पुणे-नवे महापौर २२ नोव्हेंबरला पदारूढ होतील. २१ नोव्हेंबर ही मुदतवाढ मिळालेल्या कालावधीचा शेवटचा दिवस आहे. बुधवार, १३ नोव्हेंबरला मुंबईत सर्वच महापालिकांसाठी पुढील कार्यकाळासाठी रोस्टर निघणार आहे. त्यावेळी महापौर पदाची शर्यत सुरु ,होईल. त्यामुळे महापौर मुक्ता टिळक यांच्या सह राज्यातील सर्व महापालिकांच्या महापौर कार्यकाळास दहाच दिवस उरले आहे.
राज्यातील २७ महापौरांचा कार्यकाळ २१ नोव्हेंबरला संपणार आहे. त्यामुळे सर्वच महापालिकांतर्फे राज्य सरकारच्या नगरविकास विभागाला याबाबत सूचना करण्यात आली आहे. महापौर निवडीच्या किमान १० ते १२ दिवसांपूर्वी नव्या रोस्टरची प्रक्रिया सुरू होते. त्यानंतर निवडप्रक्रियेला वेग येतो. त्यानुसार बुधवारला मुंबईत महापौर आरक्षणासाठीचे रोस्टर काढण्यात येणार आहे. यासाठी गेल्या दहावर्षात आलेल्या रोस्टरची माहिती तेवढी सर्वच महापालिका प्रशासनाकडून मागविण्यात आली होती. शिवाय, या दहा वर्षांत महापालिका निवडणुकीत काय बदल झालेत? प्रभाग, वॉर्ड वा इतर कोणत्या पद्धतीचा निवडणुकीसाठी वापर करण्यात आला, याचीही माहिती मागविण्यात आली आहे. रोस्टर कुठलेही येऊ शकते, असे संकेतही मिळत आहेत. प्रारंभी, महापालिकांमध्ये प्रवर्गनिहाय असलेल्या आरक्षणानुसार रोस्टर ठरेल. त्याप्रमाणे प्रवर्गनिहाय चिठ्ठी टाकून तेवढ्याच महापालिकांची निवड करण्यात येईल. ज्या महापालिकांचे रोस्टर अनुसूचित जाती, जमाती वा इतर मागासवर्गीयांसाठी ठरेल त्या महापालिकांची नावे उर्वरित चिठ्ठीतून वगळण्यात येईल. त्यानंतर उर्वरीत प्रवर्गासाठी इतर महापालिकांच्या चिठ्ठया टाकण्यात येतील. मात्र, या संपूर्ण प्रक्रियेसाठी रोस्टर नियमावलीचा वापर करण्यात येईल.