांगण, बी एम सी सी कॉलेज शेजारी डेक्कन जिमखाना पुणे -४ येथे होणार आहे.
या वर्षीच्या अंकाचे पहिले पान बाळासाहेब उर्फ विद्याधर अनास्कर यांना समर्पित करण्यात आले आहे. पाच पुणेकरांना त्यांच्या कर्तत्वाबद्दल, योगदानाचा उल्लेख करुन ‘सन्मान’ पानावर स्थान देण्यात आले आहे.
प्रकाशन कार्यक्रमात युवराज शहा मान्यवर पाहुण्यांची खुमासदार मुलाखत घेणार आहेत
२०१७ साली पुणे वृत्तपत्र विक्रेता संघाच्या पदाधिकार्यांच्या हस्ते दगडूशेठ हलवाई गणपती मंदिरात प्रकाशन समारंभ झाला होता. २०१६ मध्ये दिवाळी अंकाचे वितरण पोस्टाद्वारे करणार्या पोस्टमन काकांच्या हस्ते प्रकाशन झाले होते. २०१५ मध्ये वैशिष्ट्यपूर्ण परंपरा असलेल्या ‘पक्क्या’ पुणेकरांच्या हस्ते, शिवशाहीर बाबासाहेब पुरंदरे यांच्या हस्ते आणि ज्येष्ठ नेते शरद पवार यांच्या हस्ते प्रकाशन झाले होते.
पुण्यात झालेल्या अखिल भारतीय मराठी साहित्य संमेलनानंतर पुणेकरांनी पुणेकरांसाठी ’दिवाळी अंक’ काढण्याची संकल्पना ‘पुण्यभूषण फाऊंडेशन’ने प्रत्यक्षात आणली. या अंकाला दरवर्षी दर्जेदार अंकांसाठी अनेक पारितोषिके मिळत असतात, अशी माहिती डॉ. सतीश देसाई यांनी दिली.